Te Faaoraraa i te Mau Tamarii Rii

Te mau tamarii rii tei pohe na mua a’e i tae’ahia ai te faito tano no to ratou matahiti a taa ai ia ratou to ratou iho mana’o, e faaorahia ïa i te toto o te Mesia.

Aamu o te Oraraa o Joseph F. Smith

Ua ora na Joseph F. Smith i roto i te hepohepo, te pe’ape’a e te aroha i muri mai i te poheraa o te hoê tamarii rii, ua riro ta’na mau haapiiraa no ni’a i te faaoraraa i te mau tamarii rii ei faaitoitoraa e e haapapuraa. I roto i te area matahiti 1869 e te matahiti 1898, ua huna oia e iva o ta’na mau tamarii.

I muri mai i te poheraa o ta’na tamarii matamua, o Mercy Josephine i te 6 no Tiunu 1870, ua faa’ite oia i to’na oto rahi: “O te Atua ana’e tei ite i to’u here rahi i ta’u nei tamahine, o oia te maramarama e te oaoa o to’u nei a’au. I te po’ipo’i hou oia i pohe ai, i muri a’e i to’u faaea noaraa i piha’i iho ia’na i te taatoaraa o taua pô ra, no te mea na’u e haapao ia’na i te mau pô atoa, ua parau atu vau ia’na: ‘Aita ta’u aiû i taoto i te taatoaraa o tei ru’i.’ Ua ta’iri’iri ihora oia i to’na upo’o e ua pahono mai, ‘E taoto vau i teie nei mahana, e papa.’ Aue! Teie mau parau rii i te haamauiui i to’u nei aau! Ua ite au e noa’tu aita vau i ti’aturi, e reo ê atu teie, e parau râ teie no te ta’oto o te pohe, e ua ta’oto mau ihoa oia. E! aue, ua haere ê atu te maramarama o to’u nei aau. Ua fatata te hoho’a o te ra’i tei nana’ohia i roto i to’u nei aau i te mo’e.… Ua riro oe ei tao’a horo’a no te ra’i mai no to’u aau.¹

I te 6 no Tiurai 1879, ua papa’i o Joseph F. Smith i roto i ta’na buka aamu to’na oto i te poheraa o ta’na tamahine o Rhonda: “Ua tu’u vau ia’na i ni’a i te hoê turu’a e ua hahaere maua, ua ora faahou mai oia no te hoê hora noa e ua pohe i roto i to’u rima i te hora 1:40 i te po’ipo’i. I teie nei, o te Atua ana’e tei ite i te hohonuraa o to matou nei oto. O teie te pae raa o te pohe i roto i to’u nei utuafare. Te taatoaraa o ta’u mau tamarii rii here-mauhia! E te Atua e! A tauturu mai ia matou ia amo i teie nei tamataraa!” ²

Tera râ, ua roaa ia’na te tamahanahanaraa na roto i te iteraa e, auaa te Tara’ehara a te Faaora, e maitai te mau mea atoa no ta’na mau tamarii i herehia. I te poheraa o ta’na tamahine o Ruth i te 17 no Mati 1898, ua farii oia i te hoê heheuraa hanahana: “E to’u nei varua e! Ua ite au i te rima o to’u metua vahine i te tororaa mai no te farii i te varua hanahana o ta’u nei aiû iti o tei faaorahia! E to’u Atua e! Te haamauruuru nei au ia oe no teie nei orama hanahana! Ua haaputuputuhia te taato’araa o ta’u mau aiû iti i roto i te Fare o to’u ra Metua; eiaha mai te mau tamarii tei mo’e to ratou hiro’a tera râ, ma te puai, te hanahana e te marumana o te mau varua i haamo’ahia! Tei î i te ite, te oaoa e te nehenehe, e te parau mau.”³

Haapiiraa na Joseph F. Smith

E faaorahia te mau tamarii rii tei pohe na mua a’e i tae’ahia ai te faito tano no to ratou matahiti a taa ai ia ratou to ratou iho mana’o.

