Ta Tatou Ohipa, te Faaoraraa i te Mau Varua

Ta tatou ohipa faufaa rahi a’e, o te haaraa ïa no te faaoraraa i te ora nei e i tei pohe.

Aamu o te Oraraa o Joseph F. Smith

Iroto i to’na oraraa taatoa, ua tavini o Joseph F. Smith i te basileia o te Atua, “ma te hinaaro puai i te faahaere i mua i te ohipa a te Fatu.”¹ I roto i te amuiraa taa’e, i te taime oia i paturuhia ai ei Peresideni no te Ekalesia, ua a’o oia i te Feia Mo’a: “E hopoi’a na tatou ia rave itoito i te ohipa, ma te aau e te mana’o tae, na roto i te tauturu a te Fatu, e i raro a’e i te faururaa o to’na Varua, mai tei ravehia i muta’a iho a’e nei.”²

Ua faaitoito oia i te Feia Mo’a i roto i te mau paroisa e te mau ama’a e rave rahi na te ao atoa nei, ia tavini e ia haamaitai i te mau taata atoa na roto i te mau huru rave’a atoa. A faatere ai oia i te misioni no England, ua faaite mai te ta’ea’e ra o William Fowler, e melo no Sheffield i te mau mea tana i rave no te faaha’ere i te ohipa o te basileia o te Atua i mua. Ua rahi to’na mau fifi e te ati i te taime oia i ô mai ai i roto i te Ekalesia. Ua papa’i oia i te hoê himene ei faaiteraa i to’na faaroo i roto i te evanelia e no to’na mauruuru no te mau mea ta’na i farii. Tei roto te Peresideni Joseph F. Smith i teie pureraa a himenehia ai teie himene no te taime matamua. Ua haamata teie himene na roto i te mau parau tei riro ei mau parau matarohia e te Feia Mo’a i te ao atoa nei: “Mauruuru matou e te Atua” (Himene no. 10)

Ua mauruuru o Joseph F. Smith i te mau horoa** a te mau Feia Mo’a tataitahi i te ohipa a te Fatu e ua hinaaro oia ia tavini i te maororaa o to’na oraraa i te mau taata atoa, o te ora nei e o tei pohe. E mea au roa na’na te taviniraa i roto i te hiero, e taata tapao ioa oia, e faatere oia i te ohipa hiero i roto i te fare oro’a hiero; i muri iho, ua riro mai oia ei te peresideni no te hiero i Roto Miti. I raro a’e i ta’na faatereraa te haamataraahia o te Totaiete Tuatapaparaa no Utaha. Ua riro to’na oraraa e misioni no te totauturu e te faaoraraa i te mau taata atoa, ei misioni ta’na i faaue i te Feia Mo’a : “Aita hoê a’e ohipa rahi e te hanahana i roto i teie ao mai te haaraa no te faaoraraa o te feia ora e te faaoraraa i te feia i pohe.”³

Haapiiraa na Joseph F. Smith

Tei ni’a tatou i te fenua nei no te rave i te ohipa a te Atua.

O Oia o tei tono mai i ta’na Tamaiti Fanau Tahi i teie ao no te faaoti i te misioni o ta’na i rave, ua tono atoa mai oia i te mau varua tataitahi o te faaroo mai nei i to’u reo, e ta’e roa mai i te mau tane e te vahine o teie ao, no te faaoti i te hoê misioni o te ore e oti na roto i te haapa’o ore e te tau’a ore, eita atoa e oti na roto i te pouri. E haapii tatou i ta tatou ohpa; e haapii h oi i te mau titauraa ta te Fatu i titau mai ia tatou ia rave, e e haapiihoi i te mau hopoi’a Ta’na i tu’u mai i ni’a ia tatou. E mea ti’a ia tatou ia ite i ta tatou hopoi’a i mua i te Atua e i mua atoa ia vetahi ê, e i mua atoa i te maitai o Ziona, o tei faati’a-faahou-hia i ni’a i te fenua nei, i te mau mahana hopea nei.⁴

E haamanao tatou e, te rave nei tatou i te ohipa a te Atua—e ia parau vau te ohipa a te Atua, te parau nei au no te ohipa ta the Mana Hope i faati’a i ni’a i te fenua nei no to tatou faaoraraa. E ti’a i te taata ia haa no to’na iho maitai e no te maitai atoa hoi o vetahi ê. I roto i teie oraraa, eita e ti’a i te taata ia haa noa no’na iho. E ere te opuaraa ia vai otahi noa tatou e amuri noa’tu. Ua riro te taata hoê ei tufaa no te fare faaroo, e e ti’a i te tufaa tataitahi ia rave i ta’na hopoi’a no te maitai o te taatoaraa. E mea ti’a i te taata tataitahi ia rave maite i ta’na hopoi’a. Ia na reira oia, e ia paruru oia ia’na iho i te mau mea viivii o teie ao, e tauturu oia ia vetahi ê ia na reira atoa.⁵

