1. E akaoti akera au, ko Niphai, i taku tuatua ki toku nga tuakana, i na, kua tuatua maira raua kiaku, Kua akakite mai koe ia maua i te au mea ngata, e kare oki e rauka ia maua kia akakoromaki.

2. Kua tuatua atura au kia raua, kua kite au e, kua tuatua au i te au mea ngata ki te aronga tuatua tika kore ra, mei tei tau i te tuatua mou; kua akatika ra au i te aronga tuatua tika, e kua akakite atu oki au e, e akateiteiia ratou i te rā openga ra; e teianei te manako ra te aronga ara e, e mea rauka ngata te tuatua mou, no te mea, na te reira e putaʼi i to ratou ngakau.

3. E teianei e toku nga tuakana, naringa korua e nga tangata tuatua tika, e kua inangaro korua i te akarongo i te tuatua mou, e te akono i te reira, kia tika to korua aerenga ki mua i te aroaro o te Atua, kare i reira korua e koumuumu no te tuatua tika i te na ko anga e, kua tuatua maira koe i te au mea ngata kia maua.

4. Kua ako atura au ko Niphai i toku nga tuakana ma te maroiroi kia akono i te au akaueanga a te Atu ra.

5. E kua taakaaka raua ia raua uaorai ki mua i te Atu; mataora iora au ma te irinaki tikai ia raua kia aere raua na te mataara tuatua mou.

6. E teianei, kua tuatuaia e kua raveia oki teia au mea nei i te tuatau i noo ei toku metua i te puakapa i te ō tana i tapa ki te ingoa ko Lemuela.

7. Kua akaipoipo iora au i tetai tamaine a Isemaela ra; kua akaipoipo katoa oki toku ai taeake i te tamaine a Isemaela ra, e akaipoipo oki a Zoroma i te tamaine mataiapo a Isemaela ra.

8. E kua pera toku metua i te akono i te au akaueanga katoa a te Atu, tei tukuia mai kiaia ra. E kua akameitaki katoaia au, ko Niphai, i te au meitaki maata o te Atu ra.

9. E kua tuatua maira te reo o te Atu ki toku metua i te po, e kua akaue maira kiaia e, kia tae ki te popongi e akaruke ei aia e aere ki roto i te metepara.

10. Kua tu akera toku metua i te popongi e kua aere atura aia ki te ngutupa o te puakapa, akara iora aia ma te umere maata ki tetai poro, ki runga i te one, e tuke oki tona maanianga, e veo meitaki rava oki taua apinga ra. E tei roto oki nga auri meangiti e rua, e kua tou tetai auri ki te mataara ka aere ei matou ki te metepara ra.

11. E kua akaputuputu iora matou i reira i ta matou au apinga katoatoa ta matou ka apai atu ki te metepara, e te toenga oki o ta matou kai, ta te Atu i oronga maira kia matou e kua rave katoa oki matou i te au tu ua e apai atu ki te metepara.

12. Rave iora matou i to matou au puakapa, e aere atura ki te metepara i tetai tua mai i te kauvai ko Lamana.

13. E kua aere atura matou i nga ra e ā ki te pae i apatonga, patia akaou iora matou i to matou au puakapa, e tapa iora matou i te ingoa o taua ngai ra Siata.

14. Rave iora matou i ta matou au ana, e te au kakao, aere atura ki te metepara e ta i te manu ei kai na to matou au ngutuare, e kia rauka te kai, kua oki matou ki to matou au kopu tangata i te metepara ki te ngai ko Siata. E kua oki akaou atura matou ki to matou tere i roto i te metepara ra na taua kaveinga rai, e kua aere na te au ngai ruperupe o te metepara i te pae i te kotinga o te Tai Muramura ra.

15. Tere atura matou i te au rā e manganui, i te ta anga i te manu i te pae mataara ra i ta matou au ana e ta matou au kakao e ta matou au toka, e ta matou au maka.

16. Kua aru atura matou i te kaveinga o te poro ra, tei arataki ia matou na te ngai meitaki i te metepara ra.

17. E ope akera te au rā e manganui i to matou tere, patia iora matou i to matou au puakapa, no tetai tuatau poto, e kua akangaroi iora matou e kia rauka akaou ia matou te kai na to matou au ngutuare.

18. Te aere ra au ko Niphai e kimi aere i te manu ei kai, e i na, kua ati iora taku ana tei maaniia ki te auri meitaki tikai, i na, riri akera toku nga tuakana iaku, no te mea kua kino taku ana, e no te mea oki kare i rauka ta matou kai.

19. Kua oki maira matou ki to matou ngutuare ma te kore e kai.

20. Kua koumuumu maira a Lamana raua ko Lemuela e nga tamariki tamaroa a Isemaela, no to ratou au tumatetenga e to ratou au mate i te metepara ra; e kua koumuumu katoa toku metua i te Atu ra ko te Atua; i na oki, kua tumatetenga maata to ratou ngakau, e kua koumuumu ratou i te Atu.

21. Kua tumatetenga katoa au ko Niphai ma toku taeake katoa, no tei kino taku ana; e no te paruparu o ta ratou au ana i rauka ngata ei te kai ia matou.

