Pene 16

« A Pûpû atu ai i Ta Oe ra mau Oro‘a i To’u Mahana Mo‘a ra »

Ia haamo‘a tatou i te mahana sabati e ia rave i te oro‘a mo‘a ma te ti‘amâ, e horo‘a mai ïa te reira ia tatou i te puai varua rahi atu.

No roto mai i te oraraa o George Albert Smith

I to’na tamarii-rii-raa, ua haapii o George Albert Smith i te faufaa o te faaturaraa i te mahana sabati. E mea pinepine te hoê pŭpŭ tamaroa no to’na vahi faaearaa e haere mai i to’na fare i te sabati i muri a‘e i te Haapiiraa Sabati no te ani ia’na ia haere e ha‘uti popo. Te parau ra oia e, « Hoê â to’u huru e to te mau tamaroa ». « Ua mana‘o vau e, e mea arearea roa ia haere e ha‘uti popo e i te tahi atu mau ha‘uti. Tera râ, e metua vahine faahiahia roa to’u. Aita oia i parau e, ‘Eita ta oe e nehenehe e haere e ha‘uti,’ e parau râ oia e : ‘E ta’u tamaiti, e rahi a‘e to oe oaoa mai te mea e, eita oe e haere e ha‘uti…’ te hinaaro nei au e parau atu ia outou e, te mauruuru nei au no taua huru haapiiraa ra i roto i te utuafare ».¹ E itehia te puai o te mau haapiiraa a to’na metua vahine i roto i te mau faahamana‘oraa pinepine a te peresideni Smith i te feia mo‘a e, e hopoi mai te haamo‘araa i te mahana sabati i te mau haamaitairaa rahi.

I roto i to’na ti‘araa ei Hui Mana Faatere, ua ti‘a ia George Albert Smith ia haere atu i te mau pureraa a te Ekalesia i te sabati i te mau vahi e rave rahi. A hi‘opo‘a ai oia i te feia mo‘a ia haamori i te sabati, ua oaoa oia ia ite i to ratou faatura i te oro‘a mo‘a : « Ua ite au e, e mea faufaa roa no te mau melo o te Ekalesia ia maramarama maitai i te huru mo‘araa o te oro‘a a te Fatu. … Te oaoa nei au ia ite i to tatou mau taea‘e e to tatou mau tuahine ia haere mai i te fare pureraa e ia rave i teie mau tapa‘o… ma te ti‘amâ ».² [A hi‘o mana‘o tauturu 1 i te api 190.]

Te mau haapiiraa a George Albert Smith

E ere te faaueraa a te Atua e ia haamo‘a tatou i te mahana sabati i te hoê hopoi‘a, e haamaitairaa râ.

Ua haapii mai [te Fatu] ia tatou ia haamana‘o i te mahana sabati ia haamo‘ahia ïa. Ua faataa oia hoê mahana i ni‘a i te hitu ei mahana no’na, e ia hi‘o tatou i te mau haamaitairaa ta’na i tuu mai i ni‘a ia tatou i te tahi atu mau mahana, te feruri nei au e, e mea ti‘a ia tatou ia ite i te oaoa i roto i te raveraa i te mau mea ta’na i ani mai ia tatou ia rave i to’na ra mahana mo‘a, e te ti‘aturi nei au e, ia ore tatou e na reira, e ore ïa e itehia ia tatou te oaoa. … Te hinaaro nei oia ia oaoa tatou e ua faaite mai oia ia tatou e nahea e roaa ai ia tatou taua oaoa ra.³

E ti‘a ia tatou ia feruri i te tumu o te mahana o te [Fatu] e ia farii i te faaururaa o te haamoriraa. Aue ïa te ohipa e oti i to te ao nei ahiri e, e faatura te mau tamarii atoa a to tatou Metua i te Ao ra—e e mau tamarii paatoa tatou na’na—i to’na hinaaro ia faarirohia te sabati ei mahana haamoriraa. Aita hoê rave‘a no te ite e, eaha te tauiraa maitai e tupu mai, eiaha i roto noa i to tatou nunaa, i roto atoa râ i te mau nunaa atoa o te ao nei ahani e, e faatura tatou i te mahana sabati e ia haamo‘a i te reira.⁴

