Pene 6
Patururaa i te Feia ta te Fatu e Paturu nei
Ua ma‘itihia to tatou feia faatere e te Fatu, e te titau nei Oia ia tatou ia paturu ia ratou na roto i te parau e na roto i te ohipa.
No roto mai i te oraraa o George Albert Smith
Ua paturuhia o George Albert Smith ei Peresideni no te Ekalesia i roto i te amuiraa rahi no Atopa 1945. I te pae hopea o te amuiraa, ua faaite te peresideni Smith i te mauruuru no te patururaa a te feia mo‘a : « Te haamauruuru nei au ia outou, e au mau taea‘e e au mau tuahine, no to outou ti‘aturi ia manuïa vau, e mai ta te tahi pae o outou i fafau e, e tauturu mai outou ia‘u ia manuïa, no te mea, e taata noa vau, hoê o te mau taata haehaa roa i rotopu ia outou nei, tera râ, ua piihia vau i roto i teie ohipa—e eita vau e ti‘a i ô nei ahiri e, aita vau i ite e, ua piihia vau—na roto i te mana o to tatou Metua i te Ao ra ».
I muri iho ua tuu maira oia i teie aniraa : « Te hinaaro nei au i te tauturu a te mau tane e te mau vahine e te mau tamarii tata‘itahi, eiaha ei haamaitairaa no’u, ei haamaitairaa râ no outou, e no te mau tamarii a te taata nei i te mau vahi atoa. E ere te reira e hopoi‘a na’u, e hopoi‘a râ na tatou »1
Mai ta te mau haapiiraa e faaite nei i roto i teie pene, ua maramarama maitai o George Albert Smith i te mau hopoi‘a teimaha e amohia e te Peresideniraa Matamua, hou oia a riro mai ai ei Peresideni no te Ekalesia. Ua haapii oia i te feia mo‘a e, na to ratou haapa‘o e to ratou faaroo e tauturu ia haamâmâ i taua mau hopoi‘a ra, e ua faaite oia i te auraa o teie parau tumu a tavini ai oia i roto i te Pŭpŭ no te Tino Ahuru Ma Piti Aposetolo.
I te matahiti 1946, a arata‘i ai oia i te hoê tuhaa pureraa o te amuiraa rahi, ua tuu maira te peresideni Smith i te parau no te patururaa i te feia faatere o te Ekalesia ma te faataa mai e, e ere ïa i te hoê ohipa i roto noa i te mana‘o : « I teie nei, e rave tatou i te hoê ohipa i matarohia i roto i te mau amuiraa atoa ; oia ho’i, te tuuraa i te mau Hui Mana Faatere o te Ekalesia i mua i te patururaa a te mau melo. Te ti‘aturi nei au e, e ite outou, outou paatoa e, e haamaitairaa mo‘a mau teie. … E ere ïa i te hoê taipe noa, e faaiteraa râ e, na roto i te tauturu a te Fatu, e amo outou i ta outou tuhaa o te ohipa ».2 [A hi‘o mana‘o tauturu 1 i te api 70.]
Te mau haapiiraa a George Albert Smith
Ua faaineinehia, ua ma‘itihia, e ua faauruhia e te Fatu te feia e faatere nei i te Ekalesia,
Ua faaterehia teie Ekalesia rahi e te mau taata tei faaineine-taa-ê-hia, tei haapii-taa-ê-hia, tei haana-taa-ê-hia no taua hanahana teitei ra tei tuuhia i ni‘a ia ratou a rave ai ratou i to ratou ti‘araa tata‘itahi. I roto i To’na paari rahi, ua haati to tatou Metua i te Ao ra i teie mau arata‘i no Iseraela e te tahi atu mau taata e faaroo atoa mai to ratou, tei ore e faatura i te huru o te taata e aore râ, i to’na ti‘araa ei peresideni no te Ekalesia, ua hi‘o râ ia’na ei auaha parau no to tatou Metua i te Ao ra e ua paturu ia’na e ua faatura ia’na e ua pure no’na, e ua here ia’na, ia ti‘a ia ratou ia farii atoa i te mau haamaitairaa a to tatou Metua i te Ao ra.
