Te Tau Faatereraa a Joseph F. Smith
O Joseph F. Smith te onoraa o te Peresideni o te Ekalesia e te Peresideni hopea atoa o tei ite mata roa i te Peropheta Iosepha Semita. “Ua hope to’u tau tamariiraa i te hahaere noa na muri i te mau taata no te Atua, e te otoraa a oto ai ratou ra, e i te oaoaraa a oaoa ai hoi ratou. Ua hope to’u pue mahana i te faaauhia i ni’a i teie mau taata,” te na reira ra oia. 1 Ua titau maite oia ia ite i te Atua te Metua e i Ta’na Tamaiti, o Iesu Mesia, e ia tavini ia raua ma to’na varua atoa. E maramarama rahi to’na i te parau no te evanelia, e no reira, ua ti’a ia’na ia aratai i to’na mau taata i roto i te mau parau tumu o te parau mau mure ore, e ua ti’a hoi ia’na ia faaetaeta i te Ekalesia i roto i te mau aroraa a te enemi, i roto i te mau matahiti matamua o te 20 o te tenetere. Ua titau oia ia riro ei “taata faatupu i te parau hau, ei taata parau i te parau ti’a,”2 e ua haapii oia ma te puai i te parau no te haapa’o, ma te faaite papu na roto i to’na iho iteraa e, “te feia atoa o te haapa’o i te reo o te Varua … e roaa ia ratou te hoê iteraa i te parau mau a te Atua, e iteraa maramarama, e iteraa aano e te afaro e te papu, hau atu i te iteraa e roaa i te tahi atu taata.”3
Te hoê tau tamariiraa tei faaamuhia i te faaroo
Ua fanauhia te tamarii matamua a Mary Fielding raua o Hyrum Smith, o Joseph F. Smith, i te 13 no Novema 1838 i Far West, Caldwell County, Missouri, i roto i te hoê tau no te hamani inoraa rahi e te veve. E piti hepetoma na mua a’e i te reira, ua haruhia to’na metua tane na te hoê pùpù taata iino e ua tapeahia i te fare auri ma te hara ore. Ua opanihia ia Hyrum Smith, e to’na taeae te Peropheta Iosepha Semita, e i te tahi atu mau taata to ratou, ia farii i te hoê mea i roto i te Fare Tapearaa no Liberty, i roto i te maororaa e maha ava’e. Ua feruri o Mary e, ua faaateaê-hia’tu ta’na tane ia’na ma te riaria rahi “i te taime mau a hinaaro ai au … i te aupururaa e te haapa’oraa maitai a te hoê hoa; e ere râ i te reira; ua riro mai râ te aupururaa i te hoê utuafare rahi ei hopoia mana’o-ore-hia na’u i reira ra.” E melo faafariuhia oia i roto i te Ekalesia no te fenua Canada mai, e ua faaipoipohia oia ia Hyrum Smith i muri a’e i te poheraa o ta’na [ta Hyrum] vahine matamua, o Jerusha, e na’na [na Mary] e haapa’o ra i na tamarii e pae a Smith i te taime “a fanauhia mai ai ta’u Joseph F. iti.”4
I te taime a tiahihia ai te Feia Mo’a i rapae i Missouri i te tau toetoe no te matahiti 1838–39, e aiu noa â ïa o Joseph F. i te reira taime. Tei roto noa â to’na metua tane i te fare tapearaa, e e ma’i rahi hoi to to’na metua vahine, “e ua titauhia ia afai ia’na [to’na metua vahine] i te atearaa e 320 kilometera, i ni’a noa i to’na ro’i.”5 Na te tuahine teina o Mary, oia hoi, o Mercy Fielding Thompson, i faaamu e i haapa’o ia Joseph F. e ta’na iho atoa tamahine iti. I Illinois te Feia Mo’a i te faaearaa, e i Nauvoo to Joseph F. faaearaa no te rahiraa te taime o na matahiti matamua e va’u o to’na oraraa; o Nauvoo, te oire i patuhia e te Feia Mo’a i te hiti o te pape rahi o Mississipi River. I roto i te utuafare Smith e i rotopu hoi i te Feia Mo’a, ua ora oia i roto i te ite i te evanelia a Iesu Mesia. “Ua haapiihia vau ia ti’aturi i te misioni hanahana a Iesu Mesia,” ta’na ïa i faahaamana’o mai i muri a’e ra. “Ua haapii to’u metua tane ia’u i te reira, na reira atoa te Peropheta Iosepha Semita, na roto i to’u metua vahine … e ua hope to’u pue tau tamariiraa e ua hope atoa to’u pue mahana i te ao nei to’u tapearaa i taua ti’aturiraa ra.”6
Na te metua tane o Joseph F., o Hairamu, i tauturu i te Peropheta Iosepha ia faahaere i mua te ohipa no te Faahoiraa, mai te taime a faanahonahohia ai te Ekalesia, e na mua roa’toa’tu â, i te taime a iriti ai o Iosepha i te Buka a Moromona. Ua turu’i papu te Peropheta i ni’a i to’na taeae tuaana o Hairamu, i Nauvoo ihoa râ, inaha, i reira to Hairamu piiraahia, na roto i te heheuraa, ei Patereareha no te Ekalesia, e ei Tauturu Peresideni. Te parau ra te Peropheta e, tei roto ia Hairamu “te marû o te mamoe, e te parau-ti’a o Ioba, e no te haapotoraa, te haapa’o e te haehaa o te Mesia.”7
