Aoao

O le a se mea tatou te faia i le vaega lenei?

Taimi:Seti le taimi i le 60 minute mo le vaega Aoao.

Faitau:Ina ia malamalama i le faamoemoega o le vaega o le ola tutoatasi, susue i totonu o le faavaa pito i luma o le api galuega lenei ma faitau le folasaga.

Ua tatou i ai iinei e fesoasoani le tasi i le isi e saili ni galuega fou po o galuega lelei atu. Ua i ai foi se tatou sini sili atu: ina ia ola tutoatasi e mafai ai ona tatou auauna lelei atili atu ai i isi.

Faataitai:O i latou e faaaogaina ia mataupu faavae ia o le a tatou aoaoina faatasi e masani lava ona vave ona maua galuega. O lea la e taua ai! Sue i le Faafanua o le Manuia o Sailiga Galuega i le itulau mulimuli o le api galuega lenei ma auauai i le faitauina.

Faitau:O aso taitasi, o le a tatou faaleleia ai la tatou sailiga galuega. E amata atu i le aso, o le a tatou taulai atu i le taliina o fesili e ono i ai i le Faafanua o le Manuia o Sailiga Galuega mo i tatou lava. O le a tatou faia ni tautinoga, faatinoga, ma lipoti atu i le vaega. O le a faamanuiaina faatasi i tatou!

E tusa lava pe ua maua a tatou galuega, o le a faaauau pea ona tatou o mai i fonotaga faalevaega ina ia aoao ma faataitai ia mataupu faavae o le Faavae. E mafai ona faaauau pea ona tatou fesoasoani e siitia a tatou uo faalevaega ma ia maua le fesoasoani a le vaega i luitau o la tatou sailiga galuega.

O fesili ma faatinoga nei mo lenei vaiaso.

Faitau:FESILI O LE VAIASO—E faapefea ona ou maua ni avanoa mo se galuega sa’o?

FAATINOGA O LE VAIASO—Ia saunia ma faataitai la’u faamatalaga “o a’u i sekone e 30” ma faasoa atu i tagata uma ou te mafai ai. Mafaufau e fai le Faateleaiina o le Sailiga Galuega (o se gaoioiga e tuu i le faitalia).

O le a fesoasoani le vaega o totoe o lenei fonotaga ia i tatou i le taliina o lenei fesili ma faia faatinoga nei.

Faataitai:Sei o tatou faia la tatou faatinoga muamua faatasi o se vaega. Sei o tatou faaaogaina se lima minute ma filifili po o le a le igoa e ta’ua ai la tatou vaega.

Tusi igoa o vaega i lalo:

O a mea e tatau ona ou ofoina atu?

Talanoa: Na i ai se taimi na e ma ai e ta’u atu i tagata e te manaomia se galuega?

Faitau:E le tatau ona tatou popole! E manaomia e tagata uma se galuega i nisi taimi. Ua tofu i tatou ma taleni ma aafiaga. Ma le isi, o i tatou o ni fanau a le Atua. E mafai ona tatou manuia! E tatau ona tatou ta’u atu i tagata uma o loo tatou sailia se galuega lelei ma e tatou te agavaa i ai!

Faataitai:Vaevae i ni au toalaiti e taitoatolu tagata. Mei lou nofo e faafesagai ma isi, ma fai le gaoioiga lenei.

1. Faamatala atu e le tasi o oulua i le isi se mea se tasi na ausia. Ia faapuupuu! E mafai ona e fai atu: “Sa ou maua le taui o le ‘auaunaga sili ona lelei’ i le galuega,” po o le “Sa ou faamisiona” (po o nisi valaauga o le Ekalesia), po o le “O a’u o se tina.”

2. Ia, i le vave la te mafai ai, tau atu e le isi toalua ia te oe ni tomai ma gafatia na manaomia e ausia ai na taunuuga. Afai na e fai atu, “Sa ou auauna atu faamisiona,” e mafai ona tau vave atu e isi, “O oe la o se toa, o se tagata aoga lelei, o se tagata galue malosi, o se taitai, o se tagata e fesoasoani i le taulimaina o faafitauli a isi, o se tagata fuafua lelei, ma e mafai ona faia ni mea faigata.”

