8. Selusalema
Hanga fakatokelau ki Selusalema. ʻOku ʻi he lotomālie ʻo e taá ha fale tapu ʻo e kau Mosilemí ʻoku fuopotopoto pea ʻato koula, pea ʻoku ui ia ko e ʻAto Fuopotopoto Maká. Naʻe lotu ʻa e kakai Siú ʻi ha temipale ʻa ia naʻe tuʻu ʻi feituʻu ko ʻení. Naʻe hanga ʻe he ngaahi ʻā ofi ki he ʻAto Fuopotopoto Maká ʻo ʻaaʻi ʻa e kolo motuʻa ʻo Selusalemá. ʻOku ʻi he toʻomataʻú ʻa e Teleʻa ʻo Kitiloní. ʻOku ʻi he tafaʻaki ki toʻomataʻu ʻaupitó, ʻoku ʻikai ʻasi ʻi he taá, ʻa e Moʻunga ʻŌlivé. ʻOku pehē naʻe tuʻu ki he tokelau ʻo e ʻAto Fuopotopoto Maká ʻa Kolokota pe ko Kālevale.
Ngaahi Meʻa Mahuʻinga naʻe Hoko aí: Naʻe ui ʻa Selusalema ko Sēlemi ʻi muʻa (Same 76:2). Naʻe totongi ʻe ʻĒpalahame ʻene ngaahi vahehongofulú kia Melekisēteki (Sēnesi 14:18–20). Naʻe haʻu ʻa ʻĒpalahame ke feilaulau ʻaki ʻa ʻAisake (Sēnesi 22:2–14). Naʻe kapa ʻe he Tuʻi ko Tēvitá ʻa Selusalema mei he kakai Sēpusí (2 Sam. 5:4–9). Naʻe langa ʻe he Tuʻi ko Solomoné ha temipale (1 Ng. Tuʻi 6–7). Naʻe ʻalu atu mei ai ʻa Līhai ki ha fonua ʻo e talaʻofá (1 Nīfai 1:4; 2). Naʻe ngāue ai, mo fai ʻa e fakalelei ki he angahalá pea toetuʻu ai ʻa e Fakamoʻuí (Mātiu 21–28). Naʻe fakaʻauha ʻa Selusalema ʻi he hili ha taimi siʻi mei he pekia ʻa e Fakamoʻuí ʻo hangē ko ʻEne kikité (SS—M 1:3–20). ʻE toe kapa ʻa Selusalema ʻi he ngaahi ʻaho fakaʻosí (ʻIsikeli 38–39; Sioeli 2–3; Fakahā 11; 16). ʻE hā mai heni ʻa e Fakamoʻuí ko e konga ʻo ʻEne Hāʻele ʻAngaua Maí (Sāk. 12–14; T&F 45:48–53). (Vakai, FFL Selusalema; Sēlemi.)