Mai to’na atoa ra metua tane, ua tupu i roto ia Joseph F. te here e te faatura rahi i te Peropheta Iosepha Semita. I te mau matahiti i muri mai, ua faaite pinepine oia i te tahi mau mea tei tupu i roto i to’na tau tamariiraa no ni’a i to’na pa’ino e ua faaite papu tamau oia i to’na piiraa Peropheta no te Faahoiraa: “Ua î oia i te oaoa; ua î oia i te maitai; ua î oia i te here. … E nehenehe ta’na e hauti e te mau tamarii, e e mea au atoa hoi na’na ia hauti e te mau taata i te mau hauti ohie e te peapea ore, tera râ, ua paraparau atoa oia i te Metua e i te Tamaiti e ua paraparau oia i te mau melahi, e ua fâ mai ratou ia’na, e ua horo’a mai ia’na i te mau haamaitairaa e te mau horo’a e te mau taviri no te mana.”8
Aita â to Joseph F. matahiti i ti’a roa i te ono i horo’a ai to’na pa’ino o Iosepha e to’na metua tane, o Hairamu, i to raua ora no te basileia o te Atua. Ua taparahi-pohe-hia raua i te 27 no Tiunu 1844 na te hoê pùpù taata iino. Ua riro o Nauvoo ei faahaamana’oraa tamau na’na “i te mau mea mo’a no muta’a iho ra, e ua rahi roa’tu te haamana’oraa e te Aroha atoa e te oto hoi i te mea e, tei reira te vahi hunaraa Mo’a o te tino o to’u Metua Tane, e i reira atoa hoi te tupuraa te mau Ohipa Riaria, (te haamana’o Maitai ra vau i taua mau ohipa riaria ra) o tei hopoi mai i te Oto e te ino i roto i te ao parau- ti’a, e tei faatupu hoi i te oto i roto i te Aau o na 10 tauasini taata!”9
I muri a’e i te poheraa o Hairamu, ua haa amui o Mary raua o to’na tuahine, o Mercy, inaha, e vahine ivi atoa oia, no te atuatu i te hoê utuafare rahi e no te faaineine ia ratou no te amui atu i te Feia Mo’a i roto i to ratou tere i te pae to’oa o te râ . Te haamana’o ra o Joseph F. Smith i te tapu- potoraa-hia to ratou faaineineraa i te tau haapoheraa raau (autonne) no te matahiti 1846, i te taime a faahepo ai te mau pùpù taata iino ia ratou ia haere “i roto i te hoê poti no te tere atu na ni’a i te pape rahi no Mississipi haere ti’a atu i Iowa, i reira to matou puhaparaa i raro a’e i te mau tumu raau, e a faaroo noa ai i te tupitaraahia te oire. Ua faarue matou i to matou fare maitai e te mau tauhaa atoa i roto, e ta matou mau tao’a atoa, ma te ti’aturi e aore râ,, ma te feruri e, eita roa matou e ite faahou i te reira.”10 Area râ, ua parau tamau noa to’na metua vahine i ta’na mau tamarii, “Na te Fatu e iriti i te e’a,”11 e na te puai o to’na ti’aturiraa i faaora i to ratou iho faaroo. Te parau ra te Peresideni Smith e, “E ere matou i te mea atea roa a faaroo noa ai matou i te tupitaraa e tupu ra i tera pae i ô mai i te pape rahi tera râ, ua ite papu vau i roto i to’u aau i taua taime ra e—mai te ite o te hoê tamarii—aita e peapea, na te Fatu i aratai ia matou, e o te reira â to’u iteraa i teie mahana.”12
A ratere ai o Joseph F. Smith i te pae to’oa o te râ e to’na utuafare, ua hi’opoa maite oia i to’na metua vahine i te arairaa i te mau fifi na roto i te faaroo. I te hoê taime, ua parau to ratou raatira pùpù e, e riro te mau vahine ivi ei hopoia teimaha no te pùpù taatoa, ua faaite atu oia [te metua vahine] ia’na e, e amo oia i ta’na iho hopoia, e na’na iho e hapao ia’na, e e na mua oia ia’na i te tapae i Roto Miti. E ua tapae ihoa oia na mua! O Joseph F. te taata haapa’o i te mau animala a te utuafare, e ua ite maitai oia i te faufaa o te nana a te utuafare, e no reira, eita roa e mo’ehia ia’na i te hoê taime, a itehia mai ai i to’na metua vahine, na roto i te pure u’ana, na puatoro e piti tei mo’e ra. I muri a’e ra, te haamana’o ra oia, i te mau puatoro tei tarava i ni’a i te vari i raro a’e i te tugo mai te huru ra e, ua faataerohia ratou, ua pure oia [to’na metua vahine] ia nehenehe ia ratou ia ti’a i ni’a e ia haere i mua, e “ma te maere rahi o te mau taata atoa o tei ite,” ua “ti’a ratou i ni’a e ua tere matou.”13
Na Joseph F. i aratai i na puatoro a te utuafare a tomo atu ai ratou i roto i te faa no Roto Miti i te 23 no Setepa 1848. E iva to’na matahiti i taua taime ra. Ua faatia te utuafare Smith i to ratou faaearaa i ni’a i te mau fenua i te pae apatoa o te oire no Roto Miti i Millcreek, e i reira, ua rave o Joseph F., mai ta’na e haamana’o ra, i te ohipa faahoro pereoo puaahorofenua, haapa’o nana animala, haapa’o arote, taata faatahe pape, taata ooti ma te faaohipa i te tipi fefe e aore râ, te tahi tao’a no te haaparahu i te huero tei ootihia, e taata haaputu raau, taata tutu huero, taata tama huero … [e] te taata ohipa rahi a’e.”14 Ua ora te utuafare i roto i te hoê fare nainai noa tera râ, te parau ra te Peresideni Smith i muri a’e e, “Aita to matou oraraa i ino roa’tu i to te mau tauasini taata, e e ere atoa i te mea ino roa mai to te tahi pueraa.”15 Ua haapii oia ia rave itoito i te ohipa e ia haapa’o i ta’na hopoia, ia ora haihai noa, ia haamaitai i te Atua, e ia aufau i te tufaa ahuru i ni’a i te mau mea atoa e roaa mai i te utuafare.
