Te Mau Metua Tane i roto i te Utuafare

E mea ti’a i te mau metua tane tataitahi ia faateitei i te tiamâraa o to’na toro’a mo’a ei upoo no to’na utuafare.

Aamu o te Oraraa o Joseph F. Smith

I roto i to’na ororaa, ua faaherehere Iosepha F. Semita i te haamana’oraa o te poheraa o to’na metua tane, o Hyrum Smith. I te 27 no Tiunu 1918, ua peresideni te Peresideni Smith i te Menema no te Oire o Roto Miti, i reira i faati’ahia ai te hoê Patu haamana’oraa o tei faati’ahia no te faahanahanaraa i to’na metua tane. I roto i taua oro’a râ, ua parau oia “Ua haamaitaihia vau i teie mahana, e toru ahuru ma pae o ta’u mau tamarii e ora nei e o ta’u e mana’o nei e, ei mau melo tiamâ ratou pauroa i roto i te Ekalesia a Iesu Mesia i te Feia Mo’a i te Mau Mahana Hope’a Nei, e te ti’aturi nei au e, tei roto to ratou mau aau i te ohipa a te Fatu. Te oaoa nei au no ta’u mau tamarii. I teie mahana, ua hau i te vau ahuru ma ono o ta’u mau mootua. … E mea fanaô roa vau; ua horo’a mai te Fatu i te mau tao’a rahi roa na’u na roto i ta’u mau tamarii e i roto i te mau tamarii a te mau tamarii. … Te hinaaro nei au ia outou ia hi’o mai i ô nei i teie nănă iti o ta’u mau mootua—tei ô nei, o ratou tataitahi. Ua here au ia ratou. Ua matau vau ia ratou paato’a. Aita â vau i farerei ae nei ia ratou, area râ, e apa vau ia ratou, mai ta’u e na reira nei i ta’u iho mau tamarii.”¹

I muri mai, ua tavini ta’na tamaiti o Joseph Fielding Smith, ei Peresideni no te Ekalesia mai te matahiti 1970 tae atu i te matahiti 1972, ua ite i te here o ta to’na metua tane i faaite i to’na utuafare “ua pee i to’na aanoraa e to’na mâ. Aita te ao nei i ite— aita paha i ite—i te hohonu o to’na here no ratou. Ua haavahavaha te taata ino e te taata faufau ia’na; area râ, te huru mau o to’na oraraa utuafare e to’na here faahiahia no to’na utuafare tei raro roa’tu ïa i to ratou haro’aro’araa. Ehea taime o to’na pureraa ia vai parau ti’a noa ta’na mau tamarii—parau ti’a i te Atua, parau ti’a i to ratou mau taata tupu; parau ti’a i te tahi e i te tahi e parau ti’a ia’na! … A vaiiho ia ratou tataitahi e i te taato’araa, ia vai parau ti’a ia’na e ia vai parau ti’a i te ohipa o ta’na e ti’a nei ma te faaroo i roto i te tau o to’na oraraa tahuti nei, e o te mea ïa o ta’na i titau rahi i roto i to’na oraraa taato’a.”²

Te Mau Haapiiraa a Iosepha F. Semita

Aita e mono o te utuafare.

Aita e mono o te utuafare. E mea tahito roa to’na tumu oia atoa i to te ao nei, e ua faatoro’ahia ta’na misioni e te Atua mai te matamua mai â. … Ua hau atu te fare i te hoê noa iho faaearaa, e faanahonahoraa o te vai nei no to’na papu e no te here i roto i te mau taata tataitahi oia atoa hoi i roto i te mau nuna’a atoa.

Aita e nehenehe te oaoa mau ia faataa-ê-hia e ia vai taa ê i te utuafare, e no te tautoo tataitahi e ravehia no te haamo’a e no te faaherehere i to’na mana e faateitei ïa i te mau taata o te ohipa nei e o te faatusia nei no to’na faanahonahoraa. E mea pinepine te mau tane e te mau vahine i te imi ia mono no te tahi atu huru oraraa i te oraraa e vai nei i roto i te utuafare; e vaiiho ratou ia ratou iho ia ti’aturi e, te auraa o te parau utuafare, oia hoi o te faaitiraa ïa; e te tiamâraa teitei ae, o te îraa ïa o te rave’a no te faahaere i to’na hinaaro. Aita e oaoa mai te mea e, aita e taviniraa, e aita e taviniraa rahi atu i te tauiraa i te utuafare i roto i te hoê faanahonahoraa mo’a, o te faahaere e no te faaherehere i te oraraa utuafare.

