Aoao

E faapefea ona ou lelei i le galuega?

Taimi:Seti le taimi i le 60 minute mo le vaega Aoaoina.

Faitau:A uma ona tatou mauaina se galuega lelei, e tatau ona tatou tausia lena galuega ma ia sili ona lelei ai. E tatau ona avea i tatou ma tagata faigaluega sili ona lelei tatou te mafaia.

Faitau:FESILI O LE VAIASO—E faapefea ona ou lelei atili i le galuega ma faaauau pea ona faamanuiaina?

FAATINOGA O LE VAIASO—O le a ou (1) sili ona lelei i le galuega, (2) faamaonia atu lo’u taua i lo’u pule, ma le (3) fai se fuafuaga o la’u galuega.

Maimoa:“E Le o So’u Faafitauli Lena” (Leai se vitio? Faitau le itulau 108.)

Talanoa: Aisea na talosaga ai Iosefa, o le pule, ia Gloria ma Atonio e fofo a laua lava faafitauli?

Maimoa:“O La’u Faafitauli Lena” (Leai se vitio? Faitau le itulau 109.)

Talanoa: O le tauaveina o tiutetauave, na amata ai ona taua atili ia Gloria ma Atonio i le la pule. Aisea?

Faitau:O le a sili ona tatou lelei i le galuega e ala i le faaauau pea ona faaaoga ia meafaigaluega uma ua tatou maua i le sailiga mo se galuega:

1. O le faia o fesootaiga ma fausia la tatou upega fesootai.

2. O le fesootai manino atu ma isi ma faaalia se uiga ma foliga vaaia lelei.

3. Galue malosi ma faamaonia atu lo tatou taua i lo tatou pule.

E faapefea ona ou tauaveina se tiutetauave e fesoasoani ai i la’u pule ina ia faamanuiaina?

Faitau:E faataua e falefaigaluega nisi tagata faigaluega e sili atu nai lo isi. O tagata faigaluega taua e aumaia le tele o tupe pe tele atu oloa e gaosia mo le kamupani nai lo le tau i le kamupani.

Talanoa: E faapefea ona fesoasoani ia te oe pe a e fesoasoani atu i lou pule po o falefaigaluega?

Faataitai:Mafaufau i tagata faigaluega ia e toatolu e faapea o oe o Iosefa, o le pule o le kamupani. E tofu au tagata faigaluega ma se tau faapitoa ia te oe mo le totogi, masani, ma isi mea. Ma e tofu aumai e tagata faigaluega taitasi ni tupe e ala i le gaosiga o oloa, faatau atu, po o le tautuaina o tagata faatau.

Peniamina

E aumaia i totonu: 50000

Tau i le kamupani: 53000

Tupe Faasili/Tupe Leiloa: -3000

Gloria

E aumaia i totonu: 26000

Tau i le kamupani: 25000

Tupe Faasili/Tupe Leiloa: 1000

Anelia

E aumaia i totonu: 45000

Tau i le kamupani: 25000

Tupe Faasili/Tupe Leiloa: 20000

Mei lou nofoa e talanoa i le tagata i ou autafa. Tali faatasi mai ia fesili nei:

1. O ai le tagata faigaluega sili ona taua?

2. O ai e itiiti le taua?

3. Afai e i ai sau ponesi e 2000 e tuu atu i se tasi, o ai e te avatua i ai?

4. Afai e leai se alualu i luma o lau tagata faigaluega e itiiti le taua, e te tulia lena tagata?

5. Afai e taumafai se isi kamupani e faafaigaluega lau tagata faigaluega sili ona lelei ma aveese atu o ia mai ia te oe, e te tuuina atu ia te ia se siitaga e taofia ai o ia?

Talanoa e uiga i au tali ma le vaega atoa.

Talanoa: I le avea ai ma se vaega atoa, talanoa i auala e mafai ona outou avea atili ai ma ni tagata faigaluega sili ona taua.

Faataitai:Mei lou nofoa e talanoa ma le tagata e i ou autafa. Talanoa e uiga i fesili taitasi ma tusi i lalo ou manatu.

Mo lau galuega o loo i ai nei po o le galuega o e sailia, e mafai faapefea ona e:

1. Faaopoopo tagata faatau i le pisinisi?

2. Faafiafia atili ma sili ona tuuto ia tagata faatau o loo i ai nei?

3. Aumaia tagata faatau o i ai nei e faatau nisi [oloa]?

4. Faateleina le taua ma le tau o oloa?

5. Fesoasoani i tagata faatau ia vave ona totogi mai pe oo lava i le muai totogiina mai [ia oloa]?

6. Fesoasoani i le kamupani ina ia faateleina tupe maua i nisi auala?

E faapefea ona ou tauaveina le tiutetauave o le fesoasoani atu i la’u pule po o le falefaigaluega e faaitiitia ia tupe faaalu?

Faitau:I le avea ai ma ni tagata faigaluega taua, o le a tatou saili ai foi ni auala e faaitiitia atu tupe faaalu.

Talanoa: E faapefea ona e fesoasoani e faaitiitia tupe faaalu?

Faitau:I le vitio lona lua, e i ai se manatu lelei o Atonio: faatulaga le faaleleia o le masini. Sa ia aoao e sefe le tupe a lana falefaigaluega. O loo faaalia i le siata lenei le eseesega. O le manatu o Atonio o le a sefe ai e lana falefaigaluega le tele o tupe—14500 i tausaga e lima! A faaali atu e Atonio lenei mea i lana pule, e manino lava le iloa o le taua o Atonio i lana pule po o falefaigaluega!

