Te Puka Mua A Niphai
Tona Tutaraanga e Tana Angaana
E tua teia no Lihai e tana vaine ko Saraia, e tana nga tamariki tamaroa e a, tei tuatuaia, (ko te mua tangata) Ko Lamana, Ko Lemuela, ko Samu, e ko Niphai. Kua ako mai te Atua ia Lihai kia akaatea atu ki vao mai i te enua ia Ierusalema, no te mea, kua totou aia ki teia au tangata no runga i ta ratou au ara, e kua kimi akera ratou i te ravenga kia mate aia. E toru o ratou ra i te aere ua anga i roto i te metepara. Kua rave akera Niphai i tona au taeake, e oki ratou ki te enua ko Ierusalema, e tiki i te papaanga o Iuda. Te tua o to ratou takinga kino angaia. Te rave anga i te au tamaine a Isemaela ei vaine na ratou. To ratou aere anga atu ki te metepara ma to ratou kopu tangata katoa.
To ratou au tumatetenga, e to ratou makimakianga i roto i te metepara. To ratou kaveinga i te aerenga. To ratou taeanga ki te tai maata. Te patoi anga te au taeake ia Niphai. Tana i ako ia ratou, e to maanianga i te pai. Kua topa ratou i te ingoa o te reira ngai ko Bounetifula. Te aerenga na runga i te tai maata, ki te enua taputou. Ko te tua teia tei tataia i roto i te papaanga a Niphai, koia oki naku na Niphai i tata.
Pene 1
Te orama a Lihai no te pou ai, e te puka o te totou. Tana totou no te mateanga o Ierusalema, e te akakiteanga i te aerenga mai o te Mesia. Te tapapa ra te ngati Iuda i tona ora.
1. I anauia au, ko Niphai, e nga metua memeitaki, e i apiiia oki au i te kite katoa o toku metua; e i kite ana au i te au tumatetenga e managanui i toku puke ra, kareka au nei, i akaperepereia au e te Atu i toku katoa au rā, koia oki, i rauka iaku te kite maata i te au tu meitaki e te au mea oonu tikai a te Atua ra, no reira au e tataʼi tetai akapapaanga tuatua no te au mea taku i rave i toku au rā.
2. I na, te tata nei au i tetai akapapaanga tuatua i roto i te reo tikai o toku metua, (ko te kite ïa o te ngati Iuda) e te reo oki o te Aiphiti.
3. E kua kite au e, e papa tuatua mou teia taku e tata nei; e te tata nei au ma toku uaorai rima, e mei tei tau oki i toku uaorai kite.
4. I te akamataanga o te mataiti mua i te au o te ariki o te ngati Iuda ra ko Zedekia, (te noo ra toku metua, ko Lihai, i Ierusalema i tona au ra katoa) i roto i taua mataiti rai e manganui te au peroveta i aere mai i te totou anga ki te tangata, kia tataraara ratou e tikai, me kore ra, ka akakoreia taua oire ra ko Ierusalema.
5. No reira kua aere atu toku metua, ko Lihai, pure atura ki te Atu ma tona ngakau katoa, no tona iti tangata.
6. E te pure atura aia ki te Atu ra, kua eke mai tetai pou ai, noo akera ki runga i tetai toka i mua iaia ra; e manganui te au mea tana i kite e tana i akarongo ra, e no te au mea tana i kite e tana i akarongo ra, i ngaueue ei aia ma te ruketekete maata.
7. Kua oki maira aia ki tona uaorai are i Ierusalema, takoto iora aia ki runga i tona roi, kua ki oki aia i te Vaerua, e i te au mea tana i akara.
8. E kia peraia akera aia e te Vaerua, kua kite atura aia i tetai orama, e kite akera aia i te rangi i te veveteangaia, e kua manako aia e, te kite atura oki aia i te Atua i te noo anga ki runga i tona terono, e i takapiniia e te au urupu angela e manganui, i te imene anga e i te akameitaki anga atu ki to ratou Atua.
