Pene 45: E Hopoi mai te Evanelia i te Hau i te Ao nei i roto i te mau Taime Peapea

Pene 45

E Hopoi mai te Evanelia i te Hau i te Ao nei i roto i te mau Taime Peapea

E hopoi mai te Evanelia a Iesu Mesia i te hau i te ao nei i roto i te mau taime peapea.

Aamu o te Oraraa o Joseph F. Smith

I te mau matahiti hou to’na poheraa, ua oto pinepine te Peresideni Iosepha F. Semita i te mau mauiui tei tuati i te Tama’i Matamua o te Ao nei. E rave rahi mau melo o te Ekalesia i amui atu i roto i te tama’i i roto i mau pae patoi e e rave rahi hanere o tei pohe. E rave rahi mau tamaroa a te Peresideni Smith tei tavini i roto i te nuu faehau, e ua pepe e piti taime hoê o ratou i roto i te aroraa.

I roto i te parau poro’i o Noela i te Mau Feia Mo’a i taua taime râ, ua parau te Peresideniraa Matamua e: A poupou i te fanauraa o te Faito Ore, ua haamarumaruhia te maramarama o to tatou oaoa e te mau ata o te tama’i o tei faaereere i te ra’i o Europa, e ta tatou mau himene e te mau faaturaa o te oaoa e te au o te taata nei, ua faaotohia ïa e te amahamaha a te mau patiri o te pupuhi e te aue o tei pepe e o tei pohe, tei faroohia mai te atea mai, area râ, ua putapu i roto i to tatou aau a haruru mai ai te mau parau apî riaria na te maona. E ti’a mai te mau nuna’a i ni’a i te tahi mau nuna’a, te mau taeae i te tahi mau taea’e, te mau ‘Keresetiano’ i te tahi mau ‘Keresetiano’, ma te titau i te tauturu i te Atua o te here i roto i ta ratou aroraa faataheraa toto ma te ani i te aupururaa i te Arii o te Hau! Aue ia hi’oraa i te mata’u tei faaitehia i mua i te mau melahi manihini, i te hoê pùpù hauti upaupa o tei faaoto i te himene tahuti ore ‘ei hau to teie nei ao’ i te fanauraa o te aiu iti o Betelehema!”¹

Ua ora te Peresideni Smith no te faaroo i te mau parau apî o te himene o te hauraa o te tama’i o te afai mai i te hopearaa i te mau aroraa e te haamouraa o te ora e o te mau vahi nohoraa. Ua tarimahia te hauraa o te tama’i i te 11 no Noema 1918, e vau noa iho mahana hou to’na poheraa.

Ua hapii oia i te Feia Mo’a i roto i taua taime râ e, e tae mai te hau mau na roto i te fariiraa e te oraraa i te Evanelia a Iesu Mesia. Ua parau Joseph Fielding Smith o tei riro ei Peresideni no te Ekalesia i muri mai no ni’a i to’na metua tane: “E varua maitai e te hau to’na. Te hoê varua au maitai roa, te hoê o tei mauiui e tei mauiui, o tei hinaaro rahi i te tauturu i tei hinaaro mai i te tauturu no te amo i ta’na hopoi’a, e tei faateimahahia ia ti’a mai i ni’a, aita roa ia te reira i itehia i rotopu i te mau melo o te Ekalesia. Ua riro oia ei faatupu hau, e e taata tei here i te hau.”²

Te Mau Haapiiraa a Iosepha F. Semita

Na te Evanelia ana’e a Iesu Mesia e hopoi mai i te hau i roto i te ao nei.

Hoê noa mea o te hopoi mai i te hau i roto i te ao nei. O te tavairaa ïa i te Evanelia a Iesu Mesia, ia ta’a maitai, ia haapao e ia faaohipahia e te feia faatere e te mau taata mai te reira atoa te huru. Ua porohia te reira na roto i te mana i te mau nuna’a, te mau opu, te mau reo e te mau taata atoa o te ao nei e te Feia Mo’a i te Mau Mahana Hopea Nei, e aita i atea roa taua mahana râ e tomo hohonu ai teie parau poro’i no te ora i roto i te aau o te mau taata riirii, ma te haavare ore e te mana’o paari, ia tae mai taua taime râ, ia ore ratou e tapa’o noa i ta ratou haavaraa no te hape o te Keresetiano, area râ, no te tama’i e te feia o te hinaaro i te tama’i ei hara no te faahapa i te taata nei. E rave rahi matahiti, ua ti’aturihia e, e tae mai te hau na roto i te faaineineraa no te tama’i; e mea ti’a i te mâroraa o teie mahana [Tama’i 1o te Ao nei] ia faaite papu e, e tae mai te hau na roto i te faaineineraa i te hau, na roto i te haapiipiiraa i te mau taata i roto i te parau ti’a e te atatia, e i te maitiraa i te feia faatere o te faatura nei i te hinaaro parau ti’a o te mau taata.³

