1. E teianei, kua inangaro au kia kite kotou e, kia oti toku metua ko Lihai i te totou ki tona uanga, kua tuatua akaou te Atu kiaia, na ko maira, kare e tau iaia, ia Lihai, kia rave ua aia i tona kopu tangata e aere atu ki te metepara ko ratou anake ua; kia akaipoipo ra tana au tamariki tamaroa ki te vaine, kia akatupu ratou i te uanga a te Atu i te enua taputou.

2. Kua akaue maira te Atu iaia, kia oki akaou au, ko Niphai, e toku au tuakana ki te enua ko Ierusalema, kia arataki mai ia Isemaela e tona kopu tangata katoa ki te metepara.

3. E kua aere akaou atura au, ko Niphai, e toku au tuakana katoa ki te metepara, e aere atura oki matou ki runga, ki Ierusalema.

4. E kua aere atura matou ki te are o Isemaela, e kua akarongo mai aia kia matou, e kua tuatua atura matou i te tuatua a te Atu kiaia ra.

5. E kua akaparuparu iora te Atu i te ngakau o Isemaela e to tona ngutuare katoa, e kua aru mai ratou ia matou ki te metepara ki te puakapa o to matou metua.

6. Te tere atura matou ki roto i te metepara, e i na, kua akapekapeka maira a Lamana raua ko Lemuela, e pera katoa nga tamaine a Isemaela, e nga tamariki tamaroa oki a Isemaela, e to ratou kopu tangata, kua pekapeka maira kia matou, koia oki, kiaku, ko Niphai, e kia Samu, e ki to ratou metua ko Isemaela e ki tana vaine e ki tana nga tamariki tamaine e toru ra.

7. E i taua pekapeka anga mai, kua inangaro ratou kia oki akaou ratou ki te enua ko Ierusalema.

8. E teianei, no te ketaketa o to ratou ngakau, kua tangi au ko Niphai ia ratou, e kua tuatua oki au kia raua, kia Lamana raua ko Lemuela oki, i te na ko anga e, i na, e nga tuakana korua noku, e eaa i ketaketaʼi to korua ngakau e i poiri ei to korua manako, kia tuatua atu au, to korua teina, e kia riro oki au i te akaraanga no korua?

9. Eaa korua i kore ei i akarongo ki te tuatua a te Atu?

10. I akapeea korua i ngaropoinaʼi e, kua kite korua i tetai angela a te Atu?

11. I na, i akapeea korua i ngaropoinaʼi te au mea maata ta te Atu i rave no tatou, i te akaoraanga ia tatou mei roto mai i te rima o Labana, kia rauka ia tatou te au akapapaanga tuatua?

12. I na, i akapeea i ngaropoinaʼi ia korua e, ka rauka i te Atu i te rave i te au mea katoatoa, mei tei tau i tona inangaro, no te au tamariki a te tangata nei, mei te mea e akarongo ratou iaia? E tenana, kia akono tatou iaia.

13. E mei te mea e akono meitaki tatou iaia, ka rauka ia tatou te enua taputou, e te vai atura te tuatau e kite ei korua e, ka akatupuia te tuatua a te Atu no te takoreanga o Ierusalema ra; no te mea ka tupu te au mea katoa ta te Atu i tuatua no te takoreanga o Ierusalema.

14. I na oki, e te vaitata nei te tuatau e akaruke ei te vaerua o te Atu ia ratou, i na, kua takinga kino ratou i te au peroveta e kua tuku oki ratou ia Ieremia ki roto i te are tapekaanga. E kua titau oki ratou i toku metua kia ta, e kua tuaru atu ratou iaia mei te enua nei.

15. E teianei, i na, te karanga atu nei au kia korua, mei te mea ka oki korua ki Ierusalema, ka mate korua mei ia ratou oki. E teianei, me inangaro korua, e oki ki runga ki te enua, e akamanako ra i te tuatua taku i tuatua atu kia korua, mei te mea, ka aere korua, ka mate korua; i pera mai te Vaerua o te Atu i te akaue mai kiaku kia tuatua atu kia korua.

16. E kia tuatua atura au ko Niphai i teia au tuatua, kua riri raua iaku, e kua mou raua iaku ki to raua rima no te mea, kua riri roa oki raua, kua tapeka iora raua iaku ki te taura, e kua inangaro oki i te tamate iaku, kia vaio raua iaku ki roto i te metepara, kia kaingaia au e te au manu taae ra.

17. Kua pure atura au ki te Atu, na ko atura, E te Atu e, kia tau ki toku akarongo ia koe, e akaora mai koe iaku i te rima o toku nga tuakana; i na, e oronga mai koe i te maroiroi kiaku kia matara teianei taura i tapekaiaʼi au.

18. E oti akera iaku i te pure i teianei au tuatua, i na, kua matara te taura i toku rima e toku vaevae oki, e kua tu akera au ki mua i toku nga tuakana, e kua tuatua akaou atura au kia raua.

19. E riri akaou akera raua kiaku ra, e kua inangaro akera raua kia mou to raua rima iaku; ina ra, tetai o te au tamaine a Isemaela, e tona metua vaine katoa, e tetai o te au tamariki tamaroa a Isemaela, kua tuatua atura ratou ki nga tuakana noku, e maru akera to raua ngakau, e kua akaruke raua i te tamata kia ta iaku.

20. E kua aue iora oki raua, no ta raua ara i rave ana e kua tupou iora raua ki mua iaku, e kua pati maira kiaku kia akakore au i ta raua ara i rave ana kiaku.

21. E kua akakore ua au i te au mea katoa ta raua i rave ra, e kua ako au kia raua kia pure ki te Atu, ki to raua Atua, kia akakore aia i te reira. E kua pera oki raua. E kia oti ta raua pure ki te Atu, kua tere akaou atura matou e tae atu ki te puakapa o to matou metua.

22. E kua tae atura matou ki te puakapa o to matou metua, e kia tae atura au e toku nga tuakana, e te kopu tangata katoa o Isemaela, ki te puakapa o toku metua, kua akameitaki atura ratou i te Atu, i to ratou Atua, e kua apai ratou i te atinga e te atinga karakaratio kiaia ra.