Te faaoraraa i to tatou feia i pohe na roto i te ohipa hiero

Na roto i te ohipa hiero, e riro tatou ei mau faaora i ni’a i te mou’a i Ziona no ratou o tei pohe.

Aamu o te Oraraa o Joseph F. Smith

“Te mahaehae nei ta’u varua. Te oto nei ta’u aau e te reva’tura ta’u ora! E ta’u tamaiti here e, o oe ta’u oaoaraa, o oe ta’u tiaturiraa! … E ta’u Atua e, tauturu mai ia’u!¹ e hevaraa teie na te Peresideni Joseph F Smith i te pohe manao orehia o ta’na tamaiti matahiapo, o Hyrum M. Smith, te hoe melo no te Tino Hoê Ahuru Ma Piti Aposetolo. E 45 matahiti to Hyrum. E ono ava’e i muri iho, o Peresideni Semita tei faatere i te Menema i Roto Miti i te faatiaraahia te hoe ofai faahaamanaoraa no te faatura i to’na metua tane o Hyrum. I te 27 no Tiunu 1918, te mahana haamana’oraa i te taparahi poheraahia to’na metua tane e te teina o to’na metua tane, te Peropheta Iosepha Semita.

Aita e ore ua haaputapu te Varua o te Fatu i to’na varua a feruri ai oia no te pohe o ratou o ta’na i here. E nau ava’e i muri iho, e e nau hebedoma no’a hou i to’na iho pohe, ua papai mai te Peresideni Semita: “te parahi ra vau i roto i to’u piha ma te feruri hohonu i te mau papairaa mo’a; E ma te feruri atoa i te Tusia no te Taraehara o tei ravehia e te Tamaiti a te Atua, no te faaoraraa i to te ao nei; … A tamau noa ai au i te feruri, ua faatae atura vau i to’u feruriraa i nia i te mau papairaa a te aposetolo ro o Petero [a hi’o 1 Petero 3:18–20; 1 Petero 4:6]…. A feruri hohonu ai au i teie mau mea o tei papaihia, ua araara ihora te mata o to’u nei iteraa, e ua parahi mai ra te Varua o te Atua i ni’a ia’u, e ua ite atura vau i te tiria rahi o te feia pohe, i te mea iti e te mea rahi.” (PH&PF 138:1–2, 5, 11).

I muri iho i te reira, ua farii oia i te orama no te faaoraraa i te feia i pohe, o tei papaihia i roto i te Tufaa 138 no te Parau Haapiiraa e te mau Parau Fafau, o tei haapii ia’na te tahi mau parau mau api, e o tei haapapu faahou i te mau haapiiraa o ta’na i tiaturi e o ta’na i haapii i roto i te roaraa o na matahiti hoê ahuru i mua ra.

Te Mau Haapiiraa a Iosepha F. Semita

Ua faataa e ua faatahinu ateahia Iesu Mesia no te faaora i te feia ora e te feia pohe

Ua tonohia te Faaora, eiaha noa no te poro haereraa i te Evanelia ia ratou o te vai tahuti nei, area ra ua faataa e ua faatahinu ateahia Oia e te Atua no te iriti i te uputa o te fare tapearaa i tei feia tei roto i te titi e no te faaite poro haere i Ta’na Evanelia ia ratou ra.²

I te toru no Otopa, i te matahiti tauatini iva hanere ahura ma vau, te parahi ra vau i roto i to’u piha no te feruri no nia i te mau papairaa mo’a;

E no te feruri i te tusia taraehara rahi ta te Tamaiti a te Atua i rave, no te faaoraraa i to te ao nei;

E no te here rahi e te umere hoi i faaitehia e te Metua e te Tamaiti na roto i te taeraa mai o te Faaora i te Ao nei;

E na roto hoi i Ta’na tusia taraehare, e na roto i te haapaoraa i te parau tumu o te Evanelia, e tia i te taata atoa ia faaorahia.

A feruri ai au no nia i teie mau mea o tei papaihia (a taio 1 Petero 3:18–20; 1 Petero 4:6), ua ite te mata o to’u varua, e tei nia iho ia’u te Varua o te Fatu, e ua ite au i te tiria taata o tei pohe, te taata haihai e te taata tuiroo.

