E Faaora Iesu Mesia i te Feia tei Tatarahapa i te Pohe Varua

E Faaora te Tara’ehara a Iesu Mesia i te feia o tei tatarahapa e o tei haapa’o maitai i te pohe varua.

Aamu o te Oraraa o Joseph F. Smith

E mea apî roa vau e aita hoi i papu maitai i te oraraa i taua taime ra,” o ta Joseph F. Smith ïa i papa’i a tavini ai oia i roto i ta’na misioni i Hawaii. “E no reira, te hinaaro nei au ia vai haehaa, e ia î i te varua o te pure i mua i te Fatu ia mâ vau no te farii i te mau haamaitairaa e te here o te Atua.” ¹ I te omuaraa o ta’na ohipa misionare i Hawaii, ua farii teie misionare api i te hoê iteraa rau no te pae varua o te faahoho’a i te mana tamaraa e te tamahanahanaraa o te roaa mai na roto i te tara’ehara a Iesu Mesia: Ua parau oia e “e mea paruparu oia” i roto i ta’na ohipa misionare e e huru “vêvê, e te ere i te maramarama e te ite ore.”

“Oi vai a’e ai au i roto i taua huru ra, ua moemoeahia vau e te tere ra vau i te hoê vahi e, e mea tia ia’u ia haere vitiviti, e ia haere rû ma to’u puai atoa ia ore au e taere. E a rû ai au i te haere ma to’u puai atoa i ite ai au e, hoê noa iho ta’u puohu, hoê horoi e hoê puohu i roto. Aita i ta’a papu ia’u eaha râ to roto no te mea te ru noa ra vau ; i te hope’a raa, ua tae atu vau i te hoê aorai nehenehe mau, mai te mea e tia ia parauhia e aorai. E au ra e, e mea aano mau, e mea rahi mau o te ore e nehenehe ia parauhia e, e mea hamanihia e te rima taata area râ, ua ite au e, o to’u teie tipaeraa mau. A fatata atu ai au i te aorai ma te haere vitiviti atu, ite atura vau i te hoê parau pia, “Hopuraa Pape”. Taui oioi atura i vau i to’u puromu, tomo atura i roto i te hopuraa pape e tamâiho-ra ia’u. Tatara ihora vau e ite ihora i roto i te puohu na’ina’i na’u ra, te tahi na ahu uouo mâ, te hoê mea o ta’u i ore na i ite e mea maoro i teie nei. … Ua oomo ihora vau i te mau ahu. Horo atu ra vau i te hoê vahi ateatea maitai maite mea ra e, e uputa. Patoto atu ra vau e tatarahia mai ra te opani, e o te Peropheta Iosepha Semita tei farii mai i’au i reira. Hi’o maira oia ia’u ma te mata faahapa rii e teie te mau parau matamua ta’na i parau mai: ‘E Joseph, ua taerehia oe’. Area râ, ua tia papu atu vau e parau atura:

“ ‘Oia mau tera râ, ua mâ vau—E mea mâ vau!’

“… Na taua orama ra, na taua fâraa ra e taua iteraa papu ra o ta’u i farii i taua taime ra, i faariro ia’u mai teie te huru, mai te mea e mea maitai, e mea mâ e e mea parau-tia vau i mua i te Fatu, mai te mea te vai nei te hoê noa a’e mea maitai i roto ia’u nei. Ua tauturu te reira ia’u i roto i te mau tamataraa atoa e te mau fifi atoa.” ²

Haapiiraa na Joseph F. Smith

Na roto i te hi’araa o Adamu i tae mai ai te pohe varua i roto i te ao nei.

“Te hinaaro nei au e faahiti hoê e aore râ, e piti parau no ni’a i te tahi atu pohe, o te hoê ïa pohe ri’ari’a mau, hau atu i te pohe o te tino. A amu ai o Adamu, to tatou nei metua matamua i te hotu i rahuihia, a ofati ai oia i te ture a te Atua, a vai ai oia i raro a’e i te faatìtìraa a Satane, ua tiavaruhia oia mai mua atu i te aro o te Atua. … O teie ia te pohe matamua. A ora noa ai oia, ua pohe ra oia—ua pohe i te Atua, ua pohe i te maramamarama e te parau mau, ua pohe oia i te pae varua; ua tiavaruhia mai mua atu i te aro o te Atua; ua tapuhia te mau aparauraa i te Metua e te Tamaiti. Ua tiavaru-mau-hia oia mai mua atu i te aro o te Atua oia atoa o Satane e te mau nuu tei pee atu ia’na. O te pohe varua ïa.³

