Te Metua e te Tamaiti

Te haapii nei te mau heheuraa o teie anotau ia tatou nei i te mau parau mau mure ore faahiahia no nia i to tatou Metua i te Ao ra e i Ta’na Tamaiti ia Iesu Mesia.

Aamu o te Oraraa o Iosepha F. Semita

Ua faaite pinepine te Peresideni Iosepha F.Semita i to’na iteraa papu puai no nia i te Metua i te Ao ra e i Ta’na Tamaiti ia Iesu Mesia, te tumu hanahana no to tatou faaroo. Ua parau oia: “Te tiaturi nei au ma to’u varua atoa i te Atua te Metua e i to tatou Fatu e Faaora o Iesu Mesia.”¹A riro ai oia ei Peresideni no te Ekalesia, ua imi oia i te haamaramarama e i te faataa ê i te mau hopoia a te Metua e a te Tamaiti, no te mea ihoa ra e, te pii ra te tahi mau papairaa mo’a ia Iesu Mesia ei Metua. No te tauturu i te Feia Mo’a ia ite papu i te tahi mau papairaa mo’a no nia i te Metua e i te Tamaiti, ua papai te Peresideniraa Matamua e te Pupu no te tino Hoê Ahuru ma Piti Aposetolo i te hoê parau haapiiraa i te 30 no Tiunu o te matahiti 1916 o tei topahia te ioa “Te Metua e te Tamaiti.” Ua haapapu teie parau no nia i te rotahi i rotopu i te Atua te Metua e i Ta’na Tamaiti ia Iesu Mesia, e te haamaramarama ra oia no nia i te hopoia tataitahi i roto i te opuaraa no te faaoraraa. Te faaite atoa ra oia i te mau tatararaa rau i te ta’o ra Metua i faaitehia i roto i te mau papairaa mo’a no te Metua i te Ao ra e no Iesu Mesia.

E rave rahi mau parau no roto mai i tera parau haapiiraa o te faahitihia i roto i teie pene e tae noa’tu te tahi mau haapiiraa a te Peresideni Semita, o tei haapapu e, no te farii i te “ite o te Atua, e o Ta’na Tamaiti, ia Iesu Mesia, … ua riro ïa te reira te haapiiraa matamua e te haapiiraa hope’a te ora.”²

Te Mau Haapiiraa a Iosepha F. Semita

Ia ite i te Atua e ia Iesu Mesia o te Ora Mure Ore ïa.

Te faaite ra te mau papairaa mo’a ei parau mau, oia hoi: te ora mure ore, te iteraa i te Atua ora mau e ia Iesu Mesia o ta’na i tono mai (Ioane 17:3). Te tiaturi nei au na roto i te mau haapiiraa o te mau papairaa mo’a e na roto i te mau heheuraa o ta ratou i farii na roto i te reo o te Perofeta Iosepha Semita, ua tia i te Feia Mo’a i te mau Mahana Hope’a nei ia ite o vai te Atua mau e te Atua ora, e tae noa’tu i Ta’na Tamaiti o Ta’na i tono mai i roto i teie ao. Te iteraa ia raua, o te ora mure ore ïa.³

E mea faufaa ia faaroo i te Atua, e e mea faufaa atoa ia faaroo ia Iesu Mesia te Tamaiti a te Atua, te Faaora o te mau taata atoa e te Arai o te Faufaa Apï, e i te Varua Maitai, o te faaite papu ra i te Metua e i te Tamaiti, “hoê a i te mau tau atoa e a muri noa’tu.”⁴

Te Metua o to tatou varua, e mea mure ore Oia, e e tino i’o e te ivi To’na.