Ua riro te sabati i teie nei ei mahana ha‘utiraa… e mahana i faataahia na te rahiraa tauatini taata no te ofati i te faaueraa ta te Atua i horo‘a mai e râ ê te tau, e ua papû roa ia‘u e, te tumu no te rahiraa o te oto e te ati e haape‘ape‘a nei e o te tamau noa â i te haape‘ape‘a i te taata nei, no to ratou ïa haamo‘eraa i ta’na a‘oraa ia haamo‘a i te mahana sabati.⁵ [A hi‘o mana‘o tauturu 2 i te api 190.]

Hoê o te mau a‘oraa matamua i a‘ohia i roto i teie afaa no [Roto Miti] e te peresideni Brigham Young, ua faaara oia i te taata ia faatura i te mahana sabati e ia haamo‘a i te reira, e noa’tu te fifi o to ratou oraraa eiaha roa ratou e haere e rave i te ohipa i te mahana sabati. … Ua faaitoito te Ekalesia a Iesu Mesia i te Feia Mo‘a i te Mau Mahana Hopea Nei i to’na mau taata ia haamana‘o e ia haamo‘a i te mahana sabati no te mea e mea au na to tatou Metua i te Ao ra ia na reira tatou.⁶

E haapii na tatou i teie mau tamaiti e teie mau tamahine [o te Ekalesia] e tupu mai ra i te paari, ia rave i te mau mea ta te Fatu e hinaaro ia rave ratou i te mahana sabati, e e mea maere ïa te faaururaa ta ratou e faatupu i roto i te vahi ta ratou e faaea ra. Mai te mea e, aita to te ao nei e tatarahapa i to ratou haapa‘o ore e to ratou tau‘a ore, mai te mea e, aita tatou te feia mo‘a i te mau mahana hopea nei, i roto i te mau huru e rave rahi, e tatarahapa i to tatou huru tau‘a ore i te mahana mo‘a o to tatou Metua i te Ao ra, eita ïa tatou e farii i te poupou e te oaoa atoa ta tatou e hinaaro ia oaoa i ô nei, e eita ïa te reira e roaa ia tatou no te tau mure ore.⁷

Te feruri nei te tahi mau taata e, mai te mea e, ua haere ratou i te pureraa e aore râ, ua rave ratou i te sabati i te tahi tuhaa o te ohipa i titauhia ia ratou, ua ti‘amâ ïa ratou ia arearea e ia rave i te tahi mau ohipa aore i au i te varua o te sabati e ia tamau noa i te fana‘o i te haamaitairaa a to tatou Metua. Te parau nei au ia outou e, outou tei ite i te mea maitai a‘e, mai te mea e, e tamau noa te mau melo o te Ekalesia i te faaino i te parau o te sabati na roto i te rave-tamau-raa i te mau faaoaoaraa o te ao nei, e mo‘e ê to ratou faaroo ; e faatea ê atu te Varua o to tatou Metua i te Ao ra ia ratou.⁸

E ere i te ohipa faufaa ore i te ofatiraa i te mahana sabati. Te hinaaro nei au e parau atu e, e pau outou i te mau taime atoa e ofati ai outou i te mahana sabati, e rahi atu to outou pau i ta outou e apî mai, noa’tu te mea ta outou e feruri ra e roaa mai ia outou.⁹

No te haamo‘e e [e mahana sabati] teie, o te mahana o te Fatu teie, mai ta te tahi o tatou e na reira nei, e aau mauruuru ore ia. Ua faataa oia hoê mahana i ni‘a i te hitu, eiaha ei hopoi‘a, no te horo‘a mai râ i te oaoa i roto i to tatou mau oraraa e no te faariro i to tatou mau fare ei vahi putuputuraa no te utuafare, ia putuputu te mau metua e te mau tamarii no te faarahi i to tatou here i te tahi e te tahi…

