Pene 19

Te mau Haamaitairaa Pae Tino e Pae Varua no roto mai i te Parau Paari

Ua horo‘a mai to tatou Metua i te Ao ra i te Parau Paari no te haamaitai ia tatou i te hoê tino maitai e no te faaineine ia tatou no te ora mure ore

No roto mai i te oraraa o George Albert Smith

I te tamariiraa o George Albert Smith, ua tupuhia oia i te ma‘i fiva aau. Ua parau te taote i hi‘opo‘a ia’na i to’na metua vahine e, e mea ti‘a ia’na ia faaea noa i ni‘a i te ro‘i e toru hepetoma te maoro, eiaha e amu i te maa paari, e ia inu i te taofe. Te parau ra te peresideni Smith i muri a‘e e :

« Ia ho‘i te taote, ua parau atu vau i to’u mama e, aita vau e hinaaro i te taofe. Ua haapiihia ia‘u e te Parau Paari, ta te Fatu i horo‘a ia Iosepha Semita, te a‘o mai nei ïa ia tatou eiaha e faaohipa i te taofe.

« Ua fanau mai to’u metua vahine e toru tamarii i te ao nei e e piti tei pohe. E haape‘ape‘a rahi taa ê to’na no’u ».

Ua ani râ teie taure‘are‘a o George Albert Smith i te hoê haamaitairaa autahu‘araa, o ta’na i farii na roto mai i to’na taea‘e hahaere.

« Ia ho‘i mai te taote i te po‘ipo‘i a‘e te ha‘uti ra vau i rapae e te tahi atu mau tamarii. Ua maere oia. Ua hi‘opo‘a oia ia‘u e ua ite a‘e ra e ua pee to’u fiva, e mai te mea ra e, e mea maitai au.

« Ua mauruuru vau i te Fatu no te mea ua ora vau. Ua papû maitai ia‘u e, ua faaora Oia ia‘u ».¹

Ua hinaaro te peresideni Smith ia haroaroa te feia mo‘a e, ia haapa‘o ratou i te Parau Paari e hopoi mai te reira eiaha i te tino maitai ana‘e, i te mau haamaitairaa pae varua atoa râ. I roto i te hoê tuhaa pureraa autahu‘araa no te amuiraa rahi, ua faati‘a oia i te aamu o te peropheta Daniela no te Faufaa Tahito, tei haruhia e tei afa‘ihia’tu i Babulonia e tei titauhia ia amu i te maa e ia inu i te uaina a te arii :

« E peropheta o Daniela na te Atua, e e peropheta oia no te mea, ua haapa‘o oia i te mau faaueraa a te Atua. Te hinaaro nei au ia… tape‘a outou i teie parau poro‘i na outou. Ua haapa‘o o Daniela e to’na mau hoa i te mau haapiiraa a te Atua, no ni‘a i ta ratou huru maa e te inu, e ua pato‘i ratou i te maa i tuuhia i ni‘a i te amuraa maa a te arii. [A hi‘o Daniela 1:3–16.] »

Te parau ra te peresideni Smith e, no to Daniela haapa‘o i te ture no te ora maitai a te Fatu i to’na ra anotau, e ere to’na ora ana‘e tei faahereherehia, ua farii atoa râ o Daniela i te haamaitairaa rahi i te pae varua : « te faaururaa a te Manahope ».² [A hi‘o mana‘o tauturu 1 i te api 226.]

Te mau haapiiraa a George Albert Smith

Te Parau Paari o te hoê ïa a‘o here no ô mai i to tatou Metua ra, tei ite ho’i i te mau mea atoa.

E tai‘o atu vau ia outou i te hoê tuhaa o te parau ta te Fatu i parau i to te Ekalesia i te 27 no fepuare 1833.

