Pene 24

Te Oraraa Parau-Ti‘a i roto i te mau Tau Ati Rahi

Na roto i to tatou haapa‘o-maitai-raa i te evanelia, e nehenehe ta tatou e ite i te parururaa i mua i te mau ati rahi o to tatou nei anotau e e riro tatou ei faaururaa maitai i roto i te ao nei.

No roto mai i te oraraa o George Albert Smith

Ua tavini o George Albert Smith ei Hui Mana Faatere Rahi i roto i te afa matamua o te tenetere 20. I roto i taua pu‘e tau ra e rave rahi mau ati rarahi tei tupu i roto i te ao nei, mai te ati o te Topatariraa Rahi i te Pae Faarava‘iraa Faufaa e na tama‘i e piti o te ao nei. No teie mau ino rahi, e no te mea ta’na i parau ra e, te hi‘araa rahi i te pae morare i roto i te oraraa sotaiete, i parau ai te peresideni Smith hau atu i te hoê taime e, « tei roto teie ao i te hoê huru fifi rahi ».¹ Ua ite oia te tupuraa o te mau parau tohu i roto i te mau mea i tupu i roto i te ao nei no ni‘a i te mau mahana hopea nei, e ua ite papû oia e, hoê noa iho ti‘aturiraa no te hau i roto i teie ao maori râ, te haapa‘oraa ïa i te mau ture a te Atua. I te taime puai roa o te Tama‘i Matamua o te Ao nei, ua faaara oia e, « eita ïa te tama‘i e faaea, e eita te aroraa i roto i teie ao e hope e tae roa’tu i te taime e tatarahapa ai te mau tamarii a te taata nei i ta ratou mau hara e e fariu ai i te Atua ra e e tavini ai ia’na e e haapa‘o ai i ta’na mau faaueraa ».²

I roto i teie mau ati rahi, ua ite te peresideni Smith e, e rave rahi te taata tei paruparu. Teie ta’na i parau, « ua ti‘a ia‘u ia haere i te mau tuhaa huru rau o te [fenua Marite] e e mea varavara roa ia ite i te mau taata aita i paruparu te mana‘o, no te mau fifi o tei mana‘ohia e eita e noaahia i te arai ».³ Ua ite te peresideni Smith e, teie tama‘i, te mau ati o te natura, e te ati pae varua, e tuhaa ana‘e te reira no te oraraa o teie mau mahana hopea nei, no reira, ua haapii oia i te feia mo‘a e, e nehenehe ta ratou e ape i te rahiraa o teie mau ati rahi na roto i te oraraa i te evanelia e i te pato‘iraa i te faahemaraa.

Ua ite-atoa-hia ia’na te ti‘aturiraa papû e, e nehenehe te feia mo‘a parau-ti‘a i te mau mahana hopea nei e riro ei mana puai i roto i te ao e haati nei ia ratou. Ua haapii oia e, eiaha te feia mo‘a e farii noa i te huru o te ao nei, ia vai itoito noa râ ratou i roto i te vahi ta ratou e faaea ra, e ia tautoo ia iteahia to ratou mana, noa’tu te mau pato‘iraa ta ratou e nehenehe e faaruru atu. « Tei raro a‘e tatou paatoa i te titauraa ia faariro i teie ao ei vahi oaoa a‘e no tatou ia ora », ta’na ia i parau.⁴

Ua faati‘a mai te tuahine Belle S. Spafford, te peresideni rahi no te Sotaiete Tauturu, i te hoê iteraa no ni‘a i to te peresideni Smith haapiiraa ia’na i teie parau tumu. I muri noa‘e i to’na pii-raa-hia, ua faaitehia maira i te tuahine Spafford e, te vai ra hoê apooraa i te oire no New York o te faaterehia e te Apooraa Fenua na te mau Vahine. Ua riro te Sotaiete Tauturu ei melo no taua apooraa ra e rave rahi matahiti, tera râ, e ere i te mea maoro a‘e nei, e rave rahi mau melo ê atu o te apooraa tei pato‘ito‘i i te Ekalesia e ua haafifirii te reira i te mau ti‘a o te feia mo‘a i te mau mahana hopea nei i roto i te mau putuputuraa. No te reira mau fifi i feruri ai te tuahine Spafford e to’na na tauturu e, e tatara te Sotaiete Tauturu i to’na ti‘araa melo i roto i te reira apooraa, e ua papa‘i ratou i te hoê parau faaiteraa i to ratou mana‘o. Te faati‘a ra te tuahine Spafford i muri a‘e ra :

