Folasaga
E mafai ona fesoasoani le vaega lenei ia te a’u e saili se galuega?
E le faigofie le sailia o se galuega, ae o le a fesoasoani le vaega o le ola tutoatasi ia te oe e aoao ia auala sili ona lelei e saili ai se galuega ma manuia ai. I fonotaga faalevaega, o le a e tautino atu e fai ni faatinoga faaletagata lava ia, ma o le a tuuina atu e vaega ni manatu ma le faamalosiauga. O le sini o lenei vaega e le na o le fesoasoani ia te oe e saili se galuega; ina ia fesoasoani atu foi ia te oe e faatino ma le usiusitai silisili ma le faatuatua i le Alii ma maua Ana faamanuiaga folafolaina o le ola tutoatasi faaletino ma faaleagaga.
O le a le vaega o le ola tutoatasi?
O le vaega o le ola tutoatasi e ese mai le tele o vasega, lesona, ma mafutaga faaleaoaoga a le Ekalesia. E leai ni faiaoga, taitai, po o ni tagata e faafoeina ni aoaoga. E aoao faatasi tagata o le vaega ma tuu atu le lagolago ma le faamalosiau i le tasi ma le isi. Tatou te tali atu i le tasi ma le isi mo a tatou tautinoga ma fefautuaai faatasi e foia ai faafitauli.
O a mea e fai e tagata o le vaega?
I taimi o fonotaga, e tautino atu tagata o vaega e faatino pe galulue. E le gata i lo tatou aoao ae faia mea ia tatou te ola tutoatasi ai. Tatou te faia ni tautinoga, fesoasoani le tasi i le isi e tausia na tautinoga, ma lipoti atu lo tatou alualu i luma. Talu ai ona e galulue le vaega o se aufono, e taua le auai soo i fonotaga ma ia i ai i le taimi tonu. Ia aumai i taimi uma le api galuega lenei, le tamaitusi O Lo’u Auala i le Ola Tutoatasi, ma le tamaitusi O Lo’u Faave: O Mataupu Faavae, o Tomai, o Mausa. O fonotaga faalevaega taitasi e pe tusa ma le lua itula. O le faatinoina o a tatou tautinoga e faaaluina ai le tasi i le lua itula i le aso.
O le a le mea e faia e le tagata e faagaoioia?
O tagata e faagaoioia e le ni tagata e tomai faapitoa i galuega po o le aoao atu. Latou te le taitaiina pe aoao atu le vaega. Na o le latou fesoasoani lava i le vaega ina ia mulimuli tonu ai i anomea e pei ona tusiaina. O se tagata tomai faapitoa i le ola tutoatasi e masani lava ona faagaoioia ia fonotaga faalevaega; ae peitai, e mafai ona tofia tagata o vaega e faagaoioia pe a mavae le tele o vaiaso, pe a manaomia. Ina ia aoao atili, tagai i le Taiala mo Taitai ma vitio e faatatau i ai i le srs.lds.org.
Tusi Faamaonia o le Maea o le Kosi
O tagata o vaega o e auai i fonotaga ma tausia a latou tautinoga o le a agavaa e maua se tusi faamaonia mo le ola tutoatasi mai le Kolisi Faapisinisi a le AAG. Tagai i le itulau 29 i le O Lo’u Faavae mo mea e manaomia.