3. Toe fai le faagasologa lenei mo tagata taitasi i lau vaega.

Talanoa: O a ni ou lagona ao talanoaina e isi au taleni ma tomai?

Faitau:I le pusa lenei, lio mea ua e ausia po o taunuuga ma tusi nisi mea faaopoopo. Aua le matamuli. Ona lio lea o ou gafatia, tomai, ma uiga ma tusi nisi mea. Taumafai e vaai ia te oe e pei ona silasila mai le Tama Faalelagi ia te oe!

MEA UA AUSIA (Lio ma tusi nisi mea)
Valaauga i le Ekalesia
Misiona
Matua
Taui i le galuega
Aoga
Taitaiga
Taui o auaunaga
Taitaiina fonotaga
Faatauina atu se mea
Faia se mea
Tuuina atu se lauga

GAFATIA, TOMAI, UIGA (Lio ma tusi nisi mea)
Faamaoni	Galue malosi
Tomai faifaatau	Tagata e lelei le faalogo
Faamoemoeina	Agalelei
Tomai faamama	Enisinia
Fesootaiga	Tagata e setiina sini
Aoao	E magafagafa
Atamai	Lipea
Kamuta	Onosai
Fatufatua’i	Uiga lelei
Tagata atiae	Tagata e vave le aoaoina
Api o fuafuaga	Lelei

E faapefea ona ou faamatala atu i isi lo’u tagata?

Faitau:O lea la ua e iloa e tele mea e mafai ona e ofoina atu! Ina ia maua se galuega lelei, e manaomia lou tauina atu i tagata le auala e mafai ai ona e faaaogaina ou tomai e fesoasoani ai ia i latou—ma e tatau ona e tau vave atu ma le malosi ia i latou. Faatasi ai ma le vaega atoa, ia auauai i le faitauina o le “Folasga a Sofia”.

Folasaga a Sofia

Talofa lava! ¹ O lo’u igoa o Sofia Gonzalez, ma ² ou te manao i se galuega faiaoga i se aoga tumaoti. ³ E lima tausaga o lou poto masani faafaiaoga ma se tusi faamaonia i aoaoga. E maoae sikoa o suega a a’u tamaiti aoga. ⁴ O a’u o se faiaoga fiafia ma malie, ma e tuuina mai e tamaiti aoga ia te au a latou taumafaiga sili ona lelei.

¹ Igoa ² Faamoemoega³ Agavaa⁴ Uiga

Faataitai:Ia, fatu sa oe lava folasaga i vaega nei e fa. Tusi i luga o laina nei. Faaaoga le 2-3 minute. Ia aofia ai:

1. Lou igoa

2. Le galuega e te manao ai (faamoemoega)

3. Aisea o le a e lelei ai i lena galuega (agavaa)

4. Nisi o uiga po o tomai o le a fesoasoani ia te oe ina ia faamanuiaina i lena galuega

“O a’u i le 30 sekone” Motugaafa: Faapuupuu! O tagata e faalogo mo na o ni nai sekone.

O lenei ituaiga o folasaga ua ta’ua o se faamatalaga “o a’u i le 30 sekone”. Ia taitoatasi, ma tutu i luga ma faailoa atu oe lava i lau “o a’u i le 30 sekone.” Ia tausisia le 30 sekone. Ia tatou patipati ma faamalo atu le tasi i le isi.

Faitau:O le “o a’u i le 30 sekone” o se auala sili lea e faailoa atu ai i tatou lava, aemaise lava pe a patino. E sili atu le malosi pe a tatou faaopoopoa i ai se fesili i le faaiuga e patino lava i le tagata o loo tatou talanoa i ai. Na faataitai e Sofia le faaopoopoina o ni fesili eseese i lana folasaga, e fuafua i le tagata na te feiloai i ai:

Uo, aiga: O ai ni faiaoga po o ni tagata e onaina aoga e te iloa?

