Ia roaa te faaearaa (tamaruraa) i roto i te Mesia

Te feia e iteraa papu to ratou no ni’a ia Iesu Mesia, e tamaruhia ratou e tei ni’a te hau i to ratou varua.

Aamu o te Oraraa o Joseph F. Smith

Ua pohe te Peresideni Iosepha F. Semita i te 19 no Novema 1918, ua tavini oia ei Peresideni no te Ekalesia mai te matahiti 1901 mai. Ua rave oia i te ohipa a te Fatu ma te puai, te vai parautiaraa, e te manao tae, ua horo’a oia i to’na ora no te haapii i te mau parau mau o te Evanelia a Iesu Mesia. E taata a’o oia no te parau mau, e peropheta no te Atua, o tei a’o i te feia mo’a “A pee mai ia’u mai a’u e pee nei i to tatou taata faatere, te Faaora o te ao nei”¹

Te Peresideni Heber J Grant, o te mono mai ia Iosepha F Semita ei Peresideni no te Ekalesia, ua na o mai i te parau i to’na oro’a hunaraa: “I pihaiiho au ia’na i te roaraa o na matahiti e 36, a tahi i te taime a riro ai oia ei tauturu, e i muri iho i to’na riroraa ei Peresideni o te Ekalesia. I roto i tera mau matahiti aita vau i ite i te hoe noa mea i roto i to’na oraraa, i te parau e i te ohipa, aore i tano no te taata parautia. E nehenehe ia’u i te parau papu, “Ua riro oia mai te huru ra o te taata o ta’u e hinaaro ia riro.” A tia noa ai au i o nei, i te pae menema, aita te mau parau e navai, te hinaaro nei au e i te mana e te aravihi ia riro ei taata maitai, o te aroha ia vetahi ê, o te faaore i te hara, o te itoito e te hinuhinu, e taata parau tia e o te pee nei i to’na titooraa avae i roto i te mau ohipa atoa. Aita’tu ta’u aniraa.

“… Aita to te hoe taata i ora na e iteraa papu mana ae no ni’a i te Atua Ora e no ni’a i to tatou Faaora i to Iosepha F. Semita. Mai to’u apiraa, ua faauru oia i to’u varua na roto i to’na faaiteraa i to’na iteraa papu i te mau taata atoa o ta’na e farerei, ma te faaiteraa ia ratou e, te ora nei te Atua, o Iesu te Mesia, te Tamaiti a te Atua Ora, te Faaora o te ao nei. Te varua iho o te faaururaa i roto i teie taata, ua o mai i roto i to’u aau e i roto i te mau aau o te mau taata e rave rahi. Ua here au ia Iosepha F. Semita, aita’tu e taata o ta’u i here mai ia’na ra te huru. Ia haamaitai mai te Atua ia’na.”²

Teie iteraa papu i muri nei, no roto mai i te a’oraa ta te Peresideni Semita i horo’a i Provo, Utaha, i te 13 no Tenuare 1907.

Haapiiraa a Iosepha F. Semita

E tomo matou i roto i te tamaruraa a te Fatu, ia horo’a tatou i to tatou varua Ia’na e i Ta’na evanelia.

Te hinaaro nei au i te taio mai roto mai i te mau papairaa a Moroni, te parau nei oia no te mau haapiiraa o to’na ra metua tane, Moromona.

“E teie nei, e papai au o Moroni i fanu maa parau a ta’u metua ra a Moromona, o ta’na i parau i te faaroo, te tiai, e te aroha …

“… E a’o atu vau ia outou i tei roto i te ekalesia, e tei pee atu i te Mesia ma te hau, e tei roaa ia outou te tiaturiraa e navai ia e o ai outou i roto i te faaearaa-tamaruraa-o te Fatu, mai teie nei atu a e ia faaea outou e oia atoa i te ao ra.” [Moroni 7:1, 3]