Ua faaherehere maite o Joseph F. Smith i te ohipa e te tusia a to’na metua vahine, na reira to’na here e to’na faaroo aita e faaauraa. Ua fifi roa oia i te poheraa to’na metua vahine i roto i te 51raa o to’na matahiti, i muri a’e e piti ava’e i te vairaa i roto i te ma’i. I te hoê taime, ua papai atu oia i te hoê hoa to’na no te tau tamariiraa, “I muri a’e i te poheraa o to’u metua vahine, ua vai au i roto i te hoê tau fifi rahi, 18 ava’e te maoro, mai te 21 no Setepa 1852, e tae roa’tu i te ava’e Eperera 1854.” “Fatata vau mai te hoê feti’a ave [comète]e aore râ, mai te hoê ofai auahi pee haere noa, aita e taamuraa no te tapea e aore râ, no te aratai ia’u i roto i te mau otia e au.” Te haamana’o ra oia e, i te 13 o to’na matahiti, “aita to’na e Papa aita hoi e mama faahou,” aita râ oia “i ere roa i te hoa.”16 Te vaira to’na “ma’ino vahine o Mercy R. Thompson o ta’na i here roa e o ta’na e haamana’o tamau noa”17 o tei tamau noa i te haapa’o ia’na, e eita roa e mo’ehia ia’na te maitai rahi o Brigham Young, o Heber C. Kimball, e o George A. Smith, te taeae [cousin] o to’na metua tane. Te parau ra o Joseph F. e, e mau taata teie “o ta’u i haapii i te here ia ratou mai ta’u i here i to’u metua tane, no to ratou parau ti’a e to ratou here i te parau mau.”18
Ua piihia ia tavini i te fenua Hawaii [Vaihi]
I te amuiraa rahi no te ava’e Eperera 1854, a faaara ai te Peresideniraa Matamua e, ua piihia o Joseph F. no te haere atu na muri i te hoê pùpù misionare o te faaineine ra e reva, ua faaohipa oia i te faaroo ta’na i atuatu noa na mai to’na tamariiraa mai â, e “ua farii popou oia” i taua piiraa ra. I te hoê taime te parau ra oia ma te mauruuru rahi, “na roto i teie na matahiti e maha to’u raveraa i ta’u misioni i te fenua Vaihi, ua ho’i faahou mai te hau i roto i to’u aau, e ua haamau-papu-hia te mau ture e te mau otia tei riro ei aratai i to’u oraraa mai taua taime ra.”19
Ua tapae atu o Elder Joseph F. Smith i Honolulu i te fenua Vaihi (Hawaii) i te 27 no Setepa 1854, mai te huru ra e, e ono hepetoma na mua a’e i te 16raa o to’na mahana fanauraa. Ua tonohia oia i Maui, e aita i maoro ua toe noa tura oia ana’e i Kula ia ora i rotopu i te mau taata i reira e ua haapii oia i to ratou reo e ta ratou mau peu tumu. Ua titau onoono teie elder apî “i te horo’a no te parau i te reo èê,” ta’na ïa e haamana’o ra, “e na roto i teie horo’a e na roto atoa i te haapii maiteraa, hanere mahana i muri a’e i to’u tapaeraa’tu i taua mau fenua ra, ua ti’a ia’u ia paraparau i te taata i roto i to ratou reo mai ta’u e paraparau atu nei ia outou i roto i to’u reo tumu i teie taime.”20 No to’na papu i te reo, ua ti’a ia’na ia rave i te ohipa i rotopu i te nunaa taata Vaihi.
Noa’tu to’na apî, ua piihia o Elder Smith ia faatere i te ohipa i Maui, e ia tae oia i Hilo, ua faatere i te ohipa i Hawaii, e i muri a’e ra, ua faatere atoa i te ohipa i Molokai. I Molokai, a tupuhia ai oia i te hoê fiva rahi, e a vai ai oia i roto i te ma’i rahi e toru ava’e te maoro, te vaira te hoê tuahine maitai roa, o Ma Mahuhii, na’na i haapa’o maitai ia’na mai te huru e, e tamaiti na’na iho. Aita oia e mo’ehia i taua tuahine ra, e aita taua tuahine ra e mo’ehia ia’na, e i te mau matahiti i muri mai, e oaoa rahi to raua ia farerei raua. Ua riro “te maitai o te mau taata faahiahia no Hawaii i ni’a ia’u”21 ei haamana’oraa faufaa na’na.
Ua faarue atu o Elder Joseph F. Smith i Hawaii i te ava’e Atopa 1857 e ua farii i te mau hopoia rarahi ta te Peresideni Brigham Young i horo’a ia’na. Ua rave oia i te hoê misioni i te fenua Peretane (1860–63) e te piti o te misioni i Hawaii (1864). I muri a’e i to’na hoiraa mai i Roto Miti i te matahiti 1864, ua rave oia i te ohipa i roto i te Piha Toro’a Aamu o te Ekalesia, i raro a’e i te aratairaa a Elder George A. Smith no te Pùpù no te Tino Ahuru Ma Piti.
Te Ohipa i roto i te Pùpù no teTino Ahuru Ma piti e i roto i te Peresideniraa Matamua.
E i te matahiti 1866, na roto i te faaueraa a te Peresideni Young, ua faatoro’ahia o Joseph F. Smith, 28 matahiti te paari, ei Aposetolo e ua piihia ei Tauturu i roto i te Peresideniraa Matamua. Ua faatura oia i te Peresideni Young mai te taata “tei haapa’ohia e tei paturuhia e te mana o te Atua Manahope no te faahaere i mua i te misioni a [te Peropheta] Iosepha, e no te faatupu i te ohipa o ta’na i haamau a ora ai oia ra.”22 Ua hinaaro o Joseph F. Smith, ma to’na varua atoa, ia tauturu i te faahaereraa i taua “ohipa rahi ra e te hanahana hoi”23 i mua. Ua haapii oia e, “Ua farii outou i te evanelia no outou iho, no reira, a haere ana’e e a rave i ta outou ohipa taatoa, eiaha te afaraa ana’e e aore râ, te tahi noa tuhaa, te taatoaraa râ.”24 Teie te ravea no te faahaere i mua i “te maitai o Ziona e te faatiaraa ia’na i te fenua nei.”25 Taa’e noa’tu te tahi mau hopoia ta’na i roto i to’na tiaraa ei melo no te Pùpù no te Tino Ahuru Ma Piti, e piti taime to’na taviniraa ei peresideni no te Misioni no Europa (1874–75; 1877).