Failautusi: E mafai ona e faasinoa a’u ia Mrs. Gomez, le pule.

Pule o le Falefaigaluega: E mafai faapefea ona fesoasoani lo’u poto masani ia te oe?

E tatau ona tatou faailoa atu i tatou lava i ni tagata se toatele tatou te mafaia e tau atu ia i latou o loo tatou avanoa mo ni galuega.

Faataitai:Faaaoga ni nai minute e toe tusi ai lau “o a’u i le 30 sekone”. Ia faaleleia. Faaopoopo i ai ni agavaa ma ni uiga patino. Faaopoopo i ai se fesili e mafai ona e faaaogaina pe a talanoa i se pule o le falefaigaluega.

Fesili:

Faataitai:Fai faatasi o se vaega le gaoioiga lenei. E le tatau ona sili atu ma le lima i le ono minute.

1. Ia tutu i luga tagata uma ma agai atu i se avanoa taalaelae. E tatau i tagata taitasi ona faafesagai ma le isi tagata.

2. Fai atu lau “o a’u i le 30 sekone” i lau paga.

3. Ona fai atu lea o le “o a’u i le 30 sekone” a le isi tagata ia te oe.

4. Ia vave ona tuuina atu i le tasi ma le isi le manatu faaalia lenei:

   • Na i ai uma vaega e fa? (igoa, faamoemoega, agavaa, uiga)

   • Na faaiu i se fesili?

   • Pe sa faamaoni ma lelei? Na fausiaina le faatuatuaina?

   • Na ataata le tagata?

   • E te manao e faailoa atu lenei tagata pe tuuina atu ia te ia se galuega?

5. Ona fesuiai lea o paga ma toe fai. Ma toe fai!

6. Ia fai i le vave tou te mafaia seia uma ona faia faalima e tagata uma.

Faitau:Mai le taimi nei, o le a tatou le maasiasi e tau atu i tagata o loo tatou saili mo se galuega. E mafai ona tatala o tatou gutu ma tau atu i tagata uma o loo tatou avanoa mo se galuega ma e tatou te agavaa!

Ua tatou saunia e o atu ma tuu atu le “o a’u i le 30 sekone” i tagata uma tatou te vaai ai ao lei oo i le isi a tatou fonotaga. Ua tatou [saunia]?

GAOIOIGA E TUU I LE FAITALIA: FAATELEAIINA O LE SAILIGA GALUEGA
(AUA NEI FAIA LE MEA LENEI I LE TAIMI O LE FONOTAGA.)
I le tatou fonotaga lona lima, o le a tatou aoao ai e uiga i se auala e faateleai ai la tatou sailiga galuega. Peitai, afai e te manao e vave lou minoi i lau sailiga galuega i le taimi nei, e mafai ona e faia le gaoioiga faaopoopo lenei ao lei oo i lena taimi. E mafai ona e faia na o oe pe fai ma isi.
Ina ia vave atili ona faamanuiaina, e mafai ona e suesue i le “Faateleaiina o le Sailiga Galuega” i le vaega Punaoa, i itulau 15–20. Talanoa ma aoao faatasi ma lou aiga, o se tagata o le vaega, po o se isi uo. Alu ma fai—saili ni punaoa, fai ni fesootaiga, ma faatulaga ni fonotaga ma ni tagata se toatele e te mafaia. Masalo e lua i le fa itula i le aso e alu ai i le faiga o lenei mea.
O le sailiga galuega o le galue lea! Peitai a mulimuli tagata i lenei mamanu, e sili atu ona vave ona maua ni a latou galuega.
Afai e te filifili e fai le gaoioiga, toe foi mai ma lipoti mai i le vaega i se taimi mulimuli ane. O le a fesoasoani lou aafiaga i isi tagata o le vaega!

