Talateu ki he Ko Sīsū Kalaisi mo e Ongoongolelei Taʻengatá Tohi Lēsoni ʻa e Faiakó (Lēsoni Fakalotu 250)

Ko e hā ʻoku ʻamanekina mei ha faiako fakalotú?

ʻI hoʻo teuteu ko ia ke faiakó, ʻoku mahuʻinga ke mahino ʻa e Taumuʻa ʻo e Seminelí mo e Ngaahi ʻInisititiuti Fakalotú:

“Ko ʻetau taumuʻá ke tokoniʻi ʻa e toʻu tupú mo e kakai lalahi kei talavoú ke mahino kiate kinautolu mo nau falala ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, mo honau ngaahi fāmilí, pea mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012],x).

Te ke lava ʻo aʻusia ʻa e taumuʻa ko ʻení ʻaki hono moʻui ʻaki e ongoongoleleí, akoʻi fakalelei ʻa e ongoongoleleí ki hoʻo fānau akó, pea mo puleʻi fakalelei hoʻo kalasí pe polokalamá. ʻI hoʻo teuteu mo akoʻi ʻa e ongoongoleleí ʻi he ngaahi founga ko ʻení, te ke taau ai mo e ivi takiekina ʻo e Laumālie Māʻoniʻoní.

Ko ho faingamālie ia ke tokoniʻi ʻa e fānau akó ke nau ako ʻi he Laumālié koeʻuhí ke nau lava ʻo fakamālohia ʻenau tuí mo fakaloloto ʻenau uluí. Te ke lava ʻo tokoni ke ikunaʻi ʻeni ʻe he fānau akó ʻaki hoʻo tataki kinautolu ke nau ʻiloʻi, pea mahino, mo ongoʻi ʻa e moʻoní mo hono mahuʻingá, pea teuteu ke fakaʻaongaʻi ʻa e ngaahi tokāteline mo e ngaahi tefitoʻi moʻoni mahuʻinga ʻo e ongoongolelei ʻo Sīsū Kalaisí.

Ko e tohi tuʻutuʻuni Ko Hono Akoʻi mo Ako ʻo e Ongoongoleleí ko ha maʻuʻanga tokoni mahuʻinga ia ke mahino ʻa e founga fakafaiakó mo e founga ke lavameʻa ai ʻi he loki akó. Toutou vakai maʻu pē ki he tohi tuʻutuʻuni ko ʻení.

Ko e hā ʻa e ngaahi taumuʻa ʻo e kalasi ko ʻení?

ʻOku ʻoange ʻe he kalasi ko ʻení, Ko Sīsū Kalaisi mo e Ongoongolelei Taʻengatá (Lēsoni Fakalotu 250), ki he fānau akó ha faingamālie ke nau ako ai kia Sīsū Kalaisi, tokanga taha ki Hono ngaahi fatongia fakalangí ʻi he kotoa ʻo ʻEne ʻi he maama fakalaumālié, moʻui fakamatelié, pea mo e moʻui ʻi he hili ʻa e moʻui fakamatelié. ʻOku ngāue ʻaki ʻa e ngaahi folofola ʻoku fakaʻaongaʻi ʻe he Siasí, lea ʻa e kau palōfita ʻo onopōní, mo e fakamatala ʻoku ui ko e “Ko e Kalaisi Mo’uí: Ko e Fakamoʻoni ʻa e Kau ʻAposetoló” (Ensign pe Liahona, ʻEpeleli, 2000, 2–3) ko ha ngaahi maʻuʻanga tokoni kuo ueʻi fakalaumālie ki he lēsoni ko ʻení. Kuo fakamamafaʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá hono mahuʻinga e ako ʻo e moʻui pea mo e misiona ʻo Sīsū Kalaisí:

“ʻOku ou poupouʻi mālohi atu ke ke fokotuʻu ha palani ako fakatāutaha ke toe mahino mo ke houngaʻia ange ai ʻi he taʻe-hano-tatau, taʻengata pea mo e ola taʻe-fakangatangata ʻo hono fakahoko haohaoa ʻe Sīsū Kalaisi ʻa Hono uiuiʻi fakalangi ko hotau Fakamoʻui mo e Huhuʻí. ʻE fakamālohia ʻe he fakalaulauloto fakamātoato ʻo e folofolá, fakataha mo e fekumi mo e lotu fakamātoató ʻa hoʻomou mahino mo e houngaʻia ʻi Heʻene Fakalelei mahuʻinga faú” (“ʻOku Ne Moʻui! Ke Lāngilangiʻia Hono Huafá!” Ensign pe Liahona, Mē 2010, 77).