« Te hoê Parau Paari, ei maitai no te apooraa o te mau tahu‘a teitei, i putuputuhia i Ketelani, e no te ekalesia, e no te feia mo‘a i Ziona atoa ho’i—

« Ia tuuhia’tu ei aroha ; eiaha na roto i te faaueraa e aore râ, te tape‘araa, na roto râ i te heheuraa e te parau no te paari, ma te faaiteraa mai i te haapa‘oraa e te hinaaro o te Atua i te faaoraraa tahuti nei o te feia mo‘a atoa i te mau mahana hopea nei ».

E tena na, a feruri na i te reira maa taime iti— » i te faaoraraa tahuti nei o te feia mo‘a atoa i te mau mahana hopea nei ».

« I horo‘ahia mai ei parau tumu ma te fafauraa ho’i, i faaauhia i te huru no te ti‘araa o tei paruparu e tei paruparu roa a‘e o te feia mo‘a atoa ra, o te parauhia nei e aore râ, o te ti‘a ia parauhia ra ei feia mo‘a ». [A hi‘o PH&PF 89:1–3.]

Te tamau noa nei te Fatu i te parau mai ia tatou i te mau mea maitai no tatou, i te faataa mai i te huru maa hinaarohia ia faaohipa tatou, e te faaara mai nei oia ia tatou i te tahi mau mea tei riro ei mau mea ino [a hi‘o PH&PF 89:5–17].

Mai te mea ra ia‘u e, tatou te taata nei ua haamaitaihia tatou ma te faahiahia. … Ua aroha mai te Fatu ia tatou, no te faaara mai ia tatou, no te haapii mai ia tatou e no te faaara mai ia tatou no ni‘a i te mau mea e rave rahi.³

Te faariro nei au i te Parau Paari mai te hoê a‘o maitai na to tatou Metua i te ra‘i ra, o te hinaaro nei ia ite i Ta’na mau tamarii ia riro mai Ia’na. … E faariro vau i te reira mai te a‘o a te hoê metua, no to’na ite i te mea ta’u i hinaaro, na ô mai nei ia‘u e : « E ta’u tamaiti, e ere teie mau mea i te mea maitai no oe, e mai te mea e, e haapae oe i te reira, e horo‘a’tu vau i te hoaraa o to’u Varua Mo‘a e te oaoa a ora ai oe i roto i te ao nei e i te hopea ra i roto i te ora mure ore ». Aue ïa to’u maamaa ia amu vau i teie mau mea i rahuihia, ma te ite papû e, ua a‘o mai te Fatu e ti‘a ia‘u ia haapae i te reira. E feruri au e, e faahapahia vau mai te mea e, e amu vau i te reira mau mea, noa’tu e, ua parau mai Oia tei hau a‘e te ite i te tahi atu taata e, e mea ino te reira, e ua faaara mai ia‘u eiaha e rave i te reira…

… Ua feruri Oia e mea faufaa ia horo‘a mai i te reira ia tatou nei, e ia faaara mai ia tatou, e mai te mea, O’na o tei ite i te mau mea atoa, ua feruri Oia e, e mea faufaa ia horo‘a mai i te haapiiraa e te a‘o i ni‘a i teie mau mea no te tino nei, ua titauhia ïa ia tatou, tatou tei ore i ite i te mau mea e tupu mai ananahi, ia haapa‘o maitai i taua a‘o a te Atua ra. Te feruri nei au e, i roto i te Parau Paari, ua roaa i te feia mo‘a i te mau mahana hopea nei hoê ture o te faateitei ia ratou e o te huti ia ratou i ni‘a a‘e i te feia o te ore e haapa‘o i te reira.⁴

