A Haapa’o i te Faaurûraa a te Varua

E ti’a i te mau taata atoa o te Ekalesia ia farii i te faaurûraa a te Varua Maitai no to ratou iho arata’iraa.

Aamu no te Oraraa o Joseph F. Smith

Te hoi ra te Peresideni Joseph F. Smith e te Episekopo Charles W. Nibley na ni’a i te pereo’o auahi i muri a’e i te hoê tere i te pae hiti’aa o te râ. Fatata atu i Green River i Wyoming, no taahi noa’tura oia i ni’ai te pa’epa’e i te muriraa o te pereo’o, faaroo a’era oia i te hoê reo i te na ô raa e, “A haere i roto e a parahi.” Ua hoi oia i roto i te pereoo auahi ma te otiatia rii no te hoê taime poto, e na ô a’era oia i roto ia’na iho e, “O to’u mana’o noa paha teie.” E ua faaroo faahou oia i te reo i te parau raa e, “A parahi” I tera ihoa taime, ua parahi te Peresideni Smith. I taua taime iho ra, ua taahuri te pereo’o auahi no te mea, ua fai te hoê auri tereraa, e no reira, e rave rahi mau pereo’o tei taahuri. Ua parau mai te Episekopo Nibley e, ahiri aita te Peresideni Smith i parahi, ua ati ino roa oia no te mea, noa’tu aita to’na pereo’o i taahuri, “ua ino roa te rahiraa o te mau pereo’o.”

Te parau ra te Persideni Smith no ni’ai teie ohipa i tupu e, “Ua faaroo vau i tera reo e raverahi mau taime i roto i to’u oraraa e ua fana’o vau na roto i te haapa’oraa i te reira.”

“E mea fatata te Peresideni Smith i te Varua o te Fatu,” o te parau ïa a te Epesikepo Nibley, “e ua riro to’na oraraa ei hi’oraa e te viivii ore, e na roto i te reira, ua nehenehe noa i te Fatu ia faaite ia’na i to’na tavini. Oia mau e nehenehe ta’na e parau e, ‘E parau mai oe e Iehova e, te faaroo nei hoi to tavini.’ (1 Samuela 3:9).… Ua î te aau o te Peresideni Smith i te mau mea tiretiera—e nehenehe oia e faaroo, i faaroo na oia.”¹

Haapiiraa na Joseph F. Smith

E ti’araa to te mau melo atoa o te Ekalesia ia farii i te arata’iraa no’na iho no ô mai i te Varua Maitai ra.

E ere tei te hoê noa taata te varua no te faaururaa, te horo’a o te heheuraa; e ere te reira horo’a tei te Peresideniraa Matamua ana’e o te Ekalesia e i te Tino Ahuru Ma Piti Aposetolo. Aita e i fa’ataa-noa-hia no te ti’a faatere ana’e o te Ekalesia; tei te mau melo atoa râ o te Ekalesia; e ti’araa e, e haamaitairaa hoi te reira no te mau tane e te mau vahine atoa, e te mau tamarii atoa tei ra’e’ahia te va’u o te matahiti, ia fanaô i te varua o te heheuraa, e ia farii i te varua o te faaururaa i roto i ta ratou mau ohipa ei mau melo no te Ekalesia.²

E ti’araa to te melo tataitahi o te Ekalesia ia fanaô i te Varua no te faaûruraa e te maramarama no ô mai i te Atua ra o ta te varua o te heheuraa e horo’a ra ia’na, no to’na iho maitai, mai ta te episekopo e fanaô ra, e ti’a ai ia’na ia faatere i ta’na paroisa. E nehenehe i te taata atoa ia faaohipa i teie mau horo’a e teie mau haamaitairaa i roto i te faatereraa i ta’na iho mau ohipa, i roto i te arata’iraa mai i ta’na mau tamarii i ni’a i te e’ao te titauhia ia’na ia haere, e i roto i te faatereraa i ta’na faaapu, i ta’na nana, i ta’na ohipa, e i roto i ta’na imiraa faufaa.… ; e ti’ara no’na ia fanaô i te varua o te heheuraa e o te faaururaa no te rave i te mea tano, ia riro ei taata paari e te mataara, ia maitai mau i roto i te mau mea atoa o ta’na e rave. Ua ite au e parau tumu mau te reira.³

