Te faufaa, o te Niu ïa o te Tao’a rahi

Ia aufau tatou i ta tatou mau tarahu e ia haaputu atoa ia tia ia tatou ia tavini i roto i te basileia a te Atua.

Aamu o te oraraa o Iosepha F. Semita

I te matahiti ra 1918, ua papai o Iosepha F. Semita i te hoe rata i ta’na ra tamaiti ma te faati’a’tu i te tahi mau aamu o te tau noere i to’na ra apiraa a vai ai oia ma te “moniore”. Te na o ra oia no te mau matahiti matamua o to’na ra oraraa faaipoipo: “Aita ta’u e tarahu i te hoê noa ae taata i tera mau mahana, ua tia ia’u ia rave i te ohipa, aita i tia ia tutautohe noa. Ua parau oia e, ua rave oia e to’na utuafare i te ohipa ma to ratou puai atoa ia ora ratou. Tei roto ratou i te mau fifi i te taime a haere ai oia na mua rii noa ae i te tau Noere no te imi i te tahi mea taaê no ta’na mau tamarii. Ua parau oia e: “Ua hinaaro vau i te tahi mea iti no te faaoaoa ia ratou, e no te faariro i te Noere ei mahana taaê i te mau mahana atoa—aita roa râ e pene e vaira! Ua haere avae au na te purumu ma te hi’ohi’o i roto i te mau faretoa … e i muri iho ua haere ê atu vau i te hoê vahi e ore e itehia mai e te mata taata, ua parahi au i reira, e ua ta’i au mai te hoê tamarii ra te huru, tae roa’tu i te taime ua na rii te oto o to’u aau, e i te tahi maa taime i muri mai ua ho’i au i te fare, aore e pene i roto i te pute mai ia’u atoa i faarue i te fare aore e pene i roto i te pute, e ua hauti au e ta’u mau tamarii, ma to’u mauruuru e to’u oaoa i to ratou riroraa ei mau tamarii na’u….

“I muri mai i teie mau tamaraa, ua riro to’u aratia ei mea titiaifaro. Ua haamata vau i te haamaita’i i to’u oraraa, na roto i te raveraa i te ohipa ma te tuutuu ore, te haaputu etaetaraa i te moni, te faaoromai e te here i te Atua, ua ruperupe to’u oraraa.”¹

Ua parau te episekopo ra o Charles W. Nibley o tei rave i te ohipa na muri i te Peresideni Smith: “E mea haapao oia i ta’na ra mau haamau’araa…. E mea au ore roa na’na te tarahu, e aita roa e taata o ta’u i matau o tei vitiviti i te aufau pee roaraa i ta’na mau tarahu. Ua patoi roa oia i te tarahu, e aita roa oia e faao i te Ekalesia i roto i te tarahu noa’tu te mau fifi. Aita atoa ta’na iho e tarahu i roto i ta’na ra mau ohipa, ua haapao ra oia i te parau paari e na o ra e: ‘A aufau i to mau tarahu, a haere atu ai’ ”.²

Ua faaite papu te Peresideni Semita i te faaohiparaa mau o te Evanelia a haapii ai oia, “Ua riro noa’na ei haapiiraa no te Feia Mo’a e, te Ekalesia noa’tu aita to’na e mana no te faaora i te mau taata i te pae tino nei e aita atoa e mana no te haaruperupe e no te faaoaoa ia ratou i raro nei, aita atoa ïa to’na e mana no te faaora ia ratou i te pae varua, no te faateitei ia ratou i roto i te oraraa amuri atu.”³

Haapiiraa a Joseph F. Smith

A ape i te tarahu, i reira hoi outou e tiama ai i te pae faufaa e i te pae varua.

I teie nei, ua ite roa vau e, te hoê o te mau tumu no te ati rahi i rotopu ia tatou – e ua ite au e, mai te reira atoa no te mau huru taata atoa e ora nei i te fenua nei – oia hoi ua rahi ae te hoo a te taata i te moni e roaa nei ia ratou. Te haere nei ratou e tarahu i te mau tino moni rahi, te piri nei ratou i to ratou mau fare faaearaa e to ratou mau fare aupuru e tae noa’tu i te tahi atu o ta ratou mau faufaa no te tapapa i te huru oraraa o to ratou taata tupu, no te hoê tatauraa i rotopu i te tahi e te tahi no te faaiteite e no te faarahi atu a i to ratou aitarahuraa o tei riro ei peu no te ao nei….