A faatura i te mahana sabati e a haamo‘a i te reira, e te feia mo‘a i te mau mahana hopea nei, e e horo‘a mai te reira i te oaoa rahi ia outou, i reira ho’i to tatou Metua i te Ao ra e tuu mai ai i ni‘a ia outou i te mau haamaitairaa no to outou haapa‘oraa i ta’na haapiiraa e ta’na a‘oraa.¹⁰

Ua riro te haereraa i te pureraa ei tuhaa faufaa i roto i te parau no te haamo‘araa i te mahana sabati.

Mai te peu e, e rave tatou i te mea ta to tatou Metua i te Ao ra i hinaaro ia rave tatou, e haere ïa tatou i to’na fare i te mahana sabati, e a rave ai i reira i te oro‘a mo‘a ei haamana‘oraa i te tusia tei ravehia no tatou e te Faaora o te taata nei.¹¹

E mahana teie [te mahana Sabati] no te Fatu ; e mahana teie ta’na i faataa i reira tatou e haamori ai ia’na, e i teie anotau hopea nei ua horo‘a mai oia i te tahi atu faaueraa, oia ho’i, ia haere tatou i te fare no te pure e no te haapaeraa maa i to’na mahana mo‘a ra, e i reira tatou e faaite ai i ta tatou mau hapa e e faaite ai i to tatou iteraa papû i mua i te aro o te tahi e te tahi [a hi‘o PH&PF 59:9–12]…

I roto i teie anotau faahiahia a ti‘a ai i te taata ia parahi ma te au maitai i te fare e a faaroo ai i te pehe o te ao nei e a faaroo ai i te mau parau a te taata, e i te mau a‘oraa, e faaea noa ratou i roto i to ratou iho mau fare mahanahana e ma te mana‘o paha e, te farii ra ratou i te mau mea atoa e roaa ia ratou ahiri ratou i haere i te vahi i faataahia no te mau pureraa.

Eiaha te feia mo‘a i te mau mahana hopea nei ia haavarehia i roto i teie tumu parau. E ere te parau ana‘e ta tatou i faaroo tei riro ei maitai, o te faaururaa atoa râ e itehia i roto i to tatou mau fare haamoriraa no ô mai i to tatou Metua i te Ao ra ra, tei riro ei mea faufaa rahi. E ratio paha ta tatou i roto i to tatou fare, tera râ, eita te reira e riro ei faufaa no tatou i te pae varua, mai ta tatou e farii papû mai te mea e, e haere tatou i te fare o te Fatu i to’na ra mahana mo‘a, i reira ho’i e ti‘a ai ia tatou ia amu i te oro‘a mo‘a e i reira ho’i e pure ai e e ti‘aoro ai i te mau haamaitairaa a to tatou Metua i te Ao ra e e farii ai i te [hoê] faaiteraa o te parau mau i faataahia no te faaora i te taata nei.¹² [A hi‘o mana‘o tauturu 3 i te api 190.]

E haamaitairaa mo‘a te amuraa i te oro‘a mo‘a i te mahana sabati.

Te mana‘o nei au e, penei a‘e ua ite te rahiraa o tatou e, e horo‘a rahi mau teie tei horo‘ahia mai ia tatou nei i te mau taime e ti‘a ai ia tatou ia putuputu i roto i te hau e te mărû, ia farerei amui tatou e ia rave i te mau tapa‘o o te tino fati e te toto o te Fatu i haamaniihia. E mea ti‘a, e te mana‘o nei au e o [te reira] mau hoa, i roto i to tatou feruriraa tata‘itahi, ua riro ei taime mo‘a roa e te hanahana no tatou ia ite e, te faaapî nei tatou i ta tatou mau fafauraa ia’na tei horo‘a i to’na ora ia ti‘afaahou tatou e ia faateiteihia. Ia rave ana‘e tatou i teie na tapa‘o, ua papû ia‘u e ua ite tatou paatoa e te oro‘a mo‘a, tei haamauhia e a’na hou a pohe ai oia, ia riro ïa te reira ei faateiteiraa e ei faaururaa e ei haamaitairaa no tatou e amuri noa’tu.¹³

