E Heheuraa Tamau no te Maitai o te Ekalesia

E tahoêhia tatou i te oraraa nei, na roto i te heheuraa tamau o te tae mai, mai te Atua mai, i Ta’na Ekalesia na roto i te mau rave’a o Ta’na i faataa.

Aamu o te Oraraa o Iosepha F. Semita

Ia au i na Peresideni e pae o te Ekalesia na mua atu ia’na, ua farii Iosepha F. Semita i te mau aratairaa no o mai i te Atua ra no te aratai i te Ekalesia e To’na mau melo. Tera râ, i te mau ava’e hope’a o to’na oraraa, ua rairai te paruru i faataa ia’na e te Atua o tei ore hoi i iteahia ae nei. Te rahiraa o teie taime, ua faaohipahia i roto i te pure aau e te feruriraa hohonu. I te 4 no Atopa 1918, tau hepetoma rii hou to’na poheraa, ua parau oia i roto i te amuiraa rahi: “Eita vau, eita roa’tu vau e tamata ia parau i te mau mea e rave rahi e vai nei i roto i to’u feruriraa i teie poipoi, e mea tia ia’u ia vaiiho i te reira no teie mau taime i muri nei, te hinaaro nei te Fatu ia’u ia faaite ia outou i te tahi o te mau mea e vai nei i roto i to’u feruriraa e o te vai nei i roto i to’u aau. Aita vau i ora otahi noa i teie na avae e pae. Ua parahi au i roto i te varua o te pure, o te taparu, o te faaroo e te faaotiraa papu; e ua aparau tamau vau e te Varua o te Fatu.”¹ I roto i taua taime au i farii ai i te orama no te faaoraraa i te feia i pohe, tei riro mai ei tuhaa 138 no Te Parau Haapiiraa e Te Mau Parau Fafau.

Ua faî haehaa te Peresideni Smith i te maitai o te Atua na roto i te heheuraa mai ia’na te mau mea o ta’na e hinaaro ia ite a aratai ai oia i te Ekalesia: “Te ti’aturi puai nei au e, ua faaite mai te Atua ia’u i roto i to’u nei paariraa, e rave rahi mau ohipa hanahana, e rave rahi mau parau tumu, e i te rahiraa o te taime, e rave rahi paari o tei haamaitai ia’u nei; e te ti’aturi nei au e, e rave tamau noa â Oia mai te mea e, e farii maitai au, mai te mea e, e vai au i roto i te hoê ti’araa ia nehenehe ia’u ia faaroo Ia’na ia parau mai, ia faaroo a pii mai ai Oia, e ia farii a horoa mai ai Oia ia’u i te mea o Ta’na e hinaaro.”²

Te Mau Haapiiraa a Iosepha F. Semita

Te ti’aturi nei matou i te heheuraa i te taata nei no o roa mai i te Atua ra

Te ti’aturi nei matou … i te parau tumu o te heheuraa i te taata nei no o roa mai i te Atua mai ra.

E tuhaa teie no te Evanelia, eere râ te reira i te mea maere i teie tau tu’uraa Evanelia. Ua itehia te reira i te mau tau atoa e i te mau tau tu’uraa Evanelia. Eita te Evanelia e faaterehia, eita atoa te Ekalesia a te Atua e vai mai i nia i te fenua nei ahiri aita e heheuraa. O te Mesia te upoo o Ta’na Ekalesia eita i ta te taata nei, e e vai mai taua reni tu’atiraa ra na roto i te parau tumu o te heheuraa tamau e te afaro. Eere teie parau tumu no ô mai i te mau tupuna, eita atoa e he’e mai,mai roto atu i te metua tane e tae roa mai i te tamaiti, eita atoa mai tera u’i e tera u’i, area râ, e mea ora, e parau tumu puai o te oaoahia na roto i te tahi mau titauraa, oia hoi—na roto i te faaroo papu i te Atua e i te haapao i Ta’na mau ture e Ta’na mau faaueraa. I te taime a tapu êhia ai teie parau tumu, i te reira iho taime te Ekalesia e painu ai, e e faatupu te reira i te peapea rahi o to’na upoo faatere. I taua vairaa ra, eita ïa e ora faahou, e mea ti’a râ ia faaore roahia ei Ekalesia na te Atua, mai te pahi atoa ra i nia i te moana ma te raatira ore, e avei’a ore e aore râ, e hoe ore, e o te hurihuri noa ia puai te mau vero e te mau are miti o te mau hiaai rahi o te taata patoi, e te mau hiaai rahi o te ao nei, te teoteo e te maamaa, e i te pae hopea, e iri atu i ni’a i te pa’uria o te orometua haavare e te faaroo hape.³

