Ta Tatou Ohipa Misionare

E haere te mau misionare na roto i te ao atoa nei no te horo’a i te iteraa papu no Iesu Mesia e no te ueue i te huero faahiahia o te ora mure ore.

Aamu o te Oraraa o Joseph F. Smith

I muri rii noa mai i to’na tapaeraa’tu i Hawaii i te 20 no Atopa 1854, ua papa’i o Joseph F. Smith i te hoê rata i te taea’e o to’na metua tane o George A. Smith, e melo no te Pùpù no te Tino Ahuru Ma Piti o tei faatoro’a ia’na ei Peresibutero. Te faaite nei teie misionare apî e, te hinaaro mau nei oia ia faaoti i te ohipa a te Fatu, a parau ai oia e, “te oaoa nei au ia parau e ua ineine au no te haere na roto i te mata’i e te mau are no teie tumu o ta’u i fafau i te rave; te tiaturi nei e te pure nei ia nehenehe ia’u ia faaite i to’u faaroo e tae noa’tu i te hopea.”¹ Ua tamatahia to’na faaroo e rave rahi taime.

I te hoê taime, ua haamou te hoê auahi i te rahiraa o ta’na mau tauihaa, oia atoa “to’na mau ahu, te mau iritiraa matamua (Europa) o te Buka a Moromona, te mau Parau Haapii e te mau Parau Fafau, o tei horo’ahia ei tao’a aroha na’na e te Patereareha Hyrum Smith. I roto i te hoê o teie mau buka, ua vaiiho o Elder Joseph F. Smith i te parau faaite no to’na faatoro’a-raa-hia ei Elder. I te pa’apa’araa te fare, ua arahu roa te afata e te mau taihaa atoa o Elder Smith, aita ra ta’na parau faaite no to’na faatoro’araa ei misionare i pa’apa’a. Mai te mea ra e, ua faahereherehia te reira tera râ, ua pa’apa’a rii te mau hiti area râ, aita te mau retera parau i pau i te auahi noa’tu e ua pa’apa’a roa te buka i vai ai te reira. E ere e, o te mau buka ana’e tei pau i te pa’apa’a area râ, te mau buka aamu atoa a Elder Smith o ta’na i faaherehere maitai.”

Taa ê noa’tu i teie iteraa rau, teie atoa te hoê mea arearea i tupu, teie mana’ohia i te ra tau e e mea fifi. I te pa’apa’araa te mau ahu o te mau misionare, e mea titauhai ia Joseph F. Smith e to’na hoa orometua, ia tufa i te oomoraa o to raua pereue. E faaea mai te hoê elder i te fare e na te tahi ia e oomo i te pereue e haere atu ai i te mau pureraa. I muri mai, e taui raua. Na te tahi ïa e haere. “Ua vai teie ohipa no te hoê taime poto noa tera râ, ua faati’a pinepinehia teie aamu arearea i te mau matahiti i muri mai, i te ore raa te oto o na Elders no te mau peapea e te mau fifi ta raua i farii.”²

Haapiiraa na Joseph F. Smith

E mea ti’a i te mau misionare ia haapao noa ia nehenehe ratou ia aparau tamau e te Varua o te Atua.

Hoê o te mau peu maitatai e titauhia i te mau elders [peresibutero] te poro haere nei i roto i te ao, o te haehaa, te màrû e te here faito ore, no te maitai e no te ora o te utuafare o te taata nei, e te hiaai i te faati’a i te hau e te parau-ti’a i ni’a i te fenua nei i rotopu i te mau taata. Eita tatou e nehenehe ia poro i te evanelia a te Mesia e aita teie varua o te haehaa, te màrû, te faaroo i te Atua e te ti’aturi i ta’na mau fafau e ta’na parau ia tatou. E nehenehe outou ia haapii i te ite ato’a o te taata nei area râ, eita te reira e faata’a ia outou no te raveraa i te reira mai ta te faaurûraa haehaa e te arata’i a te Varua o te Atua. “O te teoteo to te pohe ra na mua, e te aau faateitei to te hi’a.” [Maseli 16:18.]