« I roto i te hoê farereiraa faataahia i te po‘ipo‘i, ua haere o vau ana‘e e hi‘o i te peresideni George Albert Smith, ma te ta‘ita‘i atoa i te parau faaite, e tae noa’tu i te hoê tapura no te mau tumu i papa‘ihia’i taua parau faaite ra. Ua tai‘o maite te peresideni i taua parau ra. I muri iho ua uiui maira oia e, ‘e ere anei teie te faanahonahoraa i amuihia’tu e te mau tuahine hou a taahuri mai ai tatou i roto i teie tenetere ?’

« Na ô atu ra vau e, Oia’.

« Na ô maira oia e, ‘ta’u e taa’tu nei i teie nei maori râ, te hinaaro nei oe i teie nei e tatara i taua ti‘araa melo ra, tera ihoa ?’

« Na ô atu ra vau e, E.‘ E ua parau faahou atu vau e, ‘ia ite mai oe e te peresideni Smith, aita tatou e fana‘o hoê noa a‘e mea no roto mai i taua apooraa ra’.

« Ua hi‘o maira te Peresideni i ni‘a ia‘u ma te maere. Na ô maira, ‘e te tuahine Spafford, e feruri noa anei oe i te mau taime atoa i te mea ta oe e farii mai ? Aita anei oe e feruri e, e mea maitai i te tahi taime ia feruri i te mea ta oe e horo‘a ? Ua parau faahou â oia e, ‘te ti‘aturi nei au e, te vai ra ta te mau vahine momoni te tahi mea e horo‘a na te mau vahine o te ao nei, e e mea ti‘a atoa ia ratou ia haapii no ni‘a ia ratou. Eiaha e tatara i to outou ti‘araa melo, te mana‘o nei au e, e rave oe e rave rahi melo aravihi o te tomite e a haere ana‘e i taua apooraa ra’.

« I muri iho ua na ô maira oia ma te haapapû maitai e, ‘a imi i te rave‘a ia itehia ta outou faaururaa’ ».⁵

Ua haapa‘o te tuahine Spafford i teie a‘o e i muri a‘e ra ua ma‘itihia oia i roto i te mau ti‘araa faatere i roto i te Apooraa Fenua na te mau Vahine, e i te pae hopea ua ma‘itihia ei peresideni. [A hi‘o i te mana‘o tauturu 1 i te api 287.]

Te mau haapiiraa a George Albert Smith

Ua tohuhia e, e tupu mai te mau ati rarahi i te mau mahana hopea nei.

Ua faaitehia ia tatou e, e tupu mai te mau fifi rarahi i te mau mahana hopea nei. … E ere na te mau papa‘iraa mo‘a ana‘e tei horo‘ahia mai i te anotau o te Faaora e na mua’tu i to’na tau, e tei horo‘ahia mai i muri mai i to’na tau, i faaara mai ia tatou, tera râ, i to tatou iho anotau ua paraparau mai te Fatu e e itehia te mau heheuraa a to tatou Metua i te Ao ra i roto i te Parau Haapiiraa e Te Mau Parau Fafau. Mai te mea e, e tai‘o tatou i teie mau heheuraa, e ite ïa tatou e te mau mea ta tatou e farerei nei i teie nei, ua tohuhia ïa…

… Te faaite mai nei te mau ve‘a ia tatou i te mau mahana atoa i te mau parau no te mau ati e tupu nei i te mau vahi atoa—te vero i ni‘a i te moana e te mau taata e pohe nei i reira, te mau aueueraa fenua, te mau mata‘i pu‘ahiohio, mai tei parauhia ia tatou e tupu mai i te mau mahana hopea nei—e mai te mea ra ia‘u ia hi‘o, e te mau taea‘e e te mau tuahine, ahiri te taata e feruri maitai, ahiri ratou e tai‘o nei i te mau papa‘iraa mo‘a, e mea ti‘a ia ratou ia ite e, te mau mea e tupu nei mai ta te Fatu i parau mai ra i teie mau mahana hopea nei, te tupu nei ïa. Oia mau, te hotu mai nei te mau rauere o te suke [a hi‘o Iosepha Semita—Mataio 1:38–39], e o ratou tei feruri maite, e ite ratou e, ua fatata mai te tau mahanahana, e taua mau mea ta Fatu i tohu ra e tupu hou To’na tae-piti-raa mai, te tupu nei ïa i teie nei.⁶