O ratou o te ape i te mau hopoi’a o te utuafare, te ere nei ïa i te hoê ohipa tumu faufaa no te maitai o te pae sotiare. E nehenehe ia ratou iho ia fati atu i roto i te mau oaoa sotiare, area râ, to ratou oaoa e mea papa’u noa ia e te hope’a no te reira râ, e oto ia i roto i te oraraa. E pii mai te mau raveraa ohipa o te mau taata i te tahi mau taime ia ratou ia faarue i to ratou mau utuafare; area râ, te mana’o no te hoiraa fare o te vai tamau ia ei faaururaa no te rave maitairaa e no te haapao maitairaa.³

I roto i te hoê utuafare maitai, eita te varua e poia, oia atoa te tupuraa e te faarahiraa o te mau mana’o maitai roa o te riro i te tapea i te mau arearearaa faufau e te mea ino. Te tumu matamua e ere ia no te haaputuraa i te mau tao’a maitai, o te faatea atu i te parau mau, i te maitai, i te oraraa pae varua; area râ, no te patu i te tao’a no te varua, no te mana’o faaotiraa maitai, e te taheraa o te here e te tautururaa.

E ere na te mau hoho’a papa’i moni rahi, te mau vauvau fare, te mau tauhaa unauna moni rahi, te tahi atu mau faaunauna, te mau tauhaa faanehenehe fare moni, te mau faaapu, te mau nănă, te mau fare e te mau fenua o te faatupu i te hoê utuafare maitai, e ere atoa na te mau faaoaoaraa sotiare e te ohie o te mana’o etaeta e rave rahi; area râ, no te nehenehe o te varua, tei faaapuhia, tei herehia, tei faaroo, e te mau varua parau ti’a; te mau rima o te tauturu e te mau mafatu o te au maitai; te here o te imi ore no’na iho, te mau feruriraa e te mau ohipa o te haaputapu i to tatou oraraa no te mau uputa maitai—teie mau mea atoa e vai ïa i roto i te niu o te hoê utuafare maitai.⁴

I roto i te utuafare, ua horo’ahia te ti’a mana faatere i te metua tane.

Aita atu e mana teitei ae i ni’a i te mau mea i te faanahonahoraa utuafare, maori râ, mai te mea e peresidenihia taua faanahonahoraa râ e te hoê o tei mau i te Autahu’araa teitei, oia hoi, to te metua tane. Te mana mai te mea e faahanahanahia, e mai te mea i rotopu i te mau taata o te Atua i roto i te mau tau tu’uraa o te Evanelia ua faaturahia maitaihia e e mea pinepine i te haapapuhia e te mau haapiiraa a te mau peropheta o tei faaûrûhia e te Atua. Te faanahoraa paterealeha e tumu mo’a to’na e e vai noa te reira na roto i te mau tau e amuri noa’tu. Te vai nei, e te vaira te hoê tumu, e ti’a ai i te mau tane, te mau vahine e te mau tamarii ia maramarama i teie faanahoraa e teie mana i roto i te ti’araa o te mau taata o te Atua, e i te imi ia rave i ta te Atua e hinaaro nei, te hoê faataaraa e te hoê faaineineraa no te faateiteiraa rahi ae o ta’na mau tamarii. …

E amo teie mana i ni’a ia’na i te hoê hopoi’a, e hopoi’a papu maitai, oia atoa to’na mau tura e te mau faufaa taa ê, e mea ti’a i te mau tane ia ora ma te hoho’a maitai i roto i to ratou oraraa, e ia faaineine maitai ia ratou ia ora ma te ti’a e teie ture no te aratai i tu’uhia mai e te Atua i roto i te faanahonahoraa utuafare. I ni’a iho i teie mana i vaiihohia ai te mau fafauraa e ua tohuhia te mau haamaitairaa, e o ratou atoa o te haapao e o te faatura i taua mana râ, e nehenehe ïa ta ratou e titau i te tahi faufaa o tei ore e fariihia e ratou maoti râ, na roto i te faaturaraa e te haapaoraa i te mau ture o ta te Atua i faati’a ei avei’a e, ei mana i roto i te utuafare.⁵

