1. Kua tuatua atura au ki toku nga tuakana, na ko atura, kia aere akaou tatou ki runga i Ierusalema ra, e kia maroiroi tatou i te akono anga i te au akaueanga a te Atu ra, i na oki, kua maata tona mana i to te ao katoa nei, e eaa ka kore ei tona mana e maata atu i te rima ngauru o Labana, e tona au ngauru oki i te tausani.

2. E no reira, e aere tatou ki runga ra, e kia maroiroi tatou mei ia Mose ra, nana oki i tuatua ki te Tai Muramura, e kua taka ke atu te tai i tera pae i tera pae e kua aere maira to tatou ai metua mei te tuikaaanga mai na runga i te one maro ra, kua arumaki maira te nuku o Pharao e maremo iora ratou i roto i te Tai Muramura ra.

3. E i na, kua kite korua e, e tuatua mou oki te reira; e kua kite katoa korua e, kua tuatua maira tetai angela kia korua, e eaa korua i ekoko ei? E aere tatou ki runga; ka rauka oki i te Atu kia akaora ia tatou nei, mei tana i akaora i to tatou ai metua ra, e kia akakore oki ia Labana mei tana i akakore i to Aiphiti ra.

4. E tuatua atura au i taua tuatua ra, riri rava atu raua, e kua koumuumu ua mai rai, ina ra, kua aru raua iaku e tae ua atu ki te aua i Ierusalema ra.

5. E po iora, kua akaue atura au kia pinipini atu ratou i vao i te patu ra. E kia pipini ratou, kua aere muna atura au, ko Niphai, ki roto i te oire, e aere tika atura ki te are o Labana.

6. Kua aratakiia au e te Vaerua, e kare au i kite i te au mea taku ka rave.

7. Aere atu ra au, e kia vaitata ki te are o Labana, kite iora au i tetai tangata e kua inga aia ki raro i te one i mua ua iaku ra, kua kona oki aia i te wina.

8. E tae atura au kiaia, kite atura au e, ko Labana ïa.

9. Akara atura au i tana koke, e kiriti akera au mei roto i tona vairanga, e auro manea tikai tona mouringa, e e manea rava te maanianga; e kua kite au i te koi o taua koke ra, e auri meitaki rava atu ïa.

10. Kua karanga mai te Vaerua kiaku, ka ta ia Labana, kua tuatua iora au i toku ngakau, kare oki au i akamaringi ana i te toto tangata, e kua emi iora au ki muri, kare oki au i inangaro i te tamate iaia.

11. Kua tuatua akaou mai te Vaerua kiaku, i na, kua tuku mai te Atu iaia ki roto i to rima na, e kua kite oki au e, i tamata ana aia kia tamate iaku uaorai e kare oki aia i akarongo i te au akaueanga a te Atu ra; kua rave oki aia i ta matou au apinga oko maata.

12. Kua tuatua akaou maira te Vaerua kiaku, ka tamate atu iaia, kua tuku mai oki te Atu iaia ki roto i toou rima;

13. I na, te ta nei te Atu i te aronga akarongo kore, kia akatupu i tona au akakoroanga tika. E ngari ake oki te mate o te tangata okotai, i te mate o tetai basileia katoatoa i te akarongo kore.

14. E teianei, kia akarongo au, ko Niphai, i taua au tuatua ra, kua akamaara au i ta te Atu i tuatua mai kiaku i te metepara i te na ko anga mai e, mei te mea e, ka akono toou ra uanga i taku au akaueanga, ka manuia ia ratou i te enua taputou.

15. Ae, kua manako katoa oki au e, kare e rauka ia ratou kia akono i te akaueanga a te Atu, kia tau ki te ture a Mose, mari ua ra, kia rauka mai te ture ia ratou.

16. E kua kite katoa au e, kua kotikotiia taua ture ra, ki runga i te au papa veo.

17. Kua kite katoa oki au e, no reira i tuku mai ei te Atu ia Labana ki toku rima, kia rauka iaku te au akapapaanga tuatua mei tana i akaue maira.

18. Kua akono au i reira i te reo o te Vaerua, kua rave iora au ia Labana ki te rauru o tona upoko, e kua tipu atura au i tona katu ki tana uaorai koke.