Te evanelia a Iesu Mesia o te faaherehereraa ïa i te mau varua, e o te tino ho’i te parahiraa no te varua, no te oaoa mure ore. Aue ïa tatou i te maamaa mai te mea e, e rave tatou i te mau peu a to te ao nei ! … I roto i to’na maitai e to’na here, ua [faaara] mai to tatou Metua i te Ao ra e : « No te mau ino e te mau uma e vai nei e o te vai â ho’i i roto i te aau o te mau taata opuaraa ino i te mau mahana hopea, ua faaara vau ia outou na, e te faaara nei ho’i au ia outou na mua roa ra, na roto i te horo‘araa’tu ia outou teie parau no te paari na roto i te heheuraa ». (PH&PF 89:4) … Te tumu o te evanelia a Iesu Mesia no te faaineine ïa ia tatou ia haroaroa i te nehenehe o te oraraa mai ta te Fatu i faaite mai e nahea ia ora i te reira, na roto i te parauraa mai ia tatou nahea tatou ia ape i te mau mea e haamou nei i te ao nei.⁵

Te ti‘aturi ra anei outou e, na te Fatu i horo‘a mai ia tatou i te Parau Paari ? Te mana‘o mau ra anei outou e, ua ite oia eaha te mea maitai no tatou ? Te mana‘o ra anei outou e, e mauruuru oia mai te mea e, e haapa‘o tatou i taua ture ra ? Ua parau oia e, e mauruuru oia. Te mana‘o ra anei outou e, e te reira ihoa to’na mana‘o ?⁶

E te mau taea‘e e te mau tuahine, eita ta tatou e nehenehe e hi‘o haapa‘o ore noa i te Parau Paari ma te faahapa-ore-hia. Ua horo‘ahia mai te reira ei a‘o e ei haapiiraa, eiaha na roto i te faaueraa e aore râ, i te faaheporaa, ei parau paari râ, no ô mai i to tatou Metua ra, no te faaoraraa tahuti o to tatou tino e no te faaineineraa i to tatou mau varua no te ora mure ore.⁷ [A hi‘o mana‘o tauturu 2 i te api 226.]

Ua fafau mai te Fatu i te ea o te feruriraa e o te tino i te feia e haapa‘o i te Parau Paari.

Te mauruuru nei au no taua Parau Paari faahiahia ra, te ohie, e mai ta te Fatu i parau ra, « i faaauhia i te puai o tei paruparu e aore râ, o tei hau i te paruparu i te feia atoa e piihia e aore râ, e nehenehe ia piihia e feia mo‘a ». Te ui nei au e… ua ti‘a anei tatou ia piihia e, e feia mo‘a ? O te feia atoa e ti‘aturi nei ia piihia ei feia mo‘a, e ti‘a ïa ia ratou ia haapa‘o i te Parau Paari. Eaha ïa te auraa o te reira no tatou ? E horo‘a mai te reira ia tatou i te mărû o te oraraa, e iriti-ê-hia te mahu taero ta te mau taata e rave rahi e huti nei na roto i te puhipuhiraa i te avaava. Aita ïa tatou e hau‘a i te hau‘a ne‘one‘o na roto i te amuraa i te avaava. E mai te mea e, e haapa‘o tatou i te reira ture, e paruru te reira ia tatou i te mau ati o te tupu mai na roto i te amuraa i te [raau taero] e vai ra i roto i te ti e te taofe, e i te mau ati rahi ta te ava e faatupu mai…

Aita to tatou Metua i te Ao ra i parau noa mai ia tatou eaha te mau mea ta tatou e haapae, ua parau atoa mai râ Oia ia tatou eaha te mea ta tatou e nehenehe e faaohipa ei maitai no tatou ». Ua parau mai Oia ia tatou e, te mau huero atoa, te mau aihere maitai atoa, te hotu o te vine e te vai atu ra, e mea maitai ïa no te taata. Te i‘o o te puaa e o te mau manu o te reva ; e teie mau mea ta’na e parau nei, e mea ti‘a ia tatou ia faaohipa-au-noa e ma te aau mauruuru ; e te hinaaro nei au i te haapapû ma te aau mauruuru.⁸

