4. Kātesi-pānia

Ko ha vakai fakatokelau-hahake atu ʻeni ki he fuʻu teleʻa toafa lahi (ʻa ia naʻe toe ui ko e uatí), ʻa ia ʻoku tuʻu ai ʻa Kātesi-pānia. ʻOku hanga ʻe he vaitafe ʻoku tafe mai heni ʻi he faʻahitaʻu ʻuhá ʻo ngaohi ʻa e feituʻu ko ʻeni ʻi he toafa Siní ke hoko ko ha feituʻu maʻuiʻui mo kelekele moʻui.

Ngaahi Meʻa Mahuʻinga naʻe Hoko aí: Mahalo ko e feituʻu ʻeni naʻe fekauʻi atu mei ai ʻe Mōsese ʻa e kau tangata ʻe toko 12 ke mataki ʻa e fonua ko Kēnaní (Nōmipa 13:17–30). Naʻe hoko ia ko e ʻapitanga tuʻu maʻu ʻo e kakai ʻIsilelí lolotonga ʻa e taʻu ʻe 38 ʻo e taʻu ʻe meimei 40 ʻo ʻenau fefonongaʻaki holo ʻi he toafá (Teut. 2:14). Naʻe mate pea tanu heni ʻa Meliame (Nōmipa 20:1). Ko e feituʻu ʻeni naʻe hoko ai ʻa e angatuʻu ʻa Kolá, pea lāunga ai ʻa e kakaí, pea mo e moto ʻo matala ʻa e tokotoko ʻo ʻĒloné (Nōmipa 16–17). Naʻe ofi mai ki he feituʻu ko ʻení ʻa e fuʻu maka ko ia naʻe taaʻi ʻe Mōsese ʻo puna mei ai ʻa e vaí (Nōmipa 20:7–11).