E faufaa rahi to te oro‘a mo‘a. Na te Fatu Iho i faaue mai ia rave tatou i teie na tapa‘o. E rave rahi mau taata e ti‘aturi nei e, e mea titauhia ia bapetizohia, e ia farii i te tahi atu mau oro‘a o te Evanelia e ravehia no ratou, noa’tu râ te reira, e ere ratou i te mea tau‘a roa i te oro‘a mo‘a o te tamaaraa a te Fatu. Ua faariro to tatou Metua i te ra‘i ra i te reira ei ohipa faufaa roa, inaha, na roto i Ta’na Tamaiti here, e i te mau aposetolo e te mau peropheta, mai tei papa‘ihia i roto i te mau papa‘iraa mo‘a, ua a‘ohia i te feia mo‘a ia rave tamau noa i te reira. E toru o te mau haapii evanelia [papa‘i Evanelia] o te faahiti ra i te parau no te reira [a hi‘o Mataio 26:26–28 ; Mareko 14:22–24 ; Luka 22:19–20], e te ite nei tatou e, te haapii nei te mau papa‘iraa mo‘a, i te mau vahi e rave rahi, i te faufaa o te reira, mai tei haapiihia e te Fatu Iho a ora ai Oia i te tino nei. Aita te Metua i te Ao ra i horo‘a mai ia tatou i te mau faaueraa e aore râ, te a‘oraa aore e faufaa to roto. Ua haapii Oia ia tatou no to tatou faateiteiraa, no to tatou tupuraa e te hoturaa, e mai te mea e, e pee tatou i Ta’na a‘o, e faaineine te reira ia tatou ia ho‘i i mua i To’na aro. … Ua titauhia ia tatou ia putuputu i te mau sabati atoa e ia rave i te mau tapa‘o o te tino e te toto o to tatou Faaora i ti‘afaahou…

E ite atoa tatou i te reira parau i roto i te pene 18 o te Toru Nephi, i reira ho’i te Faaora i haapii ai i te nunaa i ni‘a i teie fenua [Amerika], mai Ta’na i haapii i Ta’na mau pĭpĭ i roto i te ao tahito ra ia haapa‘o i te oro‘a mo‘a. Teie to’na tai‘oraa :

« E amu ihora te mau taata, e pa‘ia a‘e ra, ua na ô atu ra oia i te mau pĭpĭ ra, inaha, e faatoro‘ahia te hoê no outou, e na’u e horo‘a’tu i te mana no’na ia vavahi oia i te pane, e e haamaitai ho’i, e e horo‘atu i te mau taata o ta’u nei ekalesia, ia ratou atoa e faaroo, e e bapetizohia i to’u ra i‘oa.

« E mai ta’u i rave iho nei, mai ta’u i vavahi i te pane, e i haamaitai atu, e i horo‘atu na outou na, e na reira atoa outou i te rave e amuri noa’tu ».

… Te na ô ra te irava i muri iho e :

« E na reira outou i te rave ei haamana‘oraa i to’u tino, o ta’u i faaite atu ia outou na. E e riro ïa ei faaite i te Metua e te haamana‘o ra outou ia‘u e amuri noa’tu. E e haamana‘o tamau â outou na ia‘u, e vai noa ta’u Varua i roto ia outou e amuri noa’tu ». [3 Nephi 18:5–7.]