Aita e faanahonahoraa ê atu mai teie te huru i te ao nei. Aita e mau taata ê atu [i arata‘ihia] mai teie mau taata te huru. Ua parau-mau-hia e, te feia e faatere nei e mau taata parau-ti‘a ïa. Na roto ia ratou e rave ai to tatou Metua i te Ao ra i ta’na ohipa. Na roto ia ratou e haapiihia ai te evanelia. … Te taata e faatere nei ia tatou i teie mahana aita oia e faatere nei no to’na iho aravihi. Aita oia e faatere nei i te mea e, e tamaiti oia na te hoê taata rahi, tei roto râ oia i te ti‘araa ta’na e ti‘a nei no te mea ua ite to tatou Metua i te Ao ra i te huru paieti o to’na varua. No To’na ite i to’na hinaaro papû ia hopoi i teie parau poro‘i i te mau fenua atoa o te ao nei, ua faaineine Oia ia’na no te piiraa teitei tei tuuhia mai i ni‘a ia’na. Te faatere nei oia ei ti‘a no to tatou Metua i te Ao ra.3
Ua feruri rii au i teie mahana i te mau taata rahi haehaa tei arata‘i mai i te Ekalesia mai to’na ra faati‘a-raa-hia. … Ua matau maitai au [e rave rahi o] te mau Peresideni [o te Ekalesia] e te ti‘aturi nei au e, e mau taata paatoa ratou no te Atua. Aita e nehenehe ia feruri e, e ma‘iti to tatou Metua i te Ao ra i te tahi atu huru taata no te faatere i ta’na Ekalesia.4
Eaha te ohipa i tupu a pohe ai [Iosepha Semita] ? … Aita [te Feia Mo‘a] i ta‘iruru, aita i ma‘iti i te hoê faatere e ua rave mai i te hoê ti‘a faatere apî. Ua oti a‘e na te ti‘a faatere i te ma‘itihia e te Fatu. O te melo tahito roa a‘e ïa o te Pŭpŭ no te Tino Ahuru Ma Piti, o Brigham Young. … Ua paturu te Ekalesia paatoa ia’na ei Peresideni i roto i te mau tuhaa amuiraa atoa. I to’na poheraa, aita to’na na tauturu i parau e, o raua te Peresideni, ua faatere râ te Pŭpŭ Tino Ahuru Ma Piti no te hoê tau maoro, e i muri iho, ua paturuhia to ratou melo tahito roa a‘e ei Peresideni no te Ekalesia. Ua upooti‘a te faanahoraa ti‘a…
Ua tapa‘opa‘o vau i te tahi o teie mau mea ia ore te hape ia tupu mai. Aita o Iosepha Semita i ma‘iti ia’na iho ia riro ei Peresideni no te Ekalesia. Na reira atoa to muri mai ia’na. … No ô mai te ma‘itiraa i to tatou Metua i te Ao ra na roto i Ta’na faaururaa, e e farii te mau taata i te taato‘araa o te mana e tae mai na roto i te piiraa.5
E mea ti‘a ia tatou ia faaite i te aau mauruuru ia ite e, teie ohipa, e ere ïa i te ohipa na te taata, e ohipa râ na te Fatu ; e teie Ekalesia, e mau i te i‘oa o Iesu Mesia, ua faaterehia ïa e a’na, e eita oia e vaiiho i te hoê taata e aore râ, i te hoê pŭpŭ taata ia haamou i te reira. Eita Oia e faati‘a i te mau taata e faatere nei i ta’na Ekalesia ia arata‘i i te taata i roto i te hape, e paturu râ oia ia ratou na roto i to’na mana hope. E faarahi râ oia ia ratou i mua i te mata o te mau tane e te mau vahine maitai e te faahiahia. E haamaitai oia i ta ratou faatereraa e e roaa te manuïa rahi ia ratou. O ratou o te pato‘i e o te imi i te faahaparaa, e ore ïa ratou e ite i te oaoa i roto i ta ratou pato‘ito‘iraa. O ratou o te faaino e o te imi i te rave‘a no te haamou i te mana o te feia faatere o te Ekalesia, e ati ïa te roaa ia ratou i roto i ta ratou ohipa ino.6
E mea ti‘a ia vai te aau haamauruuru i roto ia tatou i te mea e, te arata‘ihia nei tatou e te mau taata mo‘a tei faauruhia e to tatou Metua i te Ao ra no te haapii ia tatou i tera mahana e tera mahana.7 [A hi‘o mana‘o tauturu 2 i te api 70.]
