15. Selikō

ʻOku hā ʻi he tā ko ʻení ʻa e ngaahi ʻakau ʻoku tupu he ʻahó ni ʻi Selikoó. Ko ha kolo ia naʻe ʻaaʻi ʻi he kuonga muʻá ʻi he teleʻa ʻo e Vaitafe Soataní, ʻa ia ʻoku mita ʻe 252 māʻulalo hifo ʻi he fukahi tahí. Ko ha feituʻu mahu ia ʻi he ngaahi meʻa fakangoué, ʻa ia ʻoku moʻui mo fua lahi ai ʻa e paame teití mo e sitilasí (ʻakau hangē ko e molí). ʻOku hā mei mui ʻa e moʻunga ʻoku pehē ko e Moʻunga ʻo e ʻAhiʻahí (Mātiu 4:1–11).

Ngaahi Meʻa Mahuʻinga naʻe Hoko aí: Naʻe kolosi ʻa Sosiua mo e fānau ʻa ʻIsilelí ʻi he Vaitafe Soataní ʻi heʻenau hū mai ki he fonua ʻo e talaʻofá ʻo ofi mai ki he feituʻu ko ʻení (Sosiua 2:1–3; 3:14–16). Naʻe ngaohi ʻe he ʻEikí ʻi ha founga fakaofo ke holo ʻa e ngaahi ʻā ʻo e koló ki muʻa ʻi he ʻao ʻo e kau tau ʻa ʻIsilelí (Sosiua 6; vakai foki ki he Hepelū 11:30). Naʻe fakamalaʻiaʻi ʻe Sosiua ʻa e koló (Sosiua 6:26), pea naʻe fakahoko ia (1 Ng. Tuʻi 16:34). Naʻe toe fakamoʻui ʻe ʻIlaisa ʻa e ngaahi vai ʻo Selikoó (2 Ng. Tuʻi 2:18–22). Naʻe fou mai heni ʻa e Fakamoʻuí ʻi Heʻene fononga fakaʻosi ki Selusalemá, ʻo ne fakamoʻui ai ʻa e tangata kui ko Patimiusí, pea nofo mo Sākeasi ko e tangata tānaki tukuhaú (Maʻake 10:46–52; Luke 18:35–43; 19:1–10). Naʻe kau ʻa e hala ki Selikō mei Selusalemá ʻi he talanoa fakatātā ʻo e Tangata Samēlia Leleí (Luke 10:30–37). (Vakai, FFL Selikō.)