Te hinaaro nei au … ia faaaehuehu i te feia faatere o te Ekalesia i te faufaa no te farereiraa i te mau metua tane i roto i te mau mea atoa i faaauhia no te mau piiraa o ta ratou mau tamarii tamaroa i roto i te Autahu’araa, e i te feia rave ohipa o te Ekalesia, te faatura e te faaturaraa o ta te tamarii e ti’a ia faaite no te mau metua, ia ore te reira ia haapeapeahia e te Ekalesia, eiaha atoa te feia faatere ia haere na ni’a ae i te reira. Na roto i te reira, e tu’uhia mai ïa te au maitai e te hinaaro ti’a no te paruru; te faautu’araa o te mau utuafare e te oraraa utuafare i ni’a iho i te reira te faatereraa o te Ekalesia i faani’uhia ai e, e no reira i amuihia mai ai i te mau piiraa o te Autahu’araa mo’a, te faaite papuraa i te tahoêraa, te puai e te mana i roto i ta’na mau ohipa atoa.⁶

E te mau metua tane, a faaoti i te taato’araa o ta outou ohipa i roto i to outou mau utuafare.

Mai te mea [te mau metua tane] te vaira te Varua o te Fatu i roto ia ratou a rave ai ratou i ta ratou mau ohipa no te pae tino nei, eiaha roa ratou e haamo’e i te mau metua vahine o ta ratou mau tamarii, tae noa’tu i ta ratou iho mau tamarii. Eiaha roa ratou e haamairi i te haapii ia ratou i te mau parau tumu o te oraraa e ia faaite i mua ia ratou te hoê hoho’a maitai. Eiaha roa outou e rave i te hoê ohipa ia parau outou i ta outou mau tamaroa, “Eiaha e rave i te reira”. A ora ia nehenehe outou ia parau e, “E ta’u tamaiti, a rave mai ta’u e rave nei, a pee mai ia’u, a rave i to’u hoho’a ei hi’oraa.” O tera te huru te ti’a i te mau metua tane ia ora, oia atoa o tatou tataitahi; e, e mea haama roa, e mea ino no te hoê melo o te Ekalesia ia rave i te hoê ohipa o ta’na i ite e, e ere i te mea maitai e i te ore hoi oia e hinaaro i ta’na mau tamarii ia pee atu. Eaha ïa ohipa haama na te hoê tane ia rave i ni’a iho ia’na i te hoê rahuiraa [opaniraa], te hoê faateiaharaa ia ore oia e faaoti i ta’na ohipa no te mau taata o te here nei ia’na e o te ti’a ia’na ia here, hau atu i to’na iho ora, na roto i te faati’a ohieraa i te mau hiaai e ere i te mea ti’a, te mau hinaaro puai o tei faatumuhia, e i te raveraa i te mau ohipa te ti’a ia ore e ravehia, e i te opaniraa i ta’na mau tamarii ia ore ia rave i te reira. A rave i ta outou ohipa, e to’u mau taeae, e e rave ïa te Fatu i Ta’na no outou.⁷

E te mau taeae, e mea iti roa te faatereraa faaroo, te here e te mata’u i te Atua, i roto i te utuafare; ua rahi roa te ohipa o teie nei ao, te haapaoraa ia’na iho, te oreraa e tau’a e te faatura ore i roto i te utuafare, e aore râ, e mea ti’a roa ia ore teie mau mea ia tupu rahi i rapae mai. No reira, e mea ti’a i te mau utuafare ia faatitiaifarohia. A tamata i teie mahana, e ananahi, i te faatupu i te hoê tauiraa i roto i te utuafare na roto i te pureraa e piti taime i te mahana e to outou utuafare; a ani i ta outou mau tamarii e ta outou mau vahine ia pure i pihai iho ia outou. A ani i te haamaitairaa i ni’a i te mau ma’a o ta outou e amu mai. A rave hoê ahuru minuti no te tai’o hoê ae pene no roto mai i te mau parau a te Fatu i roto i te Bibilia, te Buka a Moromona, e te Parau Haapiiraa e te Mau Parau Fafau, hou outou a faarue mai ai, e aore râ, hou outou a haere ai i ta outou ohipa i te mau mahana atoa. A faaamu i to outou pae varuaraa i te fare, oia atoa i te mau vahi e haerehia e te taata. A tu’u i te here, e te hau e te Varua o te Fatu, te maitai, te aroha, te faatusiaraa no vetahi ê, ia rahi i roto i to outou mau utuafare. A faaore i te mau parau teiaha, te nounou, te feii, te parauraa i te parau ino, te parau faufau e te faaino, te faaianaina [tuhi], e a vaiiho i te Varua o te Atua ia tomo i roto i to outou mau aau. A haapii i ta outou mau tamarii i teie mau mea, na roto i te varua e te mana, ma te paturuhia e te faaitoitohia e te rave’a taata iho. A faaite ia ratou e, te haapao maitai nei e te rave papu nei outou i te mea o ta outou e haapii nei.⁸