Aita tatou e vai nei i rapae au i te mau uru raau. Tei roto teie ao i te tamâraa, maori râ e tatarahapa te mau tamaiti e te mau tamahine a to tatou Metua i te Ao ra i ta ratou mau hara e e fariu atu ai ia’na ra. To’na auraa ra, e ti‘a ïa i te feia mo‘a i te mau mahana hopea nei, e aore râ, te mau melo o te Ekalesia a Iesu Mesia i te Feia Mo‘a i te Mau Mahana Hopea Nei, e te taatoa e toe ra, o tatou ihoa râ na mua roa, ia faaite i te hi‘oraa maitai.⁷ [A hi‘o mana‘o tauturu 2 i te api 287.]

Hoê noa rave‘a e roaa ai te hau, o te evanelia ïa a Iesu Mesia.

Hoê noa iho raau no te ati o te ao nei—hoê raau no te ma‘i o te ao nei. O te evanelia ïa a Iesu Mesia ; te ture maitai roa o te oraraa e o te ti‘amâ, tei faaho‘i-faahou-hia mai no te faatupuraa i te mau papa‘iraa mo‘a.⁸

« E hau ta’u e vaiiho ia outou nei, o to’u nei hau ta’u e hô atu no outou : e ere mai ta to te ao horo‘a ta’u horo‘a ia outou. Eiaha e taiâ to outou aau, eiaha hoi e măta‘u ». (Ioane 14:27.)

Teie te mau parau tamarû a te Arii no te Hau i ni‘a i ta’na mau pĭpĭ faaroo. E mea papû maitai e, aita e mea hinaaro-roa-hia a‘e e te taata maori râ te mau haamaitairaa no te hau e no te oaoa e te mau aau măta‘u ore. E horo‘ahia mai te reira [ia] tatou paatoa mai te mea e, e rave tatou i te reira.

I te faaho‘i-raa-hia mai te evanelia i ni‘a i te fenua nei i roto i teie tau tuuraa, ua faahiti faahou te Fatu i te mau mea Ta’na i parau na e rave rahi mau taime i roto i te Faufaa Tahito e te Faufaa Apî, oia ho’i, te hoo o te hau e te oaoa o te parau-ti‘a ïa. Noa’tu râ teie iteraa, e rave rahi o te feruri nei e, e roaa te oaoa ia tatou na roto i te tahi atu rave‘a, tera râ, e mea ti‘a ia tatou ia ite i teie nei e, aita e rave‘a ê atu. Na roto i ta’na mau rave‘a haavare ua taparu o Satane i te pae rahi o te taata nei eiaha e haere na ni‘a i te e‘a e roaa ai ia ratou te oaoa, e te na reira noa nei â oia. Eita te enemi o te parau-ti‘a e taoto.

Na roto râ i te haapa‘oraa i te mau haapiiraa a te Fatu, te fariuraa’tu ia’na e te tatarahaparaa i ta tatou hara, te raveraa i te maitai, e nehenehe ïa e noaa ia tatou te hau e te oaoa e te ruperupe. Mai te mea e, e here te taata te tahi i te tahi, e ore ïa te riri e te inoino rahi e vai nei i roto i te ao nei.⁹

I teie anotau papû ore a horo ai te taata i tera vahi e tera vahi i te imiraa i te tahi mau faanahoraa apî e ti‘a ai ia faatupu i te hau i roto i te ao nei, ia ite mai outou e : te e‘a hoê roa no teie ao e tae ai te hau o te e‘a ïa o te Evanelia a Iesu Mesia to tatou Fatu. Aita e e‘a ê atu. … Te faufaa o te roaaraa te ite i te parau mau, ua au ïa i te mau tao‘a atoa o te ao nei ; te iteraa e, tei ni‘a tatou i te ara rahi papû a haere ai tatou na roto i te e‘a o te ohipa mai tei faataahia e to tatou Metua i te Ao ra, e te iteraa e, e nehenehe ta tatou e haere noa na reira mai te mea e, e hinaaro tatou, noa’tu te mau umeraa e te mau faatianiraa e pûpûhia mai nei e te feia tei ore i ma‘itihia ei mau arata‘i no tatou, e haamaitairaa faufaa rahi ïa.¹⁰