… E rave rahi i rotopu ia tatou tei aitarahu … no te faaaifaito ia tatou i to tatou taata tupu, ahiri aita tatou i na reira, ua ora ïa tatou ia au i te faufaa e mauhia ra e tatou, e ua haaputu atoa ia tatou i te tahi moni rii no te tau fifi, e i teie nei mahana e riro ïa tatou ei feia tiama i nia i teie nei fenua…. Ia’u nei, te hinaaro nei au ia ite e … ia hoo anae tatou i te taoa no te hoê tara marite, e aufau atoa tatou hoê tara marite e aore ra te tahi taoa rii hoê tara marite to’na faito moni, e ia rave tatou i te reira ma te ore e faaiti i ta tatou mau ravea e te ravea atoa hoi o te utuafare, e aore ra na roto i te tuuraa i te hoê piri i ni’a i to tatou tua e i ni’a i te tua o to tatou utuafare. Te taata tataitahi o te ora nei na roto i te tarahu, e tuu oia i te fifi taamu i nia ia’na iho e i to’na utuafare….

Ua ite ae’na anei outou i te hoê taata o tei aitarahu, o tei piri i ta’na mau faufaa atoa, o te ora râ mai te huru ra e, aita to’na e tafifiraa e e tapitapiraa, e ua oaoa anei tera taata mai te taata râ o tei aufau pee roa i te mau mea atoa o ta’na i fatu? E mea tia ia tatou ia ora ia au i te faufaa e mauhia ra e tatou, e ia faatia i te hoê niu ei papa faatiaraa, e ia riro hoi te reira no ta tatou mau tamarii i muri mai ei papa paturaa ia ore hoi ratou ia aufau i te hoê noa ae moni aitarahu i ta tatou. Ua ite au e, aita vau e haapii nei i te Evanelia no te pae moni mai to te ao nei. Te mana’o nei au e, penei ae e piihia vau ei taata peu tahito, ei taata faaea otohe, e te tahi atu a mau i’oa. Teie mau i’oa, e parauhia no te mau taata o te ti’a no te parau atu i te mau taata ia ora ia au i te mau faufaa e mauhia ra e ratou. Te tahi mau taime, e mea titauhia ia tatou ia aitarahu. Mai te peu ua titauhia, atira ia. Area ra, aita vau i faafariuhia i te mana’o e mea titauhia no te maita’i o teie nei u’i e te u’i i mua nei ia o ta’u mau tamarii i raro ae i te faatitiraa no ta’u nei aitarahuraa.⁴

Aue te maita’i o Ziona ahiri e ite papu te feia mo’a tataitahi i te ma’i rahi o te aitarahuraa … te feia api e te feia paari! Oia mau, e mea maita’i roa mai te mea te ite ra te mau taata atoa e hiaai ra e piri i to’na fare e i to’na mau fenua no te aitarahu i te mau faateimaharaa ia pirihia te fare e te mau oto e tupu mai, ia ite ratou i te huru mau o te faatitiraa e te riaria rahi e tupu mai, ia ite maitai ratou i te reira hou ratou a rave ai i te reira faaotiraa mai ia ratou e ite i te reira i muri mai i to ratou raveraa i te tarahu.⁵

I te tau maitai, … e mea tia i te Feia Mo’a i te Mau Mahana Hopea Nei ia aufau pee i ta ratou tarahu.… Te parau atu nei au e, a paraparau ai au no teie tumu parau, te hoe ravea maitai ae o ta’u i ite no te aufau i ta’u mau tarahu i to’u nei taeae, to’u taata tupu, e aore ra te taata rave ohipa i pihaiiho ia’u, o te aufauraa i ta’u tarahu i te Atua ra na mua. E nehenehe ia’u e aufau te tahi moni hau no ta’u mau tarahu i to’u taata tupu, mai te peu e ua aitarahu vau ia ratou, i muri iho i to’u aufauraa i ta’u tarahu i te Atua ra, eita vau e haafaufaa ore i ta’u tarahu i te Atua. E ia na reira atoa outou. Mai te peu e te hinaaro nei outou ia manuia i te pae moni, ia riro mai outou e mau tane e ei mau vahine tiama e ei nunaa tiama, e haapao outou i ta outou mau tarahu i te Atua na mua, e i muri iho, e aufau atu outou i ta outou mau tarahu i to outou taata tupu.⁶

