1. Kua akaue maira te Atua iaku e kua maani iora au te au papa kia rauka iaku te tata i te akapapaanga o toku iti tangata ki runga. E ki runga i te au papa taku i maani ana, kua kotikoti au i te akapapaanga tuatua no toku metua, e to matou tere ki roto i te metepara, e te au totou a toku metua; e kua tata katoa au i taku au totou e manganui.

2. E i te tuatau i maani ei au i te reira au papa, kare au i manako e, ka akaue katoaia au e te Atu kia maani i teianei au papa; e no reira i kotikotiiaʼi te akapapaanga tuatua a toku metua e te akapapaanga anauanga o tona ai tupuna, e tetai pae maata o te tuatua no to matou tere na roto i te metepara, ki runga i te au papa i tuatuaia ra; e teianei, ko te au mea i tupu ana i mua ake i maani ei au i teianei au papa, kua tataia ïa ki runga i te au papa mua ra.

3. E oti iora iaku i te maani i teianei au papa mei tei akaueia mai, kua akaueia au, ko Niphai, kia tata i te angaanga tapu e te au totou e te au mea marama ua e te puapinga maata, ki runga i teianei au papa; e kia tamouia te au mea i tataia ei apii i toku iti tangata, ko te ka noo ki te enua nei, e no tetai au akakoroanga pakari oki i kitea e te Atu ra.

4. E no reira kua tata au, ko Niphai, ki runga i tetai au papa ke ra, i te au tamaki, e te au tauetono anga e te tumatetenga o toku ra iti tangata. E kua akapera au, e kua akaue atu au i toku ra iti tangata i ta ratou ka rave, kia mate atu au; e kia tukuia atu teia au papa ki tetai uki ki tetai uki, koia oki, ki tetai peroveta ki tetai peroveta, kia tae ki te tuatau ka akaue akaou mai ei te Atu ra.

5. Ka akakiteia te tu o taku maani anga i teianei au papa a muri ake; e teianei ra, ka tata au mei taku i tuatua ana; e na reira au kia tata i te au mea tapu no te kite o toku ra iti tangata.

6. Ina ra, kare au e tata i te tuatua ki runga i te au papa, mari ra, ko te au mea tei manakoia e au, e mea tapu. E teianei mei te mea e tarevake au, kua tarevake katoa oki te aronga taito ra; kare ra au e inangaro kia akatika iaku uaorai no tetai tangata ke, no te paruparu ra i roto iaku, no te kopapa nei e akatika nei au iaku uaorai.

7. No te mea, ko te au mea i manakoia e tetai pae tangata e, e mea puapinga maata, no te kopapa e no te vaerua oki, kua akarukeia ïa e kua takatakai uaia oki e te vaevae o tetai ke. Koia ïa, te takatakai ua nei te tangata i te Atua mou o Iseraela ki to ratou vaevae; e tuatua ua au e, kua takatakiia e to ratou vaevae, koia oki, kua akaruke ratou iaia, e kare oki ratou e akarongo i te ako a tona reo.

8. E i na, Ka tae mai aia e ono anere mataiti i muri ake i te tuatau i akaruke ei toku metua ia Ierusalema ra, mei ta te angela i tuatua maira.

9. E no to ratou kino maata, i manako ei to te ao nei e, e mea puapinga kore aia, e no reira, ka akakino ratou iaia, e ka akakoromaki ua aia, i na, e tutua ratou iaia ki te uavare, e ka akakoromaki ua mai aia i taua au mea no tona aroa e tona akakoromaki anga roa ki te tamariki a te tangata nei.

10. E ko te Atua o to tatou ai metua tei aratakiia mai mei Aiphiti maira, mei te tuikaaanga maira, e tei akaoraia oki e ïa i roto i te metepara ra, Koia ïa, te Atua o Aberahama, e te Atua no Isaaka, e te Atua no Iakoba oki ka tuku atu aia iaia uaorai i te kopapa nei, mei ta te angela i tuatua maira, ki te rima o te aronga tuatua tika kore ra, kia akateiteiia, mei ta Zenoka i tuatua ra, e kia akasatauroia, mei ta Neumu i tuatua ra, e kia tanumia ki roto i te menema mei ta Zenosa i tuatua ra i tana i akakite mai i nga ra poiri e toru, ei akairo no tona matenga, ki te aronga e noo i te au enua o te moana ra; no te ngutuare katoa o Iseraela.