Te ite nei tatou e faatupu mai te haapa‘oraa i te mau ture no te ea i te puai o te feruriraa e o te tino, e te ite nei tatou e, ia haapa‘o-ore-hia te reira, e ino ïa te feruriraa e te tino. Na Tei hamani ia tatou, te Metua no to tatou varua, i horo‘a mai ia tatou i te rave‘a ia parahi i ni‘a i teie fenua, tei parau e, te tahi mau mea i faahitihia i roto i taua heheuraa ra, e ere i te mea maitai no tatou. Ua horo‘a mai Oia ia tatou i te mau fafauraa faufaa roa, mai te mea e, e haapa‘o tatou i teie ture—te mau fafauraa no te paari, no te ea e te puai, e e fariu ê atu te melahi o te pohe ia tatou e ore e taparahi ia tatou, mai ta’na i rave i te mau tamarii no Iseraela ra [a hi‘o PH&PF 89:18–21].⁹ [A hi‘o mana‘o tauturu 3 i te api 226.]

E haapuai te haapa‘oraa i te Parau Paari i to tatou faaroo e to tatou oraraa varua.

Ua ite papû vau e, i roto i To’na aroha, a horo‘a mai ai te Fatu ia tatou i te Parau Paari, ua horo‘a mai te Fatu i te reira ia tatou, eiaha ia roaa noa te ora maitai ia tatou a ora ai tatou i roto i te ao nei, ia haapuai-atoa-hia râ to tatou faaroo, ia faarahihia to tatou iteraa papû no ni‘a i te hanahana o te misioni a to tatou Fatu, e na roto i te reira, ia ineine hau atu tatou no te ho‘i i mua i to’na aro ia hope ta tatou ohipa i ô nei. Te măta‘u nei au i te mea e, tatou te mau tamaiti e te mau tamahine no Ziona, i te tahi taime aita tatou e ite nei i te faufaa o teie parau poro‘i rahi i to te ao nei.¹⁰

Te hinaaro nei au e parau atu ia outou e, i to’u mana‘oraa, te faaohiparaa i te avaava, e mea iti ha‘iha‘i roa i te hi‘oraa a te tahi mau taata, o te rave‘a ïa i haamouhia ai to ratou ora pae varua, o te rave‘a ïa i ti‘avaruhia’i te Varua o to tatou Metua, tei faataa ê ia ratou i te oraraa o te tane e te vahine maitai, e ua faatae mai i ni‘a ia ratou i te haamo‘eraa e te faahaparaa a te mau tamarii ta ratou i fanau ra, e e parau ho’i te diabolo i te hoê taata e, Auê, e ohipa iti ha‘iha‘i noa te reira !¹¹

Te ora nei tatou i te hoê anotau a paraparau faahou mai ai te Fatu i To’na mau taata. Tatou te mau melo o te Ekalesia, tei haapa‘o i te mau titauraa a to tatou Metua i te ra‘i ra, ua ite maitai tatou e, te ora nei te Atua e e faautu‘a maitai Oia i te feia o te tavini itoito Ia’na. Ua maramarama tatou e, ua horo‘a mai oia i te tahi mau ture e te tahi mau arata‘iraa no te faatere ia tatou i roto i teie oraraa, e ia haapa‘o tatou i Ta’na mau titauraa, e roaa ïa ia tatou To’na oaoa, e te mau haamaitairaa i fafauhia ra, e apee mai te reira i to tatou haapa‘o ; tera râ, ia ore tatou e haapa‘o i Ta’na mau haapiiraa, mai te mea e, aita tatou e tau‘a i Ta’na mau a‘o paari, aita ïa ta tatou e fafauraa Ia’na ra, e te haamau‘a nei ïa tatou i te mau rave‘a o te ore e tae faahou mai ia tatou nei. Te ite nei au i te faufaa rahi no te feia mo‘a i te mau mahana hopea nei ia haapa‘o i teie ture taa ê [te Parau Paari]. Te ti‘aturi nei au e, na roto i te haapa‘oraa i te reira ture, e rahi atu te faaroo e oaoahia e te feia mo‘a i te mau mahana hopea nei. Te tai‘o nei tatou i roto i te mau haapiiraa a Moromona e, mai te mea e, aita i tupu te mau semeio i rotopu i taua mau taata ra, no te mea ïa e, aita to ratou e faaroo ; e ua parau oia ia ratou, i muri rii a‘e e, ia ore te faaroo, « ua riro to te taata huru ei mea ahoaho ». [A hi‘o Moroni 7:37–38.] Mai te mea e, e ofati tatou i te hinaaro itehia o te Fatu, eiaha ïa tatou e maere ia iti to tatou faaroo, no te mea, e ore roa te Varua e aro tamau noa ia tatou…