Ia maramarama maitaihia e, e tura to te mau tavini o te Atua, i roto i ta ratou faatereraa, no te farii oioi i te aratairaa no o mai i te Atua ra, e no reira, na roto i to ratou faaroo, e amui ratou i te paari no o mai i te Atua ra ei puai i roto i ta ratou mau ohipa, e ia oti te reira, e haapuai te reira i te hoê nunaa vi ore i roto i te mau mea o ta ratou i faatupu no te ohipa a te Atua.⁴

Ua ite au e, te mau parau tumu tataitahi o te Evanelia a Iesu Mesia o tei heheuhia mai na roto ia Iosepha Semita, te peropheta, i teie tau hope’a nei no ô mai ïa i te Atua ra, e parau mau te reira, e e vai te reira e amuri noa’tu—oia hoi, ia au i to’na faufaa, e i to’na parau mau; eita roa e nehenehe ia faataahurihia. Ua ite au i te reira i roto i to’u tino taatoa. Ua tapiti te Atua i te haapapuraa mai ia’u na roto i te parahiraa mai e na roto i te mana o To’na Varua, e na roto i te faaûrûraa o te ara nei i roto i to’u varua ia here i te mea maitai, e ia hiaai i te faarue i te mea ino.⁵

E heheu mai te Atua i To’na hinaaro i te mau taata no teie tau hau atu i te mau tau i mua ra

E faaite te Feia Mo’a i te Mau Mahana Hope’a Nei … i te iteraa papu i to te ao nei e, te ora nei te Atua e te heheu nei oia i to’na hinaaro i te mau taata atoa e tiaturi ra Ia’na e o te haapa’o ra i Ta’na mau faaueraa, ua rahi roa’tu i to tatou nei anotau i te mau tau atoa i roto i te aamu o te mau taata. Aita i î te mau buka o tei faataahia ei papa’iraa mo’a. Aita roa’tu te Atua i heheu mai i te hoê noa ae taime e, e faaea Oia e amuri noa’tu i te paraparau i te mau taata. Mai te mea e, ua faati’ahia tatou ia tiaturi i Ta’na i paparau mai, e mea ti’a e e ti’aturi tatou e, e paraparau tamau mai â Oia, no te mea e ore roa Oia e taui .…

Eaha te heheuraa maori râ, te faaiteraa i te mau ite apî, na roto mai i tei riro ei tumu no te parau mau atoa? Ia parauhia e, aita e hinaarohia te heheuraa apî, hoê huru ia parauhia e, aita tatou e hinaaro nei i te mau parau mau apî—e parau maamaa ïa. Oia atoa ïa, ia parau tatou e, te mau heheuraa o tei fariihia e Aberahama ua rava’i ïa no te mau peropheta; te heheuraa i horoahia ia Enoha ua ravai ïa no Noa, ta’na misioni o te hamaniraa ïa i te pahi e te piiraa ia tatarahapa; e aore râ, te mau parau i parauhia ia Mose ua ravai ïa no te mau tau atoa e aore râ, o te mea i fariihia e Aberahama, ua ravai ïa no ta’na mau tamarii o te mau tau atoa. Aita roa ïa. Atira noa’tu e, ua haamaitaihia o Aberahama e te mau fafauraa rahi, aita roa te parau a te Atua i haamo’ehia i ta’na tamaiti ia Isaaka, aita atoa i ta’na mootua ia Iakoba. No te aha? No te mea, aita e nehenehe i teie mau taata ia rave noa i ta ratou mau misioni i te parau noa a te Fatu i to ratou mau metua tane e ia vetahi ê. E nahea ïa te Metua o te Faaroo i te faaotiraa i ta’na ohipa i ni’a i te mau haapiiraa o tei fariihia e Noa? Eaha te faaohiparaa a te taata iho no te mau heheuraa a te mau paterealeha i tahito ra e te mau peropheta a Balaama e aore râ, ia Paulo? Oia mau, ua faaohipahia e ratou ei mau aamu parau mau e aore râ, ei mau haapiiraa, tera râ, aita te reira e rava’i no ratou iho.