Te hinaaro nei tatou i te hau i roto i te ao nei. Te hinaaro nei tatou i te here e te parau ti’a ia vai mai i te fenua nei, e i rotopu i te mau taata atoa o te ao nei; area râ, eita roa e nehenehe i te varua o te hau e o te here ia tae mai i te ao nei o te ti’a ia vai, maori râ, ia farii te taata nei i te parau mau a te Atua e te parau poro’i a te Atua, e ia ite i farii i to’na puai e to’na mana tei riro hoi ei mea hanahana, e o te ore roa e iteahia i roto noa i te paari o te taata nei.⁴

Ua here te Atua i te hau. Te parau haapiiraa a te Faaora o te taata nei oia hoi “E hau to teie nei ao, e ia ite auhia mai te taata nei,” e here, e here haavare ore. Te ture o tei hau i te rahi o te mau ture atoa o tei ore i horoahia’e nei i te mau tamarii a te taata nei oia ia: “Hinaaro oe i to Atua ia Iehova ma to aau atoa, e ma to varua atoa, e ma to mana’o atoa. O te ture matamua teie e te hau i te rahi. E mai te reira atoa te piti, E aroha’tu oe i to taatatupu mai to aroha ia oe iho na. Te ture atoa e te mau peropheta, tei teie nei ïa pue ture e piti nei.” [Mataio 22:37–40.] Ahiri ua vai nâ teie varua o te here i rotopu i te mau nuna’a o te fenua nei, teie parau tumu o te Evanelia a Iesu Mesia; ahiri teie a’oraa hanahana i tu’uhia i roto i te aau e te feia faatere o taua mau nuna’a râ, aita roa e tupu te tama’i, aita roa e faataheraa toto, aita roa e tupu te faainoraa e te vahi pau e te mau huru ino o te vai nei i teie mahana. No te mea, aita ta te mau taata o te ao nei e Evanelia. No te mea, aita ratou e haapao nei i te parau mau. No te mea, aita ta ratou e Mesia, e no reira ua vaiiho noahia ratou ia ratou ana’e râ, e te hopea o ta tatou e ite, oia ïa te mau hopea no to ratou haapao ore e o ta ratou iho mau ohipa ino.

Te vai nei hoê na’e iho mana, e, hoê noa iho, o te nehenehe ia tape’a i te tama’i i te tahi mau nuna’a o te fenua nei, o te haapaoraa mau e te viivii ore i mua i te Atua, te Metua. Aita roa te hoê mea e nehenehe ia faaoti i te reira. … Area râ, te vai nei te hoê paruru o te nehenehe ia tape’a i te taata ia haere i te tama’i, mai te mea e, ua ineine oia no te rave i te reira, o te Varua ïa o te Atua, o te faaûrû ia here, eiaha ra i te feii, o te arata’i i te parau mau, eiaha ra i te hape, o te turai i te mau tamarii a te Atua ia faatea ia’na e i ta’na mau ture, e ia faateitei ia ratou i ni’a a’e i te mau mea atoa o teie ao.

Ua parau mai te Fatu ia tatou … e tae mai te mau tama’i. Aita hoi tatou i vai poiri noa e, e vai tia’i noa ratou, e tupu taue noa mai ratou i ni’a i te mau nuna’a o te fenua i te hoê taime mana’oore-hia. Te tia’i nei tatou i te tupuraa o te mau parau a te Fatu e e tae mai ratou. No te aha? No te mea ua hinaaro te Fatu? Aita; aita roa ïa. No te mea e, ua tohuhia e te Fatu, e aore râ, ua faata’ahia, i roto i te hoê faito? Aita, aita roa. No te aha ra? Te tumu no te mea, aita te mau taata i haapao i te Fatu te Atua, e ua ite oia i te mau hope’a o te tae mai i muri iho, o te taata hoi te tumu, e o te mau nuna’a hoi o te fenua; e no reira ua ti’a ia’na ia tohu i te mau mea o te tupu i mua ia ratou, e o te tupu i ni’a ia ratou no ta ratou iho mau ohipa, eiaha râ e, ua opua oia i te tu’u mai i te reira i ni’a iho ia ratou, no to ratou hoi huru area râ, te oto râ e te ta’i râ i te mau hopea o ta ratou iho mau ohipa.