Te hinaaro nei au e haapapu i te auraa parau e—“I reira [Adamu]i pohe ai i te pohe varua.” Eaha ta’na titauraa a tuuhia ai oia i roto i te Ô i Edene? E ite oia i te Metua. E ti’a oia i mua i to’na ra aro. E hahaere e e paraparau oia Ia’na mai te taata hoi e paraparau te tahi i te tahi, te mata e te mata. O teie ïa te huru o Adamu e o Eva a parahi ai raua i roto i te ô. Area râ, a amu ai raua i te maa hotu i rahuihia, ua hurihia e ua tiavaruhia mai mua atu i te aro o te Atua, … “Na roto i te reira i pohe ai raua i te pae varua, o te pohe matamua ïa.” [PH&PF 29:41] I roto i taua huru ra, eita e nehenehe ia Adamu ia tatara ia’na i rapae i taua tiaraa ra. Tei roto oia i te rima o Satane. … Ua “pohe oia i te pae varua”—ua tiavaruhia mai mua atu i te aro o te Atua. E ahani aita e rave’a no te ora tei faaineinehia no’na, e riro ïa to’na pohe ei hoê pohe tamau, ei pohe hopea ore e te mure ore, e aore e tiaturiraa no te hoê tara’ehara.⁴

E ore roa te hoê taata i roto i te hara e faaorahia i roto i te Basileia o te Atua.

E ore roa te hoê taata i roto i te hara e ô i mua i te aro o te Atua, e ore hoi te hoê taata e nehenehe e farii i te faaoreraa hara maori râ, ia tatarahapa e ia [tanuhia]oia e te Mesia atoa [a hi’o Roma 6:4]. No te mea, ua horo’a te Atua i te tiamâraa no te ma’iti mai te au i to tatou iho hinaaro, te maitai e aore râ, te ino, te haereraa na roto i te maramarama e aore râ, i te poiri, e ua faaue oia i te reira, ia nehenehe tatou ia riro mai Ia’na ra te huru, e mai te mea e faaite tatou i to tatou mâ no te ora i te hoê oraraa mure ore e te hanahana i mua ia’na na roto i te tatarahaparaa i tatou mau hara e na roto i to tatou haapa’oraa e te faaturaraa i Ta’na ra mau faaueraa.⁵

E ore roa te hoê taata i roto i te hara e faaorahia i roto i te basileia o te Atua. E ore roa te mau hara a te hoê taata e faaorehia e te Haava parau-tia maori râ, ia tatarahapa oia i ta’na mau hara. E ore roa te hoê noa a’e taata e faatia-mâ-hia i te mana o te pohe varua maori râ, ia fanau-faahou-hia oia mai ta te Atua Mana Hope i haamana.⁶

Ua horo’a te Atua i te mau taata atoa te tiamâraa e ua horo’a oia ia tatou te rave’a no te taviniraa e aore râ, te tavini ore raa ia’na, no te rave i te maitai e aore râ, i te ino e ua horo’ahia teie nei rave’a maitai i te mau taata atoa noa’tu eaha ta ratou faaroo, to ratou nunaa e aore râ, te huru o to ratou oraraa. E tiamâraa to te feia ona, oia atoa to te feia vêvê e aita roa te hoê noa a’e taata i faa’erehia e te hoê tura o te Atua e i te mana no te faa’ohiparaa i te reira i roto i to’na îraa e ma te tiamâ hoi. Ua horo’ahia teie tiamâraa i te taato’araa. E haamaitairaa teie ta te Atua i horo’a i te mau nunaa atoa i raro nei, i ta’na mau tamarii atoa i roto i te hoê faito tia mau. Area râ, e titau oia i te hoê ti’aauraa etaeta no te huru o ta tatou faa’ohiparaa i teie nei tiamâraa, e mai tei parauhia no Kaina, oia atoa no tatou; “Ia rave oe i te parau maitai ra, eita anei e itehia mai? E aore i maitai ra, te vai ra te taraehara i te uputa na.” [Mai te mea e rave oe i te maitai ra, e faateitei ïa oe i to oe upo’o i ni’a, e mai te mea e rave oe i te mea ino ra, e tarava ïa te hara i to uputa na] (Genese 4:7).… No te mea hoi e, ua horo’a te Atua i teie tiamâraa no te maiti i te maitai e aore râ, i te ino i te mau taata atoa, noa’tu eaha te huru o to’na oraraa, e farii oia e aore râ, e farii noa oia i te faaoreraa hara a te mau taata atoa mai te mea e haapa’o ratou i te ture. Tei roto te ao nei i te hara e tei raro a’e i te faahaparaa no te mea ua haere mai te maramarama i raro nei e aita te mau taata e hinaaro ia tuu ia ratou i ni’a i te hoê faito au i mua i te Fatu.⁷