… Te ti‘aturi papû nei au e, na roto i te haapa‘o-ore-raa i teie titauraa ha‘iha‘i roa, e iti mai te faaroo i roto i te aau o te tahi o to tatou mau taata—e, na roto i te hoê haapa‘oraa taatoa i te Parau Paari, e rahi faahou ïa te faaroo i roto i te feia mo‘a i te mau mahana hopea nei, ei reira te ite rahi atu e tahe mai ai i roto ia tatou ; no te mea, na roto i te haapa‘oraa i te reira, e roaa mai te mana‘o ia haapa‘o i te tahi atu mau ture a to tatou Metua, e na roto i te haapa‘oraa i te reira mau ture, e roaa mai ïa te haamaitairaa.¹² [A hi‘o mana‘o tauturu 3 e 4 i te mau api 226–27.]

Na roto i te haapa‘oraa i te Parau Paari, te faaineine ra ïa tatou ia tatou no te ora mure ore.

I te tahi mau taime te uiui nei au e, ua ite anei te feia mo‘a i te mau mahana hopea nei e, ua horo‘ahia mai [te Parau Paari] ia tatou nei no to tatou faateiteiraa ; eiaha no to tatou noa maitai i te pae tino, no te faaineine atoa râ ia tatou no te ora pae varua…

Ua parauhia mai ia tatou e, te hanahana o te Atua o te maramarama ïa [a hi‘o PH&PF 93:36], e te faahiahia nei tatou i te mau tane e te mau vahine maramarama, no reira, e mea ti‘a ia vai te hinaaro i roto ia tatou ia haamau i te niu no te faarahi i te puai o te feruriraa, e eiaha roa’tu e rave i te hoê mea no te haaparuparu i te reira. Te itehia nei i roto i te oraraa o te tahi mau taata, te faaere nei ratou ia ratou iho i te puai o te roro e ti‘a ia ratou ia fana‘o, na roto i te faaohipa-tamau-raa i te mau mea ta to tatou Metua i te Ao ra i parau mai e, e ere i te mea maitai ; i te pae hopea, ua iti to ratou maramarama, e aita ratou e rave i te faaineineraa no te ora mure ore o te ti‘a ia riro ei fâ teitei na ratou.¹³

Mai te mea e, te ti‘aturi nei tatou mai ta tatou e poro nei e, o Iesu te Mesia, e e tamarii tatou na to tatou Metua i te Ao ra, e mea ti‘a ïa ia tatou ia haapa‘o maitai ia ti‘amâ tatou no te mau hiero ta tatou e parahi nei, tei hamanihia i te hoho‘a o te Atua. E hia rahiraa o tatou o tei ite e, ia tuu ana‘e tatou i roto i to tatou tino i te mau mea ta to tatou Metua i rahui, te haaviivii ra ïa tatou i te hiero o te varua ? E hia rahiraa o tatou e faaea nei i te feruri e, ia faati‘a ana‘e tatou i te ino o te tino, te faaere ra ïa tatou ia tatou iho i te mau rave‘a e tia’i maira ia tatou amuri a‘e, e te tapu ra tatou ïa tatou iho i te mau haamaitairaa ta te Fatu i haaputu na te feia haapa‘o ?¹⁴