E tino i’o e te ivi to te Atua. E taata Oia mai ia tatou râ te huru, mai ia tatou nei i roto i te i’o.… E tamarii tatou na te Atua. E mea mure ore Oia, e aita To’na e omuaraa. Ua ora’na Oia, te ora nei Oia, e e ora noa â oia.⁵

Aita vau e tiaturi nei i te mau haapiiraa a vetahi ê e faaite ra e, e varua noa te Atua e na roto i To’na natura e î ia’na te aano o te ao nei, e tei te mau vahi atoa oia i te parahi tinoraa mai e ma te tino ore, no te mea aita vau e nehenehe e manao e nehenehe te Atua e riro ei taata mai te peu tei roto Oia i te reva e tei te mau vahi atoa oia i te taime hoê. E manao tano ore teie, hoê feruriraa o te ore e tuea nei, i te manao e nehenehe te Atua iho, te Metua mure ore, e vai ei taata i roto i na vahi e piti i te hoê a taime. Eere roa’tu i te mea tia. Area ra tei roto i te reva To’na mana. Te toro ra To’na mana i nia i te mau hamaniraa atoa, e te ite nei To’na maramarama i te mau mea atoa, e te faatere nei Oia i te mau mea atoa e te ite nei Oia i te mau mea atoa.⁶

Te Atua te Metua Mure Ore, o ta tatou e pii nei ma te i’oa hanahana “Elohima”, o te Metua tumu ïa o to tatou Fatu e Faaora o Iesu Mesia, e te Metua o te mau varua o te huaai o te taata. E Metua o Elohima no Iesu Mesia, e e Metua atoa Oia no te mau varua.⁷

Te pure nei tatou i te Metua o to tatou Fatu, e Faaora o Iesu Mesia, e ua hamanihia tatou ia au i To’na hohoa e ia au i To’na huru, e aore ra ua fanauhia tatou i roto i te ao, e ua hamanihia tatou ia au i to’na hohoa e i to’na huru, no te mea e tamarii tatou na te Atua, e no reira ua hiroa tatou i te hohoa o te Tamaiti i te pae tino nei, e i te pae varua atoa mai te mea e haapao tatou i te mau parau tumu o te Evanelia mau e te mure ore. No te mea, ua faata ateahia tatou … ia riro mai ia’na ra te huru na roto i te faaohiparaa paari e te tano i to tatou nei tiamaraa.⁸

Te manaonao noa nei te Atua, te Metua Mure Ore ia outou. Te haapao nei Oia i To’na nunaa na roto i te ao taatoa nei, e haamaitai Oia ia outou ia au i to outou faaroo i te haapaoraa i te mau ture titiaifaro e te parau mau.⁹

Na te Atua, to tatou Metua Mure Ore, i hamani ia tatou.

O te Fatu Manahope te Hamani o te fenua nei, o Oia te Metua o to tatou mau varua. E mana To’na no te parau mai ia tatou i te mau mea te tia ia ravehia, e e hopoia na tatou ia haapao e ia apee i ta’na mau titauraa. E ohipa matauhia teie, e e mea ohie i te haroaroa.¹⁰

Te haapapu pinepine nei te mau papairaa mo’a e, o te Atua te Hamani o te fenua e o te mau rai e o te mau mea atoa i roto ra. Ia au i to’na auraa, e Taata Faanahonaho te Hamani. Ua hamani te Atua i te fenua mai te hoê openu i faanahonahohia, tera ra mea papu aita Oia i hamani i te mau materia i faaohipahia no te hamani i te ao no te mea “mea mure ore teie mau materia” (PH&PF 93:33)¹¹

No te Fatu Manahope hoi to te taata maramarama, e te mau mea atoa ta’na e farii nei; no te Fatu te fenua e te î atoa i nia iho (Salamo 24:1). Na te Atua i omua e i poiete i te mau mea atoa.¹²

A ara i te mau taata o te faatupu i te manao i roto ia outou na e, ua iti te mana o te Fatu Manahope o tei hamani i te ra’i e i te fenua e o tei poiete i te mau mea atoa ra, i nia noa i te mau mea o te fenua e i te mana o te te mau taata tahuti nei.¹³

O Iesu Mesia te Matahiapo o te mau varua e te Tamaiti Fanau Tahi a te Atua i te tino nei.