Na te Tara’ehara a te Mesia e faaora ia tatou i te pohe varua na roto i te tatarahapa e te haapa’oraa.

Ua opua te Fatu i te omua-roa-raa, ia tuu i mua i te taata te ite i te maitai e te ino, e ua horo’a ia’na te hoê faaueraa ia rave i te maitai e ia haapae i te ino. Area râ, mai te mea e a’e oia, e horo’a ïa oia i te ture no te tusia e i te hoê Faaora no’na, ia nehenehe oia ia ho’i faahou i mua i te aro e te maitai o te Atua e ia fana’o i te ora mure ore i piha’i iho ia’na. O teie ïa te opuaraa no te faaoraraa tei ma’itihia e tei haamauhia e te Atua Mana Hope hou te taata a tuuhia mai ai i raro nei. E i te hi’araa te taata na roto i te ofatiraa i te ture tei horo’ahia ia’na, ua horo’a te Fatu ia’na te ture no te tusia, e ua haamaramarama maitaihia ia’na e, ua horo’ahia te reira ei faahaamana’oraa ia’na i te ohipa rahi o te tupu i te afaraa o te mau tau, i nehenehe ai ia’na e to’na ra huaa’i ia faatiahia mai te pohe mai na roto i te mana no te faaoraraa e no te ti’afaahouraa, e ia farii i te ora mure ore i piha’i iho i te Atua i roto i to’na ra basileia.⁸

Ua faanahohia te hoê opuaraa no te faaoraraa ia Adamu. Ua haamana te Atua Mana Hope e, eita oia e farii i te pohe tino e tae noa’tu i te taime ua haapiihia oia i te rave’a no te faatea-ê- raa’tu i te pohe varua tei tae mai i ni’a ia’na na roto i te hara. No reira, ua haere mai te melahi e haapii ia’na i te Evanelia no te ora, ua faaite ia’na te Mesia, te Tara’ehara o to te ao nei, o te haere mai i te afaraa o te mau tau e o tei ahuhia i te mana no te haavî i te pohe e no te faaora ia Adamu e to’na huaai mai roto mai i te hi’araa e te rima o Satane… E mea ti’a i te tahi atu taata ia pou mai no te tauturu e no te faati’a ia’na. Na te hoê mana ê e te rahi atu i to’na e tatara ia’na i rapae i teie ti’araa o ta’na i tuu ia’na iho i roto no te mea, tei raro a’e oia i te faatìtìraa a Satane e aore e mana e aore hoi e tauturaa e ua vaiiho-noa-hia oia ia’na iho.

E no reira, ua porohia te Evanelia ia’na, e ua horo’ahia ia’na te hoê rave’a no te faatea-ê-raa’tu i taua pohe varua ra. Taua rave’a, o te faaroo ïa i te Atua, te tatarahaparaa, te bapetizoraa ia matara te mau hara, e te horo’araa i te Varua Maitai na roto i te tuuraa rima. Ua farii oia i te hoê iteraa no te parau mau e i te hoê iteraa papu no Iesu Mesia, e ua faaorahia oia i te pohe varua tei tae mai i ni’a iho ia’na, oia hoi te pohe matamua, o te hoê pohe mau e te papu maitai, e te huru hoi o te varua, noa’tu e te ora ra oia, e nehenehe ia’na ia hautiuti e ia vai i roto i to’na huru matamua hou te amuraa i te maa hotu i rahuihia ra, e ua pohe i te pae varua; te vai ra hoi to’na ihotaata e to’na faanahonahoraa; tera râ, ua pohe oia i te pae varua e e mea ti’a ia faaorahia oia mai roto atu i taua huru oraraa ra.⁹