Ko e taimi ʻe mahino ai mo fakahoungaʻi ʻe he fānau akó hono mahuʻinga ʻo e uiuiʻi fakalangi ʻo e Fakamoʻuí pea mo Hono ʻaonga ki heʻenau moʻuí, te nau maluʻi ʻa kinautolu mei he ngaahi faingataʻa ʻo e moʻuí pea mo ongoʻi mateuteu lelei ange ke aleaʻi ʻa e ngaahi tuʻunga fakalangi ʻo e Fakamoʻuí ʻi he palani ʻo e fakamoʻuí, ʻa ia ʻoku hoko ʻenau moʻui fakafoʻituituí ko hano konga mahuʻinga.

Ko e hā ʻoku ʻamanekina mei he fānau akó?

ʻOku totonu ke lau ʻe he fānau akó ʻa e ngaahi potufolofolá mo e ngaahi malanga fakaepalōfita ʻoku tuʻu ʻi he konga Laukonga ʻa e Tokotaha Akó he lēsoní takitaha. ʻOku totonu foki ke feau ʻe he fānau akó ʻa e ngaahi fie maʻu ki he maʻu kalasí mo fakahaaʻi hono ʻiloʻi ʻo e ngaahi fakamatala ʻi he lēsoní.

ʻOku fokotuʻutuʻu fēfē ʻa e ngaahi lēsoni ʻi he tohi lēsoni ko ʻení?

ʻOku fokotuʻutuʻu ʻa e kalasi ko ʻení ke semesitā ʻe taha hono lōloá mo ha foʻi lēsoni ʻe 28 naʻe faʻu ki ha ngaahi kalasi taki miniti ʻe 50. Kapau ʻoku fakahoko tuʻo ua hoʻomou kalasí ʻi he uike, akoʻi ʻa e foʻi lēsoni ʻe taha ʻi he taimi kalasi kotoa pē. Kapau ʻoku fakahoko tuʻo taha pē hoʻomou kalasí ʻi he uike, ʻi ha miniti ʻe 90 ki he miniti ʻe 100, fakatahaʻi ha foʻi lēsoni ʻe ua pea akoʻi ia ʻi he foʻi kalasi kotoa pē. ʻOku ʻi ai e konga ʻe fā ʻo e fokotuʻutuʻu ʻo e lēsoni takitaha:

• Talateú

• Laukonga ki Hono Puipuituʻá

• Ngaahi Fokotuʻu ki hono Akoʻí

• Laukonga ʻa e Tokotaha Akó

Talateú

ʻOku ʻomi ʻe he konga ko ʻení ha talateu nounou ki he ngaahi tefito mo e ngaahi taumuʻa ʻo e lēsoní.

Laukonga ki Hono Puipuituʻá

ʻOku fokotuʻu mai ʻe he konga ko ʻení ha ngaahi maʻuʻanga tokoni, hangē ko e ngaahi pōpoaki mei he kau palōfita ʻo onopōní, ʻe lava ʻo tokoniʻi lelei ange koe ke mahino ʻa e ngaahi tokāteliné, ngaahi tefitoʻi moʻoní, mo e ngaahi moʻoni ʻo e ongoongoleleí ʻoku kātoi ʻi he fokotuʻutuʻu ʻo e lēsoní.