19. Kia oti tona upoko i te tipuia atu e au ki tana uaorai koke, kua rave au i tona kakau, e aao maira ki runga i toku uaorai kopapa i aao ana oki au i tona rakei tamaki ki toku taukupu, e kare e mea i topa.

20. E kia oti, aere atura au ki te are vairanga apinga oko maata o Labana e i toku aereanga ki reira, i na, kua kite au i te tavini o Labana ko tei mou i te au taviri o taua are vairanga ra. Akaue atura au kiaia i te reo o Labana, e aere maua ki te are vairanga apinga.

21. Kua manako iora aia e, ko au, ko tona pu rai, ko Labana, no te mea kua kite aia i te kakau e te koke oki i te tatua angaia ki toku taukupu.

22. Kua tuatua maira aia kiaku no runga i te au ereta o te ngati Iuda, no te mea, kua kite oki aia e, kua aere tona pu, ko Labana, kia ratou i te po.

23. Kua tuatua oki au kiaia mei te mea, ko Labana au.

24. Kua tuatua oki au kiaia kia apai atu au i te au papa veo ra i kotikotiia te tuatua ki runga, ki toku au taeake i vao i te patu ra.

25. E kua akaue atura oki au kiaia kia aru mai iaku.

26. Manako iora aia e, no te au taeake o te ekalesia taku i tuatua ra, e ko au ko Labana taku i tamate ra, e i aru mai ei oki aia iaku.

27. E kua tuatua putuputu maira aia kiaku i te au orometua o te ngati Iuda ra, i to maua aereanga ki toku au taeake i vao i te patu ra.

28. E kia kite maira Lamana iaku ra, mataku rava iora aia, e ko Lemuela, e ko Samu katoa oki. Oro atu ra ratou mei mua atu iaku, kua manako oki ratou e, ko Labana au, kua ta oki aia iaku, e te titau katoa ra aia ia ratou kia ta.

29. Kua kapiki atura au kia ratou, e kua akarongo maira ratou iaku; kua akaruke ratou i te oro mei mua atu iaku.

30. E akara atura te tavini o Labana i toku au taeake ra, ruketekete iora aia, e kua vaitata oki aia i te oro mei mua atu iaku ra, e oki atu ki te oire ra i Ierusalema.

31. E tangata maata oki au, ko Niphai, e kua rauka oki iaku te maroiroi no te Atu ra, e no reira kua opu au i te tavini o Labana ra e kua mou au iaia, kia kore aia e oro.

32. E kua tuatua atura au kiaia, mei te mea, ka akono meitaki aia i taku au tuatua, te ora ra te Atu ra, e te ora nei oki au, ka akaora matou iaia, mei te mea e, ka akono aia i ta matou tuatua.

33. Kua tuatua atura au kiaia ma te taputou e, eiaa aia e mataku; e riro oki aia ei tangata rangatira mei ia matou katoa te tu, mei te mea e aru mai aia ia matou ki te metepara ra.

34. E kua tuatua atura au kiaia na ko atura: kua akaue mai te Atua iaku kia rave i teianei angaanga, e kare ainei tatou e maroiroi i te akono anga i te au akaueanga a te Atu ra? E teianei, mei te mea e aere katoa mai koe ki te metepara ki toku metua ra, ka noo koe kia matou.

35. Kua rauka ia Zoroma te maroiroi i te au tuatua taku i tuatua ana, ko Zoroma oki te ingoa o taua tavini ra; e kua taputou maira aia e, ka aere katoa aia ki raro i te metepara ki toku metua ra. E kua tuatua maira aia ma te taputou kia matou e, ka noo aia kia matou e tuatau ua atu.

36. Kua inangaro matou kia noo aia kia matou nei kia kore te ngati Iuda e kite i to matou aereanga ki te metepara ra; ko te arumaki aea mai ratou ia matou, e ko te mate aea matou ia ratou.

37. E oti akera ia Zoroma te taputou mai kia matou kua kore to matou taitaiā iaia.

38. Kua rave iora matou i te au papa veo ra, e te tavini o Labana oki, e aere atura ki te metepara, e kua tae atura matou ki te puakapa o to matou metua.