Te pure nei au no outou e te pure nei au i te Atua ia tauturu ia outou, e te mau metua tane e te mau metua vahine, ia haapii i ta outou mau tamarii i te mau parau tumu e i te mau ture o te Evanelia a Iesu Mesia, ia nehenehe ia ratou ia tupu i te paari ma te hara ore e tae atu i te ora. Te pure nei au ia tauturu mai te Atua ia outou ia haapii i ta outou mau tamarii i roto i te here o te parau mau, i roto i te here o te viivii ore, ia upooti’a i te mau ma’i maue o te mau hara o te ao nei, ia upooti’a i te mau viivii, ia upooti’a i te inuraa ava, ia upooti’a i te puhipuhiraa avaava, ia upooti’a i te mau inu puai e te mau raau taero, e te mau ino aita e nehenehe ia faata’a; ia haapii outou ia ratou ia vai mâ noa i roto i to ratou oraraa—i roto i ta ratou mau peu, ia riro ratou ei mau hiero mo’a ei reira te Varua o te Atua ora e faaea ai e i reira atoa e roaa ai te nohoraa au maitai. O ta outou tera ohipa, e e ohipa na’u, e e ohipa na te mau taata tataitahi o te ora nei, ia haapii i to’na utuafare i teie mau mea, e ia aratai ia ratou i te e’a o te ti’a ia ratou ia haere.⁹

Ia ora maitai te mau metua tane o Iseraela e ti’a ai; a poihere i ta ratou mau vahine mai te au i ta ratou e poihere ra ia ratou iho; a faariro i to ratou mau utuafare ei mau utuafare maitai mai te peu e nehenehe; a haamămă i te mau hopoi’a a to ratou mau hoa mai te mea e nehenehe; a horo’a i te hi’oraa maitai i mua i ta ratou mau tamarii; a haapii ia ratou ia amui e te mau metua i roto i te pure, i te poipoi e te ahiahi, e ia parahi anae ratou i raro no te tama’a, ia haamana’o i te maitai o te Atua no te horo’araa mai na ratou i te maa o ratou e amu râ e i te ahu o ta ratou e ahu râ, e ia haamana’o i te rima tauturu a te Atua i roto i te mau mea atoa.¹⁰

E mea opuahia te mau faanahonahoraa utuafare no te tau e amuri atu.

O te Atua te upo’o o te taata nei; e hi’o tatou ia’na ei Metua no te taato’araa. Aita atu e mea e faaoaoa rahi ai tatou ia’na maori râ, na roto i te haapaoraa e te faaturaraa e i te faahanahanaraa i to tatou mau metua tane e to tatou mau metua vahine, o ratou hoi te tumu o to tatou nei oraraa i ni’a i te fenua nei.¹¹

Ua faatumuhia te faanahonahoraa utuafare i ni’a i te niu o te faatereraa parau ti’a atoa, e eita e nehenehe ia tu’u i te mana no te faateimaharaa i ni’a i te faufaa o te faatereraa i roto i te utuafare tei riro ei utuafare maitai roa, eiaha atoa i ni’a i te hoê ohipa i roto i te mau mea taato’a i tupu tei faaturahia no te faatereraa i roto i te utuafare o te ti’a ia faateiteihia.¹²

