21. Teleʻa Sesililí
Hanga fakatongahihifo mei he tumutumu ʻo e Moʻunga Tēpoá ki ha konga ʻo e Teleʻa Sesililí, ʻoku ʻiloa foki ko e Tokalelei ʻo ʻEsituleiloní. Neongo ʻoku lau ʻa e Teleʻa Sesililí ko ha fuʻu teleʻa lahi pē ʻe taha, ka ko ha ngaahi teleʻa kehekehe ia ʻokú ne fakafehokotaki ʻa e Feituʻu Tokalelei ʻo Akó mo e Teleʻa Soataní pea mo e feituʻu fonua ʻo e Tahi ʻo Kālelí. Hangē ko ʻení, ʻoku tuʻu ʻa e Teleʻa ʻo Mekitó ʻi he konga fakahihifo ʻo e teleʻá. Naʻe hoko ʻa e Teleʻa Sesililí ko e hala mahuʻinga ia ke kolosi ai ʻi he Fonua Tapú mei he Tahi Metiteleniané ki he hihifó pea mo e Teleʻa Soataní ki he hahaké.
Ngaahi Meʻa Mahuʻinga naʻe Hoko aí: Naʻe fou mai ʻi he teleʻa ko ʻení ʻa e hala lahi naʻá ne fakafehokotaki ʻa ʻIsipite mo Mesopotēmiá, pea naʻe lahi ha ngaahi tau naʻe fai heni (Fakam. 1:22–27; 5:19; 2 Ng. Tuʻi 23:29–30). ʻOku kamata ʻa e tau lahi fakamuimui ʻi he fonua ko ʻení ʻaki ʻa e tau ʻo ʻAmaketoné, ʻa ia ʻe fai ia ʻi ha kiʻi taimi siʻi ki muʻa ʻi he Hāʻele ʻAngaua mai ʻa e Fakamoʻuí; pea naʻe maʻu hono hingoa mei he Hā Mekitone, pe Moʻunga ʻo Mekitó (ʻIsikeli 38; Sioeli 3:9–14; Sāk. 14:2–5; Fakahā 16:14–16).