E mea ti’a i te mau elders o te poro haere nei na te ao ia haapii i te varua o te evanelia, oia te varua o te haehaa, te varua o te màrû e te pûpûraa ia ratou iho i te mau opuaraa o ta ratou i faaineine. Mai te mea e pororaa evanelia ra, e mea ti’a ia tatou ia horo’a i to tatou taime no taua ohipa pororaa ra e, e mea ti’a ia tatou ia tutava ma to tatou paari no te faata’araa ia tatou iho no te raveraa i taua ohipa taa ê mau, e te rave’a no te raveraa i te reira o te haapaoraa ïa ia ti’a i te varua o te Atua ia paraparau mai e ia parahi mai i pihai iho ia tatou no te arata’i ia tatou i te mau taime atoa e i te mau hora atoa o ta tatou pororaa, i te rui e te ao.³

E to’u mau taea’e, ua faaô outou i roto i te ohipa a te Atua; te rave itoito nei outou i te ohipa; ua farii outou i te hoê îraa o te Varua o te Evanelia no te mea, ua faaô taato’a outou ia outou i roto i te reira. E mau orometua outou no te fafauraa mure ore. Te pure nei outou; aita hoi outou e haamo’e nei i te reira; oia mau. Eita roa e nehenehe i te hoê Elder ia haamo’e i to’na mau pure; eita e nehenehe ia’na ia haamo’e i te Fatu; e mea ti’a mau oia ia haamana’o Ia’na mai te mea e, e haapa’o oia i ta’na ohipa. Mai te mea e hiaai rahi to’na no te rave i te maitai, e ore roa oia e haamo’e i te Fatu i te poipoi, i te avatea e i te ahiahi. E pure oia i te Fatu, e faahaehaa oia e e haamauruuru Ia’na. Mai te mea e na reira outou, no reira, e farii ïa outou i To’na Varua.⁴

E mea ti’a ia vai i roto i te hoê misionare te iteraa papu o te Varua o te Atua—te iteraa papu no te Varua Maitai.… Eita te taata e faafariuhia na roto i te parau faahiahia e aore râ, te oreroraa parau noa; e ti’aturi ratou mai te mea ua papu ia ratou e, tei ia outou te parau mau e te Varua o te Atua.⁵

E mea ti’a i te mau misionare ia vai parau-ti’a noa, ia vai viivii ore noa, e ia haapa’o i ta ratou mau fafauraa.

E ere i te mea tano ia tono i te mau taata i roto i te ao no te fafau ia vetahi ê e, na roto i te haapa’oraa i te evanelia mai te mea aita ratou iho i farii i te reira. Oia atoa, aita e ti’a ia tono i te mau taata no te faatitiaifaro ia ratou. Ia faatitiaifaro ra ratou ia ratou iho na mua roa i te fare mai te mea e, aita ratou e haapa’o maitai ra i te mau faaueraa a te Atua. Mai te Parau Paari e te tahi atu mau ture ato’a o te ra’i. Aita roa e pato’iraa no te mau taata e piihia o tei ora na hoi i roto i te aehuehu e aore râ, i ihu haere noa na, e i muri mai, ua ora i te hoê oraraa maitai ma te faaite mai i te mau hotu o te tatarahapa.⁶

Te hinaaro nei matou i te feia apî … o tei tape’a ia ore ratou iho ia viivii i te mau mea no teie nei ao, ia nehenehe ratou ia haere i roto i te mau nunaa o te ao nei e ia parau i te mau taata e, “A pee mai ia’u, mai ta’u e pee i te Mesia.” E hinaaro matou ia ratou ia ite nahea ia himene, e ia pure. Te hinaaro nei matou ia ratou ia vai parau-ti’a noa, ia vai viivii ore noa, e ia vai faaroo noa i ta ratou mau fafauraa e tae noa’tu i te pohe ra, i to ratou mau taea’e o te ekalesia, i to ratou mau hoa faaipoipo, i to ratou mau metua tane e to ratou mau metua vahine, i to ratou mau taea’e e mau tuahine, ia ratou iho e i te Atua. Ia roaa ia outou te mau taata mai teie te huru no te poro i te evanelia i to te ao nei, noa’tu e, i te haamataraa e ere ratou i te mea maramarama roa, e tu’u te Fatu i to’na Varua i roto i to ratou aau, e e faaheihia ratou i te ite e te mana no te faaora i te varua o te mau taata. No te mea te huero o te ora, tei roto ïa ia ratou. Aita roa te reira i tahuti; aita roa te reira i faateahia ia ratou.⁷