Ua ti’a ia Adamu… ia faaorahia i te [pohe varua] e te toto o te Mesia, e na roto i te faaroo e te haapa’oraa i te mau faaueraa a te Atua. E mea na reira to Adamu faaoraraahia i te pohe matamua, e i faahoi-faahou-hia ai i mua i te aro o te Atua, e i mua i te maitai o te Atua Mana Hope, e i ni’a i te e’a o te haere raa mure ore i mua.¹⁰

Mai te mea ua heheu mai te Fatu i to te ao nei te faanahonahoraa no te ora e no te faaoraraa i te hara e na reria hoi te mau taata ia faateitei faahouhia i mua i to’na aro e ia fana’o i te ora mure ore i piha’i iho ia’na, te faaite uana nei au, e aita teie aniraa e ti’a ia pato’ihia, e ore roa te taata nei e faateiteihia i mua i te aro o te Atua e e farii i te îraa o te hanahana e te oaoa i roto i to’na basileia e i mua i to’na aro maori râ, ia haapa’o oia i te faanahonahoraa ta te Atua i opua e i heheu mai.¹¹

Mai te mea e ora tatou mai te au i te mau opuaraa a to tatou Metua i te Ao ra, e mai te mea e fariu to tatou aau Ia’na e i to tatouTuana, te Tamaiti a te Atua, to tatou Tara’ehara hanahana, e mea na roto ïa Ia’na tatou e ti’a faahou ai mai te pohe mai e, e faaora-atoa-hia ai e aore râ, e ti’a ai ia faaorahia i te pohe varua, e ia faaho’i-faahou-hia i mua i te aro o te Atua.¹²

Ua pi’ihia te Mesia e ua faahaerehia mai i raro nei e te Atua no te tatara i te taata nei i te hara na roto i te tatarahaparaa, no te tatara i te taata nei i te pohe tei riro ei tufaa na’na na roto i te hara te [hi’araa] o te taata matamua. Te tiaturi nei au i te reira ma to’u aau atoa.¹³

Ia rave ana’e tatou i te hoê hara, e mea titauhia tatou ia tatarahapa e ia faaho’i atu i te reira mai te mea e nehenehe. Ia ore ra tatou e faaafaro i te ino o ta tatou i rave, e tia ia tatou ia ani i te maitai e te aroha o te Atua no te tamâraa i taua ino ra.

Eita e nehenehe i te taata ia faa’ore i ta ratou iho mau hara; eita e nehenehe ia ratou ia tamâ ia ratou iho i te mau utu’a no ta ratou ra mau hara. E nehenehe i te taata ia faaea i te rave i te hara e ia rave i te ohipa ti’a i muri iho mai te mea e farii-au-hia ta ratou mau ohipa i mua i te Fatu e ia itehia mai ratou e ana. Tera râ, na vai e faatitiaifaro i te mau ohipa ino ta ratou i rave ia ratou iho e ia vetahi ê, te mau hapa o te ore e matara ia ratou iho ia faatitiaifaro? Na roto i te Tara’ehara a Iesu Mesia, e tamahia te mau hara a te mau taata tatarahapa; noa’tu e, ua uraura noa’tu mai te faai’o ra, e riro ïa mai te vavai ra i te teatea [a hi’o Isaia 1:18]. O teie te fafauraa i horoa hia ia outou.¹⁴

Na roto i te Tara’ehara e na roto i to tatou haapa’o maitairaa, i nehenehe ai tatou ia riro ei feia tufaa e te Mesia.

E ti’a tatou i mua i te haavaraa a te Atua ia haavahia e ana. Te na reira mai ra te Bibilia, te Buka a Moromona e te mau heheuraa tei farii-ti’a-hia mai e te Peropheta Iosepha Semita. E i reira, o ratou atoa o tei ore i auraro i te ture tiretiera ra e o tei ore i haapa’o, e ore ratou e faaorahia e te hanahana tiretiera. E o ratou o tei ore i auraro i te ture teretetiera e o tei ore i haapa’o, e ore ratou e faaorahia e te hanahana teretetiera ra. E o ratou o tei ore i auraro i te ture tiretia ra e o tei ore i haapa’o, e ore ratou e faaorahia e te hanahana tiretia ra area râ, e farii ratou i te hoê basileia ê atu e aore e hanahana.¹⁵