Noa’tu te iti o te matahiti to Joseph F. Smith haereraa i te haapiiraa, te vaira râ to’na ite rahi i te mau parau o to’na reo, e ua haapii atoa oia ia parau ma te mana e te marû. I te 24 no Tiunu 1866, ua a’o oia i roto i te Fare Menemene no Roto Miti e, mai tei papaihia e Elder Wilford Woodruff, no te Pùpù no te Tino Ahuru Ma Piti, “ua a’o oia i te pae avatea 1 hora e 15 minuti e tei ni’a ia’na te mana o te Atua, e ua iteahia i ni’a ia’na taua varua ra i iteahia i ni’a i to’na Pa’ino o Joseph F. Smith te Peropheta e i ni’a i to’na Metua Tane o Hyrum Smith.”26 Ua riro mai o Elder Joseph F. Smith ei taata tuiroo no te faahiahia e no te puai o ta’na mau a’oraa; ua hinaaro oia ia haapii na roto i te faaurûraa a te Varua Maitai “ia nehenehe i te feia e faaroo mai ia maramarama.”27 Ua haapii oia e, e ere “tei te nehenehe te parau, ia apee râ te varua i te taata a’o, i reira te ora e te maramarama e ô ai i roto i te varua taata.”28 I te hoê taime ua papai atu oia i te hoê tamaiti misionare ta’na, “Ua tamata noa vau ia faaite i te mau taata e faaroo mai ia’u e, o vau nei e tae noa’tu i to’u mau hoa, e mau taata faatupu i te hau ana’e matou, e feia here i te hau e e feia maitai, e ta matou misioni, o te faaoraraa ïa, eiaha râ te haamou, te paturaa, eiaha te vavahi.”29
Mai te poheraa te Peresideni Brigham Young i te matahiti 1877 e tae roa’tu i te taime a paturuhia ai o Joseph F. Smith ei Peresideni no te Ekalesia i te matahiti 1901, ua rave tamau noa oia i te ohipa no te faaara i te ora e te maramarama i roto i te varua o te Feia Mo’a e no te faatupu i te hau e te mana’o maitai. I roto i te roaraa o na matahiti e 24, ua tavini tataitahi o John Taylor, o Wilford Woodruff, e o Lorenzo Snow ei Peresideni no te Ekalesia, e ua piihia o Joseph F. Smith ei Tauturu i roto i te Peresideniraa Matamua tataitahi. I te hoê taime, aita te taata i maramarama maitai i te mau ti’aturiraa e te mau peu a te Feia Mo’a i te mau Mahana Hopea Nei, e i roto i te mau matahiti 1880, ua haere maira te mau enemi e aro i te Ekalesia e i to’na mau melo. Ua hamaramarama mai te Peresideni Smith e, “Aita ratou e hinaaro ia riro tatou ei mau taata taa’e atu i te mau taata o te ao nei, i te huru pae faaroo anei e aore râ, i te tahi atu huru anei. Te hinaaro nei râ ratou ia riro tatou mai te mau taata atoa o te ao nei, ia riro mai ia ratou te huru, e na roto i te reira, e ruri ê ratou i te mau opuaraa a te Atua.”30
Noa’tu râ te reira, ua taparu maite te Peresideni Smith i te mau melo o te Ekalesia ia here e ia faaore i te hapa a to ratou ra mau enemi. Ua haapii oia e, “Ia haamo’e tatou i te opuaraa o to tatou piiraa, e ia haapa’o ore tatou i ta tatou ohipa no te faaino i tei faaino mai ia tatou, no te faahoi te ino i te ino, no te hamani ino i te mea e, ua hamani-ino-hia tatou, te mo’ehia ra ïa ia tatou te mau titauraa a te Fatu e te mau fafauraa ta tatou i fafau i te Atua ia haapa’o i Ta’na mau faaueraa.”31 I te Feia Mo’a i paruparu ra, ua faahaamana’o oia ia ratou i te fafauraa a te Atua e, te haerea o te Ekalesia, “te tere nei te reira i mua, e te haere nei i te rahiraa e tae roa’tu i te taime e hope roa ai te mau opuaraa a te Atua no ni’a i teie ohipa rahi no te mahana hopea nei.”32
E mea fatata roa o Joseph F. Smith i te feia ta’na i tavini. “Ia farii ana’e au i te ti’aturiraa e te here o to’u mau taeae e to’u mau tuahine ta’u i here, e puta roa te reira i roto i to’u mafatu,” te na reira ra oia.33 I roto i to’na mau auraa e te mau taata, e mea faufaa a’e na’na to’na mau taamuraa i ni’a i to’na utuafare here. I roto i to’na feruriraa, ua riro te tiaraa tane faaipoipo e te tiaraa metua tane ei na piiraa teitei a’e. Mea au na’na ia parahi i te fare, ia haapii i ta’na mau tamarii, ia faatia ia ratou i te aamu, ia himene, ia hauti e ia ata’ata ratou. Ia reva ana’e oia no ta’na mau ohipa, e mana’ona’o noa oia ia ratou. I Hawaii, i te 1 no Eperera 1885, ua papai oia i roto i ta’na buka aamu: “Te pupuhi nei te matai na te pae hitia o te râ mai, e ahiri e, tei roto i te hoê tau to’eto’e a’e, e mea to’eto’e roa ïa e te fifi hoi. Te pupuhi atoa ra anei te matai ma te marû e aore râ, ma te fifi i ni’a i tei herehia e au? Te mahanahana ra anei ratou e aore râ, te to’eto’e ra?…Te poia ra anei ratou e aore râ, ua tamaa anei? Tei rotopu anei ratou i te mau hoa e aore râ, tei rotopu i te enemi, te oto ra anei e aore râ, te parahi ra i roto i te hau? E ia outou na te hau!”34 Te haamana’o ra ta’na tamaiti o Joseph Fielding Smith i te mau taime faufaa rahi a parahi ai oia i pihai iho i to’na metua tane “e i te aparauraa i te mau parau tumu o te evanelia e i te fariiraa i te haapiiraa mai ta’na ana’e e nehenehe e horo’a. Mai tera ïa te huru no te haamau-raa-hia te niu o to’u ite i te parau mau, a nehenehe atoa ai ia’u ia parau e, ua ite au e, te ora nei to’u Faaora, e e peropheta o Joseph F. Smith na te Atua ora i muta’a iho ra, i teie mahana e amuri noa’tu.”35