E faaroo ora e faaroo no te mau mahana atoa e no te mau hora atoa, te evanelia a te Mesia. E titauhia ia tatou ia rave maitai i teie ihoa mahana, teie hora, teie hebedoma, teie ava’e e teie nei matahiti mai te reira noa e matahiti e matahiti’tu, no te ora i to tatou faaroo oia te faaroo o Iesu Mesia—te parau-ti’a, te parau mau, te aroha, te here, te faaoreraa hara, te maitai, te tahoêraa, e ia hau to teie nei ao, e ia ite auhia mai te taata nei. O teie ta tatou misioni. ⁶

E haerea hanahana to tatou i mua ia tatou. E ohipa hanahana ta tatou e rave nei. E titauhia tatou ia horo’a tatou i to tatou mana’o atoa, to tatou oraraa, e te mau mea atoa ta te Fatu i horoa mai ia tatou, e ia ahuru tauatini a’e taime na ni’a a’e. Inaha, aita to te reira e faaauraa, tei roto te mau mea atoa, aita e faaauraa. O oia te mau mea atoa i teie nei e a muri a’e. Te evanelia, o te ora ïa, ia ore oia ra, aore e faufaa to te mau mea atoa.⁷

E mea titauhia ia tatou ia haa maite no to tatou iho faaoraraa.

A rave faaoti tatou i to tatou ora ma te mata’u e te rurutaina i mua i to tatou Metua, e ia vai parauti’a noa tatou e ta’e roa’tu i te hopea. A haamana’o outou e, tei roto outou i teie ohipa no teie nei e a muri noa’tu. Aita e otoheraa, aita atoa e faarueraa maori ra na roto i te hara, e i reira ïa e tae mai ai te faautuaraa no te hara. Area râ, mai te peu e te hinaaro nei outou i te faateiteiraa, te ite faahouraa i te mau metua tane e te mau metua vahine, te mau ta’ea’e e te tuahine, te mau fetii e te mau hoa; ia hinaaro outou i te hanahana, te ite, e te mau ora mure ore, e farii outou i te reira i roto i te ohipa a te Atua; aita e vahi e atu outou e farii ai outou i te reira. No reira ia vai to outou au e te anaanata’e i teie ohipa. Ia tupu to outou here no teie ohipa, e teie ana’e iho. A faarue i te mau mea no teie ao.⁸

Te evanelia a Iesu Mesia, o te mana ïa o te Atua no te faaoraraa, e e mea ti’a i te mau tane e te mau vahine atoa no te Ekalesia a te Mesia ia rave i te mau ohipa parau-ti’a, ia haapa’o i te mau ture a te Atua, e ia haapa’o i te mau faaueraa ta’na i horo’a mai, ia ti’a ia ratou ia fana’o i te mana o te Atua no te faaoraraa i roto i teie nei oraraa.⁹

Te ti’aturi nei tatou e, e mea ti’a i te mau taata o teie tau ia ora, ia haa, e ia haafatata i te Atua te Metua e te Tamaiti, ia ite ratou ia raua no te mea, o te ora mure ore hoi, ia ite ia raua. Te ti’aturi nei tatou e, no te ite ia raua e no te haafatata ia raua, e mea ti’ai te au taata i teie tau, ia ore mai tei orahia na e te Feia Mo’a i muta’a ihora, ei reira tatou e farii ai i te mau haamaitairaa i fariihia na e ratou e ia haapiihia tatou no ni’a Ia’na i te mau mahana atoa. E horo’a mai Oia i te mau faaue, e ua na ni’a iho i te faaue, ua a’o, e ua na ni’a i te a’o, te tahi vahi iti i ô nei, e mai reira hoi ei ô te tahi vahi iti. E farii tatou i te ite i te Metua e e ite tatou no tatou iho. Aita e ti’a ia’u ia farii i te ite no outou e aore râ, aita’toa e ti’a i te tahi taata ia farii i te ite no’u nei. Eita te Varua o te Atua e heheu mai ia outou i te Evanelia e aore râ, e faaite papu ia outou no ni’a i te Metua no’u nei. Eita e ti’a ia’u ia faaora ia outou; eita atoa e ti’a ia outou ia faaora ia’u. Ia au i teie parau, eita te hoê taata e riro ei faaora no te tahi. Teie râ, te taata o tei farii i te iteraa papu o te Varua i roto i to’na aau e o tei farii i te ite o te mau parau tumu matamua o te evanelia, e nehenehe ïa ia’na e faaite papu i te reira i te tahi atu taata. E na roto i te faaiteraa, e riro paha te tahi varua i te farii i te parau mau e i te ti’aturi no’na iho. O to’na râ faaroo i te evanelia e ta’na mau ohipa parauti’a te faaora ia’na, eiaha ra te faaroo e te ohipa a te taata o tei faaite papu atu ia’na. E mea na reira ana’e te taata i te faaorahia.¹⁰