O teie te taime no te mau taata atoa no te haapii i te parau no te faufaa, e ia haamata i te tuu i te moni i te hiti e ia aufau i ta ratou iho mau tarahu, e ia riro ei nunaa tiama e ei nunaa mito. Mai te peu e rave noa tatou i ta tatou hopoi’a ei Feia Moa no te Mau Mahana Hopea Nei e e faaohipa tatou i ta tatou mau ravea na roto i te paari, e haamanuiahia tatou i mua i te enemi, e haamaitaihia ta tatou mau ohipa, e hotu mai te fenua, e rahi mai te auhune e e oaoa tatou i reira; no te mea e haamaitai mai te Atua i ta’na mau tamarii haapao maitai…. O teie te taime no te faaiti i te mau haamau’araa, no te faaiti i te puhura i te mau tao’a e no te patoi i te oaoaraa o teie nei ao. Tera râ, ia vai noa a te aroha i roto i to tatou aau. Eiaha tatou e faito i te tahi e te tahi…. Eita tatou e titau atu i to tatou hoa o tei aitarahu te tahi noa toata ia tatou ia aufau pee mai i te reira mai te peu e ani mai oia ia tiai rii, e a tuu roa’tu ai ia’na i roto i te fare tapearaa. E hoho’a parau noa teie. A haamana’o i te parabole a te Fatu no nia i te parau tumu, e ia aroha noa tatou i te tahi e te tahi. [A hi’o Mataio 18:23–35].⁷

Eiaha outou e piri atu i ta outou mau tao’a. A aufau vitiviti ia pee ta outou tarahu, a vai tarahu ore noa, e mea na reira ta te Atua fafauraa e tupu ai i nia i te feia o ta’na Ekalesia, e e riro mai ratou ei feia tao’a rahi i te ao nei. Area ra, eita te reira e tupu ia piri outou i to outou mau fare, ta outou mau faapu animara, e aore ra ia o atu outou i roto i te tarahu no te aufau i ta outou tarahu ia vetahiê, e na roto i tena ohipa, penei ae e ino to outou roo e eita outou e tiaturi faahouhia no te mea ua tahiti outou ia outou iho.⁸

Ua faaara pinepinehia’na te feia mo’a i te mau mahana hopea nei e i teie mahana, te a’ohia nei ratou eiaha e tuu atu i to ratou mau fare, to ratou hoa here e ta ratou mau tamarii, i nia iho i te fata no te pereraa moni…. Mai te peu e, e haapao te feia mo’a i te mau mahana hopea nei i teie mau a’o e teie mau haapiiraa no te tau tahito ra, e e tapîtapi ratou i mua i te mau faahemaraa o te haati nei ia ratou, mai te piriraa i to ratou mau utuafare, ta ratou taiete imiraa moni, te mau taheraa pape, te mau faaamuraa animara, no te pere ia monihia ratou….

Te mau a’oraa e horo’ahia ra i o nei, no te feia ihoa ïa e hema nei ia piri i to ratou mau fare no te pereraa moni (faarahi i ta ratou moni ma te papu ore e manuia anei), eere teie parau no te feia e imi ra i te fare no te mea aita to ratou, na roto i te tahi mau taiete paturaa fare e a aufau ta-ava’e atu ai i te hoo o to ratou fare. E riro teie aufauraa ta-ava’e i te faatupu ei peu matauhia te tarani, area ra te pereraa, na te reira e faatupu mai oia i te varua puhura tao’a.⁹

E mea oto ia parau e, e rave rahi te feia o tei o i roto i te pereraa e ua puohu roahia to ratou mau varua i roto i te here i te mau tao’a o te ao nei…. E haaputu teie feia i te mau tao’a e e haapa’o noa ratou i ta ratou mau tao’a, e e aramoinahia ia ratou … te Atua o ta ratou e titau nei i te mau taime e tao’ahia ai ratou e te mau taime e vevehia ai ratou.¹⁰

Mai te peu e te vai nei hoê i o nei o te mana’o nei ia o atu i roto i te tarahu no te pereraa…. E a’o atu vau ia’na ia haere maru, ia pure no nia i te reira, e ia feruri maitai hou oia e faahepo ai ia’na iho ia tarahu i te moni e ia o atu i roto i te tarahu. Oia hoi, mai te peu e tia ia outou, eiaha outou e tarahu. A aufau pee oioi i ta outou mau tarahu mai te mea e ti’a te reira.¹¹

E mea tia i te taata ia haapao maitai i te moni e ia faaohipa i te reira na roto i te paari mai te peu te vai ra ta’na. Mai te peu aita oia i ite nahea ia haapao i te reira, e puta to’na pute e e pau oioi ta’na moni.¹²

Te ani faahou nei au i te feia moa i te mau mahana hopea nei ia tutava maite i te faatiama ia ratou iho i te mau tarahu ra. A aufau pee ta outou mau tarahu e eiaha outou ia o faahou i roto i te tarahu, e ia tiama outou i te pae moni e tiama atoa ïa outou i te pae varua.¹³

Ia rahi ae to tatou here i te Atua i te here i te moni e te imiraa i te oaoa.