Mai te mea e, e haapa‘ohia teie ture, o tei faaauhia i ni‘a i te puai o te taata paruparu a‘e i rotopu ia tatou, e riro ïa te reira ei niu i ni‘a iho i te reira e amuihia mai ai e rave rahi mau haamaitairaa rarahi ta to tatou Metua e tuu mai i ni‘a ia tatou ma te oaoa, o te ore roa ho’i e roaa ia tatou na roto i te tahi atu rave‘a. Nahea tatou e nehenehe ai e feruri e, e faati‘ahia tatou ia tau‘a ore i te hoê ture ha‘iha‘i roa a te Atua o Ta’na ho’i i parau na roto i To’na iho vaha e, e nehenehe tatou tata‘itahi e haapa‘o ? E nehenehe anei ta tatou e ti‘aturi e, e ti‘a ia tatou ia haapa‘o i te hoê ture teitei a‘e, e ia farii i te faateiteiraa rahi a‘e, mai te mea e, aita tatou e haapa‘o i teie titauraa ha‘iha‘i roa ?¹⁵ [A hi‘o mana‘o tauturu 3 i te api 226.]

Te rave‘a maitai a‘e no te haapii i to tatou utuafare ia haapa‘o i te Parau Paari o te haapa‘oraa ïa tatou iho i te reira.

E nehenehe i te mau metua tane e te metua vahine, mai te mea e haapa‘o ratou i te Parau Paari, e horo‘a i roto i ta ratou mau tamarii i te mau maitai e te puai o te ore roa e noaa ia ratou i te horo‘a na roto i te tahi atu rave‘a. Te ti‘aturi nei au e, e parahi ïa te Varua o to tatou Metua i roto i te aau e i te mau utuafare o te feia e haapa‘o i teie ture, e tera hinaaro to ratou ia riro ei mau taata haapa‘o, e faataehia ïa i roto i ta ratou mau tamarii. … Ua ite-papû-hia e, e mea ino roa te ohipa ta te avaava e faatupu i ni‘a i te roro o te hoê tamarii, e haamou te reira i te haamana‘oraa, e e haaparuparu i te mau uaua ; mai te reira atoa te ava, e faaino te reira i te roro o te tamarii apî : e haamou oia i te hinaaro ia riro ei taata tura e te parau-ti‘a, e e arata‘i ho’i te reira i roto i te ino e te taparahiraa taata. … Ua horo‘a mai te Fatu ia tatou i teie ture na roto i te maitai e te here, ma te fafau mai i te tahi mau haamaitairaa mai te mea e, e haapa‘o tatou i Ta’na a‘o. Te hinaaro nei au e faaitoito ia outou, e au mau taea‘e e au mau tuahine, ia haapii i teie i roto i to outou mau utuafare. A faaite i te reira i ta outou mau tamarii, e a faaite atoa i te utu‘a maitai i faatumuhia i ni‘a i te haapa‘oraa i te reira.

Te parau atu nei au ia outou e, te faaiteraa maitai roa a‘e o to tatou faaroo i taua ture ra, ta tatou e ti‘aturi nei e, no ô mai ïa i te Atua ra, o te haapa‘o-tamau-raa ïa i te reira i roto i to tatou mau oraraa. E nehenehe paha ia tatou ia poro i te reira i te taatoaraa o te mahana, tera râ, mai te mea e, e haapa‘o ore tatou i te reira, e riro ïa to tatou hi‘oraa ei ino rahi no te feia ta tatou e here nei no te mea, e mana‘o ratou e, e nehenehe ta ratou e pee ma te pe‘ape‘a ore i te vahi ta tatou e arata‘i nei.¹⁶