E ere i te mea ti’a i to tatou feia apî ia faaô i roto i te ino o te ravehia nei e o te tupu nei i te ra vahi e te ra vahi. Aita te reira iteraa e faateitei, e mea papu e, e haamana’o te hoê taurearea e hau atu i to ratou hi’araa matamua e, e mea na roto ïa i te hoê hinaaro hi’ohi’o noa to ratou haamataraa i te arata’i ia ratou i te mau vahi ti’a ore. Ia faatea ra te feia apî o Ziona, noa’tu e, te tavini ra i roto i te misioni e aore râ, tei te fare noa, i te mau vahi viivii. Aita ratou e titauhia ia ite i te mau ohipa e ravehia i roto i taua mau vahi ra. Eita te reira iteraa e haamaitai e e faaitoito ia ratou. Ia haamana’o râ ratou e “te iteraa no te hara, o te tamataraa ïa i te rave i te reira,” e ia ape i taua mau tamataraa ra o te nehenehe e faaino i to ratou haapao maitai e to ratou ti’araa i roto i te Ekalesia a te Mesia.⁸

Hoê misionare maitai o te hoê ïa taata au hia—e faahoa tamau oia e e tapa’o ora to’na—e imi oia ia ti’aturihia e ia haafaufaahia oia e te mau taata i roto i te pouri. Eita ra te reira e roaa i te rave i teie mahana no ananahi. E mea ti’a ra ia outou ia faahoa i te hoê taata, ia hi’opoa maitai e ia faaite ia’na e, te hinaaro nei outou i te hamani maitai e i te haamaitai ia’na; ia ite ana’e oia i te reira, i reira ia outou e horo’a’tu ai ia’na ta outou parau poro’i, e ia horo’a ra na roto i te here e te aroha. No reira, ia maiti ana’ehia te mau misionare, a maiti i tei au hia, te nehenehe e faahoa eiaha ra te feii i te mau taata; e mai te mea aita te reira huru e itehia i roto i ta outou paroisa, a haapiipii e a faata’a i te tahi feia apî tamaroa no teie ohipa.⁹

E mea ti’a i te mau misionare ia haapii i te evanelia o te ora na roto i te Varua e te ohie.

Ua haapiihia ta tatou mau elders mai to ratou â tamariiraa mai, eiaha ratou e haere e aro i te mau ekalesia o te ao nei ia piihia ratou no te poro i te evanelia a Iesu Mesia tera râ, ia haere e faaite i te parau poro’i o tei horo’ahia ia tatou na roto mai i te Peropheta Iosepha i teie tau hopea nei, e na roto i te reira e nehenehe ai i te mau taata ia ite i te parau mau, mai te mea e hinaaro ratou.

E tonohia ratou no te pûpû i te ama’a olive, te tapa’o o te hau i to te ao nei, no te pûpû i te ite e, ua paraparau faahou mai te Atua mai te ra’i mai i ta’na mau tamarii i ni’a i te fenua nei; e na roto i to’na aroha rahi, ua faahoi faahou mai i te îraa o te evanelia a ta’na Tamaiti Fanau Tahi i roto i te tino i to te ao nei, ua heheu mai e ua faahoi mai te Atua i te mana e te tura i te taata e na roto i te reira mana te mau taata e ti’a ai ia rave i te mau oro’a o te evanelia a Iesu Mesia i titauhia no to ratou ora; e e mea ti’a i te huru o ta ratou raveraa i teie mau oro’a ia fariihia e te Atua o tei horo’a mai ia ratou te mana no te raveraa i te reira i roto i to’na i’oa.

Ua tonohia ta tatou mau elders no te poro i te tatarahapa, no te poro i te parau-ti’a, no te poro i to te ao nei, te evanelia no te ora, no te aupururaa e te auhoaraa, ia haapii i te mau tane e te mau vahine ia rave i te mea au i mua i te aro o te Atua e i mua i te mau taata atoa, ia haapii atu ia ratou e ua faanahonaho te Atua i ta’na Ekalesia, te hoê Ekalesia o oia iho te fatu e te niu.¹⁰