E ua putuputu i te vahi hoê te tiria rahi o te mau varua parautia aita e roaa i te tai’o, o tei vai parautia i to ratou iteraa papu no te Mesia a ora ai ratou i te oraraa tahuti …

A tiai ai e a aparau ai teie tiria rahi, ma te oaoa i te hora no to ratou faaoraraa mai te mau fifi ra o te pohe, ua fa mai te Tamaiti o te Atua, o tei faaite i te tiamaraa i te feia i tapeahia o tei vai parautia;

E i reira ona i te pororaa ia ratou i te Evanelia mureore, te parau haapiiraa no te ti’afaahouraa e te faaoraraa o te taata nei mai te hi’araa o Adamu, e mai to ratou mau hara tataitahi na roto i te tatarahapa …

E a feruri noa ai au, ua ite ta’u mata, ua haamaitaihia to’u ite, e ua ite au e, aita te Fatu i haere tino i rotopu i te feia ino e te haapao ore o te patoi i te parau mau, no te haapii ia ratou …

Area ra, mai roto mai i te feia parautia, ua faanahonaho oia i to’na nuu e ua faataa oia i te mau vea o te ahuhia i te puai e te mana, e ua faaue oia ia ratou ia haere e ia hopoi i te maramarama o te Evanelia ia ratou i roto i te pouri, e tae roa mai i te mau varua atoa o te taata, e mea na reira te Evanelia i te poro haereraahia i te feia i pohe.

E ua haere te mau vea i maitihia ma te faaite i te mahana o te Fatu e te pororaa i te tiamaraa i te feia i tapeahia e o tei ruruhia i te fifi, e tae roa’tu ia ratou atoa o te tatarahapa i ta ratou mau hara e o te farii i te Evanelia.

E mea na reira te Evanelia i te poro haereraahia i te feia i pohe i roto i te hara, ma te ite ore i te parau mau, e aore ra i roto i te ofatiraa i te ture, o te ore i farii i te mau peropheta.³

Aita Iesu i faaoti i ta’na ohipa i te poheraa o to’na tino, aita atoa oia i faaoti i te reira i muri iho i to’na tiafaahouraa mai te pohe mai; noa’tu ua haapao oia i te tumu o to’na taeraa mai i te fenua nei, aita oia i rave faaoti i ta’na ohipa? E afea oia e faaoti ai? Ia roaa ia’na i te faaora i te tamarii tamaroa e te tamarii tamahine tataitahi a to tatou metua ra o Adamu o tei fanauhia e o te fanauhia mai i nia i teie fenua nei e tae roa’tu i te hopea o te tau, eiaha ra te mau tamarii no te pohe. O tera ïa ta’na misioni.⁴

E rohi amui te feia ora e te feia pohe i te afairaai te Evanelia i te mau tamarii atoa a te Atua.

Aita ta tatou ohipa e oti maori ra ua faaora tatou ia tatou iho, e i muri iho i te reira ia faaorahia te mau taata atoa o te tiaturi nei ia tatou; no te mea e tia ia tatou ia riro ei mau faaora i nia i te Mou’a i Ziona ra, mai ia Iesu Mesia te huru. Ua piihia tatou i teie misioni. Eita te feia pohe e riro ei feia maitai roa ra maori na roto ia tatou, eita atoa tatou e riro ei feia maitai roa ra maori na roto ia ratou (PH&PF 128:18). E misioni ta tatou e rave no ratou, e ohipa taa’e o te tia ia tatou i te rave no te faaora ia ratou o tei ore i ineine no te oraraa mure ore, no to ratou ma’ua e no te mau tafifiraa o ta ratou i farii i o nei; e tia ia tatou ia iriti i te uputa no ratou, na roto i te raveraa i te mau oro’a o te ore e nehenehe ia ratou ia rave no ratou iho, o tei titauhia no to ratou mahutiraa mai te “fare tapearaa,” ia haere mai i mua e ia ora hoi i te varua mai te au i te Atua, e ia haavahia e mai te au i te taata ra i te tino tahuti. (PH&PF 138:33–34)