Na roto i to’na mau tavini, te haapii mai nei te Fatu ia tatou i te haere‘a e tae atu ai i te oaoa e te hau.
Mai te anotau o te metua Adamu e tae roa mai i teie mahana, ua a‘o mai te Fatu i te taata na roto i ta’na mau tavini. Ua faauru oia ia ratou i te hoê oraraa maitai a‘e a faaroo ai ratou i ta’na parau, e mai te tau e te tau, mai te au i te titauraa a ta’na mau tamarii, ua tono mai oia i te mau taata mo‘a i roto i te ao nei, no te horo‘a mai i te arata‘iraa e roaa ai te oaoa, ua faauru ia ratou ia haapii i te mau parau mau hanahana o te faateitei e o te haafaufaa i te taata nei.8
Aita vau i ite hoê mea faufaa rahi tei tupu i te ao nei ta te Fatu i ore i faaite atea mai i te taata na roto i to’na mau peropheta, ia ore ho’i ratou ia vaiiho-noa-hia i roto i te ite ore i te mea e tupu ra, ia nehenehe râ ratou e faanaho i to ratou oraraa no to ratou maitai, mai te mea e hinaaro ratou…
Mai te reira ïa te parau no Noa. Ua faaue te Fatu ia’na ia hamani i te hoê pahi i reira te feia parau-ti‘a e paruruhia ai i te tiluvi e tae mai. Ua hamani o Noa i te pahi e ua poro i te tatarahapa i to’na ra u‘i no te hoê maororaa hoê hanere e e piti ahuru matahiti, e ua faaara hope roa oia ia ratou. Tera râ, no te ino rahi o te taata, aita a‘e ra ratou i haapa‘o i te faaararaa. Na roto i to ratou ti‘amâraa, ua faaoti ratou e rave i te ino eiaha râ te parau-ti‘a. Ua topa maira te ûa, e ua tahe maira te pape pu‘e, e o Noa ana‘e e to’na ra utuafare e va‘u taata tei faaorahia. Ua hope paatoa te taata i te faaarahia, no to ratou râ hinaaro mau e pato‘i i te tatarahapa, ua paremo ratou. [A hi‘o Mose 8:13–30.]9
Te hinaaro nei te Fatu e ia oaoa tatou. No reira oia i horo‘a mai ai ia tatou nei te evanelia a Iesu Mesia. No reira oia i tuu mai ai i te autahu‘araa i ni‘a ia tatou. Te hinaaro nei oia ia roaa te oaoa ia tatou. No reira oia i faanahonaho ai i ta’na Ekalesia e ua tuu i roto i te reira i te mau toro‘a e rave rahi, e tei roto teie mau mea taatoa i te afaro mau. … Mai te mea e, e pee outou i te faatereraa a te Fatu, e i te feia ta te Fatu e paturu nei, e ore roa outou e hahi ê i roto i te pouri, e ore outou e ere i te maramarama, e ore outou e ofati i te mau ture a te Atua, e e ore outou e ere i to outou mau haamaitairaa o ta’na e hinaaro nei ia fana‘o outou paatoa.10
Hoê ana‘e haere‘a hau no’u i teie mahana oia ho’i, te peeraa i te feia ta te Fatu i ma‘iti no te faatere. Te vai ra paha to’u iho mau mana‘o e ta’u iho mau hi‘oraa, e nehenehe ta‘u e haava iho ma te faatumu i ni‘a i te mau mea atoa, tera râ, ua ite au e, mai te mea e aita ta‘u mau haavaraa e tano i te mau haapiiraa a te feia ta te Fatu i horo‘a mai ia tatou no te faaite i te purumu, e ti‘a ia‘u ia taui i to’u haere‘a. Mai te mea e, e hinaaro vau i te faaoraraa e pee ïa vau i te feia faatere ta to tatou Metua i te Ao ra i horo‘a mai ia tatou nei a paturu noa ai oia ia ratou.11 [A hi‘o mana‘o tauturu 3 i te api 70.]