No te mau tamarii rii o tei rave-ê-hia’tu i roto i to ratou aruaruraa ma te hara ore hou a tae’ahia ai to ratou matahiti e ite ai ratou i to ratou iho mana’o, e o te ore e nehenehe ia rave i te hara, ua heheu mai te evanelia ia tatou e, e faaorahia ratou e aita to Satane e mana i ni’a ia ratou. Aita atoa to te pohe e mana i ni’a ia ratou. Ua faaorahia ratou e te toto o te Mesia, e ua faaorahia ratou i te pohe tei tae mai i roto i te ao nei na roto i te hi’araa o to tatou na metua matamua.…

… E mea ti’a roa i to tatou mau hoa here tei ere i ta ratou mau tamarii ia poupou, noa’tu e, tei roto ratou i te hoê oto hohonu i te pohe no te hoê tau poto noa o ta ratou tamarii rii. Ua ite ratou e, e faearaa maitai to ratou; e iteraa to ratou e, ua pohe ta ratou mau tamarii rii ma te hara ore. Te faaea nei teie mau tamarii i roto i te ouma o te Metua. E fatu ratou i to ratou hanahana e to ratou faateiteiraa e, e ore ratou e faa’erehia i ta ratou mau haamaitairaa; no te mea, i roto i te faanahoraa o te ra’i, e na roto i te paari o te Metua o te faatere maitai nei i te mau mea atoa, o ratou o tei pohe i te tamarii rii raa râ, e ere ia to ratou pohe i te hopoi’a na ratou, e aita hoi to ratou iho e ite e te paari no te haapa’oraa ia ratou iho e i papu i te mau ture no te oraraa; e na roto i te paari e te aroha e te faatereraa a te Atua to tatou Metua i te Ao ra, te mau mea atoa ta ratou i ere e te mau mea te ti’a ia ratou ia farii i o nei ahiri e, ua faati’ahia ratou ia ora i roto i te i’o nei, e horo’ahia ïa na ratou a muri a’e. Eita roa ratou e ere i te hoê noa’e mea na roto i to ratou rave-ê raa-hia’tu.…

Na roto i teie iteraa, ua marû to’u aau i te mea e, e farerei faahou â vau i ta’u mau tamarii tei haere atu i te tahi pae o te paruru; e rave rahi ta’u mau tamarii i faarue mai, e ua ite au i te mamae mai ta te hoê metua e ite, ia mana’o vau, i roto i te pohe o ta’u mau tamarii. Ua ite hohonu vau i te reira, no te mea ua here au i te mau tamarii, e ua here ihoa ra vau i te mau tamarii rii area râ, te mauruuru nei au i te Atua no te maramarama oTa’na i horo’a ia’u no ni’a i teie nei mau parau tumu, no te mea, ua ti’aturi au i teie nei i Ta’na parau e i Ta’na fafauraa e, e farii au i roto i te oraraa i mua nei, te mau mea atoa i fatuhia e au, e e î ïa to’u nei oaoa. E ore roa vau e faa’erehia i te hoê noa a’e ti’araa e aore râ, haamaitaira te ti’a ia’u ia farii e o ta’u e nehenehe ia farii. Area râ, te mau horo’araa atoa, te mau haamaitairaa atoa e nehenehe ai ia’u ia tiamâ, e ti’a ia ia’u ia farii i te reira i teie nei e aore râ, i te tau e a muri atu, e ere te reira i te mea faufaa rahi roa, ia ite ra vau i te rima o te Atua i roto i teie nei mau mea, e ia parau vau i roto i to’u aau, “Na Iehova i horo’a mai, e na Iehova i rave ê atu; ia haamaitaihia te i’oa o Iehova” [a hi’o Ioba 1:21]. Teie te mea e ti’a ia tatou ia ite no ni’a i ta tatou mau tamarii, to tatou mau metua, to tatou mau hoa e aore râ, te mau fifi o ta tatou e fareirei.⁴

I muri a’e i te ti’a faahouraa, e tupu te tino o te hoê tamarii rii e tae roa’tu e, ua aifaito e te varua.