Ua hi’opoa tamau maite noa oia i te mau mea atoa e hinaarohia e to’na utuafare no te pae tino e no te pae varua hoi, e ua imi oia i te ravea ia itehia oia i te fare, noa’tu e tei te fare iho oia e aore râ, aita. Na roto i te mau nota, te mau rata, e te mau pehepehe, ua faaite oia i to’na here tamau i to’na utuafare. I te 39raa o te mahana fanauraa o ta’na vahine ua papai oia e, “E to’u Hoa here e, ua maitai atu to’u mana’o no ni’a ia oe, ua rahi atu to oe faufaaraa, ua hau atu to oe fatataraa ia’u i teie nei, e ua rahi atu to’u here ia oe i teie mahana i to’u here ia oe … a piti ahuru a’e nei matahiti. Ua riro te mau hora, te mau hepetoma, te mau ava’e e te mau matahiti tataitahi ei haapaariraa i te taamuraa o to taua taatiraa, e na te tamarii tataitahi i haapaari roa i te reira i te taatiraa mure ore.”36
E here rahi to te Peresideni Smith i te hiero e to’na mau oro’a, inaha, na te reira e faatupu i te taatiraa mure ore o te mau utuafare. “A taa’tu ai te Feia Mo’a i te Mau Mahana Hopea Nei, o vai te ti’a ia feruri e, i ô mai i te pohe, e tamau noa â tatou i te ora i roto i te faanahonahoraa o te utuafare?”37 I te 6 no Eperera 1853, i te 14raa o to’na matahiti, ua ite oia i te tu’u-raa-hia te ofai tihi no te Hiero no Roto Miti, e i te 6 no Eperera 1892, i te 53raa o to’na matahiti, na’na i horo’a i te pure no te tapoiraa i te ofai tihi o te hiero.38 I te matahiti i muri iho, i te 6 no Eperera 1893, ua haamaitai te Peresideni Wilford Woodruff i taua fare nehenehe ra, oia te maha o te hiero i Utaha. I roto i ta’na a’oraa i roto i te mau oro’a haamaitairaa o te hiero, ua parau te Peresideni Smith e, “Teie te ono o te hiero [ia tai’o atoahia te Hiero no Keterani e no Nauvoo], e ere râ teie i te hiero hopea.”39 I te tau o oia te Peresideni no te Ekalesia, ua haamaitai oia i te tiaraa no te hiero i Cardston, Canada (27 no Tiurai 1913) e no te hiero i Laie, Hawaii (1 no Tiunu 1915).
To’na Tau ei Peresideni no te Ekalesia.
I te 17 no Atopa 1901, hoê hepetoma i muri a’e i te poheraa o te Peresideni Lorenzo Snow, ua faatoro’a e ua faataa te Pùpù Tino Ahuru Ma Piti Aposetolo ia Joseph F. Smith te onoraa o te Peresideni o te Ekalesia a Iesu Mesia i te Feia Mo’a i te Mau Mahana Hopea Nei. E ua tavini oia ei Peresideni no te roaraa 17 matahiti, mai te matahiti 1901 e tae atu i te matahiti 1918. I roto i ta’na a’oraa matamua i te Feia Mo’a, i roto i to’na ti’araa Peresideni no te Ekalesia, ua parau oia e: “E haamaitaihia tatou ia haafatata roa’tu tatou i te Fatu, mai te mea e, e na reira ihoa tatou, hau atu i ta tatou i mataro noa na, ia ti’a ia tatou ia farii i te horo’araa rahi atu o To’na Varua, hau atu i ta tatou i farii noa na, ia ti’a ia tatou ia vitiviti atu te haereraa i mua, ia oioi atu to tatou tupuraa i roto i te ite i te parau mau, e ia etaeta atu â to tatou ti’araa i roto i te faaroo. Area râ, no te tupuraa o teie mau mea atoa, tei te huru ïa o te tupuraa i te rahi o te faaroo o te taata.”40 To’na mau tere farerei tino roa i te Feia Mo’a, ta’na mau tautooraa no te haapuai i te aupururaa e te haapiiraa i roto i te mau paroisa, ta’na mau pororaa tu’utu’u ore i “te mau parau tumu o te parau mau mure ore,” e mau rave’a ana’e te reira no te faateitei roa’tu “i te parau ti’a, te viivii ore e te mo’a i roto i te aau o te taata nei.”41 Ua ite oia e, te feia parau ti’a ana’e e te viivii ore e te mo’a o te ti’a ia tauturu i te Faaora ia faatupu “i te haamo’araa o te fenua nei e i te faaoraraa o te taata nei.”42
Ua fatata te rahiraa melo i roto i te Ekalesia i te tata’i piti i roto i te tau faatereraa a te Peresideni Smith, mai te 278.645 i te matahiti 1901 haere atu i te 495.962 i te matahiti 1918. Noa’tu e tei te pae to’oa o te râ o te fenua Marite te oraraa o te rahiraa o te mau melo, ua tupu te mana’o i roto i te Peresideni Smith ia haamau i te hoê farereiraa papu i te mau melo i roto i te mau nunaa e rave rahi. Ua tere atu oia i Europa i te matahiti 1906, te matamua teie o te Peresideni o te Ekalesia tei na reira i roto i te reira ti’araa, e ua hoi faahou atu i reira i te matahiti 1910, e ua tere atoa’tu oia e farerei i te Feia Mo’a i te fenua Canada e i te mau fenua Vaihi. Ua a’o oia e to’na atoa na Tauturu i roto i te Peresideniraa Matamua, i te mau melo ia “haapa’o e ia auraro i ta ratou parau tapu i mua i to ratou faatereraa hau, e ia riro ei mau taata ai’a maitai,”43 e ia “parahi tamau noa i roto i to ratou iho ai’a, e ia haamau i te mau amuiraa e vai tamau.”44 Aita i faaitoito-faahou-hia i te mau melo o te Ekalesia ia haere ti’a’tu i Utaha no te amui atu i te Feia Mo’a i reira.