E mea pinepine te mau uiraa i te ti’a mai i roto i te mau feruriraa o te feia apî tamaroa e vai nei i roto i te misioni, “Eaha ra te mea o ta’u e nehenehe ia parau?” Hoê atoa o te apee mai i muri noa iho, “Nahea ra vau ia parau i te reira?” … Noa’tu e aita e ture papu tei horo’ahia mai, ua haapii te iteraa rau e, o te rave’a ohie te mea maitai a’e. Na roto i te haapiiraa i te mau parau tumu o te evanelia na roto i te pure e na roto i te imi maitairaa i nehenehe ai ia faaite i te reira i te mau taata na roto i te haehaa, na roto i te hoê reo ohie, ma te ti’aturi ore ia’na iho e ma te teoteo ore, e na roto i te varua o te misioni a te Mesia. Eita e nehenehe ia rave i te reira mai te mea e haamaua te hoê misionare i to’na puai i roto i te hoê huru faarahi ia riro oia ei taata orero hanahana. O teie ta’u e hinaaro nei i te faaara e i te a’o i te mau elders, ia taoti’a ratou i to ratou itoito o te oreroraa, no te mau taime e te mau vahi e tano. E ere te misioni i te vahi tano no te reira tautooraa. Eita te a’oraa i te evanelia e manuïa mai te mea e ravehia na roto i te faarahi e te màro tera râ, e parauhia na roto i te maru e te parau-ti’a, mai te au i te ohie o to’na parau mau, ma te faahitihia na roto i te hoê huru o te nehenehe ia haaputapu i te aau ei reira ia e faaanaanatae i te feruriraa e te faarooraa.

… E mea ti’a i te varua ia faaea i pihai iho i te misionare, ia nehenehe oia ia faatupu i te hoê faaararaa i rotopu i te mau taata e faaroo mai ia’na; noa’tu e, e parauhia te reira i roto i te taime aparauraa te taata i te taata e aore râ, i roto i te mau putuputuraa. Eita te varua e faaite mai ia’na iho i te taata o te horo’a ra i to’na taime no te parau i te mau parau tumu ore e aore râ, no te vauvau i parau a’o noa. E mana’o oia ia faaoaoa haavarevare noa, e eiaha ra no roto mai i te aau.¹¹

Aita roa te hoê taata e nehenehe ia poro i te Evanelia a Iesu Mesia na roto ia’na iho no te mea, eita oia e ite i te mau mea a te Atua maori râ, [na] te Varua o te Atua [a hi’o 1 Korinetia 2:11]. A titau noa’tu ai te hoê taata i te poro i te parau a te Fatu na roto i to’na iho paari e to’na iho ite, ma te farii ore i te faaûrûraa, e tahitohito ia te reira. Aita roa e nehenehe i te hoê taata ia poro no te Atua, no te atuaraa e no te parau mau no Iesu Mesia mai te mea aita oia i faaûrûhia e te Varua Mo’a. Ua hahaere e ua aparau te mau pìpì i tahito ra i te Faaora a rave ai oia i Ta’na misioni i rotopu i te mau tamarii a te taata nei, area râ, … ua parauhia ratou ia parahi noa i te oire i Ierusalema e eiaha e haere e poro i rapae e tae noa’tu e ua vehihia ratou i te mana no ni’a mai, oia hoi, ia nini’ihia mai te Varua Mo’a i ni’a iho ia ratou i reira to ratou maramarama e faaitoitohia e e faarahihia ai, e tu’uhia te iteraa papu no Iesu Mesia i roto i to ratou aau ia nehenehe ia ratou ia faaite i taua iteraa papu ra i te mau taata o ta ratou e haere atu e farerei.¹²

Tei raro a’e te elder i te arata’iraa a te varua o to’na piiraa, na te reira e haapii ia’na. Mai te mea e hi’a oia i te faarava’i i taua varua ra, oia te varua no te faaitoito e no te haapapu, e riro oia i te paruparu i te faatau e i te peapea noa. E mea ti’a i te mau misionare tataitahi ia faataa i te hoê tuhaa o te mau mahana atoa no te haapii mai i te mau parau tumu o te evanelia e i te parau a te Ekalesia e ia feruri hohonu na roto i te pure no te reira. E mea ti’a ia’na ia tai’o, ia feruri e ia pure. Oia mau, te pato’i nei tatou i te mau a’oraa i faaineinehia no te vauvau na roto i te huru oreroraa ; area râ, ia ti’a ana’e te hoê elder no te paraparau i te hoê amuiraa i to’na iho fenua e aore râ, i te mau fenua éé, e mea ti’a ia’na ia faaineine maitai i ta’na a’oraa. E mea ti’a i to’na feruriraa ia faaî- maitai-hia i te mau mana’o e ti’a ia parauhia, o te ti’a ia faaroohia e o te ti’a ia haamana’o-noa-hia; i reira te varua faaurû e faaite mai ai i te parau mau i te mau taata faaroo o te hinaaro mai, e i te horo’araa’tu i ta’na mau parau te tapa’o no te mana.¹³

Ua ani uanahia i te mau elders i roto i te mau misioni i te ara e i te Feia Mo’a i te Mau Mahana Hopea Nei, ia ape i te tama’i e i te mâro i te mau tumu parau o te papa’iraa mo’a. Aita e hinaarohia ia aparau i te evanelia na roto i te mâro; e maitai roa te parau poro’i o te parau mau ia faaite ana’ehia na roto i te mau parau ohie e te here.