Te ora nei tatou i te hoê pu‘e tau no te tupuraa te mau papa‘iraa mo‘a i rotopu i te mau fenua i reira ho’i to te Fatu parauraa na roto i te hoê o to’na mau peropheta e, i te mau mahana hopea nei, « … e mou atu ho’i te paari o te feia paari, e te haapa‘o o te feia haapa‘o ra, e mo‘e ê ïa ». (Isaïa 29:14.) I roto i te paari hope o te ao nei, tae mai i teie taime, aore roa hoê pŭpŭ taata i ti‘a i te faaite mai i te e‘a o te hau ma te papû maitai. Ua fana‘o tatou… ia ite e, te vai ra hoê e‘a e tae atu ai i te hau ra, e o te reira ana‘e, e taua e‘a ra o te haapa‘oraa ïa i te mau faaueraa a te Atua mai tei heheuhia mai i te mau tamarii a te taata nei i mutaa iho ra e i to tatou nei anotau. Ahiri e haapa‘ohia taua e‘a ra, e hope paatoa te mau fifi rarahi i roto i te ao nei i te faatiti‘aifarohia, i reira ïa te hau e tae mai ai i ni‘a i teie fenua oaoa ore.¹¹

Noa’tu e, ua î te ao nei i te pe‘ape‘a, e ua ereere te ra‘i, e ua purapura te mori ora, e te aueue nei te fenua mai raro roa mai i te hohonuraa, mai te mea e, ua ite tatou e te ora nei te Atua, e e mea parau-ti‘a to tatou mau oraraa, e oaoa ïa tatou, e itehia te hau faito ore no te mea ua ite tatou e, te farii nei to tatou Metua i to tatou mau oraraa.¹² [A hi‘o mana‘o tauturu 3 i te api 287.]

Eita tatou e măta‘u mai te mea e, e rave tatou i te mea ta te Fatu i ani mai ia tatou ia rave.

Eita tatou e măta‘u mai te mea e, e rave tatou i te mea ta te Fatu i ani mai ia tatou ia rave. No’na teie ao. Tei raro a‘e te mau tane e te mau vahine atoa Ia’na. E araihia te mau mana atoa o te ino no te maitai o To’na mau taata, mai te mea e, e faatura ratou Ia’na e e haapa‘o i Ta’na mau faaueraa.¹³

Mai te mea e, e roaa ia tatou te ti‘aturiraa o to tatou Metua i te Ao ra, mai te mea e, e roaa ia tatou To’na here, mai te mea e, e ti‘amâ tatou no te farii i Ta’na mau haamaitairaa, e ore roa ïa e ti‘a i te mau nuu tama‘i atoa o te ao nei ia haamou ia tatou, e ore ho’i e haamou i to tatou faaroo, e eita e vî ia ratou te Ekalesia tei parauhia i te i‘oa o te Tamaiti a te Atua.

A tai‘o na i roto i te pene ahuru ma iva o te mau Arii II e mea nahea to te arii Senakeriba no Asura imiraa ia haamou ia Ierusalema. Ua taparu o Hezekia, te arii no Iseraela, i te Fatu ia faaora ia ratou, a vahavaha mai ai o Senakeriba ia’na i te na-ô-raa e, « eiaha outou e mana‘o e, ta outou mau pure i to outou Atua ra e tauturu ïa te reira ia outou. Te mau vahi atoa ta’u i haere, e ta’u i haru, te pure ra ratou. Aore o outou e tauturu », e i te po‘ipo‘i a‘e, ua itehia te pae rahi o te nuu tama‘i no Asura tei ni‘a i te repo, ua pohe, e ua paruru te Fatu ia Ierusalema. [A hi‘o 2 Te mau Arii 19:10–20, 35.] O Oia to tatou puai,… to outou Metua e to’u, te Metua no te taatoaraa ; mai te mea e, e riro tatou ei mau taata ti‘amâ, e paruru oia ia tatou mai Ta’na i paruru i te mau tamaiti a Helamana [a hi‘o Alama 57:24–27], e mai Ta’na i paruru ia Daniela i te mau liona [a hi‘o Daniela 6], e na tamarii hebera e toru i te auahi [a hi‘o Daniela 3], e e ono hanere tauatini o te mau huaai a Aberahama a arata‘i mai ai oia ia ratou i rapae au i te fenua Aiphiti i raro a‘e i te faatereraa a Mose e ua haaparemo i te nuu tama‘i a Pharao i roto i te Miti Uteute [a hi‘o Exodo 14:21–30]. O Oia te Atua no teie ao. O Oia to tatou Metua. E mana hope To’na e ua fafau mai Oia e, e paruru oia ia tatou mai te mea e, e ora tatou ma te ti‘amâ.¹⁴