… Taa ê noa’tu te reira, te ite nei tatou e, i to tatou nei anotau ua horo‘a mai te Fatu ia tatou i te heheuraa no ni‘a i taua tumu parau ra. I roto i te tuhaa 20 o Te Parau Haapiiraa e Te Mau Parau Fafau, te horo‘a mai nei te Fatu ia tatou i te mau arata‘iraa no ni‘a i te reira. I roto i te reira heheuraa, e haamata i te irava 75, te na ô ra Oia e :

« E mea ti‘a i to te Ekalesia ia tairuru pinepine mai ia amu i te pane e te uaina ei haamana‘oraa i te Fatu ra o Iesu ;

« E na te peresibutero e aore râ, na te tahu‘a e haamaitai i te reira ; e mai teie te huru o ta’na haamaitairaa i te reira—e tuturi oia e te ekalesia atoa… e e pii atu i te Atua na roto i te pure aau mărû, i te na-ô-raa’tu e— »

A hi‘o na i te pure nehenehe i raro nei… :

« E te Atua, te Metua Mure Ore, te ani atu nei matou ia oe na roto i te i‘oa o to Tamaiti, o Iesu Mesia, e haamaitai mai e e haamo‘a mai i teie nei pane na te mau varua atoa o te rave mai nei, ia amu ratou i te reira mai te haamana‘o i te tino o to Tamaiti ra, e ia faaite ratou ia oe, e te Atua, te Metua Mure Ore, e ti‘a ia ratou ia rave i te i‘oa o to Tamaiti i ni‘a iho ia ratou, e i te haamana‘o â Ia’na e amuri noa’tu, ma te haapa‘o maitai i Ta’na mau faaue Ta’na i tuu mai ia ratou ia vai noa to’na Varua i roto ia ratou e amuri noa’tu. Amene ». [PH&PF 20:75–77.]

Mai te reira atoa te haamaitairaa no te pape, fatata e aifaito noa [a hi‘o PH&PF 20:78–79].

E mea mo‘a, e mau mana‘o mo‘a roa tei faahitihia i roto i te pure oro‘a. Te a‘o atu nei au ia outou, e au mau taea‘e, ia faatere ana‘e tatou i te haamaitairaa o te oro‘a mo‘a, ia faahiti tatou… i te mau parau ti‘a tei horo‘ahia mai na roto i te heheuraa, e ia na reira tatou na roto i te Varua o te Fatu. Ia faahiti ana‘e tatou i teie mau pure, e mea ti‘a ia tatou ia ite i te mau mana‘o i faahitihia i roto i te mau ta‘o ta tatou e parau ra.¹⁴

Te măta‘u nei au i te tahi mau taime i te mea e, ia haamaitai-ana‘e-hia te oro‘a mo‘a i roto i te tahi mau pureraa ta tatou, aita e vai ra te faatura i titauhia. E haamaitairaa mo‘a teie. … O ratou o te [amu] i te oro‘a mo‘a e ti‘a ïa ia ratou ia haamana‘o i te titauraa tei faaitehia i roto i te pure.¹⁵ [A hi‘o mana‘o tauturu 4 i te api 190.]

Ia amu tatou i te oro‘a mo‘a ma te ti‘amâ, e faaapî te reira i to tatou puai varua.

Te amu nei tatou i te maa tino—oia ho’i, te amu nei tatou i te faraoa e te pape e te vai atu ra, no te faaamu i te tino. Ua titau-atoa-hia ia tatou ia amu i te mau tapa‘o o te tino e te toto o to tatou Fatu tei ti‘afaahou no te faarahi i to tatou puai varua. Te itehia ra e, te mau tane e te mau vahine o te ora e rave rahi matahiti ma te ore e amu i te Oro‘a a te Fatu, e mo‘e mărû noa ïa ia ratou te Varua o to tatou Metua i te Ao ra ; e mo‘e roa ïa ratou i to’na auhoaraa i reira to ratou fariiraa i taua haamaitairaa ra, ua haapae roa râ ratou i te reira…

Ua rave au i te hoê papa‘iraa i roto i te pene 11 o te Buka matamua a Korinetia, e haamata na te irava 23, tei na ô mai e :

« I noaa ho’i ia‘u i te Fatu ra ta’u i tuu atoa’tura ia outou na, e ua rave te Fatu ra o Iesu i te pane i te ru‘i i haavarehia mai ai oia ra :

« E oti a‘e ra ia’na te haamaitai i te Atua, vavahi ihora, na ô atu ra, A rave mai, a amu ; o ta’u tino teie e ofatihia no outou nei ; e na reira outou ei mana‘oraa ia‘u.

