28. Tani
Naʻe ʻuluaki ui ʻa e kolo fakakuongamuʻa ʻo Taní ko Lisemi (Sosiua 19:47) pe Leisi (Fakam. 18:7, 14) ki muʻa ʻi hono ikunaʻi ʻe he kakai ʻIsilelí ʻa e fonuá. Ko e ngaahi matavai ko ia ʻoku tuʻu ʻi he feituʻu ko ʻení, fakataha mo e ngaahi matavai ʻo Sesalia Filipaí, ko e matavai mahuʻinga ia ʻoku maʻu vai mei ai ʻa e Vaitafe Soataní. ʻOku hā heni ʻa e feituʻu ne tuʻu ai ʻa e temipale ʻa Selopoamé.
Ngaahi Meʻa Mahuʻinga naʻe Hoko aí: Naʻe fakahaofi ai ʻe ʻĒpalahame ʻa Lote (Sēnesi 14:13–16). Naʻe hanga ʻe he faʻahinga ʻo Taní ʻo ikunaʻi ʻa e feituʻu ko ʻení pea nau ui ia ko Tani (Sosiua 19:47–48). Naʻe hanga ʻe Selopoame ʻo fokotuʻu heni ha temipale loi mo ha ʻuhikiʻi pulu koula, ʻa ia naʻe hoko ko e tupuʻanga ʻo e tō ʻa e ngaahi faʻahinga ʻe hongofulu ʻi he tokelaú (1 Ng. Tuʻi 12:26–33). Naʻe hoko ʻa Tani ko e kolo taupotu taha ia ʻo ʻIsileli ki he tokelaú—pea ko hono ʻuhinga ia ʻo e lau ʻa e folofolá ki he fonua ʻo ʻIsileli “mei Peasipa ʻo aʻu ki Tani” (2 Fkmtl. 30:5; naʻe hoko ʻa Peasipa ko e kolo taupotu taha ia ki he tongá). (Vakai, FFL Tani.)