	TAU E AUNOA MA LE FAATULAGAINA O LE FAALELEIA		TAU I LE FAATULAGAINA O LE FAALELEIA
	Lipea	Toe sui	Faaleleia	Lipea	Toe sui
Tausaga 1	2000		100	0	0
Tausaga 2	2000		100	500	0
Tausaga 3		10000	100	0	0
Tausaga 4			100	500	0
Tausaga 5	2000		100	0	0
Aofaiga o le Tau	16000		1500

Faataitai:Mei lou nofoa e talanoa i le tagata e i ou autafa. Feauauai. Vaai pe fia ni tali e mafai ona e mauaina!

1. Faamatala atu i le tasi ma le isi lau galuega po o le galuega o loo e sailia.

2. Mo lua galuega taitasi, saili ia manatu uma lua te mafai ona maua e uiga i le auala e faia ai:

   • Sefe le taimi

   • Faaleleia le faagasologa

   • Ia tausia lelei ia masini po o oloa

   • Ia faaitiitia mea sese

3. Tusi i lalo ni manatu lelei ma taumafai ia faia i le mea o loo e faigaluega ai ao lei faia le isi a tatou fonotaga. Afai e te lei mauaina i le taimi nei le galuega, mafaufau i ni auala e mafai ona e saunia ai oe lava e faaaoga ai ou manatu pe a e mauaina le galuega.

E faapefea ona ou nafa ma le tiutetauave mo la’u galuega?

Faitau:Faitau faatasi le mau i le itu taumatau.

“Ona ua fetalai mai le Alii le Atua e faapea: O le tulaga e oo i ai la outou tausiga o a’u poloaiga o le a outou manuia i le laueleele.”

2 Nifae 4:4

Talanoa: Mata o le a fesoasoani lau galuega o i ai nei (po o le galuega o loo e sailia) ina ia e ola tutoatasi? E te talitonu o le a fesoasoani atu le Alii ia te oe ia saunia mo ni galuega lelei atu? E faapefea ona Ia faia lena mea?

Maimoa:“O Loo Ia Fausia se Faletele” (Leai se vitio? Faitau le itulau 110.)

Talanoa: O le a se mea na e aoaoina mai lenei vitio? O le a se mea na e lagonaina?

Faataitai:Mei lou nofoa e talanoa i se isi tagata e i ou autafa.

1. Faamatala atu lau galuega o i ai nei po o le galuega o loo e sailia.

2. Faamatala atu le galuega e te manao i ai i le lua i le fa tausaga. O le galuega lava lea e tasi po o se isi galuega?

3. Talanoa pe faapei le lava o tupe e femalagaai ai i le malumalu, auauna atu i ni misiona, pe fesoasoani atu i isi.

4. Tusi mea sa tou talanoaina i pusa nei.

O FEA O E I AI NEI	O FEA E TE FIA I AI

GAOIOIGA E TUU I LE FAITALIA: AUALA E SAILI AI SE FAIAOGA PO O SE FAUFAUTUA E FESOASOANI IA TE A’U INA IA FAAMANUIAINA
(AUA NEI FAIA LE GAOIOIGA LENEI I LE TAIMI O LE FONOTAGA.)
Afai e te filifili, e mafai ona e faia le gaoioiga lenei ao lei faia le isi a tatou fonotaga:
E mafai ona fesoasoani atu se faiaoga ina ia e iloa tulafono e lei tusiaina ma faamoemoega o le nofoaga faigaluega. Suesue i le itulau 111.

O a meafaigaluega o le a ou manaomia e ausia ai a’u sini?

Faitau:Talu ai o lea ua tatou maua ni manatu e uiga i le mea tatou te mananao e o i ai, e faapefea ona tatou o iina? Sei o tatou faitauina le mau i le itu taumatau.

“Faauta, ou te fai atu ia te outou, E leai; ona tou te lē oo mai iinei pe a na lē seanoa le afioga a Keriso faatasi ma le faatuatua lē mafaagaeetia ia te ia, ma le faalagolago atoa i galuega a ia o lē ua malosi aoao e laveai.”

2 Nifae 31:19

Talanoa: Mata o mafai e Keriso ona faamanuia oe faaletino? Pe o aofia ai iina le fesoasoani ia te oe ia maua se galuega, tausia se galuega, ma lelei atili i lau galuega?

Faitau:O le a tuuina mai ia i tatou e le Alii ni poto masani i a tatou galuega e fesoasoani ia i tatou ia maua ni tomai ma le malamalamaaga. Na te faamoemoe mai foi ia i tatou ina ia maua le malamalama e ala i le suesue ma sauniuniga. O le tele o galuega ua na o i latou ua i ai se tikeri po o se tusi faamaoni patino e mauaina. O aoaoga e mafai ai ona tatou lelei atili i le galuega ma taua atili i o tatou pule po o falefaigaluega.

Faataitai:Lisi mai tomai ma le malamalama e te manaomia e fai ai lau galuega i le lumanai. Lisi mai ni auala e maua ai nei mea. O a ou laasaga e sosoo ai i lou auala? (Ua tuuina atu se faataitaiga.)

GALUEGA E TE MANAO I AI	TOMAI MA LE MALAMALAMAAGA E TE MANAOMIA	AUALA E MAUA AI TOMAI MA LE MALAMALAMAAGA	LE ISI LAASAGA
Pule o le Fausiaina	Tomai faaenisinia Tomai o le fuafuaina Tomai o le fofoina o faafitauli Tomai faafesootaiga	Aoga i aoga faamatata eseese pe faaenisinia po o se tikeri faaenisinia mai se kolisi.	Auai i se vaega o le ola tutoatasi o “Aoaoga mo se Galuega Lelei” e fuafua ai la’u laasaga e sosoo ai.