No reira, te tia nei tatou i te tau apî i roto i te hinaaro, e hinaaro rahi mau! no te heheuraa tamau, ia nehenehe ia tatou tataitahi ia faaoti i ta tatou mau misioni ia fariihia e to tatou Metua, e ia ti’a ia tatou ia rave i te ohipa no to tatou iho ora; e ia ite atoa tatou i te hinaaro o te Atua no Ta’na Ekalesia, To’na feia, e Ta’na mau opuaraa no te mau nunaa. E mau hinaaro rii noa teie i te mau tauatini hinaaro e vai nei no te heheuraa.⁶

E faaite mai te Atua Ia’na iho i to te ao nei, na roto i te mau reni mana o te autahu’araa.

Na roto ia Iosepha [Semita], … ua faaite mai te Fatu Ia’na iho i to te ao nei, e na roto ia’na ua maiti i te mau misionare matamua o te Ekalesia—e mau taata parau ti’a i roto i to ratou mau aau; e mau taata o ta’na i ite e, e farii i te parau, e e ohipa ma te tuati atu i ta Iosepha i roto i teie ohipa rahi, e te faufaa rahi; e o te taatoaraa o tei faatoro’ahia i te Autahuaraa, e o te taatoaraa o tei faataahia i roto i te hoê noa’tu toro’a i roto i teie Ekalesia, tei farii i to ratou mana e ia rave na roto i teie ravea, tei faataahia e te Atua, e o Iosepha te upoo. E titauraa teie, aita e nehenehe ia faahuruêhia. Aita te Atua e faati’a mai i te hoê atu peropheta e i te hoê atu nunaa no te rave i te ohipa o tei faauehia ia tatou ia rave. Aita roa e nehenehe ia’na ia vaiiho i te mau taata o tei ti’a itoito ma te parau ti’a mai te matamua mai â, mai te au i tei parauhia, no teie ohipa, e te mau taata o te vai itoito noa nei â e te faaroo, mai te mea e tamau noa ratou i te faaroo i ta ratou e tiaturi râ. Aita e uiraa i roto i to’u feruriraa e, e faaite mai ratou i to ratou iho ti’aturi ore, ei tino hoê, inaha, mai te mea e riro ratou ei mea tiamâ ore i roto i to’na hi’oraa, e tatara oia ia ratou mai roto atu i to ratou mau tiaraa e e pii i te tahi atu mau melo o te Ekalesia no te mono i to ratou mau ti’araa.⁷