Te feia haehaa e te haapa‘o e paturu ïa ratou e e paruru ho’i ratou i te mau tavini a te Fatu.
Ua matau vau e rave rahi tauatini feia faatere o teie Ekalesia faahiahia, e mau tane e e mau vahine no te mau fenua e rave rahi tei farii ma te haehaa e te haapa‘o i te evanelia ia riro mai ratou ei melo no te Ekalesia a Iesu Mesia i te Feia Mo‘a i te Mau Mahana Hopea Nei. … Ua pure [ratou] e ua paturu ratou i to ratou feia faatere… e i roto i ta’u tau ohiparaa i roto i te Ekalesia aita â vau i ite i te hoê taata tei haapa‘o maite i te mau faaueraa a te Fatu, e tei faateitei i to’na reo no te pato‘i i te feia tei piihia no te faatere i teie Ekalesia. E ohipa maere mau teie…
Te hoê o te mau iteraa rahi roa a‘e no’u nei no ni‘a i te hanahana o teie ohipa o te mau taata ïa e rave rahi… tei horo‘ahia te rave‘a i roto i te Amuiraa Tĭtĭ… no te faaite i to ratou mana‘o na roto i te ma‘itiraa e paturu anei, e aore râ, e pato‘i anei ratou i te feia e faatere nei ia ratou (ma te faaohipa i to ratou ti‘amâraa) ua tamau noa i te faatura i to ratou feia faatere. E mea papû roa e, e faauru te Varua o te Fatu i te mau taata faaroo e te haehaa ia paturu i to’na mau tavini ma‘itihia.12
A arata‘i ai o Mose ia Iseraela mai Aiphiti na roto i te medebara e tae atu i te fenua i parauhia ra, ua tama‘i o Amaleka ia Iseraela i Rephidima. Ua faaue o Mose ia Iosua ia ma‘iti i te mau taata tama‘i no te paruru ia Iseraela. Ua ta‘uma atu ra o Mose, o Aarona e o Hura i ni‘a i te aivi i ni‘a’tu i te tahua tama‘iraa. Ia tape‘a tamau noa o Mose i te raau a te Atua i ni‘a a‘e i to’na upoo, ua upooti‘a o Iseraela, ia tuu râ oia i to’na na rima i raro no te rohirohi, ua upooti‘a o Amaleka. Ua tuuhia maira te hoê ofa‘i ei parahiraa, e ua tape‘a o Aarona e o Hura i to’na na rima ia ti‘a i te mau haamaitairaa a te Atua ia tahe mai i ni‘a ia Iseraela ia upooti‘a to’na ra mau faehau e ua upooti‘a ratou i roto i te aroraa. Tei ni‘a iho ia Mose te mana o te Atua e ua vai noa i ni‘a ia’na e tae roa’tu i te taime ua oti ta’na ohipa. [A hi‘o Exodo 17:8–13.] Ia paturu mai te taata ia’na, ua haamaitai-atoa-hia ïa ratou, e mai te reira te huru no te mau tavini atoa a te Fatu tei faatere ia Iseraela…
… Noa’tu eaha te roaraa te faatereraa [te Peresideni] i te Ekalesia, aita e faataaraa ehia rahiraa matahiti, e horo‘a to tatou Metua i te Ao ra ia’na te puai, te mana, te paari, te haava e te faaururaa no te a‘o ia Iseraela i te mau taime atoa e ti‘a ia a‘ohia ratou. E mea ti‘a ia tatou ia riro mai ia Aarona e ia Hura i tahito ra i te haapa‘oraa i ta’na faatereraa ; e mea ti‘a ia tatou ia amo i to’na na rima, na roto ho’i ia’na e ninii mai ai te Fatu i te mau haamaitairaa i ni‘a ia tatou e i ni‘a i to’na mau taata.13
Ua ite au e, teie mau taata [te mau Hui Mana Faatere Rahi] e mau tavini ïa ratou no te Fatu, e ua ite au e, te imi nei ratou ia haamaitai i te taata. Te ti‘aturi nei au e, aore roa hoê o outou… e ore e paturu ia ratou, eiaha na roto noa i to outou faaroo e ta outou mau pure, tera râ, mai te mea e faainohia ratou e e hi‘o-hape-hia to ratou huru, ia itoito ïa outou i te parururaa ia ratou, mai te mea e, e titauhia, no te mea, te vai ra te taime e hinaaro ratou i ta outou parururaa. Aita te enemi i haamo‘e ia ratou, e te hoê o te mau faaiteraa ia‘u i te hanahana o te piiraa o teie mau taata, o te parau faaino ïa a te feia iino no ni‘a ia ratou, area te mau tane e te mau vahine maitai ra, e parau ïa ratou i te parau maitai no ni‘a ia ratou.14 [A hi‘omana‘o tauturu 4 i te api 70.]
