1. I na, ka akarongo mai i teia, e te ngutuare o Iakoba; kotou tei topaia ki te ingoa ra ko Iseraela, e tei aere mai mei roto mai i te vai o Iuda, koia oki no roto mai i te vai bapetizo, anga ko tei taputou i te ingoa o te Atu, e tei akaiki i te ingoa o te Atua o Iseraela, kare ra ma te tuatua mou, e kare rai ma te tuatua tika.

2. No te oire tapu ratou i ta ratou tuatuaanga, kare ra ratou i irinaki ki te Atua no Iseraela, koia te Atu Sabaota, e ko te Atu Sabaota tona ra ingoa.

3. I na, kua akakite au i te au mea i mua ana, mei tei muatangana maira; e kua riro atura ïa no roto i toku nei vaa, e kua akakite oki au i te reira. Kua akakite viviki au i te reira.

4. Kua na reira au no te mea kua kite au i taau māro, e uaua auri toou kaki, e toou rae e veo ia;

5. I akakite atu ei au kia koe mei muatangana mairai. Kare te reira au mea i tupu ake, kua akakite atu au kia koe ra, e kua akakite atu au ko te karanga aea koe e, na toku idolo te reira i rave, e na toku tiki i kotikoti e na toku tiki i maaniia i akaue i te reira.

6. Kua akarongo e kua akara oki koe i taua au mea katoa, e kare ainei koe e akakite mai i te reira au mea? Kua akakite atu au kia koe i te au tuatua ou, ko tei uunaia ra, e kare koe i kite i te reira.

7. Kua angaia ra i teianei, e kare mei te akamataanga mai; kare rai oki koe i rongo i te reira, kua akakiteia ïa kia koe, ko te karanga aea koe e, i na, kua kite ana au i te reira.

8. Koia ia, kare oki koe i akarongo, e kare oki koe i kite; kare oki mei taua tuatau maira ka rongo ei to taringa; kua kite oki au e, ka riro koe i te pikikaa, e kua kapikiia koe e e tangata kino mei te kopu maira.

9. No toku ingoa i tavare ei au i toku riri, e no te akameitakianga noku i tāpū ei au i te reira ia koe; kia kore au e tipu takiri atu ia koe ra.

10. I na, i tama ana au ia koe, e kua iki au ia koe i roto i te umu o te tumatetenga ra.

11. Noku uaorai, koia ïa, noku uaorai e akaperaʼi au; e kare oki au e akatika kia akakinoia toku nei ingoa, e kare rava au e oronga i toku kaka ki tetai ke.

12. E akarongo mai iaku, e Iakoba, e Iseraela tei ikiia e au, ko au te muatangana, ko au rai te akaopenga.

13. Na toku rima i akatumu i te enua, na toku rima katau i totoa i te rangi, kia kapiki atu au kia ratou, kua tu kapipiti ratou.

14. E akaputuputu mai kotou ravarai e akarongo mai, koai ia ratou tei akakite mai i teianei au mea? I aroaia aia e te Atu ra, koia ia, e nana e akatupu iaia i tana tuatua ta ratou i akakite atu; Nana e rave i tona inangaro ki Babulonia, e nona te rima ka iri ki runga i te Kaledea ra.

15. Te na ko maira oki te Atu, ko au nei ko te Atu; ko au tei tuatua atu, Naku i kapiki iaia kia akakite atu, naku oki aia i arataki mai, e nana e akamanuia i tona aerenga.

16. E akavaitata mai kotou kiaku nei, kare oki au e tuatua ngaro ana; mei muatangana ra, mei te tuatau i akakiteia mai e kua tuatua au; e te Atu ko te Atua, e tona Vaerua katoa tei tono mai iaku nei.

17. Te na ko maira te Atu, toou Akaora, Tei Tapu i Iseraela, Naku aia i tono. Ko te Atu ra ko te Atua tei apii mai i te au mea e puapingaiaʼi e tei arataki ia koe na te arataa e tau ei kia aere koe ra.

18. Naringa koe i akarongo mai ki te au akaueanga naku! Kua riro ïa toou au, mei te vai tae ra, e taau tuatua tika mei te ngaru moana ra.

19. E toou uanga ra, mei te one taatai ra ïa; e ta to kopu e anau ra, mei te ungaunga one te reira ra; kare oki e tipu keia tona ingoa, kare oki e akakoreia i mua iaku nei.

20. E aere mai kotou mei roto ia Babulonia, e rere ke atu i te Kaledea, ka akakite kotou ma te reo imene, e tuatua i te reira, e kia puroro atu te reo i te openga mai o te enua ra, e tuatua kotou e kua akaora te Atu i tona tavini ia Iakoba.

21. Kare ratou e kaki vai i te au metepara ra tana i arataki ia ratou; kua akatae mai aia i te vai no roto i te toka no ratou, kua vavai iora aia i te toka, e tae ua maira te vai.

22. Kua rave ua rai aia i taua au mea ra, e maata atu oki, kare rava o te aronga rave ara ra e au, te tuatua maira te Atu ra.