… “E hau to teie nei ao, e ia ite auhia mai te taata nei,” o ta tatou ïa poro. O ta tatou ïa parau tumu. O te parau tumu ïa o te Evanelia a Iesu Mesia. E a feruri ai au e, e mea hape, e mea hape ino roa, ia turu i te tama’i i roto i te mau nuna’a tataitahi, e aore râ, i ni’a i te mau taata tataitahi, te ti’aturi nei au e, e mea ti’a e e mea tano i te mau taata tataitahi ia paruru i to ratou iho ora e to ratou iho mau tiamâraa, e to ratou iho mau utuafare, i te topata hope’a o to ratou toto. Te ti’aturi nei au e, e mea tano, e te ti’aturi nei au e, e paturu te Fatu i te mau taata tataitahi a paruru ai ratou i to ratou tiamâraa no te haamori i te Atua ia au i to ratou iho hinaaro, te huru o te taata o te tamata i te faaherehere i ta ratou mau vahine e ta ratou mau tamarii i te mau pau o te tama’i. Area râ, aita tatou e hinaaro nei ia tu’uhia tatou i ni’a i te faito no te parururaa ia tatou iho.⁶

Ia pii ana’ehia no te tavini i roto i te nu’u faehau, ia ti’a ia oe ia paruru ia oe iho ia ore oe ia viivii i te mau mea o teie nei ao.

Ua faaitoito vau i to’u mau hoa … ia faateitei i ni’a i te mau mea atoa, te varua o te taata, o te here, e te faatupuraa i te hau, noa’tu e, e piihia mai ratou no te haere e aro, eiaha ratou e vavahi, e taataahi e e haamou i te mau parau tumu o ta tatou e ti’aturi nei, o ta tatou i tamata i te haapii, e o tei a’o-hia ia ratou ia tape’a maite: ei hau to teie neiao, e ia ite auhia mai te tata nei, noa’tu e, e faaû atu tatou i te enemi. Te hinaaro nei au i te parau i te Feia Mo’a i te Mau Mahana Hopea Nei o tei tapa’ohia, e o te titauhia mai hoi ta ratou mau taviniraa, e ia riro ana’e ratou ei mau faehau no te Oire e no te Hau, eiaha ia mo’ehia ia ratou e e mau faehau atoa ratou no te Tasauro, e e mau orometua ratou no te ora eiaha râ no te pohe; e a haere ai ratou i mua, ia haere na roto i te varua o te parururaa i te mau tiamâraa o te taata nei, eiaha râ no te opua i te haamou i te enemi.⁷

Ta tatou mau tamaroa … ia pii ana’ehia ratou i roto i te nu’u faehau … , te ti’aturi nei e te pure nei au e, e taitai ratou na muri ia ratou te Varua o te Atua, eiaha râ te varua no te faataheraa toto, no te faaturi, no te ino, area râ, te varua no te parau ti’a, te varua o te arata’i no te raveraa i te mea maitai, no te paturaa, no te maitai o te ao, eiaha râ no te haamou e no te faatahe i te toto.

A haamana’o i te papa’iraa mo’a … i roto i te Buka a Moromona, no ni’a iho i te mau taurearea o tei patoi i te tama’i e te faataheraa toto, tei ora viivii ore noa e te mâ, o tei tiamâ i te mana’o faaino o te mâro, o te riri, e aore râ, o te ino i roto i te aau; area râ, ia titau-ana’e-hia mai te hoê tumu, e ia piihia ratou no te haere e paruru i to ratou ora, e te ora o to ratou mau metua tane e to ratou mau metua vahine, e to ratou mau utuafare ia haere ratou—eiaha no te haamou area râ, no te paruru, eiaha no te haamanii i te toto area râ, no te faaora i te toto o tei hara ore e o tei ore e imi mai i te peapea, e te mau taata o te here i te hau o te taata nei [a hi’o Alama 56:45–48].

E haamo’e anei teie mau taata ia haere ana’e ratou i rapae i te … Ekalesia a Iesu Mesia i te Feia Mo’a i te Mau Mahana Hopea Nei i to ratou mau pure? E haamo’e anei ratou i te Atua? E haamo’e anei ratou i te mau haapiiraa o ta ratou i farii mai to ratou mai mau metua i roto i to ratou mau utuafare? E haamo’e anei ratou i te mau parau tumu o te Evanelia a Iesu Mesia e te mau fafauraa o ta ratou i rave i roto i te pape o te bapetizoraa, e i roto i te mau vahi mo’a? E aore râ, e haere anei ratou i rapae mai te huru tane mau, i roto i te mau huru atoa—ei mau taata viivii ore, ei mau taata tura, ei mau taata parau ti’a, ei mau taata haapao maitai, ei mau taata no te Atua? O teie te mea o ta’u e mata’u nei.

