1. E teianei, e tata au, ko Niphai ki runga i teianei au papa i te tuatua no te au mea taku e rave ra, e no taku akaaereanga, e no taku angaanga orometua; e kia akamata au i te tata anga, ka tata katoa au i te tuatua no toku metua e no toku au taeake.

2. E i na, kua akaoti akera toku metua i te tuatua anga mai i te au tuatua no tana moemoeā, e i te ako ia raua kia akono meitaki, kua tuatua atura oki aia kia raua no runga i te ngati Iuda.

3. E ka takoreia atura ratou, koia oki ko taua oire maata ra, ko Ierusalema, e ka apainaia atu ratou e manganui ki Babulonia ra, e kia tae ki te tuatau tau i te Atu ra, ka oki mai ratou; i na, ka akaokiia mai ratou mei to ratou tuikaaanga mai; e kia akaokiia mai ratou mei to ratou tuikaa anga maira, ka noo akaou ratou ki to ratou uaorai enua ipukarea.

4. I na, e kia tae ki te ono anere mataiti i muri ake i to toku metua akarukeanga ia Ierusalema, e akatupu ei te Atu, te Atua, i tetai peroveta i rotopu i te ngati Iuda, koia oki, tetai Mesia, te Akaora no to te ao nei.

5. E kua tuatua katoa aia no runga i te au peroveta, e no runga i te maata o ratou tei akakite mai i teia au mea no te Mesia, tana i tuatua e, koia oki te Akaora no to te ao nei.

6. Kua inga oki te tangata katoatoa e kua ngaro ratou, e ka vai ngaro atu ratou me kore ratou e irinaki i taua Akaora ra.

7. E kua tuatua katoa aia no tetai peroveta te ka aere mai na mua i te Mesia, kia akamaka i te mataara no te Atu.

8. I na, ka aere e ka tuatua aia i te metepara i te kapikianga atu e, E akamaka kotou i te mataara o te Atu ra, e e akatika i tona aerenga, no te mea te tu nei oki tetai i rotopu ia kotou na, kare ra kotou i kite iaia, e maata oki tona mana i toku, e kare oki au e tau kia tatara i te itiki i tona tamaka. E manganui oki te tuatua a toku metua i taua mea nei.

9. Kua tuatua oki toku metua e, ka bapetizo aia i Betabara i tera atu pae i Ioridana. E kua tuatua oki aia e, ka bapetizo aia ki te vai, nana oki te Mesia e bapetizo ki te vai.

10. E kia oti akera iaia te bapetizo i te Mesia ki te vai, ka kite aia i reira e, kua bapetizo aia i te Punua Mamoe a te Atua, koia te ka apai ke atu i te ara a to te ao nei.

11. E kia tuatua toku metua i taua au tuatua ra, tuatua atura aia ki toku au taeake no runga i te evangelia ka akoia i rotopu i te ngati Iuda ra, e i te tupuanga to te ngati Iuda akaronga kore. E oti akera ia ratou i te ta i te Mesia te ka tae mai, kia mate takiri, ka tuakaou mai aia mei te mate maira, e ka akakite atu aia iaia uaorai na roto i te Vaerua Tapu ki te au Etene.

12. I na, e managnui te au tuatua a toku metua no te au Etene, e no te ngutuare katoa o Iseraela ra, ka akatauia oki ratou ki tetai pu orive e tipuia tona au atava e ka akapueurikirikiia ki te au ngai katoatoa i te ao nei.

13. No reira i nanaʼi, kia arataki anakeia tatou ki te enua i taputouia ra e tikai, kia tupu te tuatua a te Atu, ko tei na ko maira e, ka akapuerikirikiia tatou e pini rava ake to te ao katoa nei.

14. E kia akapueurikirikiia te ngutuare o Iseraela ra, e ka akaputuputu akaouia mai ratou, i na, kia arikiia te kikianga o te evangelia e te au Etene ra, e pauia mai ei te atava tikai o te pu rakau orive ra, koia oki te toenga o te ngutuare o Iseraela, ka kite ratou i te Mesia mou ra, to ratou Atu, e to ratou Akaora.

15. E kua pera atura toku metua i te totou anga e i te tuatua oki ki toku nga taeake, e e manganui atu rai tana i tuatua, kare i tataia e au ki roto i teianei puka, kua tata ra au i te au mea i tika iaku kia tata, ki roto i tetai puka ke.

16. Kua raveia teia au mea i te tuatau i noo ei toku metua ki roto o te puakapa i te ō o Lemuela ra.

17. E kia akarongo akera au, ko Niphai, i te au tuatua a toku metua i te au mea tana i kite i roto i te orama e te au mea katoa oki tana i tuatua na roto i te mana o te Vaerua Tapu, kua rauka oki iaia taua mana na roto i te akarongo i te Tamaiti a te Atua. Ko te Tamaiti a te Atua ra, ko te Mesia ïa koia te ka tae mai; kua inangaro katoa au ko Niphai, kia akara e kia akarongo, e kia kite oki i taua au mea ra, na roto i te mana o te Vaerua Tapu, tei orongaia mai e te Atua ki te au tangata katoa tei kimi pakari iaia, mei te tuatau taito ra, mei te tuatau katoa ka akakite mai ei aia iaia uaorai ki te tamariki a te tangata nei.

18. Okotai oki ona tu i nanai, i teianei ra, e tuatau ua atu; e kua oti te akateateamamao i te mataara no te au tangata katoatoa mei te akatumuanga mai o te ao nei, mei te mea e tataraara ratou e e aere mai kiaia ra.

19. Ko tei kimi pakari ra ka kite ïa; e ka akakiteia te au tuatua ngaro a te Atua kia ratou na roto i te mana o te Vaerua Tapu, i teianei tuatau mei i te tuatau taito katoa ra, i te tuatau taito ra mei i te au tuatau ki mua ra, no reira, kare e tuke te aerenga mutu kore o te Atu ra.

20. E teianei, e akamaara e te tangata e, ka akavaia koe ki te au mea katoa taau i rave ana.

21. E tenana, mei te mea, i kimi ana koe i te tuatua tika kore i te au ra o toou noo anga i te kopapa nei, e kua kitea ana koe i reira ma te viivii i te akavaanga a te Atua, e kare oki e tika i te mea viivii kia noo ki ko i te Atua ra, ka titiriia atu koe ki vao e tuatau ua atu.

22. Na te Vaerua Tapu oki i oronga mai i te mana kiaku kia tuatua atu au i teianei au mea ma te uuna kore.