I rotopu i te mau tamarii varua a Elohima, o Iehova te matahiapo, e aore ra o Iesu Mesia, i rotopu i to’na mau teina atoa ra.¹⁴

Eita o Iesu Mesia te Metua o te mau varua o tei farii e aore ra o tei ore â i farii i te hoê tino i nia i teie fenua nei, no te mea hoêa Oia e o ratou. E Tamaiti Oia, mai ia ratou atoa ra i riro ei mau tamarii tamaroa e ei mau tamarii tamahine na Elohima.¹⁵

Oia hoi, mea rahi ae Oia i te tahi atu mau tamarii, no To’na tiaraa ei (1)Matahiapo e aore ra no te mea o Oia te Matahiapo, (2) o Oia te Otahi i roto i to’na tiaraa tahuti nei ei Tamarii fanau na te hoê metua vahine tahuti e te hoê Metua Tane tahuti ore, oia hoi o tei tiafaahou e o tei faahanahanahia, (3) no To’na maitiraahia e To’na faatoroa atearaahia ei Arai e ei Faaora no te mau taata atoa; (4) e no teie huru faufaa roa i To’na ei taata hara ore.¹⁶

Aita roa’tu e feaa i roto i te feruriraa o te Feia Mo’a o te mau Mahana Hopea nei no nia i te oraraa e te tiaraa o te Fatu, te Atua Manahope, o tei riro ei Metua no to tatou Fatu e Faaora o Iesu Mesia. Aita e feaa i roto i te feruriraa o te Feia Mo’a o te mau Mahana Hopea nei e Tamaiti na te Atua o Iesu, o tei fanauhia e te Atua i te tino nei.¹⁷

E Tamaiti o Iesu Mesia na Elohima i te pae varua e i te pae tino, oia ïa, o Elohima iho te Metua o te varua o Iesu Mesia e tae noa’tu o te tino i’o ta Iesu Mesia i farii no te faaoti i Ta’na Misioni, e o teie iho tino o tei pohe i nia i te satauro e o tei tia mai na roto i te ravea o te tiafaahouraa, e o te riro i teie nei ei puhaparaa no te varua mure ore o to tatou Fatu e Faaora.¹⁸

Na Maria i fanau ia Iesu Mesia, e o Maria To’na metua vahine. E tino i’o e te ivi to’na. Ua faasataurohia, e ua tia mai To’na tino mai roto mai i te pohe. Ua haamou Oia i te mau fifi o te menema, e ua haere mai Oia i roto i te hoê ora apï, hoê varua ora, hoê taata ora, hoê taata mâ te tino, e mâ te varua—te varua e te tino o tei riro mai ei varua taata ora e te tahuti ore.¹⁹

O te Atua te Metua … te Metua o to tatou varua, e te Metua i te i’o, o ta’na Tamaiti Fanau Tahi, Iesu Mesia, o tei tahoêhia te tahuti ore i te tahuti, o tei haapuai i te tahoêraa i rotopu i te Atua e te taata, o tei faatia i te mau varua tahuti, o tei farii i te utua o te pohe, o tei farii i te ora mure ore, na roto i te haapao i ta’na mau ture. Oia hoi, a imi anae i te parau mau e i te haere na te maramarama mai te Mesia i roto i te maramarama, ia farii tatou i te autaeaeraa Ia’na e i te tahi e te tahi, ia mä ta tatou mau hara i to’na toto.²⁰

Ua rotahi te Metua e te Tamaiti

“… Tei te Metua vau e tei ia’u te Metua, e te Metua e o vau, hoê a ïa maua.” [3 Nephi 11:27.] Aita vau manao nei e, e faahuru ê te tahi noa ae taata maramarama i teie mau parau, ma te manao e, hoê taata o Iesu e te Metua, tera ra ua rotahi raua i roto i te ite, i te parau mau, i te paari, i te haroaroa, e i te opuaraa, mai ta Iesu te Fatu iho i parau i Ta’na mau pipi ei hoê ia’na, i rot o ia’na ra, ia vai mai oia i roto ia ratou ra. O teie te auraa ta’u e haroaroa nei i roto i tera parau, eiaha ra mai ta te tahi mau taata e manao ra, te Mesia e te Metua hoê noa ïa taata. Te faaite nei au ia outou na, eere raua hoê noa iho taata, tera ra e piti taata raua, e piti tino, taa ê i te tahi e te tahi, mai te hoê metua tane i te taa ê i ta’na tamaiti.²¹