Noa’tu e, ua ereere te ra‘i, noa’tu e, te haruru ra te tama‘i, noa’tu te huru o te ao nei, i roto i te Ekalesia a Iesu Mesia i te Feia Mo‘a i te Mau Mahana Hopea Nei, mai te mea e, e faatura e e haapa‘o tatou i te mau faaueraa a te Atua, e paruruhia ïa tatou i te mau mana o te ino, e e ora te mau tane e te mau vahine i ni‘a i te fenua nei e hope noa’tu to ratou oraraa i roto i te tura e te hanahana mai te mea e haapa‘o ratou i te mau faaueraa a to tatou Metua i te Ao ra.¹⁵ [A hi‘o mana‘o tauturu 4 i te api 287.]

E nehenehe to tatou mau utuafare e riro ei mau vahi hau, ei mau vahi mo‘a i roto atoa i te mau ati rarahi.

Te feruri nei au e, na roto i te mau ati e vai nei i te mau vahi atoa, na roto i te tohuraa ta te Fatu i tuu mai i roto i te tuhaa matamua o Te Parau Haapiiraa e Te Mau Parau Fafau, oia ho’i « e rave-ê-hia’tu ai te hau no ni‘a mai i te ao nei », [PH&PF 1:35] e mea ti‘a ïa ia tatou ia ite e, ua tae mai taua taime ra. E mea papû e, e ti‘a ia tatou ia hi‘opo‘a ia tatou, e ia riro to tatou utuafare ei vahi tamau no te pure e no te aau mehara e no te haamauruuru. E ti‘a i te mau tane ia hamani maitai i ta ratou mau vahine, e ia haapa‘o te mau vahine i ta ratou mau tane. E tape‘a te mau metua i te here o ta ratou mau tamarii na roto i to ratou oraraa parau-ti‘a. Eiaha to tatou utuafare ia riro noa ei vahi tamau no te pure e no te haamauruuru, ei vahi râ i reira to tatou Metua e horo‘a mai ai i Ta’na mau haamaitairaa rarahi, no to tatou parau-ti‘a.¹⁶

Te pure nei au ia haamo‘ahia to tatou utuafare na roto i te parau-ti‘a o to tatou mau oraraa, ia ore ia roaa i te enemi te mana no te haere mai i reira e ia haamou i te mau tamarii o to tatou utuafare e aore râ, o ratou e parahi ra i raro a‘e i to tatou tapo‘i fare. Mai te mea e, e faatura tatou i te Atua e e haapa‘o i ta’na mau faaueraa, e riro to tatou mau utuafare ei utuafare mo‘a, aita to te enemi e mana, e e ora tatou i roto i te oaoa e te hau e tae roa’tu i te pae hopea o to tatou oraraa tahuti nei, e e haere atu ai tatou e farii i ta tatou utu‘a i roto i te tahuti ore.¹⁷

A faatuati i to outou mau oraraa i ni‘a i te mau haapiiraa o te evanelia a Iesu Mesia, e ia tupu mai ho’i te ati rahi, e ite ïa outou i te patururaa o to’na rima mana hope. Ia riro to outou mau utuafare ei vahi faaearaa tamau no te varua o te Fatu ; a faariro ei mau vahi mo‘a, eita ho’i e ti‘a i te enemi ia tomo mai i reira ; a faaroo i te reo iti ha‘iha‘i ia faauru mai ia outou ia rave i te mau ohipa parau-ti‘a. Te pure nei au no te hoê e no te taatoa eiaha outou ia ruri-ê-hia i te e‘a e tae ai i te ite e i te mana o te Atua, te faturaa ai‘a o te haapa‘o, oia ho’i, te ora mure ore.¹⁸