Te hinaaro nei au ia ite i te rima o te Atua ia arata’i i te mau ohipa o te mau taata o te haere nei e aro mai roto atu i te mau reni o te Ekalesia a Iesu Mesia … no te tauturu i te parururaa i te mau parau tumu o te tiamâraa e ia faatere i te utuafare o te taata nei. Te hinaaro nei au ia ite ia ratou ia ora ia nehenehe ia ratou ia aparau e te Fatu, i roto i to ratou mau puhaparaa, e i roto i to ratou mau vahi mo’emo’e, e i rotopu i te tama’iraa, ia nehenehe ratou ia parau e: “E te Metua e, to’u ora e to’u varua tei roto ïa i to oe na rima!”

Te hinaaro nei au ia ite i te mau tamaroa o te haere mai unei atu no teie tumu, ia haere mai te huru o ta tatou mau misionare a tonohia ai ratou i roto i te ao, ma te apeehia ratou e te varua o ta te hoê metua vahine e farii a faata’ahia ai oia e ta’na tamaiti, i te poipoi o to’na revaraa no ta’na misioni. E tauahi oia ia’na i te here atoa o te aau o te metua vahine.

… Mai te mea e haere atu ta tatou mau tamaroa i roto i te ao nei mai teie te huru, ma te taitai na muri ia ratou te varua o te Evanelia e te haapao maitai o te Mau Feia Mo’a i te Mau Mahana Hopea Nei, noa’tu eaha te mea e tupu mai i ni’a ia ratou i roto i te oraraa nei, e faaoromai ratou. E nehenehe ia ratou ia faaoromai rahi roa ia au i te faaoromairaa a te hoê noa’tu taata i te taime rohirohi e aore râ, te oto mai te mea e ti’a, e ia tamatahia ratou e upooti’a mau â ratou! No te mea aita to ratou e riaria i te pohe! E tiamâ ratou i te riaria o te mau hopea o to ratou iho oraraa. Aita e faufaa no ratou ia mehameha i te pohe, no te mea ua rave ratou i ta ratou ohipa; ua tape’a ratou i te faaroo, e ua mâ to ratou aau, e e mea tiamâ ratou no te farerei i te Atua!⁸

Ua matauhia e rave rahi ino e farereihia i muri mai i te hope’a o te nu’u faehau tei faaterehia e te mauihaa faaineine-mau-hia e o tei faaô i roto i te tama’i, o te mea ino-roaatu ïa i te pohe hanahana o te tae mai i roto i te mâroraa o te tama’i. Aita e tau’a-roahia mai te mea e piihia te mau taurearea, e aore râ, i hea roa ratou e haere ai, area râ, e mea tau’ahia te reira e to ratou mau metua, to ratou mau hoa, e ta ratou mau haaputuputuraa o te parau mau, e ia ratou iho hoi, nahea ratou ia haere. Ua haapiipiihia ratou i roto i to ratou oraraa ei mau melo no te Ekalesia ia paruru ia ratou iho ia ore ratou ia viivii i te mau mea no teie nei ao, ia faatura i te ti’araa o te tahi, ia haapao i te mau parau tumu ti’a, ia haamana’o e te parau faufaa rahi o te tao’a rahi ïa no ô mai i te Atua. Hau atu â, ia faatura ratou i te faufaa rahi o vetahi ê e ia ore e pohe tauasini taime i te haaviiviiraa ia ratou iho na roto i te raveraa i te hara pohe. Te hinaaro nei tatou ia haere ratou na roto i te a’o, oia hoi i roto i te mana’o e te ohipa, na roto i te faaroo i te mau parau tumu o te Evanelia e te faaoraraa maitai a to tatou Fatu e Faaora. E faahaamana’o tatou ia ratou e na roto noa i te a’o e te oraraa faaroo e nehenehe ai ia ratou ia ti’aturi e e tae i te ora i fafauhia mai na roto i te faataheraa toto o to tatou Faaora.⁹

Te tutava nei tatou i te ora mai te hau e te mau taata taato ‘a

Te a’o nei matou i te Mau Feia Mo’a ia ora i ta ratou haapaoraa; ia haapao i ta ratou mau fafauraa o ta ratou i rave i roto i te pape o te bapetizoraa; ia faahanahana i te Fatu e ia haapao i Ta’na mau faaueraa; eiaha ia faaterehia e te mau nevaneva o teie ao, area râ, ia imi i te arata’iraa a te Varua Mo’a, [e] a ora hau ai e te mau taata atoa.¹⁰