Ua putuputu atu te u’i matamua o te Feia Mo’a i Ziona ma te faataa’e ia ratou i to te ao nei, ia ti’a ia ratou ia faatupu i te tahoêraa e i te puai i te pae varua. Ua haapapu te Peresideni Smith i te mau u’i no amuri a’e, i te faufaa ia ora ma te hau i rotopu i to te ao nei ma te tapea maite i te faufaa o te tahoêraa e o te puai pae varua, o te roaa hoi te reira mai te au i te haapa’oraa a te autahu’araa e te mau oro’a.
E rave rahi te mau mea i parauhia e i papaihia e te Peresideni Smith no ni’a i te mana faito ore o te autahu’araa e ua tauturu itoito oia i te mau melo atoa ia maramarama i te auraa o te reira. I te taime a paturuhia ai o Joseph F. Smith ei Peresideni no te Ekalesia, te vaira te taa’eraa i roto i tera paroita e tera paroita no ni’a i te faanahonahoraa o te mau pureraa a te mau pùpù autahu’araa, na reira atoa ta ratou mau haapiiraa e te maitai o ta ratou mau ohipa. Tera râ, ua feruri atea te Peresideni Smith i te mahana “i reira te mau apooraa tataitahi o te Autahu’araa i roto i te Ekalesia a Iesu Mesia i te Feia Mo’a i te Mau Mahana Hopea Nei e maramarama ai i ta ratou ohipa; i reira ratou e amo ai i ta ratou hopoia, i reira e faarahi ai i to ratou piiraa, i reira hoi e rave ai i to ratou tiaraa i roto i te Ekalesia.”45 I roto i te amuiraa rahi no te ava’e Eperera 1908, ua faaara te Peresideni Smith e, te faaineinehia ra te tahi mau ohipa apî “ei maitai e ei faahaereraa i mua i te feia e haa ra i roto i te mau pùpù e rave rahi o te Autahu’araa.”46
E mana’ona’o taa’e to’na i te mau pùpù no te Autahu’araa Aarona. Te parau ra oia e, “E mea ti’a ia tatou ia haapa’o i ta tatou mau tamaroa tei faatoro’ahia ei Diakono, ei Haapii e ei Tahu’a i roto i te Ekalesia.”47 Tau matahiti i muri mai, ua haamata te mau episekopo i te horo’a i te mau ohipa papu na te mau tamaroa tei mau i te autahu’raa, e e rave rahi o te reira mau ohipa o tei riro ei mau ohipa tamau na ratou i teie mahana. Na roto i te haamaupapu-raa-hia te mau pureraa autahu’araa i te mau hepetoma atoa o te matahiti, e na roto atoa i to te tomite rahi a te Ekalesia hamaniraa i te mau buka haapiiraa na te mau pùpù autahu’araa, ua riro te reira ei haapaariraa i na pùpù Autahu’araa toopiti atoa, te pùpù Autahu’araa Aarona e te pùpù Autahu’araa Melehizedeka.
Ua faaite te Peresideni Smith i te faufaa rahi no te hahaereraa utuafare. “Aita vau i ite i te hoê ohipa tei hau atu i te mo’a e aore râ, tei hau atu i te faufaa, i te mau ohipa a te mau taea’e hahaere, mai te mea e, e ravehia te reira mai te au i tei titauhia inaha hoi, e haere ratou e farerei i te mau utuafare o te mau taata, e pure ratou e o ratou, e a’o ia ratou ia haapa’o i te viivii ore e te tura, te tahoêraa, te here, e te faaroo e te haapa’o i te parau no Ziona,” te na reira ra oia.48 E no te haapuai atu â i te mau utuafare o te Ekalesia, i te matahiti 1915, ua faaite oia e to’na na Tauturu i roto i te Peresideniraa Matamua, i to te Ekalesia, i te hoê faanahoraa hepetoma no te pô utuafare, ma te faaitoito i te mau metua ia faaohipa i taua taime ra no te haapii i ta ratou mau tamarii i te parau na te Atua.
Ua ite-atoa-hia i roto i teie pue tau te tupu-rahi-raa te mau pùpù tauturu. Ua haamata te mau pùpù no te faatereraa rahi o te Haapiiraa Sabati, o te feia apî tamaroa e te feia apî tamahine, e o te Paraimere, i te hamani i ta ratou mau buka haapiiraa amui. Ua parau te Peresideni Smith e, ua riro ta ratou mau haapiiraa ei aratairaa i te mau melo taurearea “i roto i te mau iteraa rahi a’e, e ia rahi atu hoi to ratou maramarama i te mau parau tumu o te evanelia a Iesu Mesia.”49 No te arairaa i te tupuraa rahi o te taime ohipa ore o te feia apî, ua fariihia ïa te ohipa Scout na te feia apî tamaroa, e ua hamanihia te hoê faanahoraa Beehive [Debure] na te feia apî tamahine. Mai te matahiti 1902, ua faaitoito noa te Sotaiete Tauturu i te mau tìtì ia papai ratou iho i te mau haapiiraa na te mau tuahine; ia tae mai râ i te matahiti 1914, ua haamata te Sotaiete Tauturu i te papai i te mau haapiiraa amui, e i te matahiti 1916, ua haamatahia i te papai i te mau parau poro’i taa’e na te mau tuahine hahaere. Ua riro teie mau faanahoraa apî ei tuhaa no te Relief Society Magazine [ve’a na te Sotaiete Tauturu] apî, e ua tauturu atoa te reira i te mau tuahine no te Sotaiete Tauturu “ia haapa’o i te oraraa o te mau metua vahine e o te mau tamahine i roto ia Ziona, i te pae varua, i te pae o te feruriraa e i te pae morare hoi.”50 I roto i te feruriraa o te Peresideni Smith, e mea faufaa roa ia ohipa te mau pùpù tauturu e te feia faatere no te autahu’araa ma te au maite, no te haapii i te evanelia e no te faaetaeta i te mau taamuraa o te auhoaraa i rotopu i te mau melo. “Na roto i te reira, te rave amui ra ïa tatou i te ohipa ma te itoito no te paturaa i te Ekalesia .”51
