1. E mei te mea ka akarongo te au Etene i te Punua Mamoe a te Atua ra, i te ra e akakite mai ei aia iaia uaorai kia ratou na roto i te tuatua e te mana, koia ïa i te akakore anga i to ratou au turorianga,

2. E me kore ratou e akaketaketa i to ratou ngakau ki te Punua Mamoe a te Atua, ka tatauia ratou ki te uanga a toou ra metua, i na, e ka tatauia ratou ki te ngutuare o Iseraela; e ka riro ratou ei iti tangata akameitakiia ki runga i te enua taputou e tuatau ua atu; e kare ratou e tuku akaouia ki raro i te tuikaaanga; e kare oki te ngutuare o Iseraela e takinga kino akaouia.

3. E te vaarua oonu ra tei koia no ratou e taua akonoanga maata ra e te viivii, ko tei akatumuia e te tiaporo e tana au tamariki, kia arataki ke atu aia i te au vaerua o te tangata ki raro i ade; i na, ko taua vaarua oonu ra i koia no te mate o te tangata, ka akakiia ïa i te au tangata tei ko i te reira, e ka mate atura oki ratou, te na ko maira te Punua Mamoe a te Atua; kare ra e akakoreia te vaerua, mari ra, ka uriia te reira ki roto i taua ade openga kore ra.

4. I na oki, e tau te reira ki te akatuikaaanga o te tiaporo ra, e e tau oki i te akautunga a te Atua ra ki runga i te iti tangata e rave i te kino e te au mea viivii ki mua iaia ra.

5. E kua tuatua maira te angela kiaku ra kia Niphai, na ko maira, Kua kite koe e, mei te mea ka tataraara te au Etene, ka meitaki ratou; e kua kite katoa koe i te au koreromotu a te Atua ki te ngutuare o Iseraela ra, e kua akarongo oki koe e, ko tei kore e tataraara, ka mate aia.

6. E teianei, e ae to te au Etene, mei te mea, ka akaketaketa ratou i to ratou ngakau ki te Punua Mamoe a te Atua.

7. Te vai atura oki te tuatau, te na ko maira te Punua Mamoe a te Atua e rave ei au i tetai angaanga maata e te umere i rotopu i te tamariki a te tangata nei, e angaanga mutu kore oki ïa; ki tetai tua me kore ra, ki tetai tua; i te akapapu anga ia ratou i te au e te ora mutu kore, me kore ra, i te vaio anga ia ratou i te ketaketa o to ratou ngakau e te poiri oki o to ratou manako e tae rava atu ki te tuikaaanga, e te takoreanga i te kopapa e te vaerua katoa oki, i te tuikaaanga o te tiaporo taku i tuatua

8. E tuatua akera te angela i taua au tuatua ra, na ko maira aia kiaku, kua akamaara ainei koe i te au koreromotu a te Metua ki te ngutuare o Iseraela ra? E kua karanga atura au kiaia, ae.

9. E kua tuatua maira aia kiaku, E akara ki taua akonoanga maata e te viivii ra, koia te metua vaine o te au mea viivii ra, ko te tiaporo oki tona tumu.

10. Kua tuatua maira aia kiaku, E akara, e rua rai akonoanga; tetai ko te akonoanga a te Punua Mamoe a te Atua ra, e tetai ra, ko te akonoanga ïa a te tiaporo ra; e tenana, ko tei kore e ariki i te akonoanga a te Punua Mamoe a te Atua, no taua akonoanga maata ra aia, koia oki te metua vaine o te au mea viivii ra, ko te vaine akaturi oki aia o te ao katoa nei.

11. Kua akara atura au e kite atura i te vaine akaturi o te ao katoa nei, e te noo ra aia ki runga i te au moana e manganui, e ki runga oki aia i to te ao katoa nei, i te au enua katoa, e te au basileia o te au reo, e te au kopu ra.

12. Kua kite oki au i te akonoanga a te Punua Mamoe a te Atua ra, e toko iti ua oki kia tatauia, no te angaanga kino e te au peu viivii a te vaine i noo ki runga i te au moana e manganui ra, ina ra, kua kite oki au i te akonoanga a te Punua Mamoe, koia oki te aronga tapu o te Atua, tei runga katoa ratou i te ao katoa nei, e kua meangiti to ratou mana ki runga i te enua nei, no te tuatua tika kore a te vaine akaturi maata taku i kite ra.