E mauruuru anei tatou ia hi’o atu i te mau tamarii ta tatou i huna i to ratou aruaruraa ia vai noa ei tamarii rii i roto i te roaraa o te mau tau e a muri atu? Aita! E ore atoa te mau varua tei fatu i te mau tino o ta tatou mau tamarii e mauruuru ia faaea noa i roto i taua huru ra. Area râ, ua ite tatou e, eita ta tatou mau tamarii e faahepohia ia faaea noa i te faito tamarii rii, no te mea ua heheuhia mai e te Atua oia te vai pihaa no te parau mau, na roto ia Iosepha Semita te peropheta i roto i teie nei tau tu’uraa evanelia e, ia ti’afaahou mai te feia i pohe, e ti’a atoa mai te tamarii tei hunahia i to’na ra aruaruraa i roto i te faito tamarii ihoa; ei reira oia e haamata ai i te tupu. Mai te mahana o te ti’a faahouraa, e tupu ïa te tino i te paari e tae roa’tu ua raeahia ia’na te huru mau o to’na varua, ei tane e aore râ, ei vahine. Mai te mea ua farii te varua i te maramarama o te Atua e te mau hinaaro o te mau varua tahuti ra, eita ïa oia e mauruuru i te hoê mea iti noa a’e ia ore. Te haamana’o nei outou e ua parauhia tatou e ua haere atu te varua o Iesu Mesia e farerei i te hoê o te mau peropheta i tahito ra e ua faaite roa’tu Ia’na iho e i To’na huru mau, e o Oia mau taua Tamaiti a te Atua ra o te haere mai i te afaraa o te mau tau. Ua parau oia e, e faaite mai Oia Ia’na iho i roto i te tino nei mai Ia’na i faaite atu Ia’na iho i taua peropheta ra [a hi’o Etera 3:9,16–17]. E ere hoi To’na huru i to te hoê aiu; e varua paari ra e te tupu maitai, mai te huru o te taata e te huru o te Atua, mai tau â huru ra i haere mai ai Oia no te rave i te hoê tino e a tupu ai i te faito mau o To’na ra varua.⁵

Te mau varua atoa o te haere mai i raro nei no te ahu i te hoê tino, e tamaiti oia e aore râ, e tamahine oia na te Atua e ua farii i te ite e te mau maitai atoa o ta te hoê tamaiti e aore râ, ta te hoê tamahine e oaoa nei i roto anei i te ao varua e aore râ, i roto i teie nei ao area râ, te taa ê raa noa oia hoi, i roto i te varua i faataa-ê-hia i te tino, ua ere noa ratou i te tino no te riroraa mai te Atua te Metua ra te huru. Ua parauhia e, e Varua te Atua e te feia e haamori Ia’na e haamori ïa ma te varua e te parau mau [a hi’o Ioane 4:24]. Tera râ, e varua e tino i’o e te ivi mai te au i to te taata nei te huru, e no reira, ia riro te taata nei mai te Atua e mai ia Iesu te huru, e mea ti’a ïa i te mau taata atoa ia farii i te hoê tino. Noa’tu eita tei tino e tae i te paariraa i roto i teie nei ao e aore râ, e tia’i ia tae i roto i te ao amuri mai, mai te au i te parau a te Peropheta Iosepha Semita, e tupu te tino i teie nei tau e aore râ, i te tau mure ore, e tae noa’tu e ua raeahia te faito o te varua, e ia faa’ere ana’ehia te metua vahine i te oaoa e te poupou no te faaamuraa i ta’na aiû e tae atu i taime e riro mai ai oia ei tane aore râ, ei vahine i roto i teie oraraa nei, e horo’ahia teie haamaitairaa ia’na i te tau i muri nei e, e hau atu to’na oaoa i ta’na i farii i ô nei. A tupu ai te reira i ô, e mea na roto ïa i te iteraa papu e, e mau hopea maitai ana’e; area râ i ô nei ra, aita e itehia te mau hopearaa maoti râ, ia tae i te taime ua hope ta tatou mau tamataraa.⁶