Ua hoê [te Metua e te Tamaiti] i roto i to raua mau aterebuti. Hoê i roto i te here, hoê i roto i te ite, hoê i roto i te aroha, hoê i roto i te mana, hoê i roto i te mau mea atoa o te faarotahi nei, o te haamana nei e o te faahanahana nei ia raua, no te mea tei ia Raua ra te titiaifaro roaraa te parau mau, te mau viritu atoa, e te mau parau tia atoa.²²

Ua piihia Iesu Mesia, te Metua

Ua rau te auraa o te te ta’o ra “Metua” ia au i te faaohiparaa i roto i te Atuaraa o te itehia nei i roto i te mau papairaa mo’a.²³

O Iesu Mesia te Metua o te rai e o te fenua

Iehova, o Iesu Mesia ïa te Tamaiti a Elohima, o tei piiha te “Metua,” e oia atoa “te Metua Mure Ore o te rai e o te fenua” (Mosia 15:4; 16:15; Alama 11:38–39; Etera 4:7). Te pii atoahia ra Iesu Mesia “Te Metua Mure Ore” (Isaia 9:6; 2 Nephi 19:6)…

… Iesu Mesia, o ta tatou atoa i matau i te i’oa no Iehova, o Oia te faaueue a te Metua, o Elohima, i roto i te ohipa o te hamaniraa.… No te mea o Iesu Mesia te Hamani, mea pinepine Oia i te piihia ei Metua no te ra’i e no te fenua; e no te mea mea mure ore Ta’na mau hamaniraa, mea tia ïa ia piihia oia te Metua Mure Ore o te ra’i e o te fenua.²⁴

O Iesu Mesia te Metua o te feia i haapao i Ta’na evanelia.

[Te tahi atu] tumu e faaite nei e, ua riro o Iesu Mesia ei “Metua”, ia au ïa i te auraa e vaira i rotupu i Ia’na e i te feia o te farii i Ta’na Evanelia, e o te riro mai ei feia ai’a i te ora mure ore …

Na roto i te haapaoraa i te Evanelia, e riro ïa te mau taata ei tamarii na te Atua, oia hoi ei tamarii na Iesu Mesia, e na roto Ia’na, ei tamarii na To’na Metua, e te faaitehia nei te reira i roto i te mau heheuraa o tei horoahia mai i roto i teie nei anotau (PH&PF 11:28–30; 34:1–3; 35:1–2; 39:1–4; 45:7–8)

E rave rahi hanere matahiti teie nei, hou i te fanauraa o te Fatu, ua faaite papu mai te Perofeta Abinadi no nia i te auraa i rotopu ia Iesu Mesia ei Metua e ia ratou o tei haapao i te mau titauraa o te Evanelia ei mau tamarii Na’na: “… E o vai te riro e huaai no te (Mesia)? Inaha te parau atu nei au ia outou, o tei faaroo i te mau parau a te mau perofeta … o tei faaroo e, e faora te Fatu i to’na ra mau taata, e tei hi’o i mua i taua mahana ra i te matararaa i ta ratou hara; te parau atu nei au ia outou e, o to’na huaai ïa teie, oia hoi, te feia ai’a ratou i te basileia o te Atua …” (Mosia 15:10–13)

E nehenehe i te mau taata e riro ei tamarii na Iesu Mesia na roto i te fanauraa apï—o ta te Atua i fanau ra, mai tei faaitehia i roto i te parau faauru. (A hi’o 1 Ioane 3:8–10)

O ratou o tei fanauhia i te Atua na roto i te haapaoraa i te Evanelia e nehenehe ia ratou e farii i te faateiteiraa e tae noa’tu hoi i te tiaraa o te Atuaraa na roto i te tutavaraa i roto i te parau tia (a hi’o i roto i te PH&PF 76:58; 132:17, 20, 37)