13. E kua kite atura au i te metua vaine o te au mea viivii i te akaputuputu anga i te au urupu maata ki runga i te enua katoatoa, i te au enua o te Etene, kia tamaki mai i te Punua Mamoe a te Atua ra.

14. E kua kite oki au, ko Niphai, i te mana o te Punua Mamoe a te Atua i te ekeanga mai ki rungo i te aronga tapu o te akonoanga a te Punua Mamoe ra, e ki runga katoa i te aronga taputou a te Atu ra, ko tei pueurikirikiia ki te au enua katoatoa o te ao nei, e kua rakeiia ratou ki te tuatua tika e te mana o te Atua i te kaka maata.

15. Kua kite oki au i te riri o te Atua i riringiia mai ki rungao i te akonoanga maata e te viivii ra, e tupu akera te tamaki e te rongo tamaki i roto i te au enua katoatoa, e te au basileia katoatoa o te ao nei.

16. E tupu akera te tamaki e te rongo tamaki i te au enua katoatoa o te metua vaine o te au mea viivii ra, kua tuatua maira te angela kiaku, na ko maira, i na, tei rungao te riri o te Atua i te metua vaine o te akaturi, kua kite oki koe i taua au mea ra.

17. E kia tae mai te rā ka riringiiaʼi te riri o te Atua ki rungao i te metua vaine o te au akaturi, koia oki te akonoanga maata e te viivii o te ao katoa ra; e ko te tiaporo oki te tumu, e i taua rā ra, e akamataiaʼi te angaanga a te Metua i te akateateamamao i te ara no te akatupuanga i tana au koreromotu, tana i papau ki tona au tangata, no te ngutuare oki ratou o Iseraela ra.

18. E kua tuatua maira te angela kiaku, E akara.

19. E kua akara atura au e kua kite i tetai tangata i kakauia ki te kakau teatea.

20. E kua tuatua maira te angela kiaku, E akara ki tetai aposetolo no te tino ngauru ma rua a te punua Mamoe ra.

21. I na, ka kite aia e ka tata aia i te toenga o teianei au mea, e tetai atu au mea tei tupu ana.

22. Ka tata katoa oki aia i te tuatua no te openga o te ao nei.

23. E tuatua mou e te pikikaa kore oki te au mea tana ka tata; e, i na, kua tataia ïa ki roto i te puka taau i kite i te tae anga mai no roto i te vaa o te ngati Iuda ra; e i te tuatau i tae mai ei te reira no roto mai i te vaa o te ngati Iuda ra, koia oki, i te tuatau i tae mai ei taua puka ra no roto mai i te vaa o te ngati Iuda ra e mea marama ua ïa e te tika, e te puapinga maata, e e mea kite ngoie ua kia kite i te au tangata katoatoa.

24. E i na, e maata te au mea ta taua aposetolo a te Punua Mamoe ra ka tata, ko te au mea ïa taau i kite, e i na, ka kite katoa koe i te toenga ra.

25. Kareka te au mea taau ka kite a muri ake, auraka koe e tata; no te mea, kua akono te Atu ra ko te Atua i taua aposetolo a te Punua Mamoe ra kia tata i te reira.

26. Kua akakite katoa ana aia i te au mea katoatoa ki tetai atu au tangata i mua ana, e na ratou i tata i te reira, e kua topiriia atu te reira kia eeuia mai ma te viivii kore i te tuatau ka tau i te Atu, ki te ngutuare o Iseraela ra, e mei tei tau i te tuatua mou i roto i te Punua Mamoe ra.

27. Kua akarongo au, e te akakite atu nei oki au, ko Niphai e, ko Ioane te ingoa o taua aposetolo a te Punua Mamoe ra, koia ïa tei akakiteia mai e te angela ra.

28. E i na, kua araiia au kia kore oki au e tata i te toenga o te au mea taku i akara e taku i akarongo ra; kua rava ra