E mea mure ore te mau varua o ta tatou mau tamarii hou ratou i tae mai ai ia tatou nei e, e riro to ratou mau varua i muri a’e i te poheraa o te tino, mai te huru ihoa â hou ratou i haereraa mai. To ratou hoho’a, e hoho’a ïa no te huru o to ratou tino ahiri e ua ora ratou i roto i te tino nei ia tupu e ia raeahia te matahiti o te taata paari e aore râ, e faatupu i to ratou mau tino tahuti ia tae’ahia te faito hope roa o to ratou mau varua. Mai te mea e ite outou i te hoê o ta outou mau tamarii o tei pohe, e nehenehe oia e faaite mai ia’na iho ia outou i roto i te huru e ta’a’tu outou ia’na, te huru o te tamarii rii; area râ, mai te mea e tonohia mai oia ei ve’a ia outou no te afai mai i te mau parau faufaa rahi, e haere mai paha oia mai te varua o te tamaiti a te Episekopo Edward Hunter (tei pohe i to’na tamarii rii raa) tei haere mai ia’na, i roto i te huru o te hoê taata paari, e o tei faaite atu ia’na iho i to’na ra metua tane ma te parau e: “O vau ta oe tamaiti.”

Aita te Episekopo Hunter i maramarama i te reira. Ua haere atu oia i to’u metua tane e ua parau atura: “E Hyrum, eaha te auraa no teie orama? Ua huna vau i ta’u tamaiti i to’na tamarii roa raa, e ua haere mai oia ia’u nei mai te hoê taata paari– te hoê tamaiti apî, te rahi e te hanahana e ua faaite oia e tamaiti oia na’u. Eaha ia te auraa?

Ua parau atura to’u metua (Hyrum Smith, te Patereareha) ia’na e, e faito paari to te Varua o Iesu Mesia hou a fanauhia mai ai i te ao nei; e e faito paari atoa to ta tatou mau tamarii e ua tae’ahia i te faito hope roa o te varua hou ratou i tomo mai ai i roto i te tahuti nei, hoê â faito to ratou ia faarue ana’e mai i te oraraa tahuti nei e mai te reira atoa to ratou huru i muri a’e i te ti’a faahouraa, ia oti ana’e ta ratou misioni.

Ua haapii Iosepha Semita e, te aiû o tei hunahia i roto i te pohe e ti’a mai ïa oia i roto i to’na huru tamarii i te ti’a faahouraa; e, ma te faatoro atu te rima i te metua vahine o te hoê tamarii i pohe, ua parau atu oia ia’na: “E farii oe i te poupou, te oaoa e te mauruuru no te atuaturaa i teie nei tamarii, i muri a’e i te ti’a faahouraa e tae noa’tu e, e raeahia te faito o to’na ra varua.” Te vai nei te faaho’iraa, te tupuraa e te faarahiraa i muri a’e i te ti’a faahouraa. Ua here au i teie nei parau mau. Ua faarahi te reira i te poupou, te oaoa e te mauruuru i roto i to’u nei aau. Mauruuru i te Fatu o oia i heheu mai i teie nei mau parau tumu ia tatou. ⁷

E mea maitai te mau mea atoa no te mau tamarii rii tei pohe.

Mai te mea ua farii tatou i te iteraa papu no te varua Parau Mau i roto i to tatou aau, e ite ïa tatou e, e mea maitai te mau mea atoa no ta tatou mau tamarii tei faarue mai, e aita e nehenehe ta tatou, noa’tu te hinaaro tatou, i te haamaitai i to ratou huru; e eita te reira e haamaitai i to ratou huru ahiri e, e faaho’i faahou mai tatou ia ratou i ô nei no te mea, a vai ai te taata i ni’a i te fenua nei ma te ahuhia e te huru tahuti nei, ma te haatihia e te mau ino o te ao nei, e fifi to’na oraraa e ati oia e e vai te mau hopoi’a i ni’a ia’na e nehenehe te reira e faataupupu i to’na oraraa manuïa, to’na oaoa e to’na faaiteiteiraa no amuri mai.⁸