… Eaha te auraa o te parau râ: ia o i roto i te faaearaa o te Fatu e aore ra ia tomo i roto i te tamaruraa o te Fatu? A parau ai au no’u nei, te auraa o teie parau, oia hoi, na roto i te here o te Atua, ua upootia Oia i nia ia’u, e no reira te faaea nei au i te Mesia ra ma te hau, aita vau e aueue faahou i tera parau e tera parau, i te rave a te taata nei, e ite paari i te mau peu atoa o te haavare ra; e ua papu vau i te ite e te iteraa papu no Iesu Mesia, e aita te hoê mana aratai e atu ia’u mai te e’a pirihao e te afaro o te faahoi ia’u i mua i te aro o te Atua, no te farii i te faateiteiraa i roto i To’na basileia hanahana ra; e mai teie mahana e a muri noa’tu e faaea vau ma te hau e tae roa’tu i te taime e o ai au i te faaearaa i pihaiiho Ia’na i te ra’i ra.

Te hinaaro nei au i te haapapu i teie mana’o i roto i to outou feruriraa, no te mea te hinaaro nei au ia ite outou o teie te auraa i opuahia e teie nau parau, “ia o i roto i te faaearaa o te Atua”. E faaite papu atu vau ia outou, o te taata râ i ore i niuhia i te haapiiraa a te Mesia, i ore i horo’a i to’na varua atoa ra i te Fatu, e i te Evanelia o ta’na i haapii atu i te ao nei, aita â oia i o mai i roto i tena faaearaa ra e aore râ aita â oia i tomo i roto i taua tamaruraa ra. Tei tua oia, e auraa parau teie, te tere haere nei, te aueue nei, aita ana e vahi papu, aita ana e faaroo e tia i te faanuu, e riro mai oia i raro ae i te rave a te taata o te paari i te mau haavare atoa e o te aratai ê atu ia’na i te hape e te pouri. E o tei farii râ i te iteraa papu o Iesu Mesia i roto i to’na aau, o te horo’a i ta’na atoa no te basileia o te Atua e i te hinaaro o te Metua ra, ua papu ïa to’na taahiraa. Ua mau to’na aau, ua tae to’na mana’o, ua faaorehia te tapitapi, ua faaorehia te feaa, ua ite oia i ta’na e tia’tura, ua papu oia i to’na ra mau opuaraa e i to’na hinaaro, area ra vau e to’u nei utuafare e haamori ia matou ia Iehova, e haapao oia i Ta’na mau faaueraa e e haere oia i tei noaa i te mau taata atoa ia haere, na roto i te viivii ore, te faatura, te vai parautia e te afaro i mua i te Fatu.

Te haamauruuru nei au i te Atua no To’na tatararaa i teie varua e teie huru tapitapi mai roto mai i to’u mana’o e to’u nei feruriraa a parau ai tatou no te ohipa ta tatou e rave nei, i te mea e ua horo’a mai te Fatu i te iteraa papu hou i te mau mea atoa no nia i teie nei ohipa. Te oaoa nei au i te Evanelia. Te oaoa nei ou i te iteraa papu o te Varua o te Atua i roto i to’u aau; Te oaoa nei au i te iteraa papu o te Peropheta Iosepha Semita; Te oaoa nei au i te mau parau tumu atoa o te Evanelia o Iesu Mesia o ta tatou e farii nei i teie mahana. Eita vau e ani, aita ta’u e hinaaro rahi ae i te haapiiraa o te oraraa e te faaoraraa o te heheuhia i roto i teie faanahoraa faahiahia o te faaoraraa i faahoihia i te fenua nei i teie nei mau mahana hopea nei….

E tutava tatou i te pee i te faito morare teitei ta te Fatu i tuu mai.

… Mai te peu e, ua hinaaro mau to tatou aau e tavini i te Atua e e haapao i Ta’na mau faaueraa, eaha ïa to’na hotu? Eaha to’na hopearaa? … E farii te taata i te varua no te faaoreraa hara, no te aroha, no te mauuruuru, no te here mau. Eita ratou e imi hara i te tahi e te tahi; eita ratou e hamani ino i te paruparu, te taata e hema haere noa, e aore ra te ma’ua; e haapao râ ratou i te ma’ua, te paruparu, te tiaturi mai i nia ia ratou no te ora e o te raro ae hoi i te faatitiraa a vetahiê, mai ia ratou e aroha i ta ratou iho; e riro te tiamaraa o to ratou taata tupu i te mo’a mai to ratou iho tiamaraa, e haafaufaa ratou i te viiviiore, te faatura, e te haavare ore o to ratou taata tupu e to ratou mau taeae mai ia ratou e oaoa e e haafaufaa, e e haamo’a i ta ratou iho.