E ti’araa to te mau taata tataitahi ia faauruhia e ia farii i te mau faaiteraa a te Varua Maitai no te arata’iraa ia ratou iho ia haapuai i to ratou faaroo, e ia faaitoito ia ratou i roto i te mau ohipa parau-ti’a, e ia vai faaroo noa e ia haapa’o e ia tape’a i te mau faaueraa ta te Atua i horo’a ia ratou; e ti’araa to te tane e te vahine atoa ia farii i te heheuraa. I te taime te hoê taata e rave ai i te mana’o no te hi’opoa, e no te faatere e aore râ, no te haava atu i to’na mau taea’e, ia ratou ihoa râ o te peresideni nei, e mea titauhia ia tape’a oioihia taua taata ra ia ore ana’e, e tupu mai te amahamaha e te pato’i. E mea ti’a i te tane e i te vahine i rotoi teie Ekalesia ia maramarama maitai eiaha hoi ia titau i taua huru varua ra.⁴

E mea ti’a tatou ia faaea i pihai iho i te Fatu, ia ha’ehaa noa to tatou mau varua, ia faaroo noa e ia ineine i te rave, i raro a’e i te faaururaa a te Varua Maitai, ia nehenehe hoi tatou ia ite i te hinaaro e te titauraa a te Metua no tatou ei mau taata e ei feia faatere i roto i te Ekalesia a te Mesia i roto i te mau faanahoraa atoa.⁵

E mea ti’a tatou … ia ora noa ia nehenehe i te Varua Maitai ia parahi mai i roto ia tatou nei mai te hoê puna ora, o te arata’i ia tatou i te maitai roa i roto i te parau-ti’a, te viivii ore e te haapa’o maitai i mua i te Atua, e ta’e noa’tu e ua hope ta tatou misioni i ni’a i te fenua nei ma te rave i te mau ohipa atoa o te titauhia ia tatou ia rave.⁶

I te rahiraa o te taime, e ta’e pinepine te heheuraa ia tatou nei na roto i tera reo haihai o te Varua.

E ere na roto i te mau faaiteraa maere ia tatou nei e haamauhia ai tatou i roto te parau mau, mea na roto râ i te haehaa e te haapa’o maiteraa i te mau faaueraa e te mau ture a te Atua. I to’u haamata- matamuaraa i ta’u misioni a vai apî ai au, e mea pinepine au i te ani i te Fatu ia faaite mai Oia i te tahi mau mea ma’ere, ia nehenehe ia’u ia farii i te hoê iteraa papu. Aita râ te Fatu i na reira mai, ua faaite mai râ Oia i te parau mau, mai te reni i ni’a i te reni, te haapiiraa i ni’a i te haapiiraa, ma’a vahi iti i ô nei e ma’a vahi iti i ô atu (a hi’o 2 Nephi 28:30), e ta’e noa’tu e ua faaite mai Oia i te parau mau mai ni’a mai i to’u upo’o e tae roa’tu i te taahiraa o to’u nei ava’e, e tae noa’tu ua matara roa te tapitapi e te taia i rapae ia’u. Aita Oia i to’no mai i te hoê melahi mai ni’a mai i te mau ra’i no te rave i te reira, aita atoa oia i parau mai na roto i te te ta’i o te pû a te hoê melahi. Na roto râ i te muhumuhu o tera reo ha’iha’i o te Varua o te Atua Ora, ua horo’a mai Oia i te iteraa papu o ta’u e mau nei. E na roto i taua faanahoraa ra, e te mana, e horo’a oia i te mau tamarii a te taata i te hoê iteraa no te parau mau o te vai i roto ia ratou, e o te faafaaite ia ratou i te parau mau, inaha ua ite te Atua i te reira, e ia rave i te hinaaro o te Metua mai ta te Mesia e rave. E aita e mea ma’ere atu o te nehenehe e fatupu mai i te reira.⁷

Eiaha outou e feaa, e to’u mau taea’e e to’u mau tuahine, mai te mea e aita outou i farii i te mau mea rarahi e aore râ, i te mau mea maere e aore râ, mai te mea e aita outou i farii i te mau heheuraa umerehia mai te ra’i mai, ia ora noa râ outou ia nehenehe i te Atua i te heheu mai Ia’na ia outou mai te mea e na reira mai Oia. Ua maitai roa ïa outou, aita ïa te hoê mea e mata’u ai outou, eita outou e ere i te hoê mea, a haapa’o ai outou, mai te mea e vai noa outou i roto i te ti’araa no te farii i te hinaaro o te Atua ia hinaaro ana’e Oia i te faaite atu ia outou. Ua rava’i noa te reira. I reira noa te Atua e heheu mai ai ia outou i te mea o te titauhia no to outou tupuraa, no to outou ha’ereraa i mua i roto i te iteraa i te parau mau.⁸

A rave ana’e tatou i te mea o ta te Varua e faaite mai.