Te hoê o te mau tamataraa tei farereihia e Joseph F. Smith, o te arairaa ïa i te ite ore o te taata e i te mau hamani inoraa e ravehia i ni’a i te Ekalesia. Tera râ, te parau ra oia e, ua riro te mau faaturoriraa a te mau taata iino “ei mau ravea mana’o-ore-hia no te faahaere i te ohipa i mua e ati a’e te ao nei. Na ratou i faafariu mai i te mata o te ao nei i ni’a ia tatou, e o te reira mau ta tatou e hinaaro nei. … Te hinaaro nei tatou ia matau to te ao nei ia tatou. Te hinaaro nei tatou ia apo mai ratou i ta tatou parau haapiiraa, ia maramarama ratou i to tatou faaroo, i ta tatou mau opuaraa, e i te faanahonahoraa o te Ekalesia a Iesu Mesia i te Feia Mo’a i te Mau Mahana Hopea Nei.”52
Ua tupu maite te hinaaro o te Peresideni Smith, e ua rahi atu te faaturahia te Ekalesia i roto i te fenua Marite e i roto i te tahi atu mau fenua. E no te tauturu i te mau ratere e haere mai i Roto Miti ia farii i te mau haamaramaramaraa ti’a no ni’a i te mau ti’aturiraa e te aamu o te Ekalesia, ua faatia te Ekalesia i ta’na pû fariiraa matamua i Temple Square i te matahiti 1902. I roto i te matahiti matamua te faatereraahia teie pû, ua fifi roa na rave ohipa tamoni ore e 25 i te Bureau of Information and Church Literature (Piha Haamaramaramaraa a te Ekalesia) na roto i te rahiraa ratere tei tae mai, hau atu i te 150.000. I te matahiti 1904, ua titau a’e ra te Piha Haamaramaramaraa i te tahi atu â mau rave ohipa, e ia faarahi-faahou-hia te fare. I te matahiti 1911, ua faatupu te Pùpù Himene no te Fare Menemene i te mau himeneraa tei haafaahiahia- maitai-hia i roto i na oire e 25 i te pae hitia o te râ e i te to’oa o te râ ropu o te fenua Marite, e tae noa’tu i te hoê himeneraa taa’e i te White House [Nohoraa o te Peresideni o te fenua Marite] no te peresideni o te fenua Marite e ta’na mau manihini.
“E faateitei e e faarahi te Fatu ia tatou i mua i to te ao nei, e Na’na e tauturu ia tatou ia amo i to tatou ti’araa e ta tatou mau ture arata’i i rotopu i te taata nei,” o te fafauraa ïa a te Peresideni Smith, ia au i te faito o te “faaroo tupu rahi” o te mau melo e to ratou hinaaro ia “mau papu i roto i te faaroo.”53 No reira, ua faaitoito tamau oia i te Feia Mo’a i te Mau Mahana Hopea Nei ia haamau papu i te a’a i roto i to ratou iho aamu e ta ratou parau haapiiraa. Ua faaoti te Peresideni ia nenei-faahou-hia te Aamu o te Ekalesia tei papaihia e Joseph F. Smith, e ua farii ia haaputuhia te mau buka aamu e te mau parau papai o te mau melo matamua (pionie), no te tu’u i roto i te apaparaa pue parau a te Ekalesia. Ua faati’a atoa oia i te feia faatere o te Ekalesia ia ho’o mai i te mau vahi aamu tei riro ei mau vahi mo’a no te Feia Mo’a i te Mau Mahana Hopea Nei, mai te fare Tape’araa no Tarateti (Carthage) i Illinois, i reira ho’i i pohe ai te Peropheta Iosepha Semita e to’na taea’e o Hyrum te pohe maratiri i te matahiti 1844 (1903); te hoê tuhaa fenua no te hiero i Inidipenideni (Independence), Missouri, (1904); te fare faa’apu i Vermont i reira te fanauraahia o Joseph F. Smith i te matahiti 1805 (1905); e te fare faa’apu a Joseph F. Smith Tamaiti i Manchester, New York, te vahi tei reira te uru raau i reira to te Peropheta ite matamuaraa i te Metua e te Tamaiti (1907). Ua faaite papu oia e, “Te mana’o nei au e, te vaira te mo’a i roto i taua mau vahi ra, no’u nei e no te taato’araa o te taata o tei farii i te misioni hanahana a Joseph F. Smith, te Peropheta.”54
Ua haapii te Peresideni Joseph F. Smith i te Feia Mo’a i te Mau Mahana Hopea Nei ia faatura i te Peropheta no to’na “iritiraa i te paruru o te ao mure ore mai te mea â ra e, no mua atu hoi i to ratou iho mau mata.”55 Ua imi atoa te Peresideni Smith ia maramarama oia e ia haapii-atoa’tu oia i te mau parau mau o te evanelia a Iesu Mesia. Ua riro ta’na mau rata i papai i to’na utuafare e i to’na mau hoa, ta’na mau faahitiraa parau e te mau pahonoraa i te mau uiraa i roto i te mau ve’a a te Ekalesia, e ta’na mau parau a’o, ei mau taime faufaa rahi no te tatararaa i te parau haapiiraa. Ia ite ana’e oia e to’na na Tauturu i roto i te Peresideniraa Matamua e, te vaira te papu ore i roto i te mau melo no te Ekalesia e i te tahi atu mau taata no ni’a i te tahi mau parau haapiiraa tumu, e papai e e haaparare ratou i te tahi mau parau haamaramaramaraa. “No Hea mai te Taata” (Novema 1909)56 e “Te Metua Tane e te Tamaiti: Te Hoê Faataaraa Parau Haapiiraa na te Peresideniraa Matamua e te Tino Ahuru Ma Piti” (Tiunu 1916),57 tera ïa te tahi mau mauihaa faufaa no te haapii i te Feia Mo’a i te Mau Mahana Hopea Nei i te huru mau o to tatou autaatiraa i to tatou Metua i te Ao ra e ia Iesu Mesia.