Eita e roaa oioi ia tatou te faito morare teitei roa ae o ta’na i tuu mai. E ua ite tatou eita te reira e roaa ia tatou i teie nei, e aita atoa te taato’araa o te ite e roaa ia tatou, area ra tei o te tapao, tei mua to tatou nei mata te faito. Te tiai nei tatou ma te anaanatae i te taime e roaahia ai ia tatou tera faito hanahana e te teitei i tuuhia i mua ia tatou na roto i te hioraa maitai, te oraraa, e te misioni a te Fatu o Iesu Mesia. Noa’tu aita i roaa ia tatou te faito maitai roa ta te Atua i faaite mai na roto ia Iesu Mesia, e tatarahapa râ tatou i ta tatou mau hape, e haapuai faahou tatou i to tatou hinaaro, e tapiti tatou i to tatou itoito ananahi. Oia mau, i teie nei e tapiti tatou i to tatou itoito, e tamata tatou i te upootia i to tatou mau paruparu, e haafatata tatou i te hioraa maitai i faaitehia ia tatou e te Tamaiti a te Atua.

O teie te Evanelia a Iesu Mesia, e e haapiiraa mau teie. Te taata o te haapao i te reira, o te farii i to te reira varua, e o te poihere i tera varua i roto i to’na aau; o te hinaaro nei ma to’na varua e o te tamata nei ia faarahi i teie hinaaro ia rahi ae i te mau hinaaro atoa, e haere ia mai te faaroo i te faaroo, mai te tiai i te ite, mai te iteraa i te paari e te mana, e i te hopea i te faateiteiraa e te hanahana i roto i te basileia o to tatou Atua, e aita e mana i raro ae i te basileia tiretiera o te tapea mai i to’na haereraa i mua, mai te peu e, e tutava oia i te haapao i te mau ture e te mau faaueraa a te Atua….

… Ia faaoti tatou, mai a Iosua i faaoti i te tau tahito ra, e tavini tatou i te Atua i teie mahana, e mai teie nei mahana e a muri noa’tu e tavini tatou Ia’na e e haapao tatou i Ta’na mau faaueraa, e haamata tatou i te ite maitai i te taaeraa i rotopu i te pouri e te maramarama, te maitai e te ino, te tano e te hape, te viivii ore e te viivii; e mai tera taime atu, e tupu to tatou hinaaro no te maitai â i te rahi, e e tupu to tatou aravihi i te raveraa i te maitai e i te rave faaotiraa i te mau opuaraa a te Atua, i te upootiaraa i ni’a i to tatou mau paruparu, mai te au i to tatou itoito i te faarueraa i te ino e i te maitiraa i te maitai, na roto i to tatou hinaaro i te maitai e te aperaa i te ino, te faarueraa i to te ao nei e te mau hinaaro o te natura o te taata hi’a, e tauturu tatou na roto i te raveraa i te mau mea o te faateitei i te taata, o te faateitei te mau hinaaro o te taata, o te faateitei i to’na ra mau opuaraa e o te faarahi i to’na aroha, to’na here, e to’na faaoreraa hara. I reira outou e faataa ai i te maramarama o te mahana mai te pouri o te ru’i. [A hi’o Moroni 7:14–15]….

E haere noa tatou ma te aroha i te aroha e tae roa’tu i te taime tatou e farii ai i te iraa e e riro ai e feia tufaa mai ia Iesu Mesia.

E taio vau i teie ia outou na:

“Oia mau, te na reira mai nei te Fatu: E tupu mai â teie o te mau varua atoa o te faarue i ta’na mau hara râ e o te haere mai ia’u nei, e o te pii mai i to’u nei i’oa, e o te haapao i to’u nei reo. E o te haapao hoi i ta’u mau faaueraa, e ite mai ïa i to’u nei mata e e ite mai hoi e te vai nei au” [PH&PF 93:1].

