1. E teianei, kare oki au ko Niphai e tata i te akapapaanga o toku ai tupuna ki roto i teia pae o te akapapaanga tuatua taku e tata nei; no te mea, kua tataia ïa ki roto i te akapapaanga tuatua i akonoia e toku metua; no reira, kare au e tata i te reira ki roto i teianei puka.

2. Kua rava ua ra kia karanga au e, e uanga matou no Iosepha ra.

3. E kare oki au e tata i te au mea ta toku metua i rave, e kare oki i tika kia tataia ïa ki runga i teianei au papa no te mea, kua inangaro au i teia au papa nei kia rauka iaku i te tata i te au mea a te Atua.

4. Ko teia te maata oki o toku nei inangaro, kia pati akatenga au i te tangata kia ariu mai ki te Atua o Aberahama, e te Atua o Isaaka, e te Atua o Iakoba, e oraʼi ratou.

5. E teianei, ko te au mea te ka riro ei rekareka anga ki to te ao nei, kare oki au e tata i te reira, ko te au mea ra ka rekareka te Atua, e te au tangata oki tei kore ratou e no te ao nei.

6. E no reira, te oronga atu nei au i tetai akaueanga ki toku ra uanga, auraka rava ratou e tata i teianei au papa ki te au tuatua te ka kore e riro ei puapinga ki te tamariki a te tangata nei.