“Te Namakin n Tamnei man te Karikibwai,” Riaona, Tebetembwa 2024.
Bannan te Onimaki
Te Namakin n Tamnei man te Karikibwai
Ana Mwakuri ni Kamaiu Iesu Kristo e katika nanou ngke I korotamneia karakinan Aberaam ao Itaaka.
Korotamnei iroun Christina Smith
Been ao korotamnei bon teuana te kawai are N na kakaitau ibukin tamaroan te aonaaba. Irou, te korotamnei e moanaki ma te namakin n tamnei man te aonaaba.
“Te Nati ni Berita”
Ngke te rao e a ritaea ao e a katauraoi ni mwaing nako, I karaoa mwakoron te bwai ibukina n aranna Te Nati ni Berita. Bon korotamnein Aberaam ngke e taua Itaaka te teei. Man te tai anne ao, I karaoi rinanin tabeua korotamnei taekan Aberaam ao Itaaka. Akanne bon mamaten nanou ao tabeua man au korotamanei aika a rangi ni kakawaki.
Ana korotamnei Stephan Seable i aon Aberaam ao Itaaka bon mamaten nanona. A bon kauringnga n taekan ana tangira te Tama ibukin Natina ae te Rikitemanna. Man te angatai bon ana tamnei e aranaki Te Nati ni Berita.
Teuana ae moan mwakaroiroi nakoiu bon Aberaam ngke e reireina natina temwaane man koroboki man te ninira ni boki. Aberaam e taua bebeena ao n tararake ma kaotan te maraki i aon moana ma te namakin mairoun te Uea bwa e na riai n anga karea iroun natina are ana rikitemanna. Itaaka e koona Aberaam ma e aki oota bwa bukin tera tamana e aki kaeka nakoina.
N te korotamnei aei iroun te Tari Seable e aranaki Ko na Kaira Natim, Ae am Riketemanna, Aberaam e karekea te namakin mairoun te Uea are e na riai n anga kareana natina temwaane ae Itaaka.
Teuana mwakoron te korotamnei ae tuai tia e kaotia bwa ngaiia uoman ni katea te baonikarea. Itaaka e titiraki e ngaa aia angakarea, ao Aberaam e kaeka bwa te Uea e na katauraoia. Ngkekei naba, Aberaam e katauraoaki nakoina te tiibu mwaane ao e tuangaki bwa e na aki anga natina bwa te karea. Aberaam e rabwata Itaaka, n taua ni kamatoaa. (Taraa Karikani Bwai 22:1–13.)
Aberaam ngke e rabwata Itaaka inanon te korotamnei aei iroun te Tari Seable aranaki Imwiin te Kataaki.
Tera ae rangi ni kakawaki i aon te karaki aei bwa bon katotongana, ke kanikina, n te angakarea iroun Natin te Atua. Tamara are i Karawa, are E tangira Natina are Tii te Rikitemanna, ao n rineia n anga Natina bwa te karea n te kabanea n tai. N ana taeka Unimwaane Neal A. Maxwell (1926-2004) man te Kooram n Abotoro n te Tengaun ma Uoman, “Bon akea te tiibu mwaane n te buakoako i Kawario ni Buokia, aio Raon Aberaam ao Itaaka” (“O, Divine Redeemer,” Ensign, Nobembwa 1981, 8).
Riki, te Tama e kariaia Rinean Natina Temwaane (taraa Mote 4:2) ni karaoa te Mwakuri ni Kamaiu ibukira ike ti na kona ni kabane n oki ni maeka ni kororaoi man te kakabwaia anne (taraa Ioane 3:16-17).
E tuangai au taneiai bwa te Atua e bon irekereke inanon maiura. Ngaira ti na bon “riai ni karekea” (2 Nibwaai 2:25), ma ti na karekea te taneiai man bwaai ake a karawawataira. N aron koauan rikin tamaroan bwaai, e ngae n anne bon iai, “kaitaraan bwaai ni kabane.” (2 Nibwaai 2:11). Ma n anne, te Atua, e bon mena irarikira n tainako ni boutokaira, ao ti kona n tokanikai bwa tera kangaanga n ara taneiai ake inanon maiura. Ti na kunea ni kona n teimatoa n tokanikai ni kataakira ngkana ti reitinako ni kataia n tangira, ibuobuoki, ao riki n tatangira— ai aron ara Tia Kamaiu.
I kakaitau ibukin te euangkerio, au utu, ao tamaroaia aomata ni kabane inanon te Ekaretia. N aki taraia bwa te tabo raa Ngai ma kainabau, Kathleen, are ti nako n ara mition rinanon te aonaaba, ti kuneia Aika itiaki ake a tangiriia imarenaia ao ibuobuoki, kakabwaia, ao anganano i bon ibukiia n tatabemaniia. Tamara are i Karawa e tangiriira, ao bon Ngaira Natina. Bon akea riki te bwai ae kakawaki nakon te riki ni kakaonimaki Nakoina ao Natina, are a bon rangi ni kakaonimaki nakoira.
N aki taraia bwa te tabo raa are a beku iai te Tari Seable ao buna, Kathleen, n aia mition rinanon te aonaaba, a kuneia Aika itiaki “ake a tangiriia imarenaia ao n ibuobuoki, kakabwaia, ao anganano i bon ibukiia n tatabemaniia.”