Tō’u niu : Fa’a’ohipa i te taime ma te pa’ari—’Eiaha ’ia hau i te 20 minuti

Feruri :

Nō te aha te taime i riro ai ’ei hō’ē o te mau hōro’a rahi roa a’e a te Atua ?

Māta’ita’i :

« Te hōro’a o te taime », e roa’a i ni’a i te https://churchofjesuschrist.org/study/video/self-reliance-videos [2:27]. (’Aita e video ? ’A tai’o i te pāpie « Te hōro’a o te taime ».)

Te hōro’a o te taime

Mai te mea, ’aita e haere ia ’outou ’ia māta’ita’i i te video, ’a ma’iti i te ti’ara’a o te feiā tai’o ’e a tai’o i te pāpie.

Kofi : ’Ia ora na, tuahine Benkosi. E aha tō ’oe huru ?

Tuahine Benkosi : Maita’i ’oe, Kofi ?

Kofi : ’Aiā, tuahine Benkosi ē. Mea ’ohipa roa vau. E rave au te ’ohipa, ’e utuutu ’e e tauturu i tō’u ’utuāfare … ’e ’ia oti, e haere au e tu’e pōpō. ’Aita tō’u e taime !

Tuahine B : Kofi, e taime rahi roa tō ’oe.

Kofi : E aha ?

Tuahine B : ’Aiū, ’erana’a te hōro’a iti rahi a te Atua nō tātou—tō tātou taime. ’Ia fa’a’ohipahia te reira i ni’a i te mau mea faufa’a roa a’e.

Kofi : E pa’i, nāhea ïa, e tuahine Benkosi ? Mea rave ’ohipa roa ’oe. Manuia maita’i ’oe i roto i tō ’oe ’utuāfare ’e i tā ’oe ’ohipa ’imira’a moni. ’Aita e parau fafau te mau ta’ata tā ’oe i tāvini ’e i ha’amaita’i , mai iā’u. ’Aita vau i ’ite e mea nāhea tā ’oe ravera’a.

Tuahine B : Eaha, e hina’aro ’oe e ’ite ? Mai te mea, e pārahi maita’i mai ’oe ’e e fa’aro’o maita’i mai, e fa’a’ite au ia ’oe i tā’u ’ohipa ’aro.

Pauroa te mahana i te po’ipo’i roa, e ti’a mai au nā mua a’e i te mahana. E ’ō’omo vau i tō’u ’ahu ’e e horoi i tō’u mata ’e tō’u rima.

E tai’o vau i te mau pāpa’ira’a mo’a. I muri iho e hāmani au i te hō’ē tāpura nō te mau mea tā’u e rave i te reira mahana.

E feruri au ’o vai tā’u e tāvini. E pure au nō te ’ite i te hina’aro o te Atua. ’E e fa’aro’o vau.

I te tahi taime e puta mai te i’oa e ’aore rā te hōho’a mata o te ta’ata i roto i tō’u ferurira’a. E tu’u ato’a vau ia rātou i roto i tā’u tāpura.

Kofi : E mea nā reira ’oe e ’ite pāpū ai i te mau taime ato’a ’o vai tē hina’aro ra i tā ’oe tāvinira’a ?

Tuahine B : ’Ē, Kofi. ’E e pure au nō te ani i te pūai ’e te pa’ari. E pure au ’ia « ha’amo’a te Atua i [tā’u] ’ohipa ». Tē nā reira ra te parau i roto i te 2 Nephi 32.

E ha’amāuruuru vau iāna. E hōro’a vau i tā’u parau ’ia rave ma tō’u puai ato’a. E ani au ’ia rave ’Oia i tē ’ore e mara’a iā’u ’ia rave.

I muri iho e hi’o vau i tā’u tāpura. E tu’u vau i te 1 i mua ’ei ’ohipa faufa’a roa a’e, i muri iho, te 2

Kofi : Nāhea ’oe e ’ite ai i te mau ’ohipa mātāmua roa e rave ?

Tuahine B : E fa’aro’o vau ’ia pure ana’e au ! I muri iho e haere au e rave i te ’ohipa. E rave mai au i te nūmera 1 ’e e tāmata i te rave i te reira nā mua roa, i muri iho, e rave mai au i te nūmera 2.

I te tahi taime e taui te mau ’ohipa. E parau mai te Vārua Maita’i iā’u ’ia rave i te tahi atu ’ohipa. E mea maita’i te reira.

E rave itoito vau i te ’ohipa, terā rā e hau te roa’a iā’u. ’Ua ’ite au ē, e tauturu mai te Atua iā’u.

Nō reira, e Kofi, nā roto i tā’u tāpura ’e te Vārua, e rave au i te mau mea faufa’a.