I te taime a parau ai te hoê taata eita oia e auraro i te mana tei faati’ahia ia au i te ture o te Ekalesia, noa’tu e, e mau orometua haapii, e episekoporaa, e melo no te apooraa teitei, no ta’na pŭpŭ autahu’araa, e aore râ, te Peresideniraa Matamua, e e haapapu i roto i to’na aau ma te opere atu i rapae, i te taime mau oia a faatea ê ai ia’na iho i te mau faufaa taa ê e te mau haamaitairaa o te Autahu’araa e te Ekalesia, e i te faataa ê ia’na i te feia o te Atua, e ia vaiiho i te mana o ta te Fatu i faati’a i roto i ta’na Ekalesia. Teie te mau taata omumu noa [taa ê i roto i te mau mana’o] i roto i to ratou mau feruriraa, te farii i te faaûrûraa no ô mai i te Diabolo, e o te hinaaro pinepine i te aratai i te Ekalesia, e ia parahi i roto i te haavaraa i ni’a i te autahu’araa. Te rave’a maitai ae no tatou ia rave, ei mau taata tataitahi, ia ora haehaa noa, ia maitai noa e ia vai faaroo noa i mua i te Atua ia roaa ia tatou to’na Varua ia nehenehe ia tatou ia haava na roto i te ti’a mau, e ia ta’a maitai i te parau mau e te hape, e i te maitai e te ino. ⁸

I te tahi mau taime, e mea mauiui iA hi’o mau melo o te Ekalesia tei faaturahia, e mau taata o tei ta’a papu, ua vaiiho ia ratou ei mau mauihaa na te mau varua faahema. … E au e, e mea fifi na te mau taata ia maramarama i te mau ohipa a te Autahu’araa, to’na mana ti’a, ta’na mau rave’a e to’na puai; e inaha, na roto i te maramarama o te Varua, e mea ohie roa ia ite area râ, aitia ra i maramarama i te reira, ua haavarehia e te mau varua faahema i roto i te ao atoa nei. Ua arataihia ratou ia tiaturi e, te vai nei te hoê mea hape, e i muri mai, te hoê ïa mea o tei haaparare haerehia, e te tiaturiraa ratou e, ua maiti taaêhia ratou no te faaafaro i te reira. Eere hoi i te mea maitai no te hoê taata ia arataihia i roto i teie ohipa fifi; inaha hoi, ia papu i te Feia Mo’a i te Mau Mahana Hopea Nei e, a ora viivii ore ai te mau tavini o te Atua, e te faatura nei i te Autahu’araa i tuuhia i ni’a iho ia ratou, e te hinaaroraa ia rave na roto i te paari o to ratou ite, ia faahanahana i to ratou mau toroa e to ratou mau piiraa, mai ia ratou hoi o tei maitihia na roto i te reo o te mau taata e te autahuaraa, e ia haamanahia na roto i te faatiaraa a te Atua, mai te mea e te vai ra te mea o ta te Fatu e hinaaro nei i te faaite i te mau tamarii a te taata, e aore râ, te tahi mau haamaramaramaraa no te faaite i ta’na Ekalesia, e na reira oia na roto i te ravea o te autahuaraa i faataahia; eita roa oia e na rapae i te reira, mai te mea e, e vai noa mai â te Ekalesia a Iesu Mesia i te Feia Mo’a i te Mau Mahana Hopea Nei i ni’a i te ao nei.

Eere roa’tu i te ohipa na te hoê taata ia ti’a mai ei heheu parau, ei peropheta, ei hi’o, mai te hoê taata i faaûrûhia, no te horo’a i te heheuraa ei aratai i te Ekalesia, e aore râ, ia faatere no te mau hui mana faatere o te Ekalesia i te mau vahi atoa o te ao nei, e iti roa i rotopu ia Ziona, tei reira te mau faanahonahoraa maitai roa o te autahu’araa, i reira hoi e hope roa ai te mau mea atoa, e tae noa’tu hoi i te faanahonahoraa o te hoê amaa.⁹