Te pure nei au ia parahi mai i roto i to tatou mau aau, e i roto i to tatou mau utuafare te varua o te here, o te faaoroma‘i, o te hamani maitai, o te aroha, o te tauturu o te haafaufaa i to tatou mau oraraa, e o te faariro i te ao nei ei ao anaana e te maitai a‘e na roto i te reira.¹⁹ [A hi‘o mana‘o tauturu 5 i te api 287.]

E nehenehe tatou e riro ei faaururaa maitai i roto i te ao nei.

Te hinaaro nei au e taparu ia outou… ia riro mai te tutau i roto i te vahi ta outou e faaea ra, ia ti‘a ia vetahi ê ia hutihia mai ia outou ra, e ia vai i roto i te parururaa. Ia anaana maitai to outou maramarama, ia ti‘a ho’i ia vetahi ê ia ite mai i ta outou mau ohipa maitai e ia faatupu i te hinaaro i roto i to ratou aau ia riro mai ia outou te huru.²⁰

E hopoi‘a na tatou ia faaite i te hi‘oraa maitai ; e hopoi‘a na tatou ia tape‘a teitei i te reva o te parau mau. E ohipa na tatou ia faaitoito i te tahi atu mau tamarii a to tatou Metua ia faaroo i ta’na haapiiraa e ta’na a‘o e ia faaafaro i te mau ohipa ia ti‘a ho’i ia tatou, i te mau vahi atoa, ia farii i te varua o te Atua ia ama i roto i to tatou mau varua, ei reira ta tatou faaururaa e riro ai ei faaururaa maitai.²¹

Aita te Fatu i titau mai i te hoê mea e ore e noaa i te ravehia. Ua horo‘a mai râ oia ia tatou i te mau faaueraa e te haapiiraa e te a‘o e nehenehe ia tatou ia haapa‘o i teie mahana e i te anotau ta tatou e ora nei…

… E te mau taea‘e e te mau tuahine, e mea ti‘a ia tatou ia haapa‘o noa. E ti‘a i te fenua ta tatou e parahi ra ia haamo‘ahia na roto i to tatou oraraa parau-ti‘a. … Te mea noa i titauhia ia tatou o te tatarahapa ïa i ta tatou mau hara, ia faaru‘e ê i te hape o to tatou mau haere‘a, ia tamâ i to tatou oraraa viivii, e ia haere e rave i te maitai. Aita e titauhia ia faataa-taa-ê-hia tatou no taua ohipa ra. E ti‘a i te tane, te vahine e te tamarii tata‘itahi i roto i te Ekalesia a Iesu Mesia ia haere e rave i te maitai e ia farii i te haamaitairaa no te reira. [A hi‘o mana‘o tauturu 6 i te api 287.]

… E tuu ana‘e i to tatou rima i roto i te ohipa ta’na i faaue mai ia tatou, e haamaitai ana‘e tatou i te mau tamarii a to tatou Metua i te mau vahi atoa tei reira ratou, i reira ïa to tatou mau oraraa e faufaahia ai, ei reira teie ao e riro ai ei ao oaoa a‘e. Teie te misioni tei tuuhia i ni‘a i to tatou mau tapono. E faautu‘a to tatou Metua i te Ao ra ia tatou no te huru o to tatou faaotiraa i te reira. Ia faati‘a mai te Atua ia haere tatou ma te hinaaro i roto i to tatou aau, e ma te haehaa, e hamani maitai i te mau taata atoa i te mau vahi atoa, e ia hopoi atu ia ratou ra i te oaoa o te tae mai na roto ana‘e i te haapa‘oraa i ta’na mau ture e te haapa‘oraa i ta’na mau faaueraa. Ia parahi mai te hau i roto i to tatou mau aau e i roto i to tatou mau utuafare, e ia anaana tatou mai te mahana e ia oaoa tatou i te mau vahi atoa ta tatou e haere, ia nehenehe ia tatou ia faaite i to te ao nei e, ua ite mau tatou e, te ora nei te Atua, na roto i te huru oraraa ta tatou e ora nei, e ia farii tatou i ta’na mau haamaitairaa, o ta’u ïa pure haehaa.²²

Te mau Mana‘o Tauturu no te Tuatapaparaa e te Haapiiraa

A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tauturu, a hi‘o i te mau api v–viii.

