Omuaraa
Ua tavini te Peresideni Joseph F. Smith no te roaraa e 52 matahiti ei Hui Mana Faatere Rahi no te Ekalesia—ei melo no te Pùpù no te Tino Ahuru Ma Piti, ei Tauturu no na Peresideni e maha o te Ekalesia e 17 matahiti, ei Peresideni no te Ekalesia. Ua haapii oia i te evanelia a Iesu Mesia i faahoihia mai, na roto i te maramarama, te maru e te ite papu, ma te faaitoito i te mau taata ia “haapa’o i te mau opuaraa a to tatou Metua i te Ao ra.”1 Ua itehia to’na tau faatereraa na roto i to’na iteraa papu no nia ia Iesu Mesia: “Ua farii au i te faaiteraa a te Varua i roto i to’u nei aau, e te faaite papu nei au i mua i te Atua, i te mau melahi e i te taata nei … e, ua ite au e, te ora nei to’u Faaora.”2
I teie mahana, te horo’a nei â ta’na mau parau poro’i e ta’na mau a’oraa i te hoê arata’iraa no te rai mai no to tatou e’a mure ore. Ta tatou ohipa i roto i teie nei ao, ia au i te reo o te Peresideni Smith, “o te raveraa ïa i te ohipa maitai, ia faaea i te rave i te hara, ia faateitei i te parau ti’a, te viivii ore, e te ohipa maitai i roto i te aau o te taata nei, e ia tu’u i roto i te aau o ta tatou mau tamarii, i te here i te Atua e i ta’na parau, na mua i te mau mea atoa.”3 Ua parau oia e, “no te riroraa ei Feia Mo’a i te mau Mahana Hopea nei, e mea ti’a i te taata ia haapae i te mau titauraa e te mau oaoaraa o te tino nei; e titauhia te haapa’o, te puai o te mana’o, te here i te parau mau, te parau ti’a i roto i te mau parau tumu, e te hinaaro papu ia ite i te haerea papu o te parau mau.”4
Ua haamau te Peresideniraa Matamua e te Pùpù Tino Ahuru Ma Piti Aposetolo i Te mau Haapiiraa a te mau Peresideni o te Ekalesia no te tauturu i te mau melo no te Ekalesia ia faahohonu i to ratou ite i te mau parau haapiiraa o te evanelia e ia haafatata atu ia ratou ia Iesu Mesia na roto i te mau haapiiraa a te mau peropheta no teie tau tu’uraa evanelia. I roto i teie buka, te faaitehia nei te mau haapiiraa a te Peresideni Joseph F. Smith, o tei parau e, “No te riroraa ei Feia Mo’a i te mau Mahana Hopea Nei, e mea ti’a i te tane e te vahine ia riro ei feia feruri, e ei feia ohipa; ia riro ratou ei mau tane e ei mau vahine (…) ei mau tane e ei mau vahine o te hi’opoa maite i to ratou oraraa e i te mau parau tumu o ta ratou i farii. … Ia maramarama ana’e te taata i te evanelia a Iesu Mesia, e ite outou ia ratou ia haere papu i mua, ma te haapa’o i te parau a te Fatu, e i te ture a te Atua, ma te haapa’o ti’a mau i te mea tei au, tei ti’a, tei parau-ti’a, e tei fariihia e te Fatu ra.”5
I roto i te pene tataitahi o teie nei buka te vaira e maha tuhaa: (1) te hoê faahitiraa parau no te faataa poto noa i te mana’o rahi o te pene; (2) “No roto mai i Life of Joseph F. Smith Te Oraraa o Joseph F. Smith,” e tautururaa teie i te mau haapiiraa i roto i teie pene na roto i te hoê hi’oraa no roto mai i te oraraa o te Peresideni Smith e aore râ, no roto mai i to’na paari; (3) “Te mau haapiiraa a Joseph F. Smith,” e faaiteraa teie i te mau parau haapiiraa faufaa mai roto mai i ta’na mau paru poro’i e ta’na mau a’oraa e rave rahi; e (4) “Te Mau Mana’o no te Haapiiraa,” o te faaitoito i te hi’opoaraa a te taata iho e te titauraa, i te aparauraa e te faaohiparaa i roto i to tatou oraraa i teie mahana na roto i te mau uiuiraa.