I roto i te mau ohipa no te pae oraraa nei e no te pae varua, e nehenehe i te Feia Mo’a ia farii i te aratairaa no o mai i te Atua ra e te heheuraa no ratou iho, area râ, eita te reira mana e tano no te faatere ia vetahi ê, e eita atoa e fariihia mai te mea e faahapa i te mau fafauraa o te Ekalesia, te parau haapiiraa e aore râ, te faatitiaifaroraa, e aore râ, ia ite i te mau ohipa i tupu na, te faaiteraa i te parau mau, e aore râ, i te mana’o tahoê maitai. Aita to te taata e tiamâraa no te ume i to’na mau taeae melo no te Ekalesia ia faaô i roto i teie mau manao noaraa e aore râ, i te haaputuraa i te mau opuaraa rau te huru o te faahemaraa te titau i te heheuraa no o mai i te Atua ra e aore râ, te orama e aore râ, te moemoeâ, oia hoi mai te mea eere i te reo o te mana i itehia, to te fenua iho e aore râ, no te taatoaraa. Ua riro te Ekalesia a te Fatu “ei fare haapaoraa” [PH&PF 132:8]. Aita te reira i faaterehia e te mau horoaraa a te hoê taata e aore râ, te mau fâraa mai, maoti râ, na roto i te tura e te puai o te Autahuaraa Mo’a tei paturuhia e te reo e te maitiraa a te Ekalesia i roto i te mau amuiraa i haamauhia.¹⁰

E tahoê te varua o te heheuraa i te utuafare o te mau taata atoa i roto i te basileia o te Atua.

Ua parau mai te Fatu ia tatou i roto i te hoê heheuraa na roto i te Peropheta Iosepha Semita, mai te mea aita tatou e riro ei hoê râ, e ere hoi tatou No’na [a hi’o PH&PF 38:27]. Ua parau Oia e mea tia ia tahoê tatou. E mea ti’a ia tatou ia hoê.¹¹

Mai te mea e ohipa tatou i raro ae i te faaûrûraa [a te Varua] e e pee tamau hoi i ta’na parau, e riro tatou ei hoê, e te manianiaraa, te aroraa e te haapaoraa ia’na anae, e vaiihohia ia i te hiti, e e haapao tatou e ia itoito hoi no to tatou mau hoa tei ora tapiri mai e no to tatou iho maitai. Area râ, te ite noa ra â tatou i rotopu ia tatou ta tatou mau mâroraa, te mau taa-ê-raa i roto i te feruriraa e te mana’o, te tahi tei ni’a roa e te tahi ra, tei raro roa ia, hoê mea tei hi’ohia i roto i te hoê maramarama taa ê na te tahi mau taata taa ê, e te vai atura â. No te aha te reira? No te mea ua haaputuputu te Evanelia i te mau taata atoa, e no te mea e mau tamarii anae tatou i roto i te hoê fare haapiiraa; no te mea ua tamau mai tatou i te mau reta matamua, mai tei vai na i roto i te i te faanahoraa rahi o te Evanelia, e no te reira area râ, aita i maitai roa. Teie te hoê mea i faatupu i te taa-ê-raa i roto i to tatou mau mana’o e to tatou mau feruriraa oia hoi, to te tahi e rave rahi mau iteraa rau e ua ta’a maitai i te parau mau i te tahi pueraa. Area râ, e haapapuraa anei teie e, aita teie mau parau tumu e vaira i roto i te Evanelia o ta tatou i farii o te ti’a ia tahoê i te mau taata atoa i roto i te parau mau? Aita, aita roa. Eaha teie mau parau tumu rahi o tei numerahia no te tahoê i te utuafare taata, e ia faaue ia ratou ia haamori i taua Atua ra, ia faaô atu i roto i taua a’o râ, e ia faaterehia e taua reo râ? Oia te parau tumu o te heheuraa, te puai o te Atua i heheuhia i To’na mau taata, te ti’aturi i roto i te aau o te mau taata e, o te Atua anae te ti’a ia faatere e ia horo’a e, e ore e ti’a i te hoê noae taata ia parau e, teie te e’a; e eita atoa e ti’a ia titau i te mau taata ia haapao matapô noa i te mau parau tumu—ma te ite ore.¹²

A vaiiho i te Feia Mo’a ia tahoê; a vaiiho ia ratou ia faaroo i te mau reo o te mau tavini o te Atua ia parau mai ia ratou; a vaiiho ia ratou ia faaroo i ta ratou mau a’o e ia haapao i te parau mau.¹³