Te vai nei te hoê paruparu i roto i te taata … e paruparu mana rahi, o te raveraa ïa e te haamaharaa ïa i to’na mau hinaaro, i ta’na mau titauraa, noa’tu e haafifi te reira ia vetahiê. Noa’tu te mau hopearaa ino e tupu mai i nia ia vetahiê, e tutava oia ia faatupu i to’na mau hinaaro, te mau hinaaro no te faarahi, e te faatupuraa i ta’na mau opuaraa pipiri. O teie te hoê o te mau hape o teie tau. O teie te hoê o te mau paruparu e taaê ai te taata i to’na ra Fatu, e taaê ai oia i te Atua e i te parau mau, e a riro ai teie taata ei ture no’na iho. Mea hape te reira.¹⁴

Te taata paari … e ape oia i te pohe mau e tupu mai na roto i te imiraa i te mau faaoaoaraa pae tino. Eita oia e faatiti ia’na iho e aore râ e hoo mai i te mau pereoo e te tahi mau pereoo tavere no te tapapa ia vetahi ê i te imiraa i te mau oaoaraa pae tino nei….

Te hopea o teie nei tapaparaa i te au e te anaanatae e te faturaa i te mau tao’a e roaa nei i te feia moni anae, oia hoi e rave rahi o te rave hua nei i te mau ohipa tano ore ia roaa ia ratou te moni no te haamaha i teie nei hinaaro. No reira i rahi roa ai te mau raveraa ti’a ore i te pae no te faufaa. E rave rahi te mau raveraa haavarevare e fariihia nei ia roaa te faufaa e ua tae roa’toa te fariiraahia te mau raveraa huna, te haavare, te haavare pinepineraahia te mau hoa e te utuafare ia roaa te moni no te haamaha i teie mau hinaaro faito ore o te hiaai.¹⁵

Te aroha nei au i te taata tao’a rahi o tei here i ta’na moni hau atu i te Atua…. E tae mai te mahana e faitohia ai tatou e e itehia ai mai te peu e ua rahi ae to tatou here i te tao’a o te ao nei i te Atua ra.… Ua parau te Fatu e mea fifi no te hoê taata tao’a rahi ia o i roto i te basileia no te rai ra. Eere no te mea ua rahi te mau tao’a a te reira taata—no te mea te opua nei te Fatu ia riro tatou ei feia tao’a rahi ae i te mau nunaa ato’a. No reira, aita e ino e vaira i roto i te riroraa ei feia tao’a rahi. Eere te ino tei roto i te faturaa i te moni. Te faaroo pinepine nei tatou i te parau “o te moni te tumu o te mau ino atoa” Aita te reira parau i tano. Aita te mau papairaa mo’a e parau nei i te reira. Te parau nei ra te mau papairaa mo’a, o te here o te moni te tumu o te mau ino atoa [A hi’o 1 Timoteo 6:10]¹⁶

Te fifi rahi ae ta’u e ite nei i nia i te e’a o te feia mo’a i te mau mahana hopea nei, o te mau mea ïa e tupu mai na roto i te faturaa i te mau tao’a rahi– te teoteo e te faarahi, te mana’oraa te taata ia’na iho e te haamoeraa i te Atua, e te haapa’o oreraa i ta tatou mau hopoia mo’a.no te mea ua î tatou i te mau haamaitairaa no teie nei ao o Ta’na i ho mai no tatou na roto i To’na aroha rahi. Te na’ohia râ e, i roto i te ati e imi tatou i te Fatu, area râ i te tau auhune râ aita tatou e haamana’o faahou Ia’na. Te ite nei au e, teie te fifi rahi roa ae e moemoe nei ia tatou i teie mahana.¹⁷