Ia faaino ana‘e tatou i to tatou mau ti‘a faatere e aore râ, ia haapa‘o ore ana‘e tatou i ta ratou a‘oraa, te faati‘a ra ïa tatou i te enemi ia arata‘i ê ia tatou.
Te vai nei te mau taata i rotopu ia tatou… tei haamatapohia i te mau haapiiraa hohonu e te mau haamaamaaraa a te taata. Te vai nei te mau taata e pato‘i nei i te a‘o e te haapiiraa a te taata ta te Atua i tuu i te upoo o teie Ekalesia…
E ti‘a tau‘e mai te tahi mau taata aita i nava‘i te iteraa, ma te hoê mana‘o maramarama, e ma te parau mai e, « teie te haere‘a » e aore râ, « tera te haere‘a », e noa’tu e, aita te reira e tu‘ati ra i te a‘o a te Fatu, te vai ra te tahi pae tei ti‘aturi i te tamata i te reira. Ua horo‘a mai te Fatu i te arata‘iraa papû e ua ma‘iti i te Peresideni o ta’na Ekalesia no te tatara i te reira arata‘iraa. Mai te mea e, eita tatou e tau‘a i ta’na i a‘o mai, i roto i to’na ti‘araa ei Peresideni no te Ekalesia, e ite tatou e, ua hape roa tatou.15
Ua riro te Peresideniraa o te Ekalesia… ei mau ti‘a no to tatou Metua i te Ao ra, eiaha i mua noa i to’na mau taata, te ti‘a nei râ ratou no’na i mua i te mau taata atoa o te fenua nei. Ua ti‘a tatou mai te mea e faarahi tatou e e faatura tatou i teie mau taata ta’na i tuu i ni‘a a‘e ia tatou. E mau taata teie e to ratou huru taata nei, e rave atoa ratou i te hape, tera râ, mai te mea e, e faaite tatou i te aau aroha i mua i te mau hape ta ratou e rave mai ta tatou e na reira i mua i to tatou iho mau paruparu e to tatou mau hapehape, e ite ïa tatou i to ratou mau maitai mai ia tatou e ite i to tatou iho.
Te ti‘a nei au i ô nei no te taparu ia outou, e au mau taea‘e e au mau tuahine, eiaha e faati‘a i te mau parau faaino e aore râ, i te mau parau au ore ia mahuti i rapae i to outou utu no ni‘a i te mau taata ta te Fatu i pii no te faatere ia tatou. Eiaha outou ia itehia i piha‘i iho i te mau taata o te faaino ia ratou e aore râ, o te haaparuparu i to ratou mana i rotopu i te mau tamarii a te taata nei. Mai te mea e, e na reira outou, e nehenehe ïa ia‘u e parau atu ia outou e, e riro outou i roto i te mana o te enemi. E mana to’na i ni‘a ia outou no te arata‘i ê ia outou i rapae i te haere‘a o te parau mau, e mai te mea e, eita outou e tatarahapa, e ite outou e, ua ere outou i te « poe tao‘a rahi », tera râ, ua taere roa ïa i reira. No to outou aau nounou e to outou matapo e arata‘i-ê-hia ïa outou, ei reira tei herehia e outou… e oto ai i te tahi atu pae o te paruru no to outou paruparu e to outou maamaa.16 [A hi‘o mana‘o tauturu 5 i te api 71.]