Eiaha outou e ti’aturi noa, e haapa’o râ outou e e rave hoi outou i te mau mea ta te Atua e faaue. E ere tera ana’e ta outou e rave, e horoa râ outou i to outou aau, to outou aroha e to outou varua ma te mana’o tae i te Atua. E horo’a outou i to outou hinaaro i te hinaaro o te Metua, e e rave outou i te mau mea atoa Ta’na e ani mai ia outou, ia faaorahia e ia faateiteihia outou i mua i to’na aro.¹¹

E haa tatou no te faaora i to tatou utuafare.

E te Atua e, eiaha ia mo’e ia’u to’u utuafare. Eita e ti’a ia’u ia aramoina i to’u utuafare, o ta te Atua i horoa mai e o tei riro ei hopoi’a na’u i mua i te Fatu, e o te ti’aturi nei ia’u no te arata’iraa, no te haapiiraa e no te hi’oraa maitai. E te Metua e, eiaha oe e faati’a ia’u ia faarue noa ia ratou a tamata ai au i te faaora ia vetahi ê. E haamata te aroha i roto i te utuafare. E haamata atoa te ora mure ore i roto i te utuafare. E oto roa vau mai te mea e, i te hoê mahana, e faaitehia mai ia’u e, na roto i to’u haapa’o ore i to’u utuafare no te tamata i te faaora ia vetahi ê, ua mo’e ê to’u mau taata. Aita vau e hinaaro i te reira. A tauturu mai e te Fatu ia’u no te faaora i to’u utuafare, a tauturu ai te tahi ia vetahi ê. Ua ite au e aita e ti’a ia’u ia faaora ia vetahi ê, e nehenehe râ ia’u ia haapii ia ratou nahea i te faaora ia ratou iho. E nehenehe ia’u e faaite i ta’u mau tamarii nahea ratou e faaorahia ai, e o tera ta’u hopoi’a matamua. O ratou ta’u e haapa’o na mua hou te tahi atu mau taata i te ao nei. E ia oti ta’u ohipa i roto i to’u iho utuafare, a horoa mai i te puai no te rave i te ohipa maitai i te mau vahi atoa e nehenehe ia’u.¹²

To tatou misioni i teie nei ao, o te raveraa ia i te ohipa maitai, ia faaea i te rave i te hara, ia faateitei i te parau ti’a, te viivii ore e te ohipa maitai i roto i te aau o te taata nei, e ia tu’u i roto i te aau o ta tatou mau tamarii, i te here i te Atua e i Ta’na parau. E riro te reira i roto ia ratou mai te pape pihaa no te maramarama, te puai, te faaroo e te mana, o te arata’i ia ratou mai to ratou apîraa e tae atu i to ratou paariraa. E riro mai ratou ei mau feia faaroo puai i te parau a te Fatu, i te evanelia e te autahu’araa tei faahoihia mai, e te faati’araa o Ziona o te ore roa e faataahuri faahouhia e aita atoa e horo’ahia i te tahi atu nuna’a. E to’u hinaaro rahi roa a’e, ia papu ta’u mau tamarii i roto i teie faaroo e i teie iteraa e eiaha roa ratou e faarue i te reira.¹³

Te hoê varua i faaorahia i roto i te ao nei e mea faufaa roa ïa i mua i te aro o te Atua. Mai te au i te hoê varua o te faaorahia i roto i te utuafare. E ohipa ta tatou i roto i to tatou mau utuafare. Eita hoi e ti’a ia tatou ia haafaufaaore i te ohipa te ti’a ia tatou ia rave i roto i to tatou utuafare. A haere atu ai na te ao nei no te rave i te ohipa e ere hoi i te mea faufaa roa’tu. E rave tatou i ta tatou hopoi’a i te mau vahi atoa.¹⁴