Aita vau e mana’o nei e nehenehe ta’u i te rave i te mau ohipa o te titauhia ia’u ia rave mai te mea e aita te tautururaa a te Varua o te Fatu. Aita vau i ite e nehenehe anei ta te hoê taata e amo i te ohipa a te Fatu o te titauhia ia’na ia rave, mai te mea e aita te muhumuhuraa te faaururaa a te Varua o te ha’ere mai, mai ô mai i te Fatu o te Maramarama.⁹

Ia ora ana’e tatou ia nehenehe tatou ia faaroo e ia maramarama i te mau muhumuhuraa o tera reo iti haihai o te Varua o te Atua, a rave ana’e tatou i te mea o ta te Varua e faaite mai e mai te taia ore i te mea o te tupu mai. Noa’tu e mea taa’e anei te reira i ta te feia pato’i e aore râ, i ta te mau enemi no te basileia o te Atua. Ua au anei te reira i te hinaaro o te Fatu? Ua tano anei te reira i te varua o te ohipa rahi no te mahana hope’a nei o ta tatou e rave nei? Ua riro anei te hope’araa ei faaha’ereraa i te Ekalesia i mua e te haapuaira ia’na i ni’a i te fenua? Mai te mea o te reira te huru, a rave ana’e i te reira, noa’tu eaha te parau e te mana’o o te taata.¹⁰

Aita i rava’i noa ia tatou i te parau e ua mauruuru tatou no te ite noaraa i te mea ti’a. Te iteraa i te mea ti’a, e mea titauhia tatou ia ha’ere e ia rave i te mea ti’a, noa’tu eaha te reira, noa’tu eaha ta (Iesu Mesia) e titau mai ia tatou. Mai te mea ua ite tatou i te mea ti’a, mai te mea ua ite tatou i te parau mau, e mea ti’a ïa ia tatou ia rave i te ti’a e i te parau mau, e mea ti’a ïa ia rave tatou i te mea ti’a, i te mau taime atoa, i roto i te mau faanahoraa atoa, e ma te ore e faaroo i te faahemaraa e aore râ, ia ruri ê atu i te haerea parau-ti’a, te e’a afaro e te piriha’o o te faahoi ia tatou i mua i te aro o te Atua.¹¹

Ia riro to tatou haapa’o ei haapa’o faahepo ore, eiaha ia faahepohia. Eiaha te taata ia faahepohia i to ratou hinaaro ia haapa’o i te hinaaro o te Atua; e mea ti’a ratou ia haapa’o i te reira no te mea ua ite ratou e mea tano te reira, no te mea te hinaaro nei ratou i te rave i te reira, e no te mea o te reira to ratou hinaaro. Te oaoa nei te Atua i te aau tae.¹²

Na roto i te faarooraa i te Varua, e farii mai tatou i te iteraa rahi atu e a tupu ai i roto i te mana o te hi’oraa.

Ua tarahu te taata i te tumu o te mau maramarama atoa e te parau mau, no te ite o ta’na e mau nei; e te feia atoa o te faaroo i te mau muhumuhuraa o te Varua, o te arata’i i te taata i te viivii ore, i te hanahana, i te here i te Atua e i te taata, e i te here i te parau mau e i te mea o te faateitei e o te faaano i te varua, e farii ïa ratou oia i te hoê iteraa mâ, te a’ano, e te afaro i te parau mau a te Atua hau atu i ta te hoê taata e nehenehe e farii.¹³

E mea ti’a i te tane e i te vahine ia parahi i roto i te parau mau, e ia vai i roto i te iteraa i te evanelia, mai te tau’a ore i to te tahi mana’o, ia ti’aturi râ i ni’a i te Varua Maita, eita hoi oia e taui, e anaana noa oia e amuri noa’tu e, e faaite tamau hoi oia i te taata atoa e i to te autahu’araa, o te ora i te hoê oraraa tei au i te mau ture o te evanelia, i te hanahana e i te hinaaro o te Metua. E farii ïa ratou i reira i te maramarama e amuri noa’tu o te ore roa e haapoirihia.¹⁴