I roto i te taime no te oto e no te mauiui mai teie te huru, e mea fifi roa ia parau i te hoê parau o te nehenehe ia haamama i te oto o te feia tei ati. Na te taime ra e na te faaurûraa a te Varua Maitai i te aau o te feia tei roohia i te ati i nehenehe ai ratou ia farii i te tamahanahanaraa e te poupou i roto i to ratou ti’aturiraa no te oraraa no amuri atu.… Ua haapii mai au e, te vai ra e rave rahi atu mau mea ino atu â i te pohe. I roto i to’u nei feruriraa, i to’u mau iteraa rau e i to’u mau ite i roaa mai no ni’a ite ora e te pohe, e mea hau a’e na’u ia ape’e atu i te taato’araa o ta’u mau tamarii e tae roa’tu i te hiti menema i roto i to ratou huru hara ore e te viivii ore, i te hi’o atu ia ratou ia tupu i te paari ia riro mai ei mau tane e ei mau vahine e ia topa i roto i te mau peu viivii o te ao nei, ia haamo’e i te Evanelia, ia haamao’e i te Atua e i te faanahoraa no te ora, e ia fariu ê atu i te ti’aturiraa o te utu’a e te faateiteiraa mure ore i roto i te ao e a muri atu.⁹

Mai te mea e mea haapa’o tatou, e amui faahouhia tatou e ta tatou mau tamarii i tera pae mai o te paruru.

Na te peropheta Eliaha i tanu i roto i te mau aau o te mau tamarii te mau fafauraa i fafauhia i te mau metua, te poro’iraa i te ohipa rahi e ti’a ia ravehia i roto i te mau hiero o te Fatu i roto i te Tau Tu’uraa o te Îraa o te Mau Tau atoa, no te faaoraraa i tei pohe e te taatiraa te mau tamarii i to ratou mau metua, ia ore te ao taatoa nei ia tairihia e te hoê utu’a e ei mea faufaa ore i to’na taeraa mai.¹⁰

Mai te mea, e fariu ê tatou i te parau mau i roto i teie oraraa nei, e faataa-ê -hia tatou i to tatou mau metua e te feia o ta tatou i here, na roto i te mau tau e ore e nehenehe ia tai’ohia o te mau tau e a muri atu. Aore roa ïa to tatou e tura i ni’a ia ratou, e aore hoi to ratou i ni’a ia tatou. E area aano te faata’a ê ia ratou ia tatou. Ia pohe tatou i roto i te faaroo ma te ora i te hoê oraraa parau- ti’a, na te Mesia ïa tatou, e mea papu roa e, e farii tatou i te haamauruururaa mure ore inaha tei ia tatou te mau parau tumu no te mure ore, e e faaahuhia tatou i te hanahana, te tahuti ore e te ora mure ore. I roto i te tahuti nei, e ite tatou i te oto i roto i te hoê roaraa maoro; e faataa ê te pohe ia tatou no te hoê taime poto, e haere atu te tahi o tatou i tera’tu pae mai o te paruru area râ, te vai ra te taime e farerei tatou i te feia i pohe, e e oaoa tatou te tahi e te tahi e amuri noa’tu. E riro te faataa-ê-raa no te hoê noa taime. I muri iho i reira, aore roa e mana e faataa ê faahou ia tatou. Na te Atua i taati ia tatou e mana ïa to tatou te tahi i ni’a i te tahi—te hoê ti’araa e ore roa e au ia patoihia—ia tahoêhia ra tatou e te mana o te autahu’araa i roto i te evanelia a te Mesia. No reira, e mea maitai a’e ia faataa-ê-hia tatou i roto i teie nei oraraa no te hoê tau poto noa, noa’tu e e ite tatou i te oto, te fifi, te rohirohi, te îviraa, te otareraa e te tahi atu mau fifi, eiaha ra no te taato’araa o te tau mure ore.¹¹

Ua fanauhia mai tatou i te hoho’a o te Mesia. I te haamataraa, ua ora tatou i pihai iho i te Metua e te Tamaiti ei mau tamaroa e ei mau tamahine na te Atua; i te taime i faataa-mau-hia, ua tonohia mai tatou i fenua nei no te ahu i te tino ia nehenehe tatou ia riro mai te huru e te hoho’a o Iesu Mesia, e ia riro mai ia’na ra; ia rave i te hoê tino, ia haere na roto i te pohe mai ia’na i haere na te pohe e ia ti’a faahou mai ia’na i ti’a faahou mai te pohe mai … Na roto i te iteraa e, e farerei faahou vau i ta’u mau tamarii tei na mua atu ia’u i te paruru e e farerei faahou vau i to’u mau fetii e to’u mau hoa, ua hopoi mai te reira i te oaoa rahi! No te mea, ua ite au e, e farerei ihoa vau ia ratou. Ua faaite mai te Atua ia’u e, e parau mau te reira. Ua haamaramarama mai oia ia’u na roto i te pahonoraa mai i ta’u pure; mai ta’na i haamaramarama i te iteraa o te mau taata atoa tei tutava ma te itoito ia ite ia’na.¹²