Aita te enemi e taoto. E rave rahi ta’na e haavare nei e ta’na e arata‘i nei i roto i te hara. … Te vai nei te tahi pae o te haapii nei i te parau haapiiraa hape ; e te tahi pae o te imi nei ia faahema i te tane e te vahine ia ofati i te mau faaueraa a to tatou Metua i te Ao ra. … Ahiri te mau melo o teie Ekalesia o te imi nei i te hape i roto i te feia faatere o te Ekalesia e o te faaino nei i te mau taata o te horo‘a nei i to ratou ora no te haamaitai ia tatou, e parahi na i raro no te ani na roto i te pure, « o vai i roto i teie mau orometua haapii e mea hau ia pee ? » eita ïa ratou e fifi i te iteraa i to ratou haere‘a ti‘a, e i reira ïa ratou e paturu ai i te feia ta te Fatu e paturu nei.17
Mai te mea e, e paturu tatou i to tatou mau ti‘a faatere, e fafau ïa tatou ia pee i ta ratou a‘o e ia faarahi i to tatou iho mau piiraa.
E riro ïa ei tumu no te puai no te Peresideni o teie Ekalesia ia hi‘o i roto i te mata o te mau tane e te mau vahine parau-ti‘a e rave rahi tauatini, e ia hi‘o ia ratou ia afa‘i i to ratou rima i ni‘a ma te fafau i to tatou Metua i te ra‘i ra, e ia paturu ia’na i roto i te toro‘a i piihia oia ra ei peresideni no teie Ekalesia faahiahia. Te hopoi‘a ta tatou e rave a afa‘i ai tatou i to tatou rima i ni‘a i taua taime ra, e hopoi‘a mo‘a roa ïa. Te auraa ra, e ere ïa te haere-noa-raa tatou ma te haape‘ape‘a ore e ma te hinaaro ia faatere te peropheta o te Fatu i teie ohipa, to’na auraa mau maori râ—mai te mea e, ua maramarama maitai au i te hopoi‘a ta’u i amo a afa‘i ai au i to’u rima i ni‘a—e ti‘a ïa tatou i muri ia’na ; e pure ïa tatou no’na ; e paruru ïa tatou i to’na i‘oa maitai, e e faaitoito ïa tatou ia faaohipa i ta’na mau haapiiraa mai ta te Fatu i faaue ia’na ia horo‘a mai i te reira ia tatou nei a vai ai oia i roto i taua ti‘araa ra.18
Ia feruri ana‘e au i te mau hopoi‘a e amohia e te Peresideni o teie Ekalesia e to’na na tauturu, e ia ite au i te mau hopoi‘a i faautahia i ni‘a i to ratou mau tapono, te hinaaro nei au ma to’u aau atoa e tauturu ia ratou, eiaha vau ia riro ei haape‘ape‘araa, tera râ, i roto i to’u piiraa, e o outou, e au mau taea‘e e au mau tuahine, e rave ana‘e tatou tata‘itahi i to tatou ti‘araa e e amo ana‘e i ta tatou tuhaa o te ohipa e e faarahi ana‘e i to tatou piiraa no te tura e te hanahana o te Atua.19 [A hi‘o mana‘o tauturu 4 i te api 70.]
Ua farii te Atua e, o tatou tei haamaitai-rahi-hia ia amo tatou i te rima o te tavini o te Fatu o te faatere nei ia tatou ; ia tauturu tatou ia’na eiaha na roto noa i to tatou faaroo e ta tatou mau pure, na roto râ i te faaiteraa i te maitai ; ia haere tatou i raro a‘e i te reva ta’na e tape‘a i ni‘a, a tamau noa ai te Atua i te paturu ia’na ei Peresideni no te Ekalesia, ei peropheta na te Fatu i teie mau mahana hopea nei.20
E paturu ana‘e na tatou i teie mau taata ta te Atua i faati‘a mai no te faatere ia tatou. E haamaitai ana‘e tatou ia ratou, eiaha i te utu noa, na roto râ i te tautururaa na roto i te mau rave‘a atoa ia amo i teie hopoi‘a e vai nei ma te teimaha i ni‘a i to ratou mau tapono. … A pure e a haamaitai ia ratou e a tauturu ia ratou.21
Te mau Mana‘o Tauturu no te Tuatapaparaa e te Haapiiraa
A feruri i teie nei mau mana‘o a tuatapapa ai outou i te pene e aore râ, a faaineine ai outou i te haapii. No te tahi atu mau tauturu, a hi‘o i te mau api v–viii.