9. E kite atura oki aia i tetai angela i te eke anga mai mei rotopu mai i te rangi, e kite atura aia e, kua maata atu tona kaka i to te rā i te avatea ra.
10. Kite katoa atura aia e tai ngauru ma rua i te aru anga iaia, e kua maata atu to ratou kaka i to te etu o te rangi ra.
11. E kua eke maira ratou, e kua aere atura ki runga i te aro o te enua, e kia tae maira te angela mua ki mua i te aroaro o toku metua, kua oronga atu i tetai puka kiaia, e kua akaue maira aia kia tatau i taua puka ra.
12. Te tatau ua ra aia, ki akera aia i te Vaerua o te Atu.
13. E kua tatau iora aia, na ko maira; e ae oki koe e Ierusalema e! Kua kite oki au i taau au angaanga viivii; i na, kua tatau toku metua i te au mea e manganui no runga ia Ierusalema; ka akapouia ïa, e tei noo ki reira, e manganui te ka mate i te koke, e e manganui te ka akatuikaaia atu ki Babulonia.
14. E kia tatau aia, e kia kite toku metua i te au mea mamaata e manganui, e te umere oki, e kua kapiki atura aia ki te Atu, i te na ko anga e, e mea maata e te umere taau ra au angaanga, e te Atu, te Atua mana katoatoa. Tei te rangi teitei toou terono, e tei runga i te tangata katoatoa o te enua nei toou mana, e toou meitaki, e te aroa, e no toou aroa i kore ei koe e akatika ia ratou tei aere kia koe kia akakoreia.
15. E kua pera atura toku metua i te akapaapaa anga atu i tona Atua, kua mataora oki tona vaerua, e kua ki tona ngakau, no te au mea tana i akara, koia oki, no ta te Atu i akakite mai kiaia.
16. E teianei, ko au, ko Niphai, kare au e tata i te au mea katoatoa ta toku metua i tata, i tata ana oki aia i te au mea tana i kite i roto i te orama e te moemoeā, e i tata oki aia i te au mea e manganui tana i totou e tana i tuatua oki ki tana au tamariki. Ko teia tei kore i pou iaku i te tata.
17. Ka tata ra au i te au mea taku i rave i toku au ra. I na, ka akapoto au i te akapapaanga tuatua a toku metua ki runga i te au papa tuatua ta toku uaorai rima i maani. E kia akaoti au i te akapoto i te akapapaanga tuatua a toku metua, ka tata au i tetai papa tuatua no toku au rā i teianei ao.
18. E teianei, ka inangaro au kia kite kotou e, kia oti i te au mea umere maata ta te Atu i akakite ki toku metua, kia Lihai, koia oki, te akakoreangaia o Ierusalema, i na, kua aere atura aia ki rotopu i taua iti tangata ra, akamata iora aia i te totou e te akakite oki kia ratou i te au mea tana i kite e tana i akarongo ra.
19. E kua taitoito maira te ngati Iuda iaia, no te au mea tana i akakite kia ratou ra, i akakite atu oki aia i ta ratou au ara e ta ratou au angaanga viivii; e kua akakite papu atu aia e, ko te au mea tana i kite e tana i akarongo, e te au mea oki tana i tatau i roto i taua puka ra, kua akakite mai taua au mea ra i te aereanga mai oki o te Mesia, e te akaoraangaia o te ao nei.
20. E akarongo akera te ngati Iuda i taua au mea ra, riri iora ratou iaia; mei i te au peroveta taito ra ta ratou i tuaru ke atu, e ta ratou i pei ki te toka, e ta ratou oki i ta, e kua tapapa ratou iaia kia ta. Ina ra, ka akakite atu au, ko Niphai, kia kotou e, tei runga rai to te Atu aroa mou ia ratou katoatoa tana i iki, e no to ratou akarongo, kia akamaroiroi ia ratou e tae rava atu ki te mana o te akaoraanga.