« E ua na reira atoa ho’i i te au‘a, ia oti a‘e ta’na amuraa, na ô atu ra, Teie nei a‘ua, o te faufaa apî ïa i to’u nei toto ; e na reira outou ia inu ei mana‘oraa ia‘u.

« Ua amu ana‘e outou i teie nei pane, e ua inu ana‘e i teie nei a‘ua, ua faaite â ïa outou i te pohe o te Fatu, e tae noa mai oia ra.

« E teie nei, o te amu i teie nei pane e o te inu i te au‘a a te Fatu nei ma te au ore ra, e hara ïa i te tino e te toto o te Fatu.

« E hi‘opo‘a maite râ te taata ia’na iho, a amu ai oia i taua pane ra, a inu ai i taua a‘ua ra.

« O tei amu ho’i e o tei inu ma te au ore ra, ua amu ïa e ua inu i te pohe no’na iho, oia aore i hi‘o i te tino o te Fatu ra.

« No reira i rahi ai te pohe ma‘i e te paruparu i roto ia outou na, e i taoto ai ho’i e tahi pae ». [1 Korinetia 11:23–30.]

… Te hinaaro nei au ia ite outou e, e fifi outou mai te mea e, e rave outou i te reira [e rave i te oro‘a mo‘a] ma te ti‘amâ ore. Hou a rave ai tatou i te oro‘a mo‘a, ei aau viivii-ore to tatou e ti‘a ai ; ei rima mâ to tatou e ti‘a ai ; e faaru‘e tatou i te mau huru inoino atoa i ni‘a i to tatou mau hoa ; ei hau tatou e to tatou mau hoa ; ia vai i roto i to tatou aau te hoê hinaaro ia rave i te hinaaro o to tatou Metua e ia haapa‘o i Ta’na mau faaueraa atoa. Mai te mea e, e na reira tatou, e riro ïa te amuraa i te oro‘a mo‘a ei haamaitairaa no tatou e e faaapî te reira i to tatou puai varua…

… E mea ti‘a ia tatou ia feruri maitai i te mau fafauraa ta tatou e rave i mua i to tatou Metua. E haapa‘o papû tatou i taua mau fafauraa ra, e e hi‘o maitai tatou e, te amu ra tatou e te inu ra tatou ma te ti‘amâ, ia haamaitaihia to tatou varua e ia faarahihia to tatou puai varua. No outou teie mau haamaitairaa, e au mau taea‘e e au mau tuahine, no te utuafare faaroo. E ti‘a ia tatou ia mauruuru i te reira, e ia ora ma te ti‘amâ no te reira, e ia ti‘a ho’i ia tatou ia faaite i to tatou faaroo na roto i to tatou oraraa. Eiaha roa’tu te hoê o tatou ia topa i raro a‘e i te faahaparaa na roto i te amuraa i te oro‘a mo‘a ma te ti‘amâ ore, ei reira ho’i tatou e ere ai i te auhoaraa o te Varua o to tatou Metua.¹⁶

E ti‘a ia tatou ia amu i te reira [te oro‘a mo‘a] ma te haehaa, ma te faaineine i te rima mâ e te aau viivii-ore, e ma te hinaaro ia fariihia tatou e to tatou Metua ; ei reira tatou e farii ai i te reira ma te ti‘amâ, e ma te oaoa i roto i te mau haamaitairaa ta tatou e farii.¹⁷

