1. E i na, kua tuatua maira te Atu ki toku metua, i roto i tetai moe, na ko maira; E ao toou, e Lihai, no te au mea taau; i rave ana; e no te mea oki e, kua maroiroi tikai koe i te akakite ki teia nei iti tangata i te au mea taku i akaue atu kia koe ra, i na, te tapapa nei ratou ia koe kia ta, e tamate takiri i toou oraanga.

2. E kua akaue maira te Atu ki toku metua i roto i tetai moe kia rave i tona ngutuare e aere atu ki te metepara.

3. Kua akono iora aia i te tuatua a te Atu, i te rave anga i te au mea ta te Atu i akaue mai kiaia ra.

4. Akaruke iora aia i tona are, e tona enua ipukarea, e tana auro, e tana ario, e tana au apinga oko maata oki, e aere atura aia ki te metepara; e kare e apinga tana i apai atu, mari ra, ko tona kopu tangata e tana kai, e tona au puakapa.

5. Aere atura aia ki raro i te kotinga o te enua, i vaitata ki te Tai Muramura; e aere atura aia e tona ngutuare katoa, koia oki, toku metua vaine ko Saraia, e nga tuakana noku ko Lamana, Lemuela e Samu, ki te metepara ra.

6. E kia pou e toru ra i te tere anga i te metepara, patia iora aia i tona puakapa ki tetai ō i te pae o tetai kauvai.

7. E patu agera aia i tetai atarau toka, e kua apai aia i tetai atinga ki te Atu ra, e kua akameitaki atura aia ki te Atu, to tatou Atua ra.

8. Kua topa iora aia i te ingoa o te kauvai, ko Lamana, e te tae atura taua kauvai ra ki te Tai Muramura e taua ō ra ko tetai kotinga ïa i te ngai i tae atu ei te kauvai ki te moana.

9. E kia kite akera toku metua e, te tae atura te vai o taua kauvai ra ki te Tai Muramura, kua tuatua atura aia kia Lamana, na ko atura, kia riro koe mei teia nei kauvai te tu, i te tae ua anga atu ki te ngai no reira mai te au tuatua tika katoa ra.

10. E kua tuatua akera oki aia kia Lemuela, na ko atura, kia riro koe mei teianei ō te tu, i te maroiroi, e te ketaketa, e te ngaueue kore i te akono anga i te au akaueanga a te Atu ra.

11. No te ngakau marokiakia o Lamana raua ko Lemuela i tuatuaʼi aia i taua tuatua ra, i na oki, i koumuumu mai raua ki to raua metua i te au mea e manganui, no te mea, e tangata kite orama aia, e i arataki ana oki aia ia ratou mei te enua maira mei Ierusalema, e i akaruke ratou i to ratou enua ipukarea, e ta ratou auro, e ta ratou ario, e ta ratou au apinga oko maata, kia mate i te metepara. E kua tuatua maira raua e, no te au manako neneva o tona ngakau i peraʼi aia.

12. E kua pera a Lamana raua ko Lemuela, ko raua oki nga tamariki mua, i te koumuumu anga mai ki to raua metua. E te koumuumu ra oki raua, no te mea, kare raua i kite i te angaanga a te Atua, ko tei anga ia raua.

13. Kare oki raua i irianki e, ka akakoreia taua oire maata ra ko Ierusalema mei tei tuatuaia e te au peroveta. Kua riro oki raua mei te ngati Iuda i noo i Ierusalema, e tei kimi oki i toku metua kia ta.

14. Kua ako atura toku metua kia raua i te ō o Lemuela, ma te mana, kua ki oki aia i te Vaerua, e ruketekete iora to raua kopapa i mua iaia. Kua akamuteki aia ia raua kia kore oki e tika ia raua kia patoi atu iaia, no reira kua akono raua i tana i akaue mai kia raua.

15. I noo ana oki toku metua i roto i tetai are puakapa.

16. E tangata mapu ua au, ko Niphai, ina ra, e kopapa maata toku, e e inangaro maata oki toku kia kite au i te au tuatua ngaro a te Atua ra, no reira kua pati akatenga atu oki au ki te Atu ra, e i na, kua akara maira aia iaku, e kua akamaru aia i toku ngakau, e kua akarongo iora au i te au tuatua katoa i tuatuaia e toku metua, e no reira, kare rava au i maro atu i toku metua, mei ta toku nga tuakana.

17. Kua tuatua atura au kia Samu i te akakite anga atu kiaia i te au mea ta te Atu i akakite mai kiaku na roto i tona Vaerua Tapu. E kua akarongo aia i taku au tuatua.

18. Kare ra a Lamana raua ko Lemuela i akarongo i taku au tuatua; no toku tangi ia raua no te ketaketa o to raua ngakau, kua pati akatenga atu oki au ki te Atu no raua.

19. E kua tuatua maira te Atu kiaku, na ko maira, e ao toou, e Niphai, no toou akarongo, kua kimi pakari mai koe iaku nei, ma te ngakau akaaka.

20. E mei te mea, e akono koe i taku au akaueanga, ka manuia koe, e aratakiia koe ki te enua i taputouia ra; ko te enua oki taku i akateateamamao no kotou; ko te enua meitaki rava atu te reira i te au enua katoatoa.

21. E mei te mea e maro to nga tuakana ia koe, ka tipu keia raua i te aroaro o te Atu ra.

22. E mei te mea e akono koe i taku au akaueanga ka riro koe ei akaaere, e ei puapii ki runga ake i toou nga tuakana.

23. E i na oki, i te rā e tamaki ei ratou iaku, ka taumaa au ia ratou ki te taumaa kino rava, e kare o ratou mana e rauka ki runga i toou uanga, mari ra, ka tamaki katoa maira ratou iaku.

24. E me tamaki oki ratou iaku, ka riro ratou ei papa i toou uanga, ei akatupu i to ratou manako iaku.