… Ua hau atu te iteraa papu o te parau mau i te hoê noa faati’araa ohie o te feruriraa, e haapapuraa mau no te aau, e iteraa papu o te faaî i te varua taatoa o te taata e farii mai.

E tonohia te mau misionare no te poro e no te haapii i te mau parau tumu matamua o te evanelia, no te Mesia e no te Mesia i faasataurohia e eiaha e faahauhia’tu na roto noa i te iteraa i te parau a te Atua. Aita ratou i faatoro’ahia no te pahono na roto i to ratou iho ite no te mau uiraa fifi o te parau a te Atua, eiaha atoa e haamoemoea i te mau taata o te haere mai e faaroo na roto i te faaiteraa i te iteraa hohonu. E mau orometua ratou e, e mea ti’a ia ratou ia faatiamâ i te mau hopoi’a o to ratou mau piiraa teitei tera râ, e mea atoa ti’a ia ratou ia haapii mai te au i ta te Fatu— ma te hinaaro i te arata’i i to ratou taata tupu na roto i te here, na roto i te tatararaa ohieraa e te mana’o papu, eiaha ra na roto i te faahaparaa.

E te mau taea’e, a vaiiho i teie mau tumu parau faufaa ore i te hiti; a haapa’o noa i te mau haapiiraa o te parau i heheuhia mai e o tei faaitehia i roto i te mau buka tumu o te Ekalesia e i roto i te mau faaiteraa parau a te mau peropheta ora; eiaha e vaiiho i te mau mana’o taa ê o te mau uiraa e ere i te mea ohie ia maramarama ia ruri ê i to outou feruriraa, a faataa ê hoi te reira i te tahi e i te tahi e i te Varua o te Fatu.¹⁴

E mea hinaarohia te taviniraa misionare i te fenua iho mai te au i to te fenua éé.

E mea oto mau i te mea e, ia hoi mai ta tatou mau tamarii tamaroa i te utuafare, o tei reva na i te ara no te faoti i te mau misioni maitai e inaha, ua vaiiho-noa-hia e aore râ, aita e tau’a faahouhia e te mau mana faatere o te Ekalesia e ua vaiihohia ia topa i roto i te aupuru-ore-raa e i te haapeapea-ore-raa, e penei a’e, ua faatea roa’tu ia ratou i to ratou mau piiraa i roto i te Ekalesia. E mea ti’a ia tape’a maitehia ratou i roto i te ohipa, e mea ti’a ia faaohipa ia ratou i roto i te ohipa pororaa, e na te reira e tape’a i te varua o te evanelia i roto i to ratou mau feruriraa e i roto i to ratou aau e ia horo’ahia te hopoi’a na ratou i to ratou mau fenua mai to te ara atoa hoi.

E mea titauhia te ohipa misionare i Ziona e aore râ, i te fenua iho oia atoa i te ara, aita e feaaraa no te reira. Te ite nei tatou e rave rahi mau tamaroa haapa’o ore e o te rave roa’tu i te mau peu faufau. E mea ti’a i te mau misionare tataitahi o tei ho’i mai na ta’na misioni o tei î i te faaroo e te hiaai i te maitai, ia rave i te hopoi’a no te faahoa e no te faaora i to’na mau hoa taurearea apî o to’na iho fenua e aita hoi i rava’i te iteraa rau. Ia ite te hoê misionare i hoi mai i te hoê tamaroa i te raveraa i te mau mea iino, e mea ti’a ia’na ia ite e, e hopoi’a na’na ia ume mai na roto i te parau faati’a a te mau mana faatere o te tìtì e aore râ, o te paroisa i reira oia e ora ai, e ia faaohipa i te mau faaûrûraa tei horo’ahia ia’na no te ora o taua taurearea i hahi ê ra, e o tei ere hoi i te iteraa rau mai to tatou mau elders i haere na i te ara, e ua riro hoi ei tumu no te faaora e rave rahi e no te taumu papu maitai ia ratou i roto i te parau mau.¹⁵