Ia haamaitai mai te Fatu ia tatou; ia tamau noa To’na Varua i te niniihia mai i ni‘a iho ia tatou. E mata na tatou i te here te tahi e te tahi, mai ta to tatou Metua i faaue mai ia tatou ia na reira. Mai te mea e, e nehenehe ta tatou e amu i te oro‘a mo‘a ma te ti‘amâ, e nehenehe ïa ta tatou e here te tahi e te tahi, mai ta to tatou Metua i faaue mai ; e ia haamana‘o e, ua parau mai Oia ia tatou e : « Mai te mea aita outou e riro ei hoê ra e ere ho’i outou no’u nei ». PH&PF 38:27]¹⁸ [A hi‘o mana‘o tauturu 5 i te api 191.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tauturu, a hi‘o i te mau api v–viii.

A tai‘o i te paratarafa hopea i te api 181. Ahiri e, e haere mai te Peresideni o te Ekalesia i roto i ta outou pureraa oro‘a, i to outou mana‘oraa eaha te mau mana‘o e tupu mai i roto ia’na ? Eaha ta outou iho e nehenehe e rave no te faaite i te faatura rahi a‘e i te Fatu e i te oro‘a mo‘a ?
A feruri hohonu i te mau parau a te peresideni Smith i roto i te paratarafa piti e te toru i te api 183. Nahea te oraraa sotaiete i te haamaitaihia ahiri e, e rahi atu te taata i te faatura i te mahana sabati ? Eaha te tahi mau rave‘a tano no te tauturu i to tatou utuafare e ia vetahi ê ia faariro i te haapa‘oraa i te mahana sabati ei haamaitairaa eiaha râ ei hopoi‘a ?
Eaha te tahi mau maitai no te haamori-amui-raa i te sabati o te ore e roaa ia tatou na roto noa i te tuatapaparaa i te evanelia i roto i to tatou utuafare ? (A hi‘o api 185) no te tahi mau hi‘oraa ; a hi‘o atoa PH&PF 59:9–12.)
A tai‘o ai outou i te tuhaa e haamata i te api 185, a feruri maite i te mea te ti‘a ia outou ia rave no te faariro i te oro‘a o te oro‘a mo‘a ei tuhaa faufaa rahi atu no to outou oraraa. Eaha te tahi mau rave‘a maitai no te tauturu i te mau tamarii ia faaineine no te oro‘a mo‘a e ia faaite i te faatura i te reira ?
A tai‘o ai outou i na paratarafa hopea e maha o te mau haapiiraa (mau api 189–90), a imi i te mau mea ta te peresideni Smith e parau nei e, na te reira e faati‘a ia tatou ia amu i te oro‘a mo‘a ma te ti‘amâ. I to outou mana‘oraa no te aha te amuraa i te oro‘a mo‘a ma te ti‘amâ e faarahi ai i to tatou puai varua ?

Te mau papa‘iraa mo‘a : Exodo 20:8–11 ; Isaia 58:13–14 ; Mataio 18:20 ; 3 Nephi 18:1–12 ; 20:8–9 ; Moroni 6:5–6

Tauturu haapiiraa : « Te hoê orometua aravihi eita oia e feruri e, ‘Eaha ta’u e rave i roto i te piha haapiiraa i teie mahana ?’ e ui râ oia e, ‘Eaha ta ta’u mau piahi e rave i roto i te piha haapiiraa i teie mahana ?’; eiaha, ‘Eaha ta’u e haapii ?’ e ui râ e, ‘Nahea vau ia tauturu i ta’u mau piahi ia ite eaha te ti‘a ia ratou ia ite ?’ » (Virginia H. Pearce, i roto i Te Haapiiraa, Aita e Piiraa Teitei A‘e, 61).

« A faatura i te mahana Sabati e a haamo‘a i te reira, e te feia mo‘a i te mau mahana hopea nei, e e hopoi mai te reira i te oaoa rahi ia outou ».

« Ia riro te oro‘a mo‘a, tei haamauhia e [te Fatu] hou a pohe ai oia, ei faateiteiraa e ei faaururaa ia tatou e ei haamaitairaa e amuri noa’tu ».