O teie te parau a te Fatu. Eere i te mea ohie no te taata ia ite atu i te aro o te Atua e ia ite e, te ora nei Oia, te taata o te ore e faarue i ta’na hara, o te ore e haere mai i te Atua, o te ore e tiaoro i To’na ra i’oa, o te ore e faaroo i te reo o te Atua, o te ore e haapao i Ta’na mau faaueraa. E ite anei oia i te aro o te Atua, e e ite anei oia te ora nei Oia? Aita, aita tera e tupu mai. O te “haere mai ia’u nei” o te “faarue i ta’na mau hara;” o te “pii mai i to’u nei i’oa” o te “faaroo i to’u nei reo”; o te “haapao i ta’u mau faaueraa.” O oia te “ite i to’u aro” te na o mai ra te Atua, e o oia o te “ite te vai nei Au” e aita oia e “ite noa te vai nei au”, e ite râ oia “O vau te maramarama mau o te horoa nei i te maramarama i te mau taata atoa o te tae mai nei i te ao nei.” [PH&PF 93:2].

E fafauraa hanahana teie e horoahia i te mau tamarii a te Atua …. Mai te peu e o Iesu Mesia, te Tamaiti Fanau Tahi a te Metua i roto i te tino, aita Oia i farii i te iraa i te matamua ra, e ua piihia te Tamaiti, area ra ua haere noa oia mai te aroha i te aroha, na nia i te aroha i te aroha ia, e e mea maramarama maitai, te taata o te haere na ni’a i To’na ra taahiraa avae, o te haapao i Ta’na ra mau haapiiraa e o te farii i Ta’na ra faanahonahoraa no te ora e no te faaoraraa, e farii ïa oia i te aroha i ni’a i te aroha, e e tamau â oia i te farii i te aroha i ni’a i te aroha. E taui to’na huru titiaifaro ore ra ei huru titiaifaro, e i reira oia e farii ai oiz maa vahi iti i onei e maa vahi iti i reira e tae roa’tu i te taime e farii ai oia i te iraa mai te îraa atoa ifariihia e te Tamaiti a te Atua, e e mea na reira oia e riro mai ai mai te Mesia ra te huru, oia hoi te Tamaiti a te Atua ra, ei tamaiti ai’a na te Atua e ei tamaiti ai’a atoa e o Iesu Mesia ra. [A hi’o PH&PF 93:11–14]. Aita vau e ite ra nahea vau ia faaite atu ia outou i te mea e ama ra i roto i to’u varua e i roto i to’u aau ia feruri au i teie parau a te Mesia, teie fanao hanahana i tuuhia i ni’a ia’u na roto i to’u haapao i te mau faaueraa a te Atua, na roto i te haapaoraa i te parau a te Fatu, oia hoi e farii riirii au i te îraa o te hanahana o te Atua, i te îraa o te ite o te parau mau, i te îraa o te mana, i te îraa o te paari, o te mauraa i te mana e te faatereraa e te hanahana mai to te Metua ra.

Aita anei te reira e turai ia outou ia ora no te hoê tumu faufaa e tupu mai i muri iho? Eere anei teie i te hoê re faufaa rahi o te tuuhia’tu i mua ia outou; o te horoahia ia outou’na na roto i to outou faaroo, to outou parautia, to outou fariiraa i te maramarama, to outou haereraa na roto i te maramarama mai te Mesia i haere na roto i te maramarama, ia tia ia outou ia parahi i pihaiiho Ia’na, e ia tama te toto o Iesu Mesia i ta outou mau hara atoa? Te haamauuruuru nei au i to’u Atua no ta’na Evanelia Mo’a; te haamauruuru nei au Ia’na no to’na tutavaraa, e no teie tiaturiraa o te faauru nei i to’u varua ia riro ei mea parautia no to’u Metua e to’u Atua; parautia hoi no te ora i pihaiiho Ia’na, parautia no te faateiteiraa i roto i To’na basileia, e no te farii i te oaoa i te parahiraa i pihaiiho Ia’na e i To’na ra mau mauruuru na roto i te mau tau atoa o te oraraa mure ore.

