ʻOku tuʻu ʻa Kapaneume ʻi he kauvai tokelau ʻo e Tahi ʻo Kālelí, pea ko e feituʻu mahuʻinga ia ki he ngāue fakafaifekau ʻa Sīsū ʻi Kālelí (Mātiu 9:1–2; Maʻake 2:1–5). Ko ha taulanga mahuʻinga mo lelei ia ki he toutaí pea mo e feituʻu fakakomēsiale mahuʻinga ia, pea naʻe nofo ai ʻa e kau Senitaile mo e kau Siu fakatouʻosi. Mahalo naʻe ʻikai tokolahi ange ʻi he kakai ʻe toko 1,000 ʻa e tokolahi ʻo e kakai ʻi ai ʻi he senituli ʻuluakí. Naʻe tuʻu ʻa Kapaneume ʻi he fetaulakiʻanga ʻo e ngaahi hala fefakatauʻaki mahuʻinga, pea maʻuiʻui mo moʻui ʻa e kelekele naʻe ʻātakaiʻi iá. Naʻe hanga ʻe he kau sōtia Lomá ʻo langa ha ngaahi fale kaukauʻanga mo e ngaahi fale tukuʻanga koloa ʻi heni. Neongo ʻa e ngaahi mana lahi naʻe fai ʻi hení, ka naʻe hanga ʻe he tokolahi ʻo e kakaí ʻo fakafisinga ʻa e ngāue fakafaifekau ʻa e Fakamoʻuí. Naʻe hanga ai ʻe Sīsū ʻo fakamalaʻiaʻi ʻa e koló (Mātiu 11:20, 23–24). Naʻe ʻikai fuoloa kuo fakaʻauha ʻa Kapaneume pea ʻoku ʻikai ke toe nofoʻi ia.