E pi’i pauroahia mai te mau tino e tarava ra i roto i te mau menema; eita ra te taato’araa e ti’a mai i te ti’a faahouraa matamua e aore râ, i te po’ipo’i o te ti’a faahouraa matamua penei a’e ra, i te ti’a faahouraa hope’a. E titauhia i te mau varua tata’itahi ia tia atu i mua i te haavaraa a te Atua e ia haavahia mai te au i te mau ohipa i ravehia i roto i te tino nei. Mai te mea e mea maitai ta’na mau ohipa, e farii ïa oia i te utu’a maitai; mai te mea râ e mea ino [te mau ohipa], e ti’avaruhia ïa oia mai mua atu i te aro o te Fatu.¹⁶

E ora ïa tatou i reira; eita tatou e pohe; aita tatou e tia’i nei i te pohe e tia’i ra tatou i te ora, te tahuti ore, te hanahana, te faateiteiraa, e e faaanaanahia tatou e te hanahana o te basileia tiretiera ra, e e farii tatou i te ïraa o taua hanahana ra: O to tatou ïa tapaeraa hopea; teie ïa te tiaraa faateiteihia e nehenehe e noaa ia tatou e aore roa e mana e nehenehe ia faa’ere ia tatou e aore râ, ia haru ê atu i te reira mai te mea e faaite tatou i to tatou haapa’o maitairaa e to tatou vai tia- noa- raa i te fafauraa o te evanelia.¹⁷

Te fâ o to tatou oraraa i te fenua nei oia hoi, ia roaa ia tatou te îraa o te oaoa, e ia riro tatou ei mau tamaroa e ei mau tamahine na te Atua to’na auraa mau, ei feia tufaa e te Atua e e feia tufaa e Iesu Mesia, ia riro ei mau arii e ei mau tahu’a i te Atua ra, no te farii i te hanahana, te mana faatere, te faateiteiraa, te mau terono e te mau mana atoa e te mau maitai atoa i faarahihia e i fatuhia e to tatou Metua i te Ao ra. Teie ïa te tumu o to tatou oraraa i ni’a i teie fenua. No te farii i teie ti’araa i faateiteihia, e mea tia ia tatou ia haere na roto i te oraraa tahuti nei e aore râ, na roto i te tamataraa, ia nehenehe tatou ia faaite i to tatou mâ, na roto i te tautururaa a to tatou nei tuana o Iesu.¹⁸

E faaorahia e e faateiteihia te mau taata i roto i te basileia o te Atua na roto i te parau-tia ana’e, e no reira e mea ti’a ia tatou ia tatarahapa i ta tatou mau hara e ia haere na te maramarama mai te Mesia i roto i te maramarama ra, ia nehenehe i to’na ra toto ia tamâ ia tatou i ta tatou atoa mau hara, e ia hoa tatou e te Atua e ia farii tatou i to’na hanahana e te faateiteiraa.¹⁹

Na roto i te amuraa i te oro’a e haamana’o ai tatou ia Iesu Mesia e Ta’na Tara’ehara.

I muri a’e i to’na huriraahia i rapae i te ô, ua faauehia Adamu ia pûpû i te mau tusia i te Atua; ei faahaamana’oraa ia’na e ia ratou atoa o te pûpû i te mau tusia e, e taipe teie no te Faaora o te haere mai no te faaora ia ratou i te pohe e mai te mea aita te Tara’ehara, e faatea-roa-hia ratou mai mua atu i te Atua. Area râ, na roto i To’na fanauraa e To’na poheraa, ua tupu teie faaueraa; e ua haamau oia i te Oro’a e ua faaue i Ta’na mau pìpì ia rave tamau noa i te reira i muri mai, ia haamana’o noa ratou ia’na, ia vai noa te reira i roto ia ratou e, ua faaora oia ia ratou, e ua fafau atoa ratou ia haapa’o i ta’na ra mau faaueraa e ia pee ia’na ia faaapîhia ratou. No reira, e mea ti’a ia tatou ia rave i te oro’a no te faaite e, e haamana’o â tatou ia’na, e te hinaaro nei tatou i te haapa’o i te mau faaueraa ta’na i tu’u mai ia tatou e ia vai noa to’na Varua i roto ia tatou—e tae noa’tu i te hopea, e ia tapea maite noa i te faaoreraa o ta tatou mau hara.²⁰

