1. E kia tae atura matou ki raro i te metepara ki to matou metua, i na, ki rava aia i te mataora, e kua mataora oki toku metua vaine ra ko Saraia, no te mea, i aue ana oki aia ia matou.

2. I manako ana aia e, kua mate matou i te metepara; e i koumuumu ana aia ki toku metua tane i te tuatua anga kiaia e, e tangata kite orama aia; i te na ko anga e: i na, kua arataki mai koe ia matou mei te enua mai o to tatou ipukarea, e kua mate taku au tamariki, e ka mate katoa oki taua i te metepara nei.

3. E kua pera mai toku metua vaine i te koumuumu anga ki toku metua tane.

4. Kua tuatua oki toku metua tane kiaia e; kua kite oki au e, e tangata kite orama au naringa kare i kite ana i te au mea a te Atua na roto i te orama, kare oki au i kite ana i te meitaki a te Atua, kua noo ra ki Ierusalema, e kua mateia au e toku au taeake katoa.

5. I na, kua rauka iaku tetai enua taputou, e te rekareka nei au i te reira, e kua kite oki au e, ka akaora te Atu i taku au tamariki i te rima o Labana, e ka arataki akaou mai ia ratou ki raro kia taua i te metepara nei.

6. Kua akapera oki toku metua ko Lihai i te akapumaana anga i toku metua vaine, ia Saraia, i to matou aereanga i te metepara, ki te oire ra ko Ierusalema, kia rauka mai ia matou te au akapapaanga tuatua no te ngati Iuda.

7. E oki iora matou ki te puakapa o to matou metua, i na, kua ki oki raua i te mataora, e kua akapumaanaia oki toku metua vaine.

8. Kua tuatua iora aia, na ko atura: E teianei, kua kite papu au e, kua akaue mai te Atu i taku tane kia aere mai ki te metepara; e kua kite papu oki au e, kua tiaki mai te Atu i taku au tamariki, e kua akaora oki aia ia ratou i te rima o Labana ra, kua oronga mai oki i te mana kia ratou, e tikaʼi ia ratou kia rave i te au mea ta te Atu i akaue maira kia ratou. E kua pera aia i te tuatua anga mai.

9. E mataora maata to raua i reira, e kua apai atura raua i te atinga e te atinga karakaratio ki te Atu ra; e kua akameitaki atura oki raua i te Atua o Iseraela ra.

10. E oti akera ia raua te akameitaki i te Atua o Iseraela, rave iora toku metua ra ko Lihai i te akapapaanga tuatua i kotikotiia ki runga i te au papa veo ra, e kua kimi aia mei te akamataanga mai e tae rava atu ki te openga.

11. E kite akera aia e, tei roto te reira i nga puka e rima a Mose ra, tei akakite mai i te angaia anga o teianei ao, e te tuatua no to tatou nga metua mua, ko Adamu raua ko Eva.

12. E akapapaanga tuatua katoa oki no te ngati Iuda mei muatangana maira e tae rava mai ki te au o te ariki o te ngati Iuda, ko Zedekia;

13. E te au totou oki a te au peroveta tapu ra, mei muatangana maira e tae roa mai ki te akamata anga o te au o Zedekia ra, tetai au totou oki i tuatuaia e te vaa o Ieremia.

14. E kua kite katoa toku metua ra, ko Lihai e, tei runga katoa i te au papa veo ra te akapapaanga o tona ai metua; no reira kua kite aia e, e uanga aia no Iosepha; koia oki, ko Iosepha a Iakoba tei okonaia ki Aiphiti, e ko tei akaoraia e te rima o te Atu ra, kia rauka iaia te akaora i tona ra metua ia Iakoba, e tona ngutuare katoa kia kore ratou e mate i te onge ra.

15. E kua arataki katoaia ratou mei to ratou tuikaa anga maira, e mei te enua maira mei Aiphiti, e ko te Atua uaorai tei akaora ia ratou.

16. No reira, kua kite toku metua, ko Lihai i te akapapaanga o tona ai metua. E uanga katoa a Labana no Iosepha, no reira kua akono aia e tona ai tupuna i taua akapapaanga tuatua ra.

17. E kite akera toku metua i taua au mea ra, ki iora aia i te Vaerua, e kua totou akera oki aia ki tona ra uanga, i te na ko anga e—

18. Ka kitea atu taua au papa veo ra ki to te pa enua katoa, e te au kopu, e te au reo, e ki te au iti tangata katoa o tona ra uanga.

19. Kua karanga katoa atura aia e, e kare rava taua au papa veo ra e ngaro; e e kare oki e tuparapara te tuatua i kotikotiia ki runga no atu eaa te roa te tuatau. E e manganui atura te au mea tana i totou no tona uanga.

20. E kua akono maua ko toku metua i te au akaueanga ta te Atu i akaue mai kia maua.

21. I rauka ia matou te akapapaanga tuatua mei ta te Atu i akaue mai, e kua kimi iora matou e kua kite oki matou e, e mea inangaro maataia ïa, e te puapinga maata kia matou, e raukaʼi ia matou te akakite atu i te au akaueanga a te Atu ra ki ta matou au tamariki.

22. E teianei, e ravenga pakari ïa ta te Atu kia apai atu matou i te reira i to matou tereanga na roto i te metepara e tae atu ei ki te enua taputou.