Ua ite au e, o te Evanelia a Iesu Mesia te faatia ia’u ia titau i teie faateiteiraa e aita’tu e ravea e faaorahia ai te taata; aita’tu e faanahoraa i heheuhia mai i to te ao nei e faateiteihia ai te taata e e ho’i faahou ai oia i mua i te aro o te Atua. Aita’tu e ravea ….

Ua heheuhia anei te mau mea atoa? Aita. Te vai nei anei te tahi atu mau mea ta te Atua e heheu mai i Ta’na mau tamarii? E, e rave rahi, aita â tatou i ineine no te maramarama rahi ae o te tae mai; no te mea o tei tuuhia’tu te mea rahi ra, e mea rahi atoa ia te titauhia’tu ia’na ra; ua tuuhia mai i te mea rahi, e te titau nei te Atua hau i ta tatou e horoa nei Ia’na. Aita tatou e haere na roto i te maramarama mai Ia’na e haere nei na roto i te maramarama ra; eita tatou e faaroo i te parau mau mai ia’na e titau nei ia tatou i te faaroo. Te faatia nei tatou i ta tatou nei mau paruru; te faatia nei tatou i te faahemaraa o tei faaati nei ia tatou, to tatou mau hinaaro, to tatou pipiri, to tatou mau hinaaro pae tino, aita tatou e tamata i te upootia i te paruparu o te tino ma te parau i roto i to tatou varua “No’u nei, e tavini au i to’u Atua, e haapao vau i ta’na mau faaueraa, e haere hara ore au i mua Ia;na” Aita tatou e na reira nei, area râ o te feia maitai roa hoi i te ao nei, te feia mo’a i te mau mahana hopea nei. Ua fatata to tatou oraraa i teie faito, hau i te tahi atu mau taata i te ao nei i teie nei mahana, noa’tu to tatou mau paruparu e to tatou mau hapehape.

E tupu mai te hau e te oaoa na roto i te evanelia a Iesu Mesia.

I teie nei, ia haamaitai mai te Fatu ia tatou. Ia vai mai To’na ra hau i nia ia tatou, e au mau taeae, e e au mau tuahine. A farii na i te tiaturiraa i te Evanelia i roto i to outou aau. Ia ite outou e, teie haapaoraa o tei horoahia ia tatou e te peropheta Iosepha Semita, o te haapaoraa ïa a te Atua, o te ture a te Atua, e o te mau titauraa a te Atua i Ta’na mau tamarii i nia i te fenua nei, e e tao’a faufaa ae teie i te mau mea atoa. E tao’a faufaa ae teie i te taata iho, i te ao, i te auro e te piru, te mau fare, e te mau fenua; e mea faufaa ae i te oraraa tahuti, no te mea na roto i te reira eita tatou e haapapu noa i to tatou iho taahiraa, i to tatou mana e te fanao, e haapapu atoa râ tatou i te horoa no te oraraa mure ore, oia hoi ta te Atua horoa rahi roa ae.

Aita to tena e faaauraa. O teie te mea rahi ae i te ao nei—te mea rahi ae i te fenua nei- o teie te mea faahiahia ae no tatou i teie nei ao, te parau mau a te Atua, te Evanelia a Iesu Mesia, te haapiiraa o te faaoraraa e te faaoraraa mai te hara mai, mai to tatou mau paruparu, e te hoê fariiraa papu ia rotahi e te varua, e te ohipa, e te ite, e te mana, e te paari o te Atua, te taata horoa i te mau mea maitai atoa. Ia vai mai te hau i nia ia outou, e ia haamaitaihia outou i te ora maitai e te here, i roto i to outou mau toro’a, i roto i te mau hopoia o ta outou e rave ra, ia vai noa to outou mata’u i te Atua i mua i to outou mata i te mau taime atoa.