Kofi : E au ra ē e mea ’ōhie, ’e mea pa’ari ato’a ra.

Tuahine B : ’Ua tano ’oe ! I te pae hope’a, ’ia ineinei au nō te ta’oto, e pure au. E fa’aho’i au i te parau i tō’u Metua i te ao ra. E fa’a’ite au iāna i te huru o te reira mahana. E ui au i te tahi mau uira’a. E ani au e aha tā’u e nehenehe e rave maita’i a’e. E fa’aro’o vau. Pinepine au i te ’ite i tōna here. ’Ua ’ite au e fa’arahi ’oia i te mea tā’u e tamata i te rave. I muri iho, e Kofi, e tupu te hau i roto iā’u, ’e e ta’oto vau.

Kofi : Hope te maita’i, e Mama Benkosi. Tē hina’aro nei au i te reira hau. Tē hina’aro nei au e fa’a’ohipa i tō’u taime. Tē hina’aro nei au e ’ohipa ’e e tāvini maita’i a’e.

Tāu’aparau :

E aha tā ’outou i ha’api’i mai nā roto mai i te tuahine Benkosi i roto i te video ?

Tai’o :

I teie mau ’īrava ’e te mau fa’ahitira’a parau i muri nei a te feiā fa’atere o te ’Ēkālesia :

« Inaha ho’i, ’o teie nei orara’a te taime ’ia fa’aineine te ta’ata nō te fārerei atu i te Atua ; ’oia ïa, inaha, o te mahana nō teie nei orara’a ’o te mahana ïa ’ia rave te ta’ata i tā rātou ’ohipa » (Alama 34:32).

« Hō’ē ana’e faufa’a tā tātou i ni’a i te fenua nei, maori rā tō tātou taime… ’Ia fa’a’ohipa-maita’i-ana’e-hia, e hōpoi mai ïa te reira i te orara’a maita’i ’e te ’ōhie ’e te ’oa’oa. ’A feruri ana’e i te reira ’e ’eiaha e pārahi fa’ahou ma te tūfene noa i te rima, ma te ha’amau’a i te taime » (Brigham Young, i roto i Te mau a’ora’a a Brigham Young, sel. John A. Widtsoe [1954], 214).

E nehenehe tātou e paremo ’ōhie i raro aʼe i te tereraʼa ʼohipa o te mau mahana ato’a ʼe i te mau mea faufa’a ’ore o te oraraʼa tāhuti nei. Te taʼotoraʼa, te ʼamuraʼa i te māʼa, te ’ahura’a, te raveraʼa i te ʼohipa, te haʼutiraʼa, te fa’a’eta’etara’a i te tino, ʼe e rave rahi atu ā mau ʼohipa mātarohia, e mea tītauhia ïa ʼe te faufaʼa rahi. I te pae hopeʼa rā, te ta’ata e rirohia mai e tātou, ʼo te hotu ïa nō tō tātou ʼite ʼe tō tātou hina’aro ’ia haʼapiʼi mai roto mai i te Metua, te Tamaiti ʼe te Vārua Maitaʼi ; e ʼere noa ïa te rahiraʼa o tā tātou mau ʼohipa tāmahana i te roaraʼa o te hōʼē oraraʼa » (David A. Bednar, « Te maita’i rahi roa i parauhia maira », Liahona, Novema 2017, 93).

’OHIPA E RAVE (5 minuti)

Ta’ahira’a 1 : ’A tai’o e te hō’ē ’āpiti i nā ta’ahira’a e pae tā ’outou e nehenehe e rave i te mahana tāta’itahi nō te fa’a’ohipa maita’i i tō ’outou taime.

Ta’ahira’a 2 : I ni’a i te hō’ē pāpie ta’a ’ē, ’a tāpura i tā ’outou mau ’ohipa. ’Ia riro te reira ’ei mau ’ohipa faufa’a nō tā ’outou ’ohipa, nō te fare ha’api’ira’a, nō te ’ēkalesia, ’aore rā nō te ’utuāfare—’eiaha ’ei mau ’ohipa tāmahana noa. ’A pure ’e ’a fa’ata’a i te mau mea mātāmua i roto i tā ’outou tāpura.

Ta’ahira’a 3 : Ananahi e ti’a ia ’outou ’ia ha’amau i te mau fā, ’ia ’ohipa, ’e ’ia fa’aho’i i te parau e mea nāhea tō ’outou fa’a’ohipara’a i tō ’outou taime.

Fafau ia ’oe :

E fa’a’ohipa vau i teie mau ta’ahira’a i te mau mahana ato’a nō te fa’a’ohipa maita’i a’e i tō’u taime, ’e e fa’aho’i au i te parau i te mau pō ato’a i tō’u Metua i te ao ra i roto i tā’u mau pure.