E haa tatou no te faaoraraa o te feia ora e te feia i pohe

E paturu tatou i te Mesia, i ta’na mau feia, e i ta’na ohipa parauti’a e te faaora; e paturu tatou te tahi e te tahii roto i te parauti’a, e a’o tatou ma te maru te tahi i te tahi no ni’a i te mau ohipa hape i ravehia. E riro tatou ei mau hoa e ei mau faaora i te mou’a o Ziona, te tahi no te tahi. E haapuai tatou i tei paruparu. E faaitoito i tei tapitapi. E hopoi tatou i te maramarama i to ratou ite e ti’a ai, ia riro tatou ei mauhaa i roto i te rima o te Atua ei faaora no te mau taata atoa. Aita to tatou mana no te faaora te taata nei. E mana râ to tatou no te faaite atu ia ratou i te ravea e farii ai ratou i te ora na roto i te haapa’oraa i te ture a te Atua. E nehenehe ia tatou e faaite atu ia ratou nahea ia ha’ere no te farii i te ora, no te mea e mana to tatou no te raveraa i te reira. Ua ite tatou e ua taa ia tatou nahea i te raveraa e ua riro mai te reira e hopoi’a no tatou ia haapii i te reira..na roto i te hioraa maitai e na roto atoa i te a’o i to tatou mau hoa o teie nei ao.¹⁵

Ta tatou misioni, te faaoraraa ïa i te taata. Ua ohipa maite tatou no te arata’i mai te taata ia ite i te evanelia a Iesu Mesia, no te arata’i mai ia ratou i te tatarahapa, i te haapa’oraa i te mau titauraa a te ture a te Atua. Ua tutava tatou i te faaoraraa i te taata i roto i te hape, i te haapiiraa ia ratou ia faarue i te ino e ia rave i te maitai.¹⁶

Ta tatou misioni, o te faaoraraa ïa, te parururaa i te ino, te faateiteiraa i te taata nei, te hopoiraa i te maramarama e te parau mau i to te ao atoa nei, te haapiiraa i te taata o te ao nei i te ha’ere i mua i te Atua na roto i te parauti’a, e te faaturaraa Ia’na i roto i to ratou oraraa.¹⁷

Te tamara … i te maitai … o to tatou varua, tei roto ïa i to tatou aravihi i te tamanahana i te taata, to tatou aravihi i te tauturu ia vetahi ê, eiaha râ to tatou aravihi i te tauturu ia tatou iho ma te taahi ia vetahi ê i raro i roto i te aroraa o te oraraa nei.¹⁸

E ti’a ia tatou ia titau i te tauturu ia vetahi ê ia upo’oti’a ratou—eiaha râ ia re ratou! Ta tatou opuaraa, te ora mure ore ia—te faateiteiraa o te taata nei—e ere te faainoraa o te taata nei.¹⁹

Ta tatou ohipa o te faaoraraa ïa o te ao nei, te faaoraraa o te taata nei, te arata’i ia ratou ia afaro ratou i te mau ture a te Atua e te mau parau tumu o te parau-ti’a, te tano, e te parau mau, ia ti’a ia ratou ia faaorahia i roto i te basileia o to tatou Atua, e ia riro ratou na roto i te haapa’oraa i te mau oro’a o te evanelia, ei feia tufaa o te Atua e ei feia tufaa apiti ia Iesu Mesia. O tera ta tatou misioni.²⁰

Aita ta tatou ohipa e oti maori râ, ia faaora tatou ia tatou iho, e aita atoa tera e oti maori râ, ia faaora tatou i te mau taata o te ti’aturi nei ia tatou; no te mea e ti’a ia tatou ia riro ei mau faaora i ni’a i te mou’a ra o Ziona, mai ia Iesu Mesia te huru. Ua pii hia tatou i teie misioni. E ore e noaa te maitai rahi roa ia ratou ra ia ore tatou nei, e ore atoa tatou e maitai roa ia ore to tatou feia i pohe ra. Ta tatou misioni, te raveraa ïa i te ohipa no ratou e ei mono no ratou; e ti’a ia tatou ia faaora ia ratou o tei ore i ineine no te ora mure ore, no to ratou ite ore e te mau fifi ta ratou i farii; e mea ti’a ia tatou ia iriti i te uputa no ratou, na roto i te raveraa i te mau oro’a tei ore e roaa ia ratou i te rave, e o te titauhia no to ratou matararaa mai roto mai i te fare tapearaa varua; ia ora ratou ia au i te Atua na roto i te varua, ia haavahia ratou ia au i te taata tahuti nei.²¹