Ngaahi Fokotuʻu ki hono Akoʻí

ʻOku kau ʻi he konga ki he Ngaahi Fokotuʻu ki hono Akoʻí ha nāunau ke tokoni atu ke ke ʻiloʻi fakatouʻosi ʻa e meʻa ke akoʻí mo e founga ke akoʻi ʻaki iá (vakai foki, konga 4.3.3 mo e 4.3.4 ʻi he tohi tuʻutuʻuni ko e Ko Hono Akoʻi mo Ako ʻo e Ongoongoleleí). ʻOku fokotuʻutuʻu ʻa e ngaahi ʻekitivitī ako kuo fokotuʻu atú ke tokoni ke ʻiloʻi, mahino, pea mo fakaʻaongaʻi ʻe he fānau akó ʻa e ngaahi moʻoni toputapú. ʻE lava pē ke ke fili ke fakaʻaongaʻi ha niʻihi pe kotoa ʻo e ngaahi fokotuʻú ʻi hoʻo filioʻi kinautolu ke feʻunga mo hoʻomou sīpinga faiakó takitaha pea mo feau ai e ngaahi fie maʻu pea mo e ngaahi tūkunga hoʻo fānau akó. ʻI hoʻo fakakaukauʻi e founga ke filioʻi ai ʻa e ngaahi fakamatala ʻo e lēsoní, muimui ʻi he faleʻi ko ʻeni meia ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻI heʻeku fanongó, kuo faʻa akoʻi ʻe Palesiteni Peeka, ke tau ʻuluaki ohi mai, pea tau toki liliu. ʻOku tau tuʻu maʻu kakato ʻi he lēsoni kuo ʻomaí, kuo pau ke tau foaki, pea tau toki lava ʻo muimui ʻi he Laumālié ke Ne liliu ia. Ka ʻoku ʻi ai ha ʻahiʻahi, ʻi he taimi ʻoku tau talanoa ai ki he founga ofeʻi ngofua ko ʻení, ke kamata ʻaki e liliú kae ʻikai ko e ohi maí. ʻOku napangapanga-mālie. Ko ha tukupā taʻe-tuku. Ka ko e founga ʻo hono ʻuluaki ohi mai pea toki liliú ko ha founga lelei ia ke tuʻu ai ʻi ha tuʻunga ʻoku mālohí”(“A Panel Discussion with Elder Dallin H. Oakes” [Seminaries and Institutes of Religion Satellite Broadcast, Aug, 7, 2012]; si.lds.org).

Ko e Ngaahi Fokotuʻu ki hono Akoʻí ʻoku ʻi ai ha fakamatala ki ha tokāteline pe tefitoʻi moʻoni ʻe taha, ʻa ia ʻoku ʻasi mataʻitohi mataʻāʻaá. Ko e taimi ʻe ʻilo ai ʻe he fānau akó ʻa e ngaahi tokāteline mo e ngaahi tefitoʻi moʻoni ko ʻení mo vahevahe ʻa e meʻa kuo nau akó, ʻe kehe ʻenau fakaleá mei he meʻa ʻoku tuʻu ʻi he tohi lēsoní. Tokanga ʻi he taimi ʻe hoko ai ʻení, ke ʻoua naʻá ke taku ʻoku hala ʻenau ngaahi talí. Neongo ia, kapau ʻe lava ke toe tonu ange ha fakamatala, tokoniʻi fakalelei ke fakamahinoʻi ʻa e fakakaukaú.

Koeʻuhí ke tokoniʻi ʻa e fānau akó ke nau hoko he kotoa ʻo ʻenau moʻuí ko ha fānau ako ʻo e folofolá, akoʻi kinautolu he founga ke fakaʻaongaʻi ai ʻa e ngaahi tokoni fakaako ʻoku maʻu ʻi he ngaahi tatau ʻo e folofola ʻa e Kau Māʻoniʻoni ʻi he Ngaahi ʻAho Kimui Ní. Fakaʻaongaʻi ʻa e ngaahi faingamālie ʻi he kalasí ke tokoniʻi ʻa e fānau akó ke nau ako fakahoko ʻa e ngaahi pōtoʻi ako ʻo e folofolá pea mo e ngaahi foungá (vakai, Ko Hono Akoʻi mo Ako ʻo e Ongoongoleleí, 20–23). ʻI hoʻo fai iá, ʻe fakaloloto ange ʻe he fānau akó ʻenau saiʻia ʻi he folofolá, fakaivia ke nau kumi e tali ʻo ʻenau ngaahi fehuʻí, mo ako ke taki ʻe he mālohi ʻo e Laumālie Māʻoniʻoní.

Laukonga ʻa e Tokotaha Akó

ʻOku hiki ʻe he konga ko ʻení ʻa e ngaahi potufolofola mo e lea ʻa e kau taki māʻolunga ʻo e Siasí te nau fakatupulaki e mahino ʻa e fānau akó ki he ngaahi tefito ʻoku ʻi he ngaahi lēsoní. Poupouʻi ʻa e fānau akó ke nau lau ʻa e ngaahi nāunau ko ʻení kimuʻa pea nau toki omi ki he kalasi takitaha. ʻI heʻenau ako ʻa e ngaahi fakamatala fakalaumālie ko ʻení, he ʻikai ngata pē ʻi heʻenau mateuteu lelei ange ke kau ʻi he ngaahi fealēleaʻaki ʻa e kalasí, ka te nau maʻu foki ha mahino lahi ange ki he ngaahi tefito ʻo e lēsoní. ʻOange ki he fānau akó ha lisi ʻo e “Ngaahi Laukonga ʻa e Tokotaha Akó” kotoa ʻi he kamataʻanga ʻo e semesitaá.