[Ua papa’i te Peresideni Joseph F. Smith i te taea’e Joseph H. Dean i Oahu, Hawaii:] Ua faaroo vau ma te oto rahi i te pohe o ta orua aiû i te fare. Ua ite au i to oe oto no te mea, ua roo-atoahia vau i te reira fifi a faaea ai au i reira. Ua opua vau i te papa’i atu ia orua tera râ, ua tu’u vau ia’u iho nei i roto i to orua ti’araa e ua pato’i au i te papa’i atu. I roto i taua mau taime fifi ra, ua hinaaro vau i te haere i te hoê vahi atea, mo’emo’e e te hau, e aore roa te mata e ite mai ia’u maori râ, to te Atua ana’e, e i reira vau e o vau ana’e e oto ai e o te Atua to’u ite.… E na te taime, i te taime mau—i haere mai ai taua taata faaora rahi ra—e haaputapû i to’u aau, e te mana’o nei au ma te feaa ore e, e ite atoa orua i te reira. Tera râ, ia ore ana’e te mau oto matamua e ia tamarûhia te aau na te taime e te tereraa o te oraraa, i reira te mau parau maiti-mau-hia e nehenehe ai ia faaara i te mau mana’o maru o te aroha o te tahi aau i te tahi aau no te mau mauiui hoê â naturaraa. Ua ite mau te Fatu eaha te reira, e ua ite tatou e, te feia hara ore tei rave-ê-hia atu i te ra’i, e ho’i ïa i mua i te taata i reira ratou e noho ai i te matamua roa ma te mâ e te mo’a, tei faaorahia mai te haamauraahia mai â o teie nei ao e te tusia a te taata i parau na “mai ia ratou hoi to te basileia ra o te ao.” Ta’u tei pure no roto roa mai i te hohonuraa o te aau, ia tauturu mai te Atua ia’u ia ora mâ noa, ia nehenehe ia’u ia amui atu i ta’u mau tamarii hara ore i roto i to ratou ra fare io Oe na!¹³

Mana’o Tauturu i te Haapiiraa

Eaha te mau haamaitairaa i fafauhia i te mau tamarii rii o te pohe hou a taeahia ai to ratou matahiti a taa ai ia ratou to ratou iho mana’o (A hi’o atoa PH&PF 29:46). Nahea tei iteraa i hopoi mai ia ia tatou te tamahanahanaraa e te tiaturiraa ia oto ana’e tatou i te pohe o te hoê tamarii rii?
Mai te mea e pohe te hoê tamarii rii, eaha ïa te huru o to’na varua? Afea te tino o te tamarii rii e tupu ai e e paari ai?
Na vai te hopoi’a no te atu’aturaa i te hoê tamarii rii tei pohe i to’na apîraa? Eaha te mau haamaitairaa i fafauhia mai i te mau metua parau-ti’a no teie oraraa i mua, tei pohe ta ratou mau tamarii i te apîraa ra?
Nahea te iteraa i te mau parau haapiiraa no te rave’a no te ora i te tamahanahanaraa e i te tautururaa i te feia te oto nei i te pohe o te hoê tamarii rii?
Nahea to te mau oro’a o te taatiraa o te hiero i te hopoiraa mai i te tamahanahana e te tiaturi i te mau metua ia pohe ana’e te hoê tamarii rii? Eaha te mea e tia ia tatou ia rave no te amui atu i ta tatou mau tamarii rii tei pohe?
Nahea te “hoê parau maiti tano mau” i te tamahanahanaraa i te hoê varua oto i te pohe o te hoê i herehia? Nahea tatou ia faaineine no te parauraa i taua mau parau ra?