Na roto i te fanauraa apï—o te pape e o te Varua—e nehenehe i te mau taata atoa ia riro ei tamarii na Iesu Mesia na roto i te mau ravea Ta’na i horoa “e mau tamaiti e e mau tamahine fanau hoi ratou no te Atua ra” [PH&PF 76:24; 1 Korinetia 4:15; PH&PF 84:33–34; 93:21–22]

Mai te peu mea tano i te parau e, e mau tamaiti e e mau tamahine na Iesu Mesia o ratou o tei farii e o tei haapao i te Evanelia—oia hoi no nia i teie parau te faaite papu nei te mau papairaa mo’a e, aita roa’tu ïa e nehenehe ia patoihia e aore ra ia hunahia—ua tano atoa ïa ia piihia Iesu Mesia ei Metua no te mau taata parau tia, oia hoi ua riro ra ratou ei mau tamarii Na’na e ua riro Oia ei Metua no ratou na roto i te piti o te fanauraa— te fanauraa apï na roto i te bapetizoraa.²⁵

O [Iesu Mesia] te niu e te tihi rahi o ta tatou haapaoraa. E mau tamarii faamu tatou Na’na, na roto i te tanuraahia i te Mesia ra i roto i te bapetizo, na roto i te fanau faahouraa i te pape e i te varua i roto i te ao, na roto i te mau oro’a o te evanelia a te Mesia, e ua riro ïa tatou ei mau tamarii na te Atua, ei feia ai’a i te Atua ra, ei feia ai’a tatou e te Mesia ra na roto i to tatou riroraa ei tamarii faamu e na roto i te faaroo.²⁶

Mai te peu aita te tatarahapa, e te bapetizo e te fariiraa i te Varua Maitai, o te tumu o te fanauraa apï, eere ïa tatou no te utuafare o te Mesia, area ra e riro tatou ei mau purutia, e e faataeaêhia tatou i te Atua ra e i Ta’na mau ture, e e vai noa ïa tatou i roto i teie huru hi’a, i te tino anei e aore ra i te varua, no te tau o te mau tau e amuri noa’tu, maori ra ia haapao tatou i te opuaraa o tei faaineinehia i te rai no te arai e no te faaora i te utuafare o te taata nei.²⁷

Ua ite au e nehenehe ta’u e ite i te [faaoraraa] na roto noa i te haapaoraa i te ture a te Atua, na roto i te haapaoraa i te mau faaueraa, na roto i te raveraa i te mau ohipa tia, ma te apee i te mau taahiraa avae o to tatou aratai, o Iesu, te Hioraa e te Upoo o te taatoaraa. O Oia te E’a o te Ora, o Oia te Maramarama o te ao, o Oia te Uputa e tia ai ia tatou ia tomo na reira, ia nehenehe ia tataou ia farii i te hoê parahiraa Ia’na ra i roto i te basileia tiretiera o te Atua.²⁸

Aita’tu e i’oa i raro ae i te ra’i e ora ai te taata nei e aore ra e faateiteihia ai i roto i te Basileia o te Atua, maori rä o Iesu Mesia.²⁹

Ua rito o Iesu Mesia ei Metua na roto i te mana ta te Atua i horoa Ia’na ra.

I roto i te mau auraa atoa o Iesu te Tamaiti i to te utuafare taata nei, ua faaite Oia ia Elohima To’na Metua, na roto i te mana e te tura. O teie ihoa te huru mau o te Mesia i roto i To’na oraraa hou te tahuti nei, hou Oia i farii ai i te hoê tino, i reira ua matau tatou Ia’na i raro ae i te i’oa o Ioheva; e tae noa’tu i roto i to’na oraraa tahuti, e i roto i Ta’na mau ohipa ei varua i rotopu i te mau taata o tei pohe; e mai te reira taime mai ä a tiafaahou ai Oia [a hi’o Ioane 5:43; 10:25, 30; 14:28; 17:11; 3 Nephi 20:35; 28:10; PH&PF 50:43]. No reira, ua tuu te Metua i To’na i’oa i nia i Ta’na Tamaiti, e ua paraparau, e ua poro o Iesu Mesia i roto e na roto i te i’oa o te Metua; no te pae o te mana, e te Huru Atua, ua rotahi ïa Ta’na mau parau e Ta’na mau ohipa i ta te Metua.