“Mai to’u apîraa mai â, ua imi au i te mau rave’a atoa … ia riro vau ei taata faatupu i te parau hau, ei taata parau i te parau-ti’a, e eiaha hoi te parau vaha noa i te parau-ti’a, e faaite atoa râ i te hi’oraa maitai,”58 te na reira ra te Peresideni Smith. Mai te 15 raa o to’na matahiti e tae roa’tu i to’na poheraa i te 80 raa o to’na matahiti, ua hanere rahiraa a’oraa e te oreroraa parau o ta’na i horo’a no ni’a i te evanelia, no te tauturu i te Feia Mo’a ia maramarama e ia haapa’o ratou i te mau haapiiraa a Iesu Mesia. No ni’a i to’na aravihi i te haapii, te parau ra o Charles W. Nibley e, “O vai te faito ia’na ei taata parau i te parau-ti’a? O oia tei hau i te rahi i te mau taata atoa o ta’u i faaroo a’e nei—te puai, te mana, te maramaramara te parau, te au ia faaroo. E mea faahiahia mau ia faaroo i te parau mau ora e i te faaiteraa papu puai ia hiti mai na roto mai ia’na.”59
E oaoa rahi to Joseph F. Smith ia haapa’o te mau melo o te Ekalesia i ta’na mau fa’aararaa e ta’na mau faaitoitoraa i roto i to’na ti’araa ei peropheta na te Atua. Ua riro ïa ei ohipa faufaa rahi no’na ia ite oia i te hinaaro o te Feia Mo’a ia haere i mua i roto “i te parau-ti’a, te viivii ore e te mo’a hoi.”60 Ua faaite oia i te e’a na roto i to’na haehaa e te haapii ohie. “E tamarii noa o vau nei, te imi nei au i te ite,” te na reira ra oia i te matahiti 1916. “Ia haere marû noa ta’u imiraa i te ite, te tahi reni i muri i te tahi reni, e te tahi a’o i muri i te tahi a’o, te tahi vahi iti i ô nei, e mai reira hoi ei ô te tahi vahi iti, i tera mahana e tera mahana, i tera ava’e e tera ava’e, i tera matahiti e tera matahiti, te ti’aturi papu nei au e, e tae i te tau e ite ai au i te parau mau mai te Atua i ite ra, e e faaorahia’i e e faateiteihia’i au i mua i To’na ra aro.”61 E taata aurarohia oia no to’na taia ore e te tapitapi ore to’na iteraa, hau-roa’tu râ oia i te faaturahia no to’na aroha i te taata. O Koleka vahine, te hoê o to’na mau hoa Vaihi ta’na i here roa, o tei arue ia’na ma te parau e, “e tavini no te Atua Teitei, e taata aau matara noa tei î i te aroha.”62 Aita oia i haapii “i te parau vaha noa i te parau ti’a, na roto atoa râ i te hi’oraa maitai,”63 e na roto atoa i te imiraa i te mau rave’a atoa “ia aifaito to’na huru e to’na hoho’a i to Iesu Mesia.”64
I roto i te mau ava’e hope’a o to’na oraraa, ua vai te Peresideni Smith i roto i te hoê huru Varua taa ê. “Ua paruparu to’u tino, area to’u huru i te pae varua ra, ua ite au e, aita te reira i vai noa i ni’a i taua huru paari ra, mai muta’a iho ra, ua tupu râ te reira i te maitai roa’tu,”65 te na reira ra oia i te ava’e Eperera 1918. E ono ava’e i muri iho, i te 3 no Atopa 1918, te parahi ra oia i roto i to’na piha ma te feruri hohonu i te mau papairaa mo’a, e “ma te feruri atoa i te tusia rahi no te taraehara o tei ravehia e te Tamaiti a te Atua, no te faaoraraa i to te ao nei,”66 ua farii a’e ra oia i te hoê faaiteraa nehenehe no ni’a i te tere o te Faaora i rotopu i te feia pohe ra, a vai noa’i to’na tino i roto i te menema. Ua parauhia teie heheuraa i muri a’e ra, te Orama no ni’a i te Faaoraraa i te Feia Pohe, e ua faarirohia ei Parau Haapiiraa e te Mau Parau Fafau 138, e ua riro atoa ei ohipa teitei roa a’e i roto i te oraraa o te hoê peropheta o tei poro tu’utu’u ore i te faufaa no te faataeraa i te faanahoraa no te oraraa e no te faaoraraa i te taato’araa o te mau tamarii a te Atua ra.
Te hanahana o te Atua, te ti’araa hanahana o te taata e to’na ti’aturiraa i ni’a i te Atua, te faufaa no te haapa’o e no te mau oro’a mo’a, te maitai, e te haapa’o—teie te mau tumu parau o ta te Peresideni Smith i tuatapapa tamau. Mea varavara oia e a’o i te hoê parau tumu o te evanelia ma te faataa ê i te reira i te taato’araa o te faanahoraa o te oraraa e te faaoraraa. E nehenehe ta’na e poro i te evanelia i roto i to’na îraa i roto noa i te hoê a’oraa, i te tahi taime, i roto noa i te hoê pereota, ma te haapapu i te faufaa no te iteraa i te Atua te Metua e i Ta’na Tamaiti, ia Iesu Mesia. “E mea na roto i to tatou here ia Raua, e na roto hoi i to tatou hinaaro ia haapa’o i ta Raua mau titauraa e ia riro mai mai ia Raua ra te huru, ei reira e tia’i ia tatou ia here te tahi e te tahi, ei reira tatou e farii ai i te oaoa rahi atu no te raveraa i te maitai o te ore roa e roaa ia tatou na roto i te raveraa i te ino.”67
Joseph F. Smith, te ono o te Peresideni o te Ekalesia a Iesu Mesia i te Feia Mo’a i te Mau Mahana Hopea Nei. Penihia e A. Salzbrenner.