“3 Kawai n Teimatoa n te Maiu ao Kukurei Iai,” Riaona, Tebetembwa. 2024.
Kairake n Ikawai
3 Kawai n Teimatoa n te Maiu ao Kukurei Iai
E tangiriira Tamara ae i Karawa ni kunei kimwareirei inanon te maiu are ti a tia n anganaki.
Guido mai Tiaaman
N ningai am kabanea n tai ae ko kukurei ni koaua?
E kangaanga kaekaan te titiraki anne?
Inanon taai ni kangaanga, ti kona ni karekea te rootaki man kataakira ike ti aki konaa n uringa bwa aekakira namakinan te kimwareirei akanne. N aron Titita Reyna I. Aburto, te Kauoman Kauntira ngkoa n te Beretitentii ni Kabuta n te Bootaki n Aine, e kabwarabwara: “Naang aikai a kona … ni kamatakiira nakon ootan te Atua ao ni karaoa ae ti na titiraki ngkana arona bwa e na iai te oota anne ibukira. ”
Ibukin mwaitira ngaira kairake n ikawai, te maiu e kona n tabetai e namakinaki ai aron te bwai teuana are tina teimatoa iai—te bwai teuana are tina ikorakora rinanona ni karokoa n tokina tina karekei kakabwaia ake a beritanaki.
Tera are ti mwaninga n tabetai bon te bwai teuana naba are tina kukurei iai. Te kakabwaia man te kakukurei ae akea tokina e kona ni moanaki ngkai.
Aikai tabeua kawai ike tina kona ni kamarurunga ara kantaninga ao te kimwareirei inanon maiura.
Uringa Koaua aika Beebete
Onean mwiin kataneiaan matara n noraaba n te rootongitong, ti kona ni ukora taian oota ake a uotaki nakoira man ana euangkerio Iesu Kristo.
E tia ni kauringiira Beretitenti Nelson are “te roko te kimwareirei mairoun ao ibukin [Iesu Kristo]. Bon Ngaia ae e nako mai irouna te kimwareirei ni kabane.” Ngkana ko a ikakorakora ni kan kunea te oota ni maium, te rairaki nakon Iesu Kristo e riai n tainako bwa te moan mwaneka.
Ko kona naba ni butia Tamara are i karawa ni buokiko bwa ko na uringa kakawakin itiakin kinakim mai ieta.
E reirei Unimwaane Gary B. Sabin man te Itingaun, “e bon rangi ni kakaawaki ibukin kukureira bwa ti na uringnga bwa ngaira nati mwaane ao aine iroun Tamara are i Karawa ae tatangira.” Koauan ataakina bwa te Atua e ataiko ao e tangira aron tamaroam are ko na kaotarake maium.
N aki ongei kangaanga ake ko kaitarai, ururingakin moan reirei n te euangkerio aikai e na kona ni buokiko ni kaoa ootan te Tia Kamaiu inanon maium.
Kakaea Bwa Tera Ae e Uota te Kakukurei Nakoim
N tabetai e kona ni matoa uringana are kukureira n tainako e aki taraa n ae ti te arona ma ake irouia aomata. Koauana, n aroia kairake n ikawai, e bon aki matoa kabotauan maiura nakoia kaain rarikira. Ma uringnga bwa ngkoe are kona taua aron oin kukureim.
Titirakiniko: tera ae e anga niko te kukurei?
Tera ae e karika moangarem?
Ngkanne-Beretitenti Dieter F. Uchtdorf e kaoti iango ngke e Kauoman Kauntira n te Moan Beretitentii, “Kauarerekea te katawe ao anaa teutana te tai ni kinako raoi.” Tarai tikiraoia inanon bwaai aika uarereke: Nakonako moa. Kawara te tembora. Anganano temanna ibukin te waaki ni mwakuri n ibuobuoki. Kakaea te bwai ae ko tatangiria ni karaoia ae boou ke kaoka are ko tatangiria mai mwaina.
Unimwaane Richard G. Scott (1928–2015) man te Kooram n Abotoro n te Tengaun ma Uoman e taetae bwa e kanga ara kakauingo ni kaotarai maiura: “Rinea te bwai teuana n aron te katangitang, maie, koroboki aika tabu, ke kario kuna. Te riki ni kakauiango e na buokiko ni kukurei n te maiu. E karika tamnein te kakaitau. E na rikirake taarena ake tuai ataaki, kakorakora am konabwai n iai uaaia, ni mwakuri, ao ni karekea te kantaninga n te maiu. E kanakoa te maroaa ao maraki n atu. E anga kabouan, kakiaan namakinan te kukurei, ao te kakukurei ibukin te maiu.”
Kunea bwa tera ae kaona nanom ma te kukurei e kona ni buoka manga kauraan te oota inanon maium ngkana ko aaki kona ni waakirake.
Katurua am Taratara bwa Tera ae Kakawaki Riki
Ngkana te maiu e a manga korakora katikitikana ao ko a namakina anaakin korakoram n rinanon boong nako, anaa te tai n tiku n rau ni katurua am taratara iaon bwaai aika kakawaki riki.
Ni karaona, Beretitenti Uchtdorf e kaota te iango are ti “kabeetei aron maiura teutana.” Manga katurua am taratara ni maium i aon ana tangira Tamara are i Karawa ao tamaroan Ana Mwakuri ni Kamaiu Iesu Kristo. Moanibwaia am reitaki ma am utu, raoraom, ao boni ngkoe.
Kauna te aki raoiroi ma te raoiroi, te rootongitong ma te ootan Iesu Kristo ao Ana euangkerio.
Ngkai e kaungaiira Beretitenti Nelson: “Tina aki tii teimatoa inanon te tai aei. Ti na butimwaai taai aika a na roko ma te onimaki!” Ngkai ti teimatoa n rinanon matoatoan te maiu, reiakinna ni kukurei n aron tikiraoia naba. Te kakukurei ae akea tokina are e beritanaki n te euangkerio e aki moanaki tao n taai aika ana roko—e moa mang ngkai.