Te rave’a ora noa o ta tatou e rave, o te ora ha’ehaaraa ïa, ia parauti’a e ia vai faaroo noa i mua i te Atua ia nehenehe tatou ia farii i To’na Varua ia nehenehe tatou ia haava ma te parau-ti’a, e ia ite i te parau mau e te hape, e te parauti’a e te ti’a ore.¹⁵

Nahea tatou e ite ai e, te a’o ta tatou e farii no ô mai i te feia faatere o te Ekalesia, e mea ti’a anei te reira? Na roto mai ïa i te Varua o te Atua i to tatou aau, e matara to tatou mau feruriraa e maramarama hoi, e ite tatou i te mau haapiiraa no tatou iho, e ia nehenehe hoi ia tatou ia faataa ê i te parau mau i te hape, te maramarama i te poiri, e te maitai i te ino.¹⁶

Ua horo’ahia i te Feia Mo’a i te Mau Mahana Hopea Nei te ti’araa ia ite i te parau mau, mai ta te Atua e ite ra, e aita e mana i raro a’e mai i te basileia tiretiera e nehenehe e arata’i ê ia’na e haapoiri i to’na iteraa, e haamohimohi to’na feruriraa e aore râ, e faaiti i to’na faaroo e aore râ, i to’na iteraa i te mau parau tumu o te evanelia a Iesu Mesia. Eita roa te reira e nehenehe e tupu inaha te turama ra te maramarama o te Atua hau atu i to te haavare e te hape, no reira, o ratou o te mau i te maramarama o te Mesia, te varua o te heheuraa e te ite o te Atua, tei ni’a a’e ïa ratou i te mau mea haavare atoa i te ao nei, ua ite ratou i teie haapiiraa, e no ô mai ïa i te Atua e ere na te taata.¹⁷

Ia ora ana’e tatou ia au i te mea i heheuhia mai, e horo’a mai â te Fatu i te maramarama i to tatou nei ite.

E rave rahi â te mau mea o tei ore â i heheuhia mai. Te vai nei te mau mea e heheuhia mai o ta te Atua e faaite mai i te taime titauhia o ta tatou e ore e ite i teie nei. No’u nei râ, e mea rahi tei heheuhia mai e ta’u e nehenehe e ite. Ahiri pa’i e nehenehe ta’u e haru mai i te mau mea atoa ta te Atua i heheu mai, e ia ite i te reira e ia faaohipa ma te parau-ti’a i roto i to’u oraraa, ia mana’o vau i reira vau e ineine ai ia farii i te tahi â heheuraa, mai te mea ê e vai ti’amâ noa vau. Te maere nei au ia hi’o e, e rave rahi mau taata i rotopu ia tatou o te mana’ona’o nei i te mau mea o tei ore â i heheuhia mai i te mau tamarii a te taata nei.… Ahiri pa’i te taata e aufau nei i ta ratou tuhaa ahuru, ahiri pa’i ratou e haapa’o i te ture no te parau paari, ahiri ratou e pure i to ratou mau pure, ahiri ratou e tu’u i to ratou oraraa no te mau ohipa parau-ti’a i ni’a i te fenua nei e ia haapii mai i te evanelia no ratou e ia haapa’o i te reira, aita ïa ta ratou mau uiraa e rahi, eita ïa e mo’e ia ratou e, e rahi atu to ratou ite.¹⁸

Aita to tatou e iteraa e, eita hoi tatou e haapii i te taata maori râ, o ta te Fatu te Atua i heheu mai, e te a’o atu nei matou ia ratou o tei mau i te mana, e ia ratou e haapii nei e e pori nei i te mau parau tumu o te evanelia i to te ao nei e i te Feia Mo’a i te Mau Mahana Hopea Nei, ia faatano ratou i ta ratou mau haapiiraa e ta ratou mau arata’iraa i te parau a te Atua o tei heheuhia mai. E rave rahi mau mea tei heheuhia mai e o tei ore â i haapa’ohia, te haapapu nei au ia outou. E mea rahi roa te mau ohipa o te titauhia ia haapii. E mea rahi â te mau mea o te ti’a ia haapiihia na roto i te varua no te haamaramaramaraa, e mea rahi roa te ohipa i heheuhia mai na roto i te Peropheta Iosepha e to’na mau taata o ta te taata i ore â i farii i roto i to ratou aau, e o te ore â i farii.