E mea maitai ae ia horo’a i te tamahanahana e te oaoa i to tatou taata tupu i te fariiraa i te reira. Area râ i roto i te varua e te huru o to te ao nei i teie mahana, eere te reira te mana’o. Te tapapa nei te mau taata o te ao nei i te mau mea o ta ratou e mana’o nei e, e faatupu te reira i te oaoa. Aita ratou e tau’a nahea râ e roaa ai ia ratou te oaoa, inaha te tae noa mai ra te reira. I te pae rahi, na te auro e te moni e horo’a ia ratou to ratou au mau e to ratou atoa oaoa mau. Tera râ, tau matahiti i muri ae, e faarue ratou i teie ao, e vaiho mai ratou i ta ratou mau tao’a e te mau mea atoa o ta ratou i poihere. Aita e tia ia ratou ia hopoi atu i ta ratou auro na muri ia ratou, no te mea no teie ao te reira. Ia tae atu ratou i muri mai i te paruru ra, te mau mea o tei faaoaoa’na ia ratou, eita ïa e roaa faahouhia e to ratou rima. Ua morohi te puna o to ratou oaoaraa….

Te vai râ anei te hoê mea i roto i teie ao o te horo’a i te oaoa e te au hau ae i te iteraa e, ua faaorehia ta tatou mau hara, e e mea tiama tatou i mua i te aro o te Atua to tatou Metua i te Rai ra, e aita tatou i haamauiui ae i te hoê noa ae o to tatou taata tupu, e aita ta tatou e tarahu e e haaviraa, aita atoa hoi tatou i topa i raro ae i te faatitiraa a te ao nei e aore ra a to tatou taata tupu? E hau atu te oaoa ta’na e faatupu mai i te tahi noa’tu tao’a i raro nei. Eita te reira e roaa na roto i te moni. Eita te mau tao’a o te ao nei e faatupu i te reira oaoa.¹⁸

E faaohipa tatou i te paari i roto i te mau ohipa pae tino ia tia ia tatou ia patu i te basileia o te Atua.

Hoe mea i papu ia’u, oia hoi, e mea ti’a ia tatou ia haapii i te mau parau tumu no te faatereraa i te faufaa. E mea ti’a ia tatou ia faaohipa i to tatou paari, te feruriraa, e te ite maitai ae e roaa ia tatou i roto i te mau ohipa pae tino e i te mau ohipa pae varua…. E mea pipiri roa tatou. Aita e tano ia parau tatou e: “na te taata iho oia e haapao” area ra e rave rahi o tatou o te nounou nei Te hinaaro nei tatou i roto i to tatou aau te mau mea atoa e fatuhia ra e to tatou taata tupu noa’tu aita tatou e hinaaro ra i taua mau mea ra. No te riro mai to tatou taata tupu ra,, no te faahoa ia’na, e no te faahoa ta tatou mau tamahine i ta’na mau tamahine ra, e ta tatou mau tamaroa i ta’na ra mau tamaroa, e mea ti’a ia tatou ia fatu i te hoê fare nehenehe, te mau tauihaa fare nehenehe e te mau mea faaunauna moni rahi noa’tu eita te reira e pee ia tatou ia aufau mai te pee ra i to tatou taata tupu ia aufau. E ohipa maamaa roa te reira. E mea ino te reira …

… E mea tia i te feia mo’a tataitahi i te mau mahana hopea nei ia haapii – te u’i api ihoa ra i Iseraela – nahea ratou tataitahi ia faariro i te ao nei ei mea maitai ae na roto i to ratou huru. E mea tia ia tatou paatoa ia rave i te tahi ohipa maitai. Ia na reira tatou, e faufaahia ïa to tatou mau oraraa. E haamaitai mai te Atua ia tatou i roto i ta tatou mau ohipa e ta tatou mau tutavaraa; e mai te peu e tauturu tatou i te tahi e te tahi i roto i te mau ohipa pae tino nei e e rave tatou i ta tatou mau imiraa moni ia au i te mau parau tumu tano, e maitai rii ae teie ao no tatou, e e haamaitaihia tatou i te ao nei. E rahi mai ta tatou mau ravea no te patu i te basileia o te Atua, e rahi atu a ta tatou no te haaputuputu i te feia veve, no te patu ia Ziona, no te maitai o te Feia Mo’a e no to tatou iho maita’i.¹⁹