Ua parau mai te peropheta Iosepha Semita o teie te hoe o te mau hopoi’a faufaa roa ae o te horo’ahia i te Feia moa i te mau mahana hope’a nei. E no teaha? No te mea o teie te anotau o te iraa o te mau tau o te na mua mai i te hau o te mileniuma, e te mau mea atoa o tei parauhia e te vaha o te mau peropheta mo’a, mai te faatumuraa o teie ao, e tupu ihoa, e riro te mau mea atoa ei hoê, i nia i te ra’i e i raro i te fenua nei. O tera ta tatou ohipa e rave, e aore ra o te roaa hoi ia tatou i te rave, e vaiho tatou i te toea i ta tatou mau tamarii, e faaputapu i roto i to ratou aau i te faufaa o teie ohipa, ma te haapii ia ratou i te here i te parau mau e i roto i te ite o teie mau parau tumu nei, ia pohe noa’tu tatou, ua rave ia tatou tei roaa ia tatou i te rave, e e rave ratou i teie hopoia i nia ia ratou e rave noa ratou i te reira e oti roa ae.⁵

Te parau tumu e tano ra no te feia ora, e tano atoa ïa no te feia pohe…. E no reira e bapetizohia tatou no ratou o tei pohe. Eita te feia ora e riro ei feia maitai roa ra maori na roto i te feia pohe, eita atoa te feia pohe e riro ei feia maitai roa maori ra na roto i te feia ora. E tia ia vai mai te taatiraa e te tahoeraa o te mau metua i te mau tamarii e o te mau tamarii i te mau metua ia riro te utuafare o te Atua ei hoê mai te fifi te huru, e i reira ratou e riro ai ei utuafare no te Atua e no to’na ra Mesia.⁶

Teie Evanelia i heheuhia i te Peropheta Iosepha, ua porohia ae’na i te mau varua i te fare tapearaa, ia ratou o tei faarue mai i teie oraraa nei no te ao varua e aore â ratou i ite i te Evanelia. Te haapii nei o Iosepha Semita tera Evanelia ia ratou. Oia atoa o Hyrum Smith. Oia atoa o Brigham Youne, e oia atoa te mau aposetolo parautia atoa o tei ora i teie nei anotau i raro ae i te faatereraa a te Peropheta Iosepha (a hi’o PH&PF 138:36–37, 51–54). Tei tera ao ratou, ua mau ratou i te autahu’araa mo’a i faariihia e ratou i o nei i raro ae i te feia mana, o tei horo’ahia ia ratou a vai noa ai ratou i te tino; te haapii nei ratou i te Evanelia i te mau varua i roto i te fare tapearaa; e te Mesia, a vai noa ai to’na tino i roto i te menema, ua haere oia e poro i te tiamaraa i te feia i tapeahia e ua iriti oia i te mau uputa o te fare tapearaa no ratou o tei ruruhia i te fifi (a hi’o 138:27–30). Eere o ratou anae o tei o mai i roto i tera ohipa, e hanere, e tauatini atu a mau taata; te mau orometua o tei pohe i roto i ta ratou misioni aita â ta ratou misioni i oti, area ra te rave noa nei â ratou i ta ratou misioni i te ao varua (PH&PF 138:57) Aita e ore, ua ite te Mesia e ua titauhia e ua ti’a ia piihia ratou i reira. Eita vau e maro i teie huru mana’o, eita atoa vau e aa. Te vaiho nei au i te reira i roto i te rima o te Atua, no te mea e riro teie mau mea atoa ei maitai rahi ae, no te mea aita te Atua e vaiho noa ia tae mai te ino i ta’na ra feia i te ao nei maori e riro te reira ei maitai rahi ae.⁷

Ua tiaturi tamau noa vau, e te tiaturi noa nei au ma to’u varua atoa e, te mau taata ra mai ia Petero e Iakobo, e te Tino Hoê Ahuru ma piti aposetolo i maitihia e te Faaora i to’na ra tau, no e rave rahi mau tenetere i mairi iho nei mai to ratou hamani inoraahia no to ratou iteraa papu o Iesu Mesia, ua o mai ratou i roto i te poro haereraa i te faaoraraa no te feia i tapeahia i te ao varua ra e i te iritiraa i te mau uputa o te fare tapearaa (PH&PF 138:38–50). Te mana’o nei au e, aita e ohipa faufaa ae ta ratou e rave i teie nei ohipa. To ratou mau piiraa taae e te faatahinuraahia o te Fatu ona iho, no te faaora ia i to te ao nei, no te faaite hua i te faaoraraa i te feia i tapeahia, e no te iritiraa o te mau uputa o te fare tapearaa no ratou o tei taamuhia i te fifi o te pouri, te parau haamehameha, e te ma’ua …

