A imi i te ite i roto i te parau mau

Ia imi onoono tatou te ite i roto i te parau mau e ia imi tatou i te ravea ia haapii ia tatou iho e ia haamaitai atoa ia tatou i te mau mahana atoa.

Aamu o te Oraraa o Iosepha F. Semita

Noa’tu aita te Peresideni Iosepha F. Semita i fanao i te mau ravea no te haere i te haapiiraa, ua faauruhia ra to’na oraraa e teie parau tumu: “te hanahana o te Atua ra o te maramarama ïa” (PH&PF 93:36), e ua turai oia i te Feia Mo’a ia imi te mau ite atoa i te pae varua e i te pae tahuti. Ua paturu tamau te Peresideni Semita i te mau faanahoraa haapiipiiraa a te Ekalesia, e haapii ra i te Feia Mo’a e rave rahi, te mau ihi o te haapiiraa tuarua e o te haapiiraa faaroo. Na’na i haamau i te niu o te Aupupu oi Rave’a Haapiipiiraa a te Ekalesia na roto i te haamau atoaraa i te Faanahoraa no te Haapiipiiraa Evanelia a te Ekalesia. Ua iritihia te haapiiraa Evanelia matamua i te matahiti 1912, tapiri ae i te haapiiraa no Granite High school i Roto Miti, Utaha.

Ei Peresideni no te Ekalesia, ua faaitoito oia i te mau pupu atoa o te Ekalesia—mai te Sotaiete Tauturu, te Haapiiraa Sabati, te Paramaire, e te Feia Api Tamaroa e te Feia Api Tamahine—ia amo i to ratou tiaraa ei haapii Evanelia. I raro ae i ta’na peresideniraa, ua papaihia te mau buka haapiiraa no te mau tamarii e no te mau taata paari e vaira i roto i te mau pupu a te Ekalesia. Te vaira i roto i te mau ve’a i neneihia e te Ekalesia te mau faanahoraa no te mau haapiiraa e horoahia i te mau hebetoma atoa. Ua riro na ei taata papai ve’a, i te mau matahiti e rave rahi, i te mau ve’a ra Improvement Era, tei monohia e te Ensign i teie nei mahana, e te Juvenile Instructor, o tei neineihia no te Haapiiraa Sabati. Te vaira i roto i te reira mau ve’a te mau tumu parau e rave rahi e haapapu ra i te haapiiraa a te Ekalesia. Te na o ra te hoê o to’na mau hoa: “Mea au roa na’na e papai, e ua faaite pinepine na oia i to’na hinaaro ia rahi ae to’na taime no te papai i roto i te Improvement Era.”¹

Mai ta te Peresideni Smith i faahiti: “ No te Feia Mo’a i te mau Mahana Hope’a nei, ua riro te faaoraraa iho, na roto i te taraehara o te Mesia, ei taahiraa i roto i te ite.… Te ite, ua riro ïa ei rave’a no te haereraa i mua e amuri noa’tu.”²

Te Mau Haapiiraa a Iosepha F. Semita

Tei roto te mau parau mau atoa i te Evanelia.

Aita te hoê noa ae parau mau no te Evanelia a Iesu Mesia e vaira i roto i te tahi atu mau nunaa faaroo e aore ra haapaoraa, o tei ore â i haapiihia i te nunaa e Iosepha Semita, te Perofeta, e i muri mai ia’na te feia faatere e te mau peresibutero o te Ekalesia; tera ra, no te ite i te reira mau mea ei fanaoraa no tatou, e mea tia ihoa ïa, ia faaitoito, ia tutava e ia tae to tatou aau. No reira, e haere mai paha vetahi ê e aparau ia tatou i to ratou mau manao, o tei ore e tuea i ta tatou mau haapiiraa, i ta tatou mau parau mau, tera ra o ta te mau taata e faaroo nei e o tei faatiaturihia e, e mea apï teie mau haapiiraa, e aita teie mau haapiiraa e itehia nei i roto i te Evanelia a Iesu Mesia mai te haapiihia e te Feia Mo’a i te mau Mahana Hope’a nei. E feruriraa tano ore e te riaria tera, e mea tia ia paruruhia te taata o te here nei i te Evanelia.³