Te tiaturi nei au e haapao tatou i te mau faaueraa a te Atua, e haaputu tatou i ta tatou moni, e aufau pee tatou i ta tatou mau tarahu, e riro tatou ei mau tane e ei mau vahine tiama, eiaha tatou ia riro ei titi, mai te rahiraa o tatou i teie nei mahana. Tei raro ae e rave rahi o tatou i te faatitiraa o te tarahu e e mea fifi roa ia matara i rapae i taua mau tarahu ra, area ra mai te mea e manuia tatou i te matararaa i rapae i taua mau tarahu ra na roto i te poupou, a na reira anae ïa e tae roa’tu i te hopea; e ia tae i te taime e piihia ai tatou ia tavinini i roto i te misioni, e nehenehe ia tatou e parau e: “E, ua ineine au e te hinaaro nei au e haere” e e nehenehe ihoa ra tatou e parau e: “Aita ta’u e tarahu ia vetahi ê, e te vai nei ta’u ravea no te haere e no te faaamu i to’u utuafare”.²⁰

Te tiaturi nei au e, e hopoia na tatou te faaineineraa ia tatou no te mau tau fifi no te o’e, te ma’i, te vero, e te aueueraa fenua, e te taime e ta’uma ai te miti i ni’a ae i to’na mau otia. E nahea tatou ia rave i te reira? Na roto i te haapiiraa e te faaohiparaa i te mau parau tumu o te faaohiparaa tano i te moni i roto i to tatou oraraa, e na roto i te hoê faanahonahoraa o te autaeaeraa e te here e tia i te hoê taata ia tauturu i to’na ra taeae, e tahoê ratou, eita te hoê o ratou e ere i te hoê noa ae mea no te mea e mana to vera no te tauturu atu. Te hoê o te mau fafauraa rahi ta te Fatu i fafau i to’na Nunaa, mai tei papaihia i roto i te Buka Fafau, oia hoi e riro mai ratou ei nunaa tao’a rahi ae i te mau nunaa atoa (BF 38:33) I teie nei, nahea te reira e tupu ai mai te peu e haamau’a tatou i te mau mahana atoa te moni ta tatou i roaa, e mai te peu e e tarahu rahi atu tatou i ta to tatou taata tupu?…

… Ia riro tatou ei feia rave ohipa e te tarani, e ia haaputu tatou i ta tatou mau api. Aita tatou e tuu ra i to tatou tiaturiraa i roto i ta tatou mau tao’a, aita atoa tatou e faariro ra i te reira ei Atua no tatou; no teaha ia? Ia tia ia tatou ia mito ia tatou ia tae mai te mau tau fifi ra e ia ti’a atoa hoi ia tatou ia amo i te mau hopoia i titauhia i te nunaa o te Atua no te faatupu i te mau opuaraa a te Atua Mana Hope i te fenua nei.²¹

Mana’o Tauturu i te Haapiiraa

Mai te peu e ua hinaaro tatou i te manuia i te pae varua e i te pae tino nei, eaha ta tatou e rave? Nahea te nounou e haamou ai i te manuiaraa?
Eaha te mau haamaitairaa o te tae mai na roto i te aperaa i te tarahu? Eaha te mau fifi tei roohia e te feia o te faarahi i ta ratou mau tarahu? Eaha te tumu e o ai te mau taata i roto i te tarahu?
Eaha ta tatou e rave i te “tau manuiaraa” no te faaora ia tatou i te tarahu ra? Eaha ta tatou mau hopoia pae moni i te Fatu ra? No teaha tatou e aufau ai i te reira na mua?
Noa’tu e hoohia te mau fare na roto i te “aufauraa ta-ava’e”, eaha te tahi mau mea e tia ia hiopoahia no nia i te aitarahuraa fare? Nahea te “varua puhura tao’a” e aratai ai i te mau taata ia haafifi i to ratou mau fare e to ratou maitai pae moni? Nahea tatou ia ape i teie mau mea?
Nahea te pipiri e te imiraa i te mau faaoaoaraa e faataa ê ia tatou i te Atua ra? Eaha te mau fifi e tupu mai ia here tatou i te moni, hau i ta tatou e here nei i te Atua ra?
Nahea tatou ia faaineine i te pae tino e te pae varua no te “tau o’e”?
Nahea tatou ia faaohipa i ta tatou mau faufaa no te “faatupu i te mau opuaraa a te Atua Mana Hope”? Nahea te ineine pae moni ia tauturu ia tatou no te tavini?
Nahea tatou ia haapii i ta tatou mau tamarii i te mau parau tumu no te faaohiparaa paari o te moni?

No te haamaitai i te faufaa moni, ua haamau te mau pionie feia mo’a i te tahi mau taiete mai te Zion’s Cooperative Mercantile Institution.