11. Kua na ko maira te peroveta, Ei taua rā, e aravei ei te Atu ra ko te Atua i te ngutuare o Iseraela ra, tetai, no ta ratou tuatua tika maata ka kite ei tona reo, e e tupu ei to ratou mataora e to ratou ora, e tetai, ka kite na roto i te mangungu e te uira o tona mana, e te uriia, e te ai, e te auai, e te poiri ra, e te ngaa anga o te enua, e te au maunga ka akatuia ki runga.

12. E ka tupu teia au mea katoatoa e tikai, te na ko maira te peroveta ko Zenosa. Ka ngaangaa te toka e te enua katoa, e no te aue maata o to te enua, ka riro mai te ui ariki o te au enua i te moana i te tuatua e, te mamae nei te Atua o te ao katoa nei.

13. E te tangata tei noo ki Ierusalema ra, te na ko maira te peroveta, ka akakinoia ratou e te tangata katoatoa, i te mea, kua akasatauro ratou i te Atua o Iseraela ra, e kua akaariu ke atu i to ratou ngakau i te akaruke anga i te au akairo, e te au semeio, e te mana e te kaka o te Atua o Iseraela ra.

14. E no te mea, kua akaariu ke atu i to ratou ngakau, te na ko maira te peroveta, e kua akavaavaa ratou i Tei Tapu i Iseraela nei; ka ori aere ua ratou i te kopapa nei, e ka mate, e ka riro oki ratou ei tuatuaanga kino e ei taitoitoanga, e ka makitakitaia e to te au enua katoatoa.

15. Ina ra, te na ko maira te peroveta, kia tae mai taua rā ra, e kore ei ratou e ariu ke atu i to ratou ngakau ki Tei Tapu i Iseraela nei, ei reira e akamaaraʼi aia i te koreromotu tana i papau ki to ratou ai metua.

16. Ei reira aia e akamaaraʼi i te au enua o te moana; e ka akaputuputu mai au i te aronga katoa o te ngutuare o Iseraela i nga ope e ā o te ao nei, te na ko maira te Atu, mei ta te peroveta ko Zenosa i tuatua maira.

17. E ka kite oki te ao katoa nei i te ora a te Atu ra, e ka akameitakiia te au enua katoatoa, e te au reo, e te au kopu, e te au iti tangata, te na ko maira te peroveta ra.

18. E kua tata oki au, ko Niphai, i teia au mea ki toku ra iti tangata, e e penei ake, ka tauturu au ia ratou i te akamaaraanga i te Atu ra ko to ratou Akaora.

19. E teianei, e tuatua atu au ki te ngutuare katoatoa o Iseraela mei te mea ka rauka ia ratou teianei au tuatua.

20. I na oki, e angaanga taku i te pae vaerua, ko tei akaparuparu mai iaku nei, e kua paruparu oki toku au pauanga ivi no to Ierusalema ra, no te mea, naringa kare te Atu i aroa mai iaku, i te akakite anga mai ia ratou nei mei tana oki i akakite mai ki te au peroveta taito ra, kua mate katoa ia au.

21. Kua akakite papu mai oki aia i teia au mea katoatoa no ratou ki te au peroveta taito ra, kua akakite katoa aia ia tatou ki te au peroveta e manganui; e teianei, ka kite katoa tatou ia ratou, no te mea, kua tataia ïa ki rungao i te au papa veo ra.

22. Kua apii atura au ko Niphai i teia au mea ki toku nga tuakana; e kua tatau oki au kia raua i te au mea e manganui tei kotikotiia ki runga i te au papa veo ra, kia kite raua i te angaanga a te Atu i te au enua ke ke. i rotopu i te aronga taito ra.

23. E kua tatau katoa au kia raua i te au mea e manganui no roto mai i te puka a Mose ra; kia akaariu ua maira au ia raua kia akarongo i te Atu ra, i to raua Akaora, kua tatau iora au i te au tuatua i tataia e te peroveta ra ko Isaia; kua akatau oki au i te au tuatua tapu katoa ia matou, kia riro te reira ei meitaki e e apiianga oki no matou.

24. I na, kua tuatua au kia raua e, e akarongo mai korua i te tuatua a te peroveta ra, no te toenga korua o te ngutuare o Iseraela ra, e e atava oki korua tei tipu keia, e akarongo mai ana korua i te tuatua a te peroveta ra tei tataia ki te ngutuare katoa o Iseraela, e e akatauanga oki ïa no korua kia rauka katoa ia korua te irinaki e ta to korua au taeake katoa, no ratou oki korua i tipu keiaʼi, no te mea, kua na reira te peroveta i te tata anga.