Tō’u niu : Ora i te hō’ē orara’a fāito tueā—’Eiaha ’ia hau i te : 20 minuti

Feruri :

Nāhea vau i te tāpe’a i te mau tītaura’a o te orara’a fāito tueā ?

Māta’ita’i :

« Te mau tātarahapara’a ’e te mau fa’aotira’a », e roa’a i ni’a i te https://churchofjesuschrist.org/study/video/self-reliance-videos [1:25]. (’Aita e video ? ’A tai’o i te pāpie « Te mau tātarahapara’a ’e te mau fa’aotira’a »).

Te mau tātarahapara’a ’e te mau fa’aotira’a

Mai te mea ’aita e haere ia ’outou ’ia mata’ita’i i te video, ’a tai’o i te pāpie.

Peresideni Dieter F. Uchtdorf

E ’ere anei i te parau mau ē, tē ’ohipa noa nei tātou e ’aita e vatara’a ? ’E te mea pe’ape’a, te amo nei tātou i tō tātou vata ’ore mai te hō’ē feti’a hanahana, mai te huru atura ïa ē, nō te rahi o te ’ohipa, riro atura te reira ’ei manuiara’a ’aore rā ’ei tāpa’o nō te hō’ē orara’a teitei a’e.

E ’ere anei ?

Tē mana’o nei au i tō tātou Fatu ’e te hi’ora’a maita’i o Iesu Mesia, ’e Tōna orara’a poto i rotopū i te mau ta’ata nō Galilea ’e nō Ierusalema. ’Ua tāmata vau i te feruri iāna i te rū-haere-ra’a i terā ’e terā putuputura’a ’aore rā i te ravera’a e rave rahi mau ’ohipa nō te fa’aoti i te hō’ē tāpura ’ohipa rū.

’Aita i ’itehia iā’u.

’Ua ’ite rā vau i te Tamaiti aroha ’e te aupuru a te Atua i te orara’a i te mahana tāta’itahi nō te hō’ē tumu. I tōna ha’ara’a i pīha’i iho i te feiā e ha’ati rā iāna, ’ua ’ite rātou e mea faufa’a rātou ’e te herehia ho’i. ’Ua ’ite ’oia i te faufa’a mure ’ore o te feiā tāna i fārerei. ’Ua ha’amaita’i ’oia ia rātou ’e ’ua aupuru ia rātou. ’Ua fa’ati’a ’oia ia rātou i ni’a, ’ua fa’aora ia rātou. ’Ua hōro’a ’oia ia rātou i te hōro’a faufa’a rahi o tōna taime.

(« Te mau tātarahapara’a ’e te mau fa’aotira’a », Liahona, Novema 2012, 22)

Tāu’aparau :

E aha tā tātou e nehenehe e ’apo mai i roto i te orara’a o te Fa’aora nō te tauturu ia tātou ’ia fa’atupu i te hō’ē orara’a au maitai ?

Tai’o :

I teie mau ’īrava ’e te mau fa’ahitira’a parau a te feiā fa’atere o te ’Ēkālesia :

« ’E ’a ara ’ia ravehia teie mau mea ato’a ma te pa’ari ’e ma te nahonaho ; ’aita ho’i i tītauhia i te hō’ē ta’ata ’ia horo ’oi’oi atu i tei au i tōna ra pūai » (Mosia 4:27).

« ’Eiaha e mata’u ; tei pīha’i ato’a iho vau ia ’oe : ’eiaha e taiā, ’o vau ho’i tō Atua : e fa’a’eta’eta vau ia ’oe, e tauturu vau ia ’oe » (Isaia 41:10).

« ’A rave noa i te mea maita’i roa a’e e oti ia ’outou i te mahana tāta’itahi. ’A rave i te mau ’ohipa o te mau mahana ato’a, ’e hou ’outou ’a ’ite ai i te reira, e ’ī tō ’outou orara’a i te hāro’aro’ara’a pae vārua ’o tē ha’apāpū mai ia ’outou ē, tē here nei tō ’outou Metua i te ao ra ia ’outou. ’Ia ’ite ana’e te hō’ē ta’ata i te reira, i reira ïa te orara’a e ’ī ai i te fā ’e te aura’a, ma te fa’a’ōhie ’ia tāpe’a i te fāito tueā » (M. Russell Ballard, « Keeping Your Life in Balance [’Ei orara’a fāito tueā] », Liahona, Setepa 2012, 50).

« Te fāito tueā i roto i tōna ’ā’anora’a, ’o te ’itera’a ïa i te mau mea e nehenehe e taui, te tu’ura’a ia rātou i roto i tō rātou iho hi’ora’a ātea ’e te ’itera’a i te mau mea tē ’ore e taui » (James E. Faust, « The Need for Balance in Our Lives [Te faufa’a nō te fāito tueā i roto i tō tātou orara’a] », Ensign, Māti 2000, 5).

Tāu’aparau :

E aha te mau mea e nehenehe e fa’a’ōhie ’aore rā e fa’a’ore i roto i tō tātou orara’a ’ia nehenehe ia tātou ’ia ’ite i te ’oa’oa rahi atu ?

’Ohipa e rave

Ta’ahira’a 1 : ’A tai’o i te fa’ahitira’a parau a te peresideni Dallin H. Oaks : « Te rahira’a ʼohipa maitataʼi tā tātou e nehenehe e rave, ’ua hau atu ïa i te taime iho nō te rave i te reira. Tē vai ra te tahi mau ’ohipa hau roa atu i te maita’i, ’e ’o te reira ïa te mau ’ohipa e rave nā mua roa i roto i tō tātou orara’a » (« Maita’i, maita’i a’e, maita’i roa a’e », Liahona, Novema 2007, 104).

Ta’ahira’a 2 : ’A feruri ’oe iho, i tō ’outou huru orara’a i te hepetoma tāta’itahi. I teienei, ’a feruri na ē, e 25 matahiti pa’ari a’e ’outou ’e tē ora noa nei ā ’outou mai te reira te huru. ’A fa’a’ī i nā fa’ahitira’a parau e piti i raro nei nō ni’a i tō ’outou orara’a :

’Aita vau i hōro’a nava’i i te taime

’Ua rahi roa te taime tā’u i hōro’a

Ta’ahira’a 3 : ’Ia ’ore e roa’a te mau tātarahapara’a a muri a’e, ’a pāpa’i hō’ē ’aore rā e piti ’ohipa tā ’outou e nehenehe e rave nō te fa’atupu hau atu i te au maita’i i roto i tō ’outou orara’a.

Fafau ia ’oe :

E ha’a vau i ni’a i tō’u mana’o nō te tu’u i te fāito tueā i roto i tō’u orara’a.