I to Iesu haereraa mai e a mauiui ai “te taata parau-tia no te feia parau-tia ore”, te taata hara ore no te taata hara, tei farii i te faautu’araa a te ture o ta te mau taata hara i ofati, i reira te ture no te tusia i rave faaotihia ai, e ua monohia e te tahi atu ture o ta tatou e parau i teie nei te “Oro’a o te amuraa ma’a a te Fatu,”ei haamana’oraa na tatou i to’na oraraa e a muri noa’tu, i ta’na misioni, i to’na pohe, i to’na ti’afaahouraa e i te tusia rahi ta’na i pûpû no te faaora i te taata nei, no te mea, ua parau oia, “e na reira outou… ei mana’oraa ia’u, ua amu ana’e outou i teie nei pane, e ua inu ana’e i teie au’a, ua faaite â ïa outou i te pohe o te Fatu, e tae noa mai oia ra.” No reira, no tatou teie ture e eaha te ture o te pûpûraa tusia i te feia tei ora na hou te tae matamuaraa-mai o te Tamaiti a te Taata e tae noa’tu i to’na hoi faahouraa mai. No reira, e mea tia ia tatou ia faatura e ia haamo’a noa i te reira, no te mea hoi e, e faautu’araa tei faataahia ia ofati ana’ehia te reira ture. [a hi’ol Korinetia 1:25–29].²¹

Te oro’a o te amuraa ma’a hope’a a te Fatu… o te hoê ïa parau tumu no te Evanelia o te titauhia i te feia faaroo atoa ia haapa’o i te tahi noa’tu oro’a no te evanelia. Eaha ïa to’na tumu? Ia haamana’o tamau noa tatou i roto i to tatou varua i te Tamaiti a te Atua tei faaora ia tatou i te pohe mure ore e o tei faahoi mai ia tatou i te ora na roto i te mana o te Evanelia. Hou te taeraa mai o te Mesia i te fenua nei, ua faahaamana’ohia te reira i te mau taata e noho ra i te reira tau i te ao nei e i porohia atu hoi te Evanelia i te tahi atu oro’a oia hoi, te pûpûraa i te ora o te animala ei taipe no te tusia rahi e tupu i te afa tia o te mau tau ra.²²

Mana’o Tauturu i te Haapiiraa

Eaha te Tara’ehara? Eaha te taime outou i ite ai i te mana o te Tara’ehara i roto i to outou nei oraraa?
Eaha te pohe varua? No te aha te reira i riro ai ei pohe ri’ari’a atu i te pohe tino?
Ahiri e “aita e rave’a no te faaora i horo’ahia” no Adamu e to’na ra huaai, eaha ra ïa te mau utu’a no tatou?(A hi’o atoa 2 Nephi 9:6–9.)
Eaha ta te Faaora i rave i nehenehe ai tatou ia hemo i rapae i te pohe varua? Eaha te mea e tia ia tatou ia rave ia upoo-ti’a i ni’a i te pohe varua? Nahea tatou ia “titau i te maitai e te aroha no te tamâ ia tatou i te… hara? 29
Eaha te mau haamaitairaa o ta outou i farii no to outou iteraa e, e nehenehe ta Iesu Mesia e tamâ i te mau hape ta outou i rave ia outou iho e ia vetahi ê? Mea nahea to outou iteraa i teie iho â mau haamaitairaa i roto i te oraraa o vetahi ê?
Eaha te auraa o te parau ia faaanaanahia? Nahea tatou ia faaanaana ana’ehia i roto i te varua i teie nei? (A hi’o Mose 6:64-68.) Eaha te mau haamaitairaa e tae mai i te feia i “faaanaanahia i te hanahana Tiretiera” (A hi’o atoa PH&PF 88:28-29.)
Nahea te amuraa i te oro’a i te tautururaa ia tatou ia upoo-ti’a i te pohe varua? Nahea tatou ia haamana’o noa i te Faaora? Eaha te mea ta tatou e rave no te faatura i te oro’a e ia haamo’a noa i te reira?
Nahea tatou ia farii ma te mauruuru i te tao’a horo’a o te Tara’ehara i roto i to tatou nei oraraa?

Christ in Gethsemane — Te Hoho’a Te Mesia i Getesemane, penihia e Harry Anderson. Na roto iTa’na Tara’ehara, ua faaora o Iesu Mesia i te mau taata atoa i te pohe tino. Ua faaora atoa oia i te taata tatarahapa i te hara.