Mai te peu te here nei outou i te parau mau, mai te peu ua farii outou i te Evanelia i roto i to outou aau e te here nei outou i te Evanelia, e faarahihia to outou maramarama; e faarahihia to outou haroaroa i te parau mau. Te parau mau, ia faaauhia i te mau mea atoa i te ao nei, o te reira te faatiama nei i te taata—na roto i te tinairaa i te tutautohe, te haapao ore, te mau utua riaria o te haapao ore, inaha e mea riaria mau ia haapao ore tatou i ta tatou mau hopoia i mua i te Atua Ora. Mai te peu e haapii outou i te parau mau e e haere outou na roto i te maramarama o te parau mau, e faatiamahia outou i te mau hape o te taata nei … eita ïa outou e faahapahia. E farii te Atua ia outou e e haamaitai oia ia outou e ta outou mau tamarii, e faaruperupe oia ia outou mai te hoê tumu tarona.⁴

Te taata e fanao ra i te haapii e te apo i te ite o te Atua e te e’a no te ora.… o oia ïa te taata oaoa ae i te te taata i tao’ahia e aore ra i itehia ia’na te mau tao’a hunahia o te fenua.… Ua tiama to’na feruriraa no te farii i te mau parau tumu ohie e te faufaa o tei heheuhia, no roto roa mai i te pihaa o te ora, no te faaoraraa e no te ora o te taata nei. E no reira, tei roto ïa te hiaai papu i ta’na aau no te amo i te tumu rahi hanahana o te faaoraraa o te taata nei.⁵

Eaha te vahi o ta outou e hinaaro ra ia haere te mau taata o tei ore i farii i te parau mau? Mea ohie roa te pahonoraa. Eita roa ratou e ite i te mâha i roto i te mau haapiiraa a te taata. Ia imi ratou i roto i te mau parau papai a te Atua; a turai ia ratou ia pure i roto i to ratou mau piha, e i reira eita roa’tu te taata e faaroo i ta ratou aniraa i te maramarama; a turai ia ratou ia haapao i te mau haapiiraa a Iesu, e i reira to ratou ite i te parau mau e haamata ai i te aano. Teie te rave’a e tae ai te hau i ni’a i to ratou varua, te oaoa i roto i to ratou aau e te hoê tiaturiraa papu o ta te tauiraa e ore roa e tahape. E ite papu ratou e, o Oia o te ite ra i roto i te vahi i hunahia, e haamaitai ïa ia ratou i roto i te huna ore [Mataio 6:6.]⁶

E hape na te mau haapiiraa a te taata, area ta te Atua ra, e vai noa ïa ei mea mau e te titiaifaro.

E mau tamarii haere haapiiraa maitai to tatou u’i apï. Te imi nei ratou i te parau mau e te ite o te ti’a ia haapoupouhia, tera ra i roto i ta ratou mau ma’imiraa, e apo atoa ratou, no te taime poto, no te mea e mea faufaa te reira, i te mau haapiiraa a te mau taata. Teie ra, mai te mea te ite ra ratou i teie mau haapiiraa ei ravea faufaa i roto i ta ratou mau maimiraa, eita ïa teie mau haapiiraa i te mea ino no ratou. I te taime ra e faariro ai ratou i teie mau haapiiraa a te taata ei parau mau tumu, i reira ïa te fifi e tupu ai, na roto i to ratou hopoi êraahia i rapae i te aratia afaro …