Aita e ti’a ia tatou ia haafaufaaore i te ohipa no te faaoraraa i te feia i pohe, ta te Peropheta Iosepha i tu’u mai i ni’a ia tatou ma te ani mai ia imi tatou i to tatou mau fetii e te mau tupuna o tei ore i farii i te evanelia hou ratou a pohe ai. E mea ti’a ia tatou ia rave i teie mau oro’a mo’a e te mana, o tei heheuhia ei oro’a faufaa no te faatupuraa i te oaoa e te faaoraraa o te mau taata i ora na i teie ao i te taime aita i ti’a ia ratou i te faarii i teie mau oro’a, o tei pohe ma te ite ore i te reira. Te ti’ai nei teie mau feia ia tatou ta ratou mau tamarii o te nehenehe e rave i to ratou mau oro’a ia faaorahia ratou mai roto mai i te fare tape’araa i te ao varua ra. Na roto i ta tatou mau ohipa e ofatihia te mau fifi o te tapea nei ia ratou, e ore te pouri, e e ta’e mai te maramarama i ni’a ia ratou e e ite ratou i te ao varua ra i te ohipa i ravehia no ratou e ta ratou mau tamarii i ô nei, e e oaoa ratou i to outou rave faaotiraa i teie mau hopoi’a.²²

Aita e taime i tupu, e aita roa e taime e aparau ai te feia o te mau nei i te autahu’araa i roto i te Ekalesia a Iesu Mesia i te Feia Moa e, ua nava’i to tatou raveraa i te ohipa. Roa noa’tu â te oraraa nei, e a vai noa’tu â hoi to tatou aravihi no te raveraa i te maitai, no te paturaa ia Ziona e no te maitai o te tamarii a te taata nei, e ti’a ia tatou na roto i te manao tae, ia faatupu i te mau titauraa i anihia mai ia tatou no te rave i ta tatou hopoi’a, noa’tu te iti e aore râ, te rahi.²³

Mana’o Tauturu i te Haapiiraa

No te aha e mea faufaa roa no tatou ia ite e, ua tonohia te taata tataitahi i te ao nei “no te faaoti i te hoê misioni”? No te aha aita e ti’a ia tatou i te faaoti i ta tatou misioni ma te “rave-noaraa i te ohipa” no tatou iho?
Nahea tatou ia faariro i te ohipa a te Atua ei ohipa na tatou? No te aha te ohipa a te Fatu e titau ai i “to tatou mana’o atoa? Nahea ta tatou mau maitiraa ia riro ei faaiteraa i to tatou ti’aturiraa i te ohipa a te Fatu?
Eaha ta tatou e rave, taa ê atu i te ti’aturiraa e te haapa’oraa, “ia faaorahia e ia faateiteihia tatou i mua i te aro o te Atua?” Eaha te auraa o te parau “horo’a i to oe aau, to oe puai, e to oe varua i te hinaaro o te Atua”? Ia hope ta tatou mau tutavaraa atoa, nahea tatou e farii ai i te faaoraraa? (a hi’o ato’a 2 Nephi 25:23).
Eaha te mau mea ta tatou titau ia tu’u i roto i te aau o te mau melo o to tatou utuafare “o te hau i te mau mea atoa”?
Nahea tatou ia faaitoito no te faaora i to tatou iho ma te rave atoa i ta tatou mau hopoi’a taa ê? Nahea ta tatou taviniraa ia vetahi ê i roto i te Ekalesia e i te ao atoa nei ia riro ei haamaitairaa no to tatou utuafare?
Nahea tatou ia “faateitei i te taata nei”? Eaha ta tatou e rave no te tauturu ia vetahi ê i te vai parau-ti’araa i te mau ture a te Atua?
Eaha te ti’a ia tatou ia rave no te ofati i “te fifi o te faatîtîraa” o te feia i pohe ma te ite ore i te evanelia? Eaha to outou mana’o ia ite outou e, te feia ta outou e tauturu “e oaoa ratou i to outou rave faaotiraa i teie mau hopoi’a”?
No te aha “te tamataraa i te maitai o to tatou varua” e itehia ai i roto i “to tatou aravihi i te tauturu ia vetahi ê”? I to outou mana’oraa, no te aha te reira? E mea nahea e i nahea outou i te horo’araa i te tusia no te maitai o vetahi ê? Eaha te huru o to outou aau i tera taime?

Genealogical Society — Te piha toro’a a te Totaiete Tuataparaa o Utaha i Roto Miti hou te matahiti 1917, e omuaraa no te Fare Buka Aamu Utuafare. Mai te pa’e aui i te pa’e atau: Lillian Cameron, Joseph Christensen, Joseph Fielding Smith, and Bertha Emery.