Te ani mai nei te matahiti apî e te mau matahiti i muri nei i te mau taata o te mau fenua atoa ia tahoê i roto i te faatupuraa i te hau e te faatupuraa i te au taea’eraa atoa. E mea ino te mâro, te auore, te piripiri, te taiata, e ia faaore-roa-hia i roto i te oraraa o te taata hoê. E ere te taata i te mea riirii noa e aore râ, i faufaa ore no te tauturu atu. A tu’u i te taata tataitahi ia here i to’na taata tupu mai ta’na e here ia’na iho e te mau fifi o teie nei e hemo ia, e faaarahia mai te mau ati o te mau mahana i muri nei, e e “farerei te mau taata taatoa i te mau vahi atoa i te hoê taea’e e te hoê hoa.”

Te hoê faahoho’araa no te oraraa maitai e te aupururaa hanahana, ua horo’ahia mai ïa i te ao nei a piti ahuru tenetera i mairi a’e nei na roto mai ia Iesu Mesia. Ta’na parau poro’i o te hau ïa e ia ite auhia mai te taata nei. Ua faaniuhia ta’na ture i ni’a i te parau ti’a tei faaohipa paarihia e tei rave maramaramahia. Ua riro te maramarama ei ture arata’i No’nae te parau mau Ta’na ia parau tumu.¹¹

I roto i te riri maha ore o to te “taata nei aau aroha ore i te taata,” tei faaitehia i roto i te aroraa riaria i rotopu i te mau nuna’a o te mata’u noa nei, te farii nei matou i te mau tumu o te riro ei oaoaraa e ei haamauruururaa, e ia hi’o na roto atu i te feaa o te tama’i riaria i te faaotiraa e te papuraa o te mau fafauraa o te hau tamau, a fatata mai ai te taeraa mai o to tatou Fatu e Arii.¹²

Te … paturu papu nei au i teie parau tumu, tei roto i te parau mau i te Evanelia a Iesu Mesia, te puai o te faaoraraa, te puai o te hau, te puai o te au o te taata nei, te here, te aroha e te faaoreraa hara, e te puai o te aupururaa i pihai iho i te Atua, tei roto ïa i te Evanelia a Iesu Mesia e i roto i te haapaoraa i te reira ei tuhaa na te taata. Te faati’a nei au, e eiaha no te faati’a noa area râ, te haapapu nei au e, aita atu e mea rahi a’e i ni’a i te fenua nei, aita atoa i ni’a i te ra’i, te parau mau o te Evanelia a te Atua o tei horo’ahia e o tei faaho’ihia mai no te ora e te faaoraraa o te ao nei. E na roto i te reira e tae mai ai te hau i te tamarii a te taata nei, e aita te reira e tae mai i te ao nei na roto i te tahi atu rave’a.¹³

Mana’o Tauturu i te Haapiiraa

No te aha e na te Evanelia ana’e a Iesu Mesia e hopoi mai i te hau i roto i te ao nei? Eaha ta tatou e rave no te tauturu i te hopoiraa mai i te hau i roto i te ao nei?
Ihea roa te hau e haamata ai? Mea nahea te faaturaraa i na faaueraa rahi e piti e arata’i ai i te hau i roto i te utuafare e i te mau vahi tapiri?
Nahea e nehenehe ai ia ratou o te tavini nei i roto i te nu’u faaehau e riro ai ei “mau orometua no te ora eiaha râ no te pohe”?
Nahea e nehenehe ai i te mau melo ia afai na muri ia ratou i roto i te taviniraa i te nu’u “te varua o te Evanelia e te haapao maitai o te Mau Feia Mo’a mau”?
Ia pii ana’ehia te mau melo ia tavini i roto i te nu’u faehau, eaha te mau ti’aturiraa e te mau huru o te tauturu ia ratou ia ore e riaria i te pohe?
Eaha te nehenehe ia tatou tataitahi ia rave ia “ora ma te hau e te mau taata taatoa”?
Eaha ta te hi’oraa a te Faaora i haapii ia tatou no ni’a i te orara ma te hau e te au o te taata nei?

Two Thousand Stripling Warriors — E Piti Tauasini Taurearea Faehau, na Arnold Friberg, ua papa’i Helamana no te mau taurearea o ta’na i arata’i i roto i te aroraa: “Ua rahi hoi to ratou mana’o i te tiamâ o to ratou ra mau metua i to ratou iho ora; oia ïa, i haapiihia na hoi ratou e to ratou mau metua vahine, ia ore ratou ia feaa, e faaora te Atua ia ratou” (Alama 56:47).