Nahea ia Faaohipa i Teie Buka
No te haapiiraa i te taata iho. Ua papaihia teie buka no te haamaitai i te iteraa o te melo tataitahi i te mau parau tumu o te evanelia tei haapiihia ma te puai e te Peresideni Joseph F. Smith. Na roto i te pure e te tai’oraa, e farii te melo tataitahi i to’na iho iteraa papu no ni’a i teie mau parau mau. E riro teie ei buka apî i roto i te vairaa buka evanelia a te melo tataitahi, e e riro hoi ei tauturu faufaa roa no te haapiiraa o te utuafare i te fare iho.
No te tau’araa parau i roto i te mau pureraa i te Sabati. Ua riro teie buka ei buka haapiiraa i roto i te pureraa a te pùpù Autahu’araa a Melehizedeka e te Sotaiete Tauturu i te Sabati. Titauhia i te mau orometua haapii ia haapii i ni’a i te tumu parau e i ni’a i te mau papairaa mo’a i faaitehia, ma te faaohipa i te mau uiraa i te pae hopea o te pene no te tauturu i te aparauraa i roto i te haapiiraa. Na roto i te hi’opoaraa i te mau uiraa hou a tuatapapa ai i te mau parau a te Peresideni Smith, e riro te reira ei tautururaa ia roaa te tahi iteraa hau atu i ta’na mau haapiiraa.
E mea ti’a i te mau pureraa i te Sabati ia haapapu i te haapiiraa i te mau parau tumu o te evanelia, i te mau hi’oraa o te haapii i teie nei mau parau tumu, e i te mau iteraa papu no te parau mau. Maite mea e, e titau te mau orometua haapii i te Varua na roto i te haehaa, no te faaineine e no te aratai i te haapiiraa, e puai te roaa i te feia e faaroo ra, i roto i to ratou iteraa i te parau mau. E faahaamana’o te orometua haapii i te mau melo o te piha haapiiraa ia hopoi mai ratou i ta ratou buka i te pureraa, e faatura atoa oia i te faaineineraa o te mau melo na roto i te haapiiraa i te mau parau a te Peresideni Joseph F. Smith. Na roto i to te mau melo tai’oraa i te pene parau hou a haere mai ai i te haapiiraa, e ineine ïa ratou no te haapii e no te faateitei i te tahi e te tahi.
Aita e faufaa e aore râ, aita e titauhia i te mau melo ia hoo mai i te tahi atu mau buka tauturu e aore râ, te tahi atu mau parau faahororaa no te turu i te mau haapiiraa. E faaitoitohia râ te mau melo ia hi’o i te mau papairaa mo’a i faaitehia no te tahi atu â tuatapaparaa i te parau haapiiraa.
Ua faataahia teie buka no te haapiiraa a te taata tataitahi, e ia riro hoi ei ravea faahororaa no te evanelia; tera râ, e rave rahi mau pene roroa eita e hope i te haapiihia i roto i te roaraa o te hoê hora haapiiraa. No reira, e mea faufaa te tai’oraa i te haapiiraa i te fare, no te farii i te îraa o te mau haapiiraa a te Peresideni Smith.
I roto i ta outou tuatapaparaa, e mata na outou i te titau ia ite maite outou i teie peropheta no te Atua, to’na haehaa, te faaroo e te mata’u ore, oia te Peresideni Joseph F. Smith. E mata na outou i te farii i ta’na a’o “ia maiti i te maitai no te mea, ua ti’a te reira, e no te mea ua here to oe aau i te maitai, e no te mea, o te reira tei hau i te mau mea atoa.”6 E mata na outou i te ati atu i te Peresideni Smith i roto i ta’na faaiteraa i te mana o te evanelia a Iesu Mesia : “Na to tatou faaroo i te parau haapiiraa i faahoi-faahou-hia mai … i haamau e i haapaari ia tatou, e i faatupu, ma te uiui ore e aore ra, ma te fea’a ore, i to tatou faaroo e to tatou ti’aturi i te misioni hanahana a te Tamaiti a te Atua.”7