1. E kua akamori atura raua i te Atu, e kua aere iora matou e raua katoa, e kua maani iora matou i te rakau, e tuke oki te maanianga. E kua putuputu te Atu i te akakite mai kiaku i te tu o te maanianga i te au rakau o te pai.

2. I teianei, kare au, ko Niphai, i maani i te au rakau mei ta te tangata nei maanianga, kare oki au i maani i te pai mei ta te tangata maanianga; kua maani ra au i te reira mei ta te Atu ra i akakite mai kiaku, kare te reira i aite ki ta te tangata nei ravenga.

3. Kua aere putuputu atura au, ko Niphai, ki runga i te maunga, e kua pure putuputu au ki te Atu; no reira kua akakite mai te Atu i te au mea mamaata kiaku nei.

4. E akaoti akera au i te pai, mei tei tau ki te tuatua a te Atu, kua akara maira toku nga tuakana e, e mea meitaki ïa, e e mea manea rava oki te maanianga; no reira kua taakaaka akaou raua ia raua uaorai ki mua i te aroaro o te Atu.

5. Tae maira te reo o te Atu ki toku metua, i te akaue anga mai ia matou kia aere ki raro, e kia aere ki roto i te pai.

6. E oti akera ia matou te akapapa i te au mea katoatoa, ko te au ua rakau e maata, e te au tu kiko no te vao rakau, e te meri kia maata, e te au mea katoatoa oki, mei ta te Atu i akaue mai ia matou ra, e ao akera, kua aere matou ki roto i te pai ma ta matou au apinga, e ta matou au ua, e te au mea katoatoa ta matou i apai mai, te tangata oki kia tau ki tona mataiti, kua aere matou, e ta matou au vaine, e ta matou au tamariki oki ki raro, e kua tomo ki roto i te pai ra.

7. I anau toku metua e toko rua puke tamariki tamaroa i roto i te metepara; kua tapaia tetai ki te ingoa ko Iakoba, e te ingoa o te teina openga ko Iosepha.

8. E oti akera matou i te tomo ki roto i te pai ra, ma ta matou au apinga katoatoa mei tei akaueia mai kia matou, kua tere atura matou ki te moana, e kua puia matou e te matangi e tae atu ei matou ki te enua taputou.

9. E i puia matou e te matangi i te au rā e manganui, i na, kua akamata toku nga tuakana, e te au tamariki tamaroa a Isemaela, e ta ratou au vaine i te tarekareka ia ratou uaorai, akamata ratou i te ura, e te imene, e te tuatua i te au tuatua tau kore; kua ngaropoina oki ia ratou te mana i tae ei ratou ki reira ra; e kua akateiteiia ratou i te ngakau parau.

10. E kua mataku rava au, ko Niphai, ko te riri aea te Atu ia matou, e ko te papa aea aia ia matou no ta matou ara, e ko te apukuia aea matou e te moana; e kua akamata iora au, ko Niphai, i te tuatua atu kia raua ma te ngakau ruketekete; i na, kua riri maata ratou iaku, e kua na ko maira, Kare matou e akatika kia riro to matou teina ei tutara ki runga ia matou.

11. E kua mou maira a Lamana raua ko Lemuela iaku, e kua tapeka iora raua iaku ki te taura, e i takinga kino maira iaku; ina ra, kua akakoromaki maira te Atu i te reira, kia rauka iaia kia akakite mai i tona mana, i te akatupu anga i tana tuatua no te aronga rave i te kino ra.

12. E tapeka iora raua iaku kia kore e rauka iaku te oriori, kua kore i reira te kaveinga ta te Atu i oronga mai ei angaanga.

13. Kare i reira ratou i kite e ka akapeea kia akatere i te pai, tupu iora te uriia, e kua akaokiia matou ki muri na runga i te tai i nga rā e toru, tupu iora to ratou mataku maata, ko te pou aea ratou i te moana, kare ra ratou i tatara mai iaku.

14. E ā o matou rā i te akaokiangaia ki muri, e kua maata roa te uriia i reira.

15. E vaitata akera matou i te apukuia ki roto i te moana. Kua puia matou ki muri na runga i te moana i nga rā e ā, kite akera toku nga tuakana e, tei runga ia raua te akaapaanga a te Atua, e me kare raua e tataraara i ta ratou au angaanga kino ka mate raua e tikai; no reira kua aere mai raua kiaku, e tatara iora raua i te taura i toku rima, kua akaē toku rima e toku vaevae kua maata oki te mamae no tei tapekaia.

16. Ina ra, kua irinaki au i te Atua e kua akameitaki au iaia i te au rā katoa, e kare au i koumuumu i te Atu no toku au tumatetenga.

17. I tuatua ana toku metua, ko Lihai, kia raua, e ki te au tamariki tamaroa katoa a Isemaela; ina ra, kua tuatua raua i te tuatua akamataku ki tei tauturu mai iaku; e kua rokoia toku nga metua e te maki ki runga i to raua roi no tei pakari raua, e no te aue i ta raua nga tamariki.

18. No to raua iriea e te aue e no te ara oki a toku nga tuakana, i vaitataʼi raua i te mate takiri e i te aravei oki i to raua Atua; e kua vaitata to raua rauru inaina i te takoto ki raro i te one, e kua vaitata oki raua i te tukuia ki raro i te moana tanu ei.

19. E no te au tumatetenga o to raua metua vaine kua aue a Iakoba raua ko Iosepha, e tamariki ua raua, kare oki i maru te ngakau o toku nga tuakana i te roimata e te pure o taku vaine e taku tamariki, kia tatara raua iaku.

20. Kare e rauka i tetai mea kia akamaru i to raua ngakau, mari ra, ko te mana o te Atua kia akamataku ia raua ki te mate, e kite akera raua e, kua vaitata raua i te pou i te moana ra, kua tataraara raua i te au mea ta raua i rave ana, e kua tatara iora raua iaku.

21. E kia tatara raua iaku, i na, kua rave iora au i te kaveinga e kua angaanga iora te reira kia tau ki toku inangaro. E kua pure atura au ki te Atu; e oti akera iaku te pure, akaea iora te matangi e te uriia e kua marino iora.

22. E kua akatere atura au, ko Niphai, i te pai, tere akaou atura matou ki te enua taputou.

23. E tere atura matou i te au rā e manganui, tae atura matou ki te enua i taputouia ra, e kua aere atura matou ki runga i te enua ra, patia iora i to matou au puakapa, e kua tapa matou i te ingoa o taua ngai ra, ko te enua taputou.

24. Kua akamata akera matou i te arote i te enua e kua akamata katoa matou i te tanu i te au ua. I na, ko te au ua ta matou i apai no te enua maira no Ierusalema, kua tanu matou i te reira ki roto i te enua. E kua tupu meitaki tikai te reira, e kua akameitaki maataia matou.

25. I to matou aereanga na runga i te enua taputou i roto i te metepara, kua kite matou ki roto i te vao rakau i te au tu manu katoatoa, ko te ua puakatoro e te toa puakatoro, te asini e te oroenua, te puakanio taae e te au manu taae tei akonoia no te tangata nei. E kua rauka ia matou te au one no reira mai te auro, e te ario, e te kapa.