Ia haapa’o ana’e tatou e ua nehenehe ia tatou ia haapa’o i te mau haapiiraa o te evanelia e te mau ture a te Atua e te mau titauraa no te ra’i, o tei heheu a’enahia mai, e maitai roa’tu ïa tatou e fatata atu tatou i te maitai roaraa i roto i te paari, te ite e te mana, hau atu i ta tatou i ite i teie mahana. Ia ta’e ana’e mai taua taime ra, te vai atu â te tahi atu mau mea faufaa roa o tei ore â i heheuhia mai i te mau taata o te Atua. tera râ, ia ore tatou e rave i te mea o tei horo’ahia ia tatou ia ore tatou ia faaroo i te mau mea i faauehia ia tatou i teie nei, ia ore tatou ia ora i ta tatou haapa’oraa i teie nei, mai ta te Fatu i horo’a mai ia tatou, mai te tu’u mai i te mau faaueraa, mai te tu’u mai i te maramarama e te ite ia tatou i ni’a i te mau mea o ta tatou i farii a’ena, o ta tatou hoi i ore i hope i te haapa’o, e riro ïa ei faahaparaa i ni’a ia tatou. E ora râ tatou ia au i te faaûruraa, te heheuraa o teie taime, e ia haapa’o te melo tataitahi o te Ekalesia i te mau faaueraa a te Fatu e ia rave i te ohipa i roto i te Ekalesia mai te au i ta te varua e horo’a ia’na i te arata’iraa e te raveraa i te ohipa. E ti’a i te taata atoa ia farii i te faaururaa mai ô mai i te Atua ra no te iteraa e aha ta tatou ohipa e nahea i te rave i te reira.¹⁹

Te mea o te ti’a ia tatou ia rave o te oraraa ïa ia au i te maramarama e te ite o ta te Atua i heheu mai ia tatou i roto i teie tu’uraa tau, ia nehenehe tatou ia tû i te mau mana no te ra’i e i te mau taata no te ra’i mai, e i to tatou ihoa râ Fatu o Iesu Mesia o Oia hoi to tatou upo’o faatere, to tatou paruru, to tatou hi’oraa, e te rave’a no te ora e no te faaora i to te ao taato’a; na roto hoi Ia’na e nehenehe ai tatou i te tomo atu i roto i te basileia tiretiera o te Atua, ia ore ana’e oia eita roa ïa tatou e tomo atu i roto i taua huru hanahana hope ore. O Oia te e’a, te maramarama e te ora o te ao nei, e o te haapa’o i te mau faaueraa o Ta’na i horo’a mai, e e rave i te mau ohipa o Ta’na i rave, e Ta’na i faaue ia tatou ia rave, eita ïa oia e ha’ere na roto i te pouri, e farii ra ratou i te maramarama o te ora.²⁰

Mana’o Tauturu i te Haapiiraa

Ia vai “te varua heheuraa”e horo’ahia ai?
I roto i teihea mau tuhaa o to tatou oraraa e fana’o ai tatou i te arata’iraa a te Varua?
No te aha te Atua e arata’i pinepine ai ia tatou na roto i te reo haihai eiaha ra na roto i te “mau tapa’o ma’ere”? (A hi’o atoa 1 Te Mau Arii 19:11–12.) Eaha ta te Atua mau rave’a no te arata’i ia tatou na roto i te reo haihai?
Nahea tatou e ite ai e ua fauruhia tatou i te Varua o te Fatu? (A hi’o atoa PH&PF 6:15, 22–23; 9:8–9; 11:12–14.)
No te aha tatou e ore ai e ape’e oioi i te mau muhumuhuraa o te Varua? No te aha te Atua e “Oaoa ai i te mau aau ta’e”?
Nahea tatou ia ora ia nehenehe tatou ia farii i te arata’iraa a te Varua? Eaha te mea e opani ia tatou ia farii i te muhumuhuraa o te Varua?
I afea ra to te Varua tautururaa ia outou no te faananea i to outou ite i te parau mau a te Atua?
Eaha te mau haamaitairaa o te ta’e i te feia o te ti’aturi i te mau muhumuhuraa o te Varua Mo’a eiaha râ i te ti’aturi noa i ta te tahi parau?
Nahea tatou ia faaineine ia tatou no te farii i te maramarama e te ite hau atu? (A hi’o atoa Alama 12:10).

Joseph F. Smith and Charles W. Nibley — Te Peresideni Joseph F. Smith i te pa’e aui e te Episekoporaa Faatere Charles W. Nibley i te tapa’eraa pereo’o auahi. I roto i teie nei tere e te Episekopo Nibley, ua paruruhia te Peresideni Smith i te ati no te mea ua faaroo oia i te muhumuhuraa a te Varua.