Te taparu nei au ia outou, a imi i te Parau Paari na roto i te pure. Eiaha e tai‘o noa i te reira ; a imi râ na roto i te pure. A imi i te tumu i horo‘a mai ai to tatou Metua i te Ao ra i te reira. Ua horo‘a mai Oia i te reira ia tatou ma te hoê fafauraa no te oraraa roa‘e e te oaoa, eiaha no to tatou haapa‘o-ore-raa i te reira, no to tatou râ haapa‘o. A tai‘o i te Parau Paari i mua i to outou mau utuafare e a faaite i te hi‘oraa. Mai te mea e, e na reira tatou, e tamau noa ïa o Ziona i te tupu i te rahi. Mai te mea e na reira tatou, e tamau noa ïa te Ekalesia a te Arenio a te Atua i te riro ei puai no te maitai i roto i te ao nei.¹⁷ [A hi‘o mana‘o tauturu 5 i te api 227.]

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tauturu, a hi‘o i te mau api v–viii.

I te api 219, te faahiti nei te peresideni Smith i te aamu o Daniela i te pato‘iraa ia amu i te maa e te uaina a te arii. A tai‘o Daniela pene 1, e a feruri i te hoê iteraa tei roaa ia outou i te taime a titauhia ai ia outou ia amu i te hoê mea tei rahuihia i roto i te Parau Paari. Eaha te tahi mau rave‘a tano no te haapa‘o i te Parau Paari i roto i te mau taime e titauhia outou ia vai faatura noa ia vetahi ê ?
A tai‘oa faahou i te tuhaa matamua o te mau haapiiraa (te mau api 219–21. Nahea e ti‘a ai ia outou ia faaohipa i teie mau haapiiraa no te tauturu i te hoê taata e fifi nei i te haapa‘o i te Parau Paari ?
A hi‘opo‘a poto noa i te mau api 221–24, i reira to te peresideni Smith tau‘a parauraa i te tahi mau haamaitairaa i fafauhia i te feia e haapa‘o i te Parau Paari (a hi‘o atoa PH&PF 89:18–21). Nahea teie mau fafauraa i te tupuraa i roto i to outou oraraa ? Eaha te tahi atu mau haamaitairaa tei fariihia e outou na roto i to outou haapa‘oraa i teie ture ?
I te api 223, te fafau nei te peresideni Smith e, na roto i te haapa‘oraa i te Parau Paari, e horo‘a mai te reira i te « hinaaro ia haapa‘o ». Eaha te auraa o teie parau no outou ?
I to outou mana‘o, nahea to tatou haapa‘oraa i te Parau Paari i te tauturu i te Ekalesia « ia riro ei puai no te maitai i roto i te ao nei » ? (api 225). Na roto i te pure a tuatapapa i te tuhaa 89 o Te Parau Haapiiraa e Te Mau Parau Fafau, mai tei parauhia mai e te peresideni Smith, e a feruri eaha ta outou e nehenehe e rave no te haapa‘o maitai atu â i te Parau Paari.

Te mau papa‘iraa mo‘a : 1 Korinetia 6:19–20 ; Alama 34:36 ; Te Parau Haapiiraa e Te Mau Parau Fafau 29:34 ; 130:20–21

Tauturu haapiiraa : « E nehenehe outou e faaite i te here i te feia ta outou e haapii na roto i te faaroo-maitai-raa ia ratou e te faaiteraa i to outou anaanatae papû i roto i to ratou mau oraraa. E mana to te here o te Mesia no te tamarû i te mau aau e no te tauturu i te taata ia faaroo i te muhumuhu a te Varua » (Te Haapiiraa, Aita e Piiraa Teitei A‘e, 46).

Ua haapii mai te peresideni Smith i te reira no te mea ua haapa‘o o Daniela i te ture no te ora maitai a te Fatu i to’na ra anotau, ua ti‘a ti‘amâ oia no te farii i « te faaururaa a te Manahope ».

Aita to tatou Metua i te Ao ra i parau noa mai ia tatou eaha te mau mea ta tatou e haapae, ua parau atoa mai râ Oia ia tatou eaha te mea ta tatou e faaohipa ei maitai no tatou ».