Area ra, aita hoê noa ae o teie mau tiaraa e taui i te hoê tuhaa iti noa ae no te auraa e vaira i rotopu i te Metua e te Tamaiti e i rotopu ia Elohima e ia Iesu Mesia.³⁰

E to’u mau taeae e mau tuahine e, ua ite au te ora nei to’u Arai. Ua ite au, mai ta’u e ite nei te ora nei au, ua fa mai Oia iho i roto i te taata i to tatou nei anotau, e no te ite ta tatou e farii nei, aita ïa te reira i haamauhia i nia iho i te mau mea noa o te tau tahito, e na te Varua o te Atua e faaite papu nei ia tatou e, o tei niiniihia i roto i te aau o te mau taata atoa o te tomo i roto i te fafauraa o te Evanelia a te Mesia. Tera ra, ua farii tatou te mau ite apï e te mau faaiteraa o te mau orama no te ra’i mai e te mau färaa mai o te Atua te Metua e o te Mesia te Tamaiti i onei to raua taahiraa avae; e ua faahiti papu mai raua i to raua huru, to raua huru taata, e ua faaite mai raua i to raua hanahana. Ua faatoro raua i to raua rima no te faaoti i ta raua ohipa—te ohipa a te Atua, eiaha ra te ohipa a te taata.… O teie to’u iteraa papü ia outou na, to’u mau taeae e mau tuahine, e te faaite papü nei au i te reira na roto i te i’oa o te Fatu Iesu Mesia.³¹

Mana’o Tauturu i te Haapiiraa

No te aha: te ora mure ore, o te iteraa ïa i to tatou Metua i te Ao ra e ia Iesu Mesia? Nahea to tatou haroaroa no nia ia raua e tauturu ai i to tatou auraa e o raua?
No te aha mea faufaa ia ite e, e tino i’o e te ivi, e te tahuti ore, e te hanahana, e te mure ore o to to tatou Metua i te Ao ra.?
Nahea tatou e haamaitaihia ai ia ite anae tatou e, o te Metua i te Ao ra te Metua o to tatou varua?
Eaha te auraa o te parau ra “E taata faanahonaho Tei Hamani”?
No te aha i parauhia ai ua riro o Iesu Mesia te fanau tahi i rotopu i te mau tamarii varua a to tatou Metua i te Ao ra? Eaha te mau mea ta te Faaora i nehenehe e rave no te mea ua fanauhia i roto i teie ao mai te Tamaiti Fanau Tahi a te Metua i te tino tahuti nei?
Nahea te Metua i te Ao ra e o Iesu Mesia e riro ai ei hoë? Nahea tatou e riro ai ei hoê i te Metua e i te Tamaiti? (a hi’o Ioane 17:22–24)
No te aha te piihia nei te Metua e te Tamaiti te Hamani?(a hi’o atoa i roto ia Mose 1:32–33.)
Nahea tatou e riro ai ei mau tamaiti e ei mau tamahine na te Mesia? (a hi’o i roto i te Mosia 5:5–8) Eaha ta tatou e nehenehe e rave “no te faahaehaa i roto i te Evanelia ei tamaroa e ei tamahine na te Mesia? (a hi’o 1 Ioane 2:3; 4:7–8)
No te aha Iesu Mesia e parau ai i te mau parau a te Metua mai te mea o Oia te Metua? Eaha ta teie e faaite ra ia outou no nia i te auraa e vaira i rotopu i te Metua e te Tamaiti?

stained-glass window — Teie hi’o hoho’a o te haamaramarama hamanihia i te matahiti 1913 no te hoê paroita a te Ekalesia o Adams i Los Angeles, Califonia, e faaite ra i te fâraate Atua Metua e Ta’na Tamaiti o Iesu Mesia ia Iosepha Semita.