… Te mau mea ta tatou e farii i o nei, hoe a ia i te mau mea i ta te Atua e i te oraraa i mua ia tatou. Hoe a huru e i ta te Atua mau opuaraa o tei itehia i o nei e i ta’na mau opuaraa e itehia i mua i to’na aro e i roto i To’na basileia. O ratou o tei faatiahia no te poro i te Evanelia i o nei e o tei faataahia i o nei no te rave i tera ohipa, eita ratou e ere i te ohipa ia pohe noa’tu ratou, e tamau noa ratou i te faaohiparaa i ta ratou mau tura o ta ratou i farii i o nei i raro ae i te Autahu’araa o te Tamaiti a te Atua no te tavini ia faaorahia te mau taata o tei pohe ma te ite ore i te parau mau.⁸

E riro tatou ei mau faaora i nia i te Mou’a i Ziona, na roto i te raveraa i te mau oro’a faaoraraa i roto i te hiero no te feia i pohe.

A haapii i ta outou mau tamarii e a haapii ia outou iho i te mea e, e mea tia ia tatou ia riro ei mau faaora i nia i te Mou’a Ziona no ratou o tei pohe ma te ite ore i te Evanelia, e te mau hiero o te Atua i nia i teie mau mou’a nei, e te tahi atu mau hiero na te ara, ua patuhia e ua opuahia no te raveraa i teie mau oro’a mo’a o te titauhia no ratou o tei pohe ma te farii ore i te reira. Eiaha e moe ia outou i teie mau mea. A haamana’o noa i te reira no te mea ua titauhia ia tatou ia na reira.⁹

Teie ohipa faahiahia no te faaoraraa o te feia i pohe, te faatahoeraa i te feia ora e te feia i pohe, te mana no te taatiraa … e te mau oro’a atoa o tei heheuhia ia ravehia i roto i teie mau tiahapa mo’a i parauhia e mau hiero, e o tei faauehia ia tatou e te Atua ia patu i To’na ra i’oa mo’a, … teie mau mea, ua heheuhia ïa ia tatou i teie anotau i roto i to’na îraa e i roto i to’na maramarama hou i tei heheuhia i te mau tau atoa o te aamu o te ao nei mai ta tatou i ite.¹⁰

Te hinaaro nei tatou e ite i taua mahana ra e patuhia ai te mau hiero i mau tuhaa fenua e rave rahi, e i te mau vahi e titauhia ai te reira no te maitai o teie nei feia; no te mea ua ite tatou te hoê o te mau hopoia rahi roa o tei tuuhia i nia i te feia o te Atua i teie nei mahana, o te faafariuraa ïa i to ratou aau i to ratou mau metua (Malaki 4:5–6, PH&PF 2), e e tia ia ratou ia rave i te ohipa e au ia ravehia no ratou no te faatahoe ia ratou i roto i te taamu o te Fafauraa api e te mure ore mai tera ui e tae atu i tera ui. Ua na o mai te Fatu na roto i te Peropheta, o teie te hoê o te hopoi’a rahi roa ae o tei tuuhia i nia ia tatou i teie mahana hopea nei.¹¹

No nia i te matararaa te mau varua i rapae i te fare tapearaa, te tiaturi nei tatou e, e tupu te reira i muri i to te Evanelia haapiiraahia ia ratou i te ao varua, e ia farii ratou i te reira e tae roa’tu i te mau oro’a i ravehia no ratou e te feia ora. E faaruhia teie ohipa ia tia i te mau taata atoa i te ao varua ra ia farii i te maitai o te faatiamaraa, e ua heheuhia mai e, te ohipa rahi e tupu i te Mileniuma nei,o te ohipa ïa i roto i te hiero no te faaoraraa i te feia i pohe, e i muri iho te tiaturi nei tatou e, e farii tatou i te haamaitairaa o te heheuraa na roto i te mau ravea ta te Fatu e faaohipa no te heheu mai no nia i te feia o tei ravehia to ratou mau oro’a. E mea papu, noa’tu te Evanelia e haapiihia i te mau taata atoa, te maitai e te ino, oia hoi te mau taata o te tatarahapa e te mau taata o te ore e tatarahapa i te ao varua, hoe a i o nei, e roaa te faaoraraa ia ratou anae o te tatarahapa e o te faaroo.¹²