O oia o te ohipa i roto i te aua misioni, e ite oia i to’na hi’oraa i te aanoraa, e tai’o ahuruhia to’na puai, e manuïa to’na paari i roto i te mau vahi atoa e e tauma roa i ni’a i te hoê faito teitei, e e riro oia ei taata ai’a puai e te faufaa, oia atoa ei melo haapa’o maitai no te Ekalesia. Mai te mea ua hinaaro mau te hoê misionare i te faaô i roto i te aua, e mea titauhia oia ia riro ei misionare o te pùpù taato’a ia’na iho, ma te horo’a i te numera hoê roa o to’na itoito no te mau ohipa taa ê o tei horo’ahia ia’na ia rave. Ia hoi oia i to’na oire, te auraa mau, e vai noa â oia ei misionare; tera râ, e mea ti’a ia’na ia haamana’o e, e rave faahou oia i to’na parahiraa i rotopu i te mau taata rave ohipa, e ia amu i te ma’a ma te hou i to’na rae.… E mea ti’a i te mau misionare tei ho’i mai, ia vai ineine noa no te taime e hinaarohia ai te mau aau itoito, te mau feruriraa puai e te mau rima tavini ma te aau tae. E ore te hamani maitai o te taata aravihi i te evanelia e morohi— no te hoê ino iti noa—e ti’a ra oia no te faahoho’a i te hinaaro itoito o te aau tae tei arai maitaihia, no te aroha papu mau—e haapoto noa, no te ohipa.¹⁶

O tatou nei, te mau taata afai e e mau taata ueue no te huero maitai o te ora mure ore, a faatano i to tatou oraraa i te mau mea o ta tatou e poro nei, i ta tatou mau parau i te parau mau o ta tatou e afai nei, e ta tatou mau ohipa i te hinaaro o te Atua i heheuhia mai; area râ [mai te peu]e pee mai tei mau hotu i ta tatou ohipa o te faaroo, o tatou iho nei, te mau Elders e aore râ, te Feia Mo’a, e riro tatou ei mau haafifiraa no te haereraa i mua o te ohipa, ei mau ofai faataupupuraa i te e’a o te taata mataitai e hi’o noa mai nei ia tatou na roto i te varua haapa’o, aita tatou e faarahi nei i te hio’araa o te ora o vetahi ê tera râ, te vaiiho atoa ra ïa tatou i to tatou iho i roto i te fifi.¹⁷

Mana’o Tauturu i te Haapiiraa

No te aha e mea titauhia te “haehaa, te màrû e te here faito ore” ei mau huru maitai no te mau misionare? Eaha atu â te tahi mau huru o te tauturu i te mau elders e te mau tuahine ia riro ei mau misionare maitai roa? (A hi’o atoa PH&PF 4.) Nahea teie mau huru e nehenehe ai ia tauturu ia tatou ia riro ei mau melo misionare maitai roa?
No te aha i haapaarihia ai i te mau misionare ia faaea i rapae i te mau “mea viivii o teie nei ao”? Mea nahea to te Fatu haamaitairaa i teie mau huru misionare?
Eaha te mea ta tatou e nehenehe e rave ia ti’aturihia mai tatou e to tatou mau hoa e to tatou mau hoa tapiri melo ore? Nahea tatou ia faataa ia ratou e, “te hinaaro nei tatou i te mea maitai e i te haamaitai ia [ratou]”? Nahea tatou ia faaite au maitai i te evanelia i to tatou mau hoa melo ore?
Eaha te parau mau e ti’a i te mau misionare ia faaineine no te haapii?
No te aha e mea fifi i te mau misionare ia faaohipa i te mau marôraa, i te mau aparauraa e te mau haapiipiiraa hotu ore no te haapii i te evanelia? No te aha te vaira te hoê mana puai a’e ia haapii na roto i te Varua? (A hi’o PH&PF 100:5–8.)
Nahea te hoê misionare ia faaaravihi “i te varua o to’na piiraa”? Nahea tatou te mau melo o te Ekalesia ia farii e ia faaaravihi i te “varua itoito e te haapapuraa” a poro ai i te evanelia?
Nahea te mau misionare i ho’i mai na te misioni ia “tape’a maitehia i roto i te ohipa”? Eaha ta te feia faatere e te tahi atu mau melo o te Ekalesia e nehenehe ia rave no te tautururaa i te mau misionare i hoi mai ia faaea “itoito i roto i te ohipa pororaa”? Nahea te hoê misionare i hoi mai na te misioni e “riro ai ei faufaa no te faaora e rave rahi e i te faatumu papuraa ia ratou i roto i te parau mau”?

O Joseph F. Smith teie, faatata 19 matahiti i muri mai i to’na ho’iraa mai na te Misioni i Hawaii i te matahiti 1858.