E mafai faapefea ona ou taulimaina ma le atamai a’u tupe?

Faitau:O le ola tutoatasi e aofia ai ma le itiiti o tupe e faaaluina nai lo tupe tatou te mauaina atoa ma le i ai o ni tupe i ni teugatupe. O teugatupe e mafai ona fesoasoani ia i tatou e taulimaina ni pili e lei faamoemoeina pe fesoasoani ia i tatou e tausia i tatou lava ma o tatou aiga pe a laitiiti ifo o tatou totogi po o tupe maua nai lo mea tatou te faamoemoe i ai. I le avea ai ma se tasi o lenei vaega, tatou te tuuto atu i le teuina o se tupe i vaiaso taitasi, pe tasi sene pe lua.

Talanoa: I nisi o eria, o se manatu lelei le teuina o tupe i se faletupe. I isi eria, e le o se manatu lelei, e pei o le taimi e maualuga ai le tau o oloa i se atunuu pe ua le tulaga lelei ia faletupe. E lelei tulaga mo le teuina o tupe i se faletupe i la outou eria? O fea o faletupe e sili ona lelei le pasene mo teugatupe?

Faitau:O le isi vaega o le ola tutoatasi o le saoloto lea mai aitalafau faaletagata lava ia. O nonogatupe faaletagata lava ia o loo faaaogaina e faaalu ai le tele o tupe nai lo tupe ua tatou maua. Ua fautuaina i tatou e perofeta e aloese mai aitalafu faaletagata lava ia, ma ao tatou ola tutoatasi atili o le a tuuitiitia ma aloese mai soo se aitalafu faaletagata lava ia (e ui o aitalafu tau pisinisi e ono atamai i nisi tulaga).

O ma’i faafuasei e masani ona mafua mai ai ni avega tetele tau tupe. O inisiua ma polokalama tausi soifua faalemalo e masani ona fesoasoani e puipuia mai nei avega. O le lesitala mo se inisiua po o se polokalama o le soifua maloloina faalemalo e mafai ona avea ma se vaega taua o lo tatou auala i le ola tutoatasi.

Talanoa: O nisi ituaiga o inisiua (e pei o se inisiua tau le soifua maloloina ma le inisiua o le ola) e sili ona taatele ma sili ona aoga nai lo isi ituaiga o inisiua. O nisi tagata e saunia nei inisiua e lelei ao nisi e le faamaoni. O a vaega o inisiua e sili ona lelei i la outou eria?

Aisea e finagalo ai le Alii ia tatou ola tutoatasi?

Talanoa: Aisea e finagalo ai le Alii ia tatou ola tutoatasi?

Faitau:Faitau le upusii i le itu taumatau.

“Ina ua faapaiaina o lona uiga o le vaetofia lea po o le tuuina atu o se mea e paia, ma tuuto atu i faamoemoega paia.”

D. Todd Christofferson, “Toe Manatunatuga i se Olaga Faapaiaina,” Ensign po o le Liahona, Nov. 2010, 16–19.

Talanoa: E mafai faapefea e o taou taumafaiga ia maua se galuega ona avea ma se “faamoemoega paia,” e pei ona saunoa ai Elder Christofferson ?

Faitau:Ua i ai i le Alii le mana e fesoasoani ia i tatou ina ia ola tutoatasi. Sa Ia fetalai mai, “Aua faauta, o A’u o le Atua; ma o A’u o se Atua o vavega” (2 Nifae 27:23). A o tatou tuuto atu, po o le faapaiaina, o a tatou taumafaiga ina ia manuia a tatou galuega i le faamoemoega paia o le ola tutoatasi, o le a taitaiina i tatou e le Alii e ala i musumusuga. A o tatou faaalia lo tatou faatuatua e ala i le faalogologo mo ma usiusitai i Ana musumusuga, o le a faataunuu e le Alii Ana vavega ma faia nisi taumafaiga sili atu nai lo mea e mafai ona tatou faia mo i tatou lava.