A tai‘o i te aamu no Belle S. Spafford i te fariiraa i te a‘o a te peresideni Smith (te mau api 277–79). Eaha te mau rave‘a e nehenehe ta outou e rave « ia itehia to outou huru » ?
I roto i te te tuhaa matamua o te mau haapiiraa (api 280), te faaite mai nei te peresideni Smith i te mau fifi i tohuhia ra hou te Tae Pitiraa mai (a hi‘o atoa i te 2 Timoteo 3:1–7 ; PH&PF 45:26–35). I to outou mana‘oraa, no te aha e mea faufaa ia ite e, ua tohu-a‘e-na-hia teie mau fifi i roto i te mau papa‘iraa mo‘a ?
A tai‘o faahou i te tuhaa e haamata i raro i te api 281. Eaha te tahi mau fifi i roto i te ao nei o te nehenehe e faatiti‘aifarohia na roto i te haapa‘oraa i te evanelia a Iesu Mesia i faaho‘i-faahou-hia mai ? Nahea to te evanelia hopoiraa mai i te hau i roto i to outou oraraa ? i to outou utuafate ? i roto i to outou mau auraa e vetahi ê ?
I te mau api 282–83 te horo‘a nei te peresideni Smith i te mau hi‘oraa no roto mai i te mau papa‘iraa mo‘a no ni‘a i to te Fatu parururaa i To’na mau taata. Nahea Oia i te parururaa ia outou e i to outou utuafare ? Nahea te haapa‘oraa i te tautururaa ia tatou ia haavî i te măta‘u ?
Eaha te tahi mau fifi e faaino i te parururaa varua o to tatou utuafare i teie mahana ? Eaha te nehenehe ia tatou ia rave no te faariro i to tatou mau utuafare ei « mau vahi mo‘a, e ore e ti‘a i te enemi ia haere mai i reira » ? (No te tahi mau mana‘o, a tai‘o faahou i te tuhaa e haamata i te api 284.)
A tai‘o i te paratarafa matamua e te maha i te api 285. Nahea te feia mo‘a faaroo i te mau mahana hopea nei e riro ai ei « mau tutau » i roto i te mau vahi ta ratou e noho ra ? No te aha te « [tamâraa] i to tatou mau oraraa viivii » e horo‘a ai ia tatou i te aravihi rahi atu no te « haere e rave i te ohipa maitai » ? A feruri na roto i te pure eaha te ti‘a ia outou ia rave no te tamâ i to outou iho oraraa viivii.

Te mau papa‘iraa mo‘a : Isaïa 54:13–17 ; Mataio 5:13–16 ; Ioane 16:33 ; 2 Nephi 14:5–6 ; Te Parau Haapiiraa e Te Mau Parau Fafau 87:6–8 ; 97:24–25 ; Iosepha Semita—Mataio 1:22–23, 29–30

Haapiiraa tauturu : A feruri i te ani i te mau melo o te piha haapiiraa ia tai‘o i te mau upoo parau i roto i « Te mau haapiiraa a George Albert Smith » e a ma‘iti i te hoê tuhaa faufaa no ratou e aore râ, no to ratou utuafare. A ani ia ratou ia tuatapapa i te mau haapiiraa a te peresideni Smith i roto i te reira tuhaa, e tae noa’tu i te mau uiraa no ni‘a i te reira i te hopea o te pene. I muri iho a ani i te mau melo o te piha haapiiraa ia faaite i te mea ta ratou i haapii mai.

« E hau ta’u e vaiiho ia outou nei : e ere mai ta to te ao nei horo‘a ta’u horo‘a ia outou. Eiaha e taiâ to outou aau, eiaha ho’i e măta‘u » (Ioane 14:27).

« A faariro i to outou mau utuafare ei vahi faaearaa tamau no te varua o te Fatu ; a faariro i te reira ei mau vahi mo‘a ».