-
A tai‘o i te paratarafa hopea o « No roto mai i te oraraa o George Albert Smith » (api 61). Eaha ta « outou tuhaa i roto i te ohipa » ? A tuatapapa ai outou i teie pene, a feruri i te mau rave‘a e ti‘a ia outou ia faaite na roto i ta outou mau parau e te mau ohipa e, te paturu nei outou i te feia faatere o te Ekalesia.
-
A tai‘o faahou i te tuhaa matamua o te mau haapiiraa (mau api 62–63), te piti e te maha ihoa ra o te paratarafa. Eaha te taa-ê-raa o te rave‘a a te Fatu no te ma‘iti i te feia faatere e te rave‘a a to te ao nei ? Eaha te mau iteraa tei roaa ia outou tei haapuai i to outou faaroo e, ua ma‘itihia to tatou feia faatere e te Fatu ?
-
A tuatapapa i te tuhaa e haamata i te api 64 e a tai‘o Te Parau Haapiiraa e Te Mau Parau Fafau 21:4–7. Eaha te a‘oraa papû ta te Fatu i horo‘a mai na roto i te Peresideni o teie Ekalesia i teie taime ? na roto mai i to outou peresideni tĭtĭ e aore râ, to outou peresideni mataeinaa ? na roto mai i to outou episekopo e aore râ, to outou peresideni amaa ? Eaha te mau haamaitairaa tei fariihia e outou na roto i to outou haapa‘oraa i teie a‘oraa ?
-
A tai‘o faahou i te tuhaa e haamata i te api 65 e a tai‘o i na paratarafa matamua e piti i te api 69. Eaha te auraa no outou te patururaa i te feia faatere o te Ekalesia ? Nahea te patururaa i te feia faatere o te Ekalesia i te haapuai i to tatou mau utuafare ?
-
A tai‘o i te paratarafa hopea i te api 68. No te aha e mea ataata ia faaino i te feia faatere o te Ekalesia ? Eaha ïa te hoê rave‘a maitai a‘e no te pahono mai te mea e, e faaite mai te hoê taata i te hape o te hoê o to outou ti‘a faatere ?
Te mau papa‘iraa mo‘a : Amosa 3:7 ; Ephesia 4:11–14 ; Hebera 5:4 ; Te Parau Haapiiraa e Te Mau Parau Fafau 84:109–10 ; 107:22 ; 112:20
Tauturu haapiiraa :Te hoê rave‘a no te faaitoito i te haapiiraa itoito o te faarooraa ïa ma te haapa‘o maitai ia ui mai te hoê taata i te hoê uiraa e aore râ, ia horo‘a oia i te tahi mana‘o. « Te faarooraa e faaiteraa ïa no te here. E mea pinepine te reira i te titau i te faatusiaraa. Mai te mea e, e faaroo papû mau tatou ia vetahi ê, e mea pinepine tatou i te faaru‘e i te mea ta tatou e hinaaro e parau ia ti‘a ho’i ia ratou ia paraparau » (Te Haapiiraa, Aita e Piiraa Teitei A‘e, 66).
« E taata noa vau nei, hoê o te mau taata haehaa roa a‘e i rotopu ia outou, ua piihia râ vau i roto i teie ohipa… na roto i te mana o to tatou Metua i te Ao ra ».
Ia riro tatou… mai ia Aarona e ia Hura i tahito ra; e amo tatou i te rima o [te peropheta] ».
Te turu nei tatou i to tatou feia faatere mai te mea e, « e amo tatou i ta tatou tuhaa o te hopoi‘a e ia faarahi i to tatou piiraa no te tura e te hanahana o te Atua ».