Aita râ vau e hinaaro nei ia mana’o outou no te hoe taime iti e mea fifi e e mea teimaha te faaroo ia Iesu Mesia. Eere roa’tu te reira. Ua parau mai te Atua “ua maru ta’u zugo e ua mama ta’u nei hopoia” [Mataio 11:30]. O te faaoraraa hara ïa. Te taata faatitihia eere ïa te taata i faaorahia ia matara i rapae i te faatitiraa a te hara, o te taata râ o te vai noa ei aitarahu e ei titi na te hara. O oia te te titi, o oia te taata aitarahu; o oia te titau nei i to tatou aroha, to tatou hoaraa O oia te taata ta tatou e tamata i te faaora mai roto atu i te taamu o te faatitiraa a te hara, ia oaoa oia i te tiamaraa i mua i te hare e te ofatiraa i te ture.

E tia ia Iesu Mesia, te Tamaiti a te Atua, e ua tia ia’na a ora ai oia i roto i te tahuti nei, ia oaoa i te mau mea atoa ta te feia parautia e oaoa ra; aita hoe noa ae mea i patoihia ia’na ia ite. Hoê â huru atoa no te feia mo’a i te mau mahana hopea nei. Te parau nei vetahi pae e: “Ahe hoi e, ahiri pai e ora vau i ta outou haapaoraa ia au i ta outou faaiteiteraa ia’u nei, aita ïa to’u e oaoaraa faahou. E mou roa ïa to’u mau oaoaraa’toa.” Aue outou te maamaa e. E nehenehe au e tamata i te mau oaoaraa tumu atoa e te ti’a mai te mau taata atoa o ta te Atua i poiete i ni’a i te fenua nei. E ahiri hoi e mea haapao maitai ae au i to’u nei taeae i te haapaoraa i te mau faaueraa a te Atua, e rahi ae ïa to’u oaoa i to’na ra. E roaa atoa te oaoa mau ia outou, te oaoa anoi orehia, ia au i to outou haapao maitai, i to outou faaroo e i to outou haereraa i mua i roto i te ite i te Atua, inaha na te Evanelia e faatupu i te oaoa mau e i te tiamaraa mau, te matararaa tatou mai roto atu i te faatitiraa a te ino e a te au avaava ra.

Ia tauturu mai te Atua ia ite tatou i te parau mau, e i te maramarama mai te huru ra o te anaanaraa o te mahana ra e ia ite hoi tatou nahea ia faataa i te maramarama o te mahana i te pouri o te po, o ta’u pure ia, i te i’oa o Iesu. Amene.

Mana’o Tauturu i te Haapiiraa

Eaha te auraa o te parau “ia o mai i roto i te Faaea o te Fatu”? Nahea tatou e o ai i roto i teie faaea?
Nahea tatou e horoa ai i to tatou varua atoa i te Fatu e i Ta’na Evanelia?
Eaha ta tatou e rave ia roaa ia tatou te “faito teitei” o tei tuuhia mai e te Faaora?
Eaha te auraa o te parau ra, te haereraa “mai te aroha no te aroha”? Eaha ta tatou e rave no te haapapu e, te haere nei tatou mai te reira te huru e tae roa i te taime e farii ai tatou i te iraa?
Eaha te mau fafauraa hanahana o tei horoahia i te mau taato o te tutava ia riro mai te Faaora ra te huru?
A tupu ai to outou faaroo ia Iesu Mesia i te rahi, nahea oia ia haamama i ta outou hopoia e nahea oia ia horoa ia outou’na te faaea? (A hi’o atoa Mataio 11:28–30).
Eaha te tahi mau mea o te tauturu ia outou ia ite e, e itehia te hau e te oaoa hope roa na roto i te Evanelia a Iesu Mesia?
Nahea to outou haapiiraa i te Evanelia a Iesu Mesia, mai tei haapiihia e te Peresideni Iosepha F Semita, i tauturu ai ia outou ia haapii atu â no nia i te Atua? Ia farii i te oaoa e te hau? Ia riro mai te Faaora ra te huru?

Te Peresideni Joseph F. Smith, mai te matahiti 1838 e tae atu i te matahiti 1918.Ua haapii oia e: “E farii outou i te oaoa mau, te oaoa o tei ore i anoihia,ia au i to outou haapao maitai, to outou faaroo e to outou haereraa i mua i roto i te ite i te Atua, inaha, na te Evanelia e faatupu i te oaoa mau.”(Millennial Star, 30 no Me 1907, api 349).