A imi i te aupururaa e te tahoêraa a te Varua Maitai. A vaiiho i teie varua ia homumu e ia here ma te haapao maitai i roto noa i te hoê amuiraa utuafare na’ina’i e te haehaa oia atoa i roto i te meloraa o te faanahonahoraa teitei e to te pûpû autahu’araa. A tu’u ia tomo i roto i te aau o te mau taeae e te mau tuahine, te mau metua e te mau tamarii o te utuafare, oia atoa i roto i te aau o te Peresideniraa Matamua e te Tino Ahuru Ma Piti. A tu’u ia navenave e ia tamaru i te mau marôraa i rotopu i te mau melo o te mau Peresideniraa Tĭtĭ e te Mau Apooraa Teitei, oia atoa i rotopu i te mau hoa tapiri mai o te ora nei i roto hoê â paroita. A vaiiho ia tahoê i te feia apî e te feia paari, te tane e te vahine, te nănă e te tia’i nănă, te mau taata e te Autahu’ araa i roto i te mau taumuraa o te mauruuru e te faaoreraa hapa e te here, ia nehenehe Iseraela ia fariihia e te Fatu, e ia haere mai tatou paatoa i mua Ia’na ma te mana’o ore i te faaino atu i te taata atoa nei. I reira, aita ïa e faataiaraa no te mau haamaitairaa i fafauhia ia ratou o te haamori haavare ore nei Ia’na. E horo’ahia te mau paraparauraa maru monamona a te Varua Maitai ia ratou e te mau tao’a rahi o te Ra’i, te faaiteraa a te mau melahi, e horo’ahia mai ïa i terâ taime e terâ taime, no Ta’na fafauraa tei reva na mua roa e eita roa e iri!¹⁴

Mana’o Tauturu i te Haapiiraa

Eaha te heheuraa? Eaha te auraa ia parau anaehia e, ua riro te heheuraa ei “parau tumu ora e te puai”?
Eaha te tupu i te Ekalesia mai te mea e, aita e heheuraa papu e tamau?
Eaha te auraa ia tatou e, aita â i î te mau buka o tei faataahia ei papa’iraa mo’a? Nahea tatou ia faaineine i to tatou aau no te fariiraa i te heheuraa o te tae mai na roto i te mau rave’a i faataahia o te autahu’araa?
No te aha e mea faufaa te heheuraa tamau i te anotau o te mau peropheta mai a Noa e Mose? Eaha te mau haamaitairaa no te hoê peropheta ora i teie mahana? Mea nahea to te peropheta tautururaa ia tatou ia pahono i te mau titauraa o to tatou nei anotau?
No te aha e mea ti’a i te heheuraa no te Ekalesia ia tae mai na roto i te mau rave’a i faataahia o te autahu’araa? Noa’tu e, e “nehenehe ia farii i te aratairaa Huru Atuaraa e te heheuraa no ratou iho, no te aha aita e mana to te reira ia aratai ia vetahi ê? (A hi’o atoa PHPF 42:11).
I te tahi mau taime, i roto i te hea mau vahi te mau melo o te Ekalesia i au ore ai i roto i to ratou maramaramaraa i te mana o te autahu’araa? Nahea te mau melo e nehenehe ai ïa tinai i teie au ore?
Nahea te mau melo o te Ekalesia i roto i te ao nei ia tahoêhia ia riro ei hoê i roto i te tumu e te parau mau? Mea nahea te faaûrûraa o te Varua Maitai ia tauturu ia tatou ia tahoê mau hia? No te aha e mea faufaa ia riro tatou ei hoê? (A hi’o atoa PH&PF 38:27).

Swiss German Mission — Te Peresideni Iosepha F. Semita e te mau misionare e te mau melo o te Misioni o Suete Heremani, avae Atete 1910. Ua a’o te Peresideni Smith i te Feia Mo’a ia tahoê, e ia “haapao i te reo o te mau tavini a te Atua ia parau mai ia ratou. (*Gospel Doctrine,* api 261).