Ua haamau te Ekelesia i to’na tiaturiraa i ni’a i te mana etaeta o te heheuraa no o mai i te Atua ra, o te riro ei hohoa; e te na o ra te Ekalesia e, no te mea i tera tau e tera tau, ua taui noa’na te mau faaiteraa no roto mai i teie mea e piihia nei te “ihi”, no reira, te parau nei oia e, te heheuraa no o mai i te Atua ra, e parau mau te reira o te vai noa a tau e a tau noa’tu; no reira, te mau hi’oraa o te mea nainai ae e mea tano ihoa ïa ia tuati atu i te haapapuraa o te mea rahi ae. Taaê noa’tu te reira, te na o atoa ra te Ekelesia e, i roto i te mau tiahapa’toa o ta’na i haamau no te haapiiraa i te teologia e aore ra i te tahi noa’tu mau amaa o te ihi ite, ia tu’ati te mau haapiiraa e horoahia ra e te mau orometua i te mau parau tumu e te haapiiraa a te Ekalesia …

Eita te haapaoraa a te Feia Mo’a i te mau Mahana Hope’a nei i te enemi no te hoê noa ae parau mau, e aore ra no te mau maimiraa a te aivanaa i te parau mau. Te na o ra te Peresideniraa Matamua i roto i te hoê euhe Noela i te Feia Mo’a e: “O te mea i ite ti’ahia, e farii oaoa matou i te reira, area ra te mau faaiteraa faufaa ore o te philosophio, te mau haapiiraa hape a te taata e te mau titautauraa tahape a te taata, eita matou e farii i te reira, e eita atoa matou e paturu i te mau mea e patoi nei i te heheuraa no o mai i te Atua ra e aore ra i te manao paari, e paturu râ matou i te mau mea atoa e faatupu nei i te tura i ni’a i te taata, e faatuati nei i te viivii ore e e faarahi nei te faaroo i te Atua ra, taaê noa’tu te vahi no reira mai te reira parau mau. [Te mau parau a te Peresideniraa Matamua i roto i te ve’a Season, Deseret Evening News, 17 no Titema, 1910, api3]

Te ravea maitai roa ae no te feia apï e tutava nei i te faahohonu i te mau haapiiraa o te philosophio, o te imi hohonuraa ïa i te mau mea atoa ma te ara maite i te haamau i ta ratou ma’imiraa i ni’a anae i te parau mau. E vai noa te parau mau, area te mau haapiiraa a te mau philosopho ra tei ni’a ïa i te tauiui noaraa e te taahuriraa atoa. Ta te mau taata e faaohipa nei i teie mahana ei turu, no te taime poto, i roto i ta ratou mau maimiraa aivanaa i te parau mau i roto i te mea i ore â i itehia, e nehenehe te reira e mou ananahi no te mea ua hope te reira i te faaohipahia, area te faaroo ra, e parau tumu mure ore ïa na roto i te reira e farii ai te taata faaroo haehaa i te tamahanahana mure ore. O te reira anae te rave’a no te imi i te Atua.⁷

Ua tauiui noa’na te ihi ite e te philosophio na roto i te mau tau atoa o te tau. I roto i te hoê tenetere, e rave rahi te mau haapiiraa i te pae no te ihi ite e no te philosophio tei mono i te mau faaiteraa tahito a te mau aivanaa, tei mono i te faaroo tahito e te mau haapiiraa tahito. E nehenehe teie mau mea ia tauiui noahia e hope atu ïa tau, area te parau na te Atua ra, e vai noa ïa ei parau mau e ei parau titiaifaro.⁸

Te haapiiraa e imi ra i te mau titauraa o te ao nei, ua ere ïa i te mea o te faatiama nei i te varua e e faatupu nei i te hoê oraraa mâ ae. A haere ai tatou i te paariraa e a faaruru ai tatou i te mau tamataraa, to tatou oaoao mau, te haere noa’tura ïa i te niuraahia i ni’a i to tatou oraraa pae varua. Te puai noa’tu ra to tatou hiohioraa i te huru o to tatou oraraa a manaonao ai tatou i te hopearaa o teie oraraa e fatata mai nei, e a ite ai tatou i te oraraa teitei e haere mai nei.⁹

Ia faarahi e ia nuu te faito o to tatou maramarama i mua.