Ua itehia te ohipa rahi i ravehia … e te feia mo’a no te ohipa hiero. Tei ni’a ia ratou te varua o te ohipa faaoraraa i te feia i pohe, e ua rahi to ratou hinaaro ia rave i teie ohipa here no o mai i te Atua ra. Teie ohipa, te na o ra te Peropheta Iosepha ia tatou, “e mea titauhia no to tatou faaoraraa, mai ta Paulo i parau’na no nia i te mau metua tane, “Eita ratou e maita’i roa maori tatou, eita atoa tatou e maita’i roa maori ratou” (PH&PF 128:15) Te faaueraa a te Atua i te feia mo’a, o te rohi maiteraa ïa ma to ratou puai atoa no te faaoraraa o to ratou feia i pohe ….

Te varua o te faauru nei i te feia mo’a ia rave i te ohipa no te faaoraraa o te feia i pohe, o te tanuraa ïa i roto i te aau o te mau tamarii te mau fafauraa i fafauhia i te mau metua. E au ra te faauru nei teie varua ra i te aau o te mau taata maitai o te fenua nei, o te horo’a i to ratou taime e ta ratou mau ravea no te haaputu i te mau aufau fetii o te utuafare. E tia i te feia moa ia imi i te mau ravea atoa ia roaa ia ratou teie mau parau atoa no to ratou mau tupuna i raro roa, ia ravehia hoi to ratou faaoraraa na roto i te mau oro’a i roto i te Fare o te Atua. Te haamauruuru nei matou i te feia mo’a no to ratou itoito i roto i teie ohipa faufaa roa.¹³

Te faatoro ra tatou i to te ao nei te amaa olive no te hau. Te faaite ra tatou i to te ao nei te ture a te Atua, te parau a te Fatu, te parau mau, mai tei heheuhia i teie mau mahana hopea nei no nia i te faaoraraa i te feia i pohe e no te faaoraraa i te feia ora.¹⁴

Mana’o Tauturu i te Haapiiraa

Eaha te “ohipa” e te “misioni” a te Faaora”? Eaha ta te Faaora i rave i te ao varua no te faaoti i teie ohipa faahiahia? (A hi’o PH&PF 138:11–12, 19, 29–30)
E mea nahea te ohipa misionare i te raveraahia i te ao varua ra? O vai te mau misionare? (A hi’o PH&PF 138:29–34, 57–59)
Eaha ta tatou e nehenehe e rave no te iriti i te “uputa o te fare tapearaa no ratou o tei ruruuhia i te fifi no te pouri, te parau faariaria, e te ma’ua? Eaha te tahi mau mea o tei riro ei tauturu no te imiraa i to outou mau tupuna e no te rave faaotiraa i to ratou mau oro’a hiero?
Nahea tatou e “riro ai ei mau faaora i nia i te Mou’a i Ziona”? No teaha teie ohipa i riro ai ei “hoê o te mau hopoia rahi roa ae o tei tuuhia i nia i te feia o te Atua i teie nei mahana”?
Eaha te tahi mau opuaraa o te mau hiero? Eaha te mau haamaitairaa tei fariihia e outou no te mea ua rave outou i te oro’a no te tahi atu mau taata i roto i te hiero, e aore ra ua horo’a outou i to ratou mau i’oa ia ravehia to ratou mau oro’a?
Eaha “te ohipa faahiahia o te Mileniuma”? Nahea tatou e tauturu ai i tera ohipa i teie nei?
Nahea to outou ite i te faanahoraa a te Atua no te faaoraraa i te feia i pohe i haamaitai ai i to outou oraraa? Eaha ta teie faanahoraa e faaite mai ia tatou no nia i te here o te Atua i ta’na mau tamarii atoa.

Hyrum M. Smith — Te tamaiti a te Peresideni Joseph F. Smith, melo no te Tino Hoê Ahuru ma Piti Aposetolo, o tei pohe i te matahiti 1918, tau taime rii noa na mua ae i to te Peresideni Smith fariiraa i te orama no ni’a i te faaoraraa o te feia i pohe e o tei riro mai i muri iho ei tuhaa 138 no Te Parau Haapiiraa e Te Mau Parau Fafau.

Cardston, Alberta Temple — Na te Peresideni Smith i haamo’a i te fenua i hamanihia ai te hiero no Cardston, Alberta i Canada i te matahiti 1913 ra.