Te u teuteu fēfē ke faiakó?

ʻE tokoni’i koe ’e he ’Eikí ʻi hoʻo teuteu ke faiakó. Mahalo te ke ʻiloʻi ʻi hoʻo teuteú ʻoku ʻaonga ke ke fehuʻi pē ʻeni kiate koe:

• Kuó u lotua nai ke maʻu e fakahinohino ʻa e Laumālie Māʻoniʻoní?

• Kuó u ako nai ʻa e ngaahi potufolofola naʻe vahé mo e laukonga ki he puipuituʻá?

• Kuó u lau nai ʻa e nāunau fakalēsoní mo fakapapauʻi pe ʻoku ʻi ai ha faʻahinga meʻa ʻoku fie maʻu ke u liliu pe filioʻi ke feau e ngaahi fie maʻu ʻeku fānau akó?

• Te u muimuiʻi fēfē e ngaahi laukonga ʻa e tokotaha akó ke fakapapauʻi ʻoku maʻu ʻe he fānau akó ʻa e meʻa lahi tahá mei ai?

• Te u tokoniʻi fēfē ʻa e fānau akó takitaha ke nau kau kakato ʻi he lēsoní?

Mahalo e ʻaonga ʻa e ngaahi fokotuʻu ko ʻení foki.

• Poupouʻi ʻa e fānau akó ke nau lau ʻa e ngaahi potufolofola ne vahe angé pea mo e ngaahi fakamatalá kimuʻa ʻi he kalasí takitaha.

• ʻAmanaki ʻe fakahoko ʻe he fānau akó honau fatongiá ko e kau ako.

• ʻOange maʻu pē ha ngaahi faingamālie ke fakamatalaʻi ai ʻe he fānau akó ʻa e ngaahi tokāteliné mo e ngaahi tefitoʻi moʻoní ʻi heʻenau lea pē ʻanautolu, pea mo fakamoʻoniʻi ʻa e meʻa ʻoku nau ʻilo mo ongoʻí.

• Fulifulihi ʻa e ngaahi ʻekitivitī akó mo e ngaahi founga ʻokú ke fakaʻaongaʻi ʻi he kalasí takitaha pea mei he ʻaho ki he ʻaho.

• Fokotuʻu ha ʻātakai ʻo e ako te ne fakaafeʻi ʻa e Laumālié pea mo lava ai ʻa e fānau akó takitaha ʻo maʻu ʻa e faingamālie pea mo e fatongia ke akoʻi pea mo feakoʻaki (vakai, T&F 88:78, 122).

ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Fakapapauʻi ʻoku tokolahi ʻa e kau maí koeʻuhí he ko e ngāue ʻaki ʻe ha taha ako ʻa e tauʻatāina ke filí, ʻokú ne fakamafaiʻi ʻa e Laumālie Māʻoniʻoní ke faiako. … Ko e taimi ʻoku fakamatalaʻi ai ʻe he fānau akó ʻa e moʻoní, ʻoku nau fakapapauʻi ai ʻi honau lotó pea mo fakamālohia ʻenau fakamoʻoni fakafoʻituituí” (“To Understand and Live Truth” [ko ha efiafi mo Elder Richard G. Scott, Feb. 4, 2005], 3; si.lds.org).

Te u filioʻi fēfē ʻa e ngaahi lēsoní maʻanautolu ʻoku faingataʻaʻia fakaesinó?

ʻI hoʻo teuteú, manatuʻi ʻa e fānau ako ʻoku ʻi ai haʻanau ngaahi fie maʻu makehé. Fulifulihi ʻa e ngaahi ʻekitivitií mo e ngaahi fakaʻānauá ke tokoni ke nau ikunaʻi. Hangē ko ʻení, ʻe ʻi ai ha fānau ako ʻe niʻihi ʻe ʻaonga kiate kinautolu haʻanau ngāue ʻaki e ngaahi folofola kuo ʻosi hiki ke fanongo ki aí. ʻE lava ke download faingofua pē ʻeni mei he LDS.org.

Fetuʻutaki ki he peesi Disability Resources ʻi he disabilities.lds.org ke maʻu ha ngaahi fakakaukau mo ha ngaahi maʻuʻanga tokoni lahi ange pea mo e konga ʻo e tohi tuʻutuʻuni ʻo e Seminelí mo e Ngaahi ʻInisititiuti Fakalotú ʻoku ui ko e Adapted Classes and Programs for Students with Disabilities.