Eita tatou e imi tamau i te haapii ma te ore e roaa ia tatou te ite i te parau mau [2 Timoteo 3:7]. Te hape râ, inaha te haapii noa nei tatou e te piri noa’tu ra tatou i te haroaroaraa titiaifaro o te parau mau, e o te hopoia e mauhia ra e te mau melo o te Ekalesia i piihia ia amo i te mau tiaraa. Eita teie parau no te feia anae e mau ra i te mau ti’araa teitei, no … [te mau] melo atoa ra o te Ekalesia a Iesu Mesia i te Feia Mo’a i te mau Mahana Hope’a nei.

O vai i rotopu ia tatou nei aita to’na maramarama i haere i te rahi? O vai i rotopu ia tatou nei aita i haapii noa ae i te mahana tataitahi? O vai i rotopu ia tatou nei aita i roaa ia’na te ite na roto i te mau matahiti a amo ai oia i te mau ti’araa i roto i te Ekalesia e i roto i te oraraa huiraatira? E au râ ia’u e, e mea oto ia parauhia e, ua tutau noa te Ekalesia a Iesu Mesia i te Feia Mo’a i te mau Mahana Hope’a nei i te vahi hoê e tae noa’tu i to’na mau melo e ua faaea tatou i te nuu i mua, ua faaea tatou i te haamaitai i to tatou faito maramarama e i te rave faaoti i te mau ohipa tei reira tatou i te tuuraahia ei nunaa e ei melo no te Ekalesia a te Mesia.¹⁰

Te hoê o te mau ino rahi roa ae … o te ma’uâ ïa i apitihia i te tau’a ore. Te manao nei au e, ahiri te taata ma’uâ eita i te mea tau’a ore i teie mau mea e i teie huru i to ratou, e nehenehe ratou ia turai faahouhia â i roto i te ite. Te fifi e itehia ra i roto i te mau tane e te mau vahine, o to ratou ïa tapô pinepineraa i to ratou mata i ni’a i te mau mea e haaati nei ia ratou, e mea fifi mau no te rahiraa o te mau taata ia haapii e aore ra ia faaohipa i te mau parau mau ohie i roto i to ratou oraraa, te mau parau mau o ta te Feia Mo’a tataitahi e tia ia faaohipa i roto i to ratou mau utuafare. Nahea tatou ia tinai i te fetoitoiraa o teie ino, oia hoi teie tau’a oreraa e teie ma’uâ rahi? Te manao nei au e, te rave’a hoê roa o te ti’araa ïa i ni’a, o te tau’araa i te mau mea faufaa, ia oaoa e ia maitai te mau tamarii a te taata nei, e te mea faufaaa roa, oia hoi ia oaoa e ia maitai tatou iho.

Ua rava’i anei te imiraa i te parau mau e aore ra te tinairaa i te ma’uâ? Aita. Ia oti te reira, te vaira te faaohiparaa i te haroaroaraa e te ite ta tatou i farii i roto i te mau haaraa e i roto i te mau ohiparaa tei riro ei mea faufaa no te paruru ia tatou e no te paruru i ta tatou mau tamarii, to tatou mau taata tupu, to tatou mau fare e to tatou oaoa.¹¹

A imi i te parau mau i roto i te mau parau papai; a faaroo e a farii i te parau mau i faahitihia e te mau perofeta ora e te mau orometua; a haafaufaa i to outou varua i te mau iteraa maitai ae. O ratou e parau nei i To’na ra i’oa, te titau nei te Fatu i te haehaa, eiaha ra i te ma’uâ. Te maramarama, o te hanahana ïa o te Atua; eita roa te taata e faaorahia i roto i te ite ore. [PH&PF 93:36; 131:6].¹²

Te taviniraa i roto i te ohipa a te Fatu, ua riro ïa ei ravea e roaa ai te ite mau; e na te hoê ite mai te reira te huru e faaaano i te mau tuhaa e au i taua taata ite ra ia haa’tu e o te faatupu i te anaanatae e te puai i roto i te mau ohipa atoa o ta’na e opua.¹³

A faatupu te mau manao maitai i roto i to outou feruriraa, a faatupu i te mau parau ruperupe, ia riro ta outou mau titauraa ei mau opuaraa teitei. Ei feia matara outou i te mau tafifiraa, e ua tae roa i te riro ei feia tauturu, ei feia tavini e te fifi ore, noa’tu eita te hoê taata e nehenehe e parau e, eita vau i te ohipa na to’u mau taata tupu, ia ara te taata ia ore oia ia riro ei taata maamaa i te hunaraa e, e ohipa tatou na to tatou Metua i te ao ra. A imi na ia roaa te ite i roto i te tatararaa mau o teie nei ta’o [ite]; ia aano te ohipa i rave otihia e outou a faaohipa maitai ai outou i to outou taime, i to outou tino e i to outou maramarama, a aratai ai outou i ta outou mau ohipa i roto i te mau mea roo maitai, eiaha ia mau’a ta outou mau rohiraa e to outou taime e eiaha ia riro ei ohipa faufaa ore e te ino.

A imi i te mau hoa tano; ia riro outou ei taata maitai, ei taata faatura, ei taata au maitaihia, ei taata imi i te ite i roto i te mau mea maitai atoa, ei taata haroaroa i te mau hopoia o te oraraa, e ia riro outou ei haamaitairaa no te feia atoa ta outou e piri atu, e ei taata ite i te maiti i te mea maitai i roto i te oraraa. ¹⁴

I roto i ta tatou mau faaitoitoraa’toa i roto i te ite e te ao nei, ia tapea tatou i te mea auri.

Mea faufaa roa ia haamanao noa te Feia Mo’a i te mau Mahana Hope’a nei i te huru oraraa e au i te oraraa faaroo e te viivii ore o ta te heheuraa apï i horoa mai ei aveia no tatou. Oia ïa, mea tia ia tape’a maite ratou i teie mea nehenehe roa i parauhia: “te mea auri.”

I teie nei tau, a puai roa ai te mana o te mau pupu no te pae tapihooraa, turuutaa, e te ohipa imiraa moni, …eita roa’tu e au ia tuuhia i te hiti te mau hopoia a te Feia Mo’a i te mau Mahana Hope’a no te tahi atu mau peu o te oraraa.

E mea peapea roa ia ite e, te farii pinepine nei te mau taata, ei aveia no ratou, te huru oraraa o te feia e haaati ra ia ratou. Mai te peu te ravehia ra te mau raveraa ti’a ore e te puhurahia ra te tahape o te faaoromai e au i roto i teie mau pupu tapihooraa, turuutaa, e politita, aita ïa e tumu ia faaerehia te Feia Mo’a i te mau Mahana Hope’a nei i te hoê tutau papu oi haafetoitoihia ratou na muri i te feia toetoe, te feia i mo’e e aore ra i te feia viivii.…

Eiaha roa ia mo’ehia ia tatou e, ua riro e e riro tatou ei Feia Mo’a i te mau Mahana Hope’a nei, noa’tu te huru o to tatou ti’araa i roto i te oraraa nei, e eiaha atoa ia mo’ehia ia tatou taua aratai ra to tatou i te pae morare e te pae varua, oia hoi te Evanelia. Te tahi o to tatou feia apï tei faaino i to ratou oraraa, e nehenehe ratou e faananea faahou i to ratou ino e to ratou mairiraa i ni’a i te taahiraa matamua o ta ratou i rave na a opua ai ratou ia riro mai te feia o ta ratou i taati atu i te taime a imi ai ratou i te mau mea o teie nei ao.

Te vai ra te mau tau anaanatae, e te rahiraa o te taime, no te nanea o taua huru ra, ua tae roa i te haamo’e i te paari o te mau tane e te mau vahine, e no reira, aita’tu ta ratou manaonaoraa, maori râ te mau mea e faatupu ra i te hoê oaoaraa poto e aore ra i te api e roaa i roto i te tahuti nei. Te vaira vetahi o ratou aita’tu ta ratou e reni aratai, maori ra te reni aratai e haaparahi râ ia ratou i roto i te tuiroo i mua i te mau taata. Ia tae i te taime e maru ai te fetoitoiraa o teie mau anaanataeraa, tei roto ïa ratou, eiaha noa i te paenuraa na te reva, i roto atoa râ i te paremoraa i rotopu i te mau mea painu o te feia i mo’e ra.…

E mea faufaa mau e te hinaarohia, ia tae i te mau taime atoa ra, i te taime ihoa râ, na roto i to tatou amuimuiraa i te mau hoa aita to ratou e hiroa i te pae morale e i te pae varua, e mea ti’a ia haere atu tatou i te fare o te Fatu no te haamori e no te amui atu i te Feia Mo’a, inaha, na roto i to ratou huru viivii ore e to ratou huru varua, e riro te reira i te faataui i to tatou mau manao hape, na roto i to tatou hoiraa e rave e e amo i te mau ohipa i roto i te huru oraraa e au ra i te mau haapiiraa i roto i ta tatou Ekalesia e e tano ra i to tatou varua.

… No reira, i ropu i to tatou mau piiraa e to tatou mau amuimuiraa i te ao nei, eiaha ia mo’ehia ia tatou te hopoia rahihopea e mauhia ra e tatou no ni’a ia tatou iho e i to tatou Atua.¹⁵

Mana’o Tauturu i te Haapiiraa

Eaha te mau mea i tupu i roto i to outou oraraa o tei haapii ia outou e, tei roto te taatoaraa o te parau mau i te Evanelia a Iesu Mesia?
Eaha te tia ia tatou i te rave no te haapii i te mau parau tumu o te parau mau? Eaha te mau fifi e tupu mai ia ore tatou e haapao i teie mau parau tumu? Eaha te mau haamaitairaa o tei fafauhia no ratou o tei haapii e o tei haere na roto i te maramarama o te parau mau?
Eaha te tiaraa o te Ekalesia i ni’a i te maimiraa a te aivanaa i te parau mau? I roto i teaha te mau haapiiraa e te mau philosophio a te taata i taaê ai i te parau a te Atua?
Eaha te mau fifi e tupu mai i roto i te haereraa i te haapiiraa no te faatupu noa i te mau titauraa o te oraraa tahuti nei?
Eaha te mau tumu e faaea ai te mau taata i te faahaere i te faito o to ratou ratou maramarama i mua? Nahea tatou e tamau ai i te haapii noa i te mahana tataitahi? (A hi’o PH&PF 130:18-19)
No te aha te ite ore i te parau mau i riro ai “ ei hoê o te mau ino rahi roa ae? Nahea tatou ia tapea i te fetoitoiraa o teie ino?
Nahea to outou taime, to outou tino e to outou maramarama e riro ai ei fana’oraa no outou? Nahea to tatou huru e ta tatou mau peu e riro ai ei faafana’oraa ia tatou i te “mau maitai o te oraraa nei”?
Eaha te tupu mai, mai te mea e vaiiho tatou ei avei’a no tatou “te huru o te feia e haati nei ia tatou” i roto i to tatou imiraa i te ite e te haapiiraa e no te pae tino?
I ropu i to tatou mau piiraa o to tatou mau amuimuiraa i te ao nei, eaha te ti’a ia tatou ia rave ia ore ia mo’ehia ia tatou ta tatou hopoia rahi-hopea no tatou iho e no to tatou Atua?

first seminary building — I roto i teie tiahapa te faatupuraahia te haapiipiiraa Evanelia matamua a te Ekalesia. Haamata i te matahiti 1912, i pihai i te fare haapiiraa tuarua Granite High School i Roto Miti.

Latter-day Saints’ University — E mau taurearea haere haapiiraa teie i roto i te Fare Haapiiraa Tuatoru a te Feia Mo’a i Roto Miti, Utaha, matahiti 1903. Ua a’o te Peresideni Iosepha F. Semita i te feia mo’a e: “A haafaufaa i to outou varua i te mau iteraa maitai ae. Eita roa te taata e faaorahia i roto i te ite ore” (Gospel Doctrine, api 206).