22. E kua tuatua atura au, ko Niphai, i te au tuatua e manganui ki toku nga tuakana, no te mea, kua akaketaketa akaou raua i to raua ngakau, e kua koumuumu oki raua ki te Atu ra ko te Atua.

23. I maani iora au ko Niphai i tetai ana rakau, e no tetai rakau tika kua maani au i te kakao, rave iora au i te ana e te kakao e te toka e te maka. E kua ui au ki toku metua: Ka aere au kiea e raukaʼi te kai?

24. E kua pati atura aia ki te Atu ra, e taakaaka oki ratou ia ratou uaorai no taku ra tuatua; No te mea, E manganui te au mea taku i tuatua atu kia ratou ma te maroiroi o toku vaerua.

25. E kua tae maira te reo o te Atu ko toku metua, e kua akoia aia no tona ra koumuumuanga atu ki te Atu, e kua taakaakaia aia ma te tangi tikai.

26. E kua tuatua maira te reo o te Atu kiaia, Ka akara na i te poro kia kite i te au mea i tataia ra.

27. E kua akara iora toku metua i te au mea i tataia ki rungao i te poro ra, mataku iora aia ma te ruketekete maata, e i pera katoa toku au taeake e nga tamariki tamaroa a Isemaela e ta matou au vaine katoa.

28. E i akara oki au, ko Niphai, i nga auri meangiti i roto i te poro, e kua angaanga te reira kia tau ki te akarongo, te akakoromaki, e ta matou irinaki i te reira.

29. Kua tataia oki tetai tataanga ou, e kua marama oki matou i te reira, na te reira i oronga kia matou i te marama i te au ravenga a te Atu ra; e kua tataia ki runga e kua tauiia i tera taime i tera taime kia tau ki to matou akarongo, e to matou akono. E no reira te kite nei tatou e, na roto i te au ravenga iti, e akatupu ei te Atu i te au mea mamaata.

30. Aere atura au, ko Niphai, ki te take o te maunga mei tei akakiteia mai i rungao i te poro ra.

31. Ta iora au i te au manu taae e kua rauka mai iaku te kai na to matou au ngutuare.

32. Oki maira au ki to matou au puakapa i te apai anga mai i te au manu taku i ta ana; e kia kite maira ratou e, kua rauka iaku te kai, kua maata to ratou rekareka. E kua taakaaka ratou ia ratou uaorai ki mua i te Atu ra, e kua akameitaki atura ratou iaia.

33. Aere akaou atura matou ki to matou tere, na te kaveinga ta matou i aere i mua ana. E ope akera te au ra e manganui i to matou tere, patia akaou matou i to matou au puakapa kia noo matou no tetai tuatau poto ua.

34. Mate iora Isemaela, e tanumia iora aia ki te ngai i tuatuaia ko Naama.

35. Kua eva iora te au tamaine a Isemaela ra, no tei mate to ratou metua, e no to ratou au tumatetenga i te metepara ra, e kua koumuumu maira ratou i toku metua no te mea, kua arataki aia ia ratou mei roto mai i te enua ia Ierusalema, i te na ko anga mai e, Kua mate to matou metua, e kua roa to matou aereanga i te metepara nei e kua maata oki to matou au tumatetenga i te pongi e te kaki vai e te roiroi; e oti akenei taua au tumatetenga katoa ra, e mate oki matou i te metepara nei no te pongi.

36. E kua pera ratou i te koumuumu mai ki toku metua e kiaku katoa oki; e kua inangaro ratou i te oki atu ki Ierusalema.

37. Kua tuatua atura Lamana kia Lemuela e ki nga tamariki tamaroa a Isemaela, i na, e ta tatou i to tatou metua e to tatou teina ko Niphai, koia tei rave ua i te mana kia riro ei tutara e ei puapii no tatou, no tona ai tuakana.

38. E teianei, te tuatua ra aia e, kua tuatua mai te Atu kiaia, e kua tae katoa mai te au angela kiaia. Ina ra, kua kite tatou e, kua pikikaa mai aia ia tatou; te akakite ua mai nei aia i taua au mea ra na roto i tana au ravenga ngaro e te rave nei aia i teia au mea kia vare tatou, te manako ra paa aia e, ka arataki paa aia ia tatou ki tetai metepara mamao; e kia arataki ke atu aia ia tatou ka manako aia e, ka akariro aia iaia uaorai ei ariki e ei tutara ki runga ia tatou, kia rave oki aia ia tatou mei tei tau i tona uaorai inangaro e tona uaorai manako. E kua pera toku tuakana ko Lamana i te akatupu i te riri ki roto i to ratou ngakau.

39. Te arataki ra te Atu ia matou, no reira kua tuatua te Atu i te au tuatua e manganui kia ratou, e kua ako ua maira ia ratou. E kua akoia maira ratou e te reo o te Atu ra, kua akaruke ratou i to ratou riri, e kua tataraara iora ratou i ta ratou au ara, e kua akameitaki akaou maira te Atu ia matou i te kai, kia kore matou e mate i te metepara.