Aita ta tatou mau amuiraa [utuafare] i opuahia no teie noa oraraa, no teie noa taime, mai ta tatou i ite mai te mure ore mai. Te ora nei tatou no teie tau e no te mau tau e a muri atu. E faanaho tatou i te mau amuiraa e te mau taatiraa no teie tau e no te mau tau e a muri atu. To tatou mau here e to tatou mau hinaaro ua vai ïa i te vairaa mau e ua faaineinehia ia vai eiaha noa no teie oraraa pae tino nei e aore râ, no te oraraa tahuti nei, area râ, no te mau tau e a muri atu. O vai atu â eiaha ra i te Feia Mo’a i te Mau Mahana Hope’a Nei o te hi’otutonu i te iteraa e, i ô atu i te menema, e ora noa tatou i roto i te fanahonahoraa utuafare? te metua tane, te metua vahine, te mau tamarii ma te ta’a i te tahi e te tahi i roto i te mau taatiraa o ta ratou i tarahu te tahi i te tahi e o ta ratou i ti’a no te tahi e te tahi? teie faanahonahoraa o tei riro ei tumu i roto i te faanahonahoraa rahi e te maitai o ta te Atua ohipa, e o tei faata’ahia no te haere tamau noa na roto i te mau tau e amuri atu?¹³

Te vai ta’u fafauraa hanahana no te taatiraa o ta’u mau here na roto i te mau tau e amuri atu. Na roto i te haapaoraa i teie ohipa, i roto i te Evanelia a Iesu Mesia, e haaputuputu vau i pihai iho ia’u to’u utuafare, ta’u mau tamarii, te mau tamarii a ta’u mau tamarii, e tae roa’tu e, ua rahi roa ia au i te mau huero o Aberahama, e aore râ, e ore e nehenehe ia tai’ohia mai te one tatahi râ. No te mea o teie to’u tura e ta’u faufaa taa ê, e te tura e te faufaa taa ê o te mau melo tataitahi o te Ekalesia a Iesu Mesia i te Feia Mo’a i te Mau Mahana Hope’a Nei o tei mau i te Autahu’araa e o te faaohipa nei i mua i te aro o te Atua.¹⁴

I muri mai i te reira, no te rave maitairaa i te mau mea o ta te Atua i faati’a ia riro ei tahoêraa no te taata taato’a, e parau mau roa ïa. Ia riro ei metua tane manuia e aore râ, ei metua vahine manuia e mea hau ae ïa i te riroraa ei tenerara manuia e aore râ, ei taata ti’araa rahi manuia i roto i te hau.¹⁵

Mana’o Tauturu i te Haapiiraa

Eaha mau te “tumu matamua”o te mau metua tane i roto i te utuafare? Nahea te atuaturaa i te utuafare e faatae ai i ô atu i te oraraa pae tino no te oraraa pae varua? Nahea te hoê metua tane ia patu i te mana’o no “te tao’a no te varua” i roto noa i to’na utuafare?
Eaha te mau ohipa tumu o te “vai i roto i te niu o te hoê utuafare maitai”? No te aha i riro ai ei hopoi’a na te metua tane ia ite e, e faarahihia nei teie mau mea?
Nahea te mau vahine faaipoipo e te mau tamarii ia paturu i te upo’o o to ratou utuafare? Eaha ta te mau tane faaipoipo e te mau metua tane e rave ei taata parau ti’a, no te farii i teie patururaa no ô mai i te mau melo o to ratou mau utuafare?
Mea nahea to te Fatu horo’araa i te mau haamaitairaa o te autahu’araa no te mau vahine otahi?
Nahea te mau metua tane ia faaitoitohia e te mau utuafare i te haamaitaihia mai te mea e farereihia e e faaturahia e te feia faatere o te autahu’araa?
Eaha te mau mea o te ti’a ia faatitiaifarohia i roto i to tatou mau utuafare i teie mahana? Eaha ta te mau metua tane e nehenehe ia rave no te faaore i te peu o te ao nei e i te faata’a i te haapao i te faaroo i roto i te utuafare?
Eaha te mau haamaitairaa o ta tatou e farii no te mea ua ite tatou e, e nehenehe to tatou taatiraa utuafare e haere tamau noa e tae atu i te ora mure ore? Eaha ta te mau metua tane e nehenehe ia rave no te haapapu i te ora mure ore i roto i to ratou iho mau utuafare?

Ua vaiiho mai o Hyrum Smith, te metua tane o te Peresideni Iosepha F. Semita, i te hoê hi’oraa maitai e ti’a i te vairaa, i ta’na tamaiti, noa’tu e, e pae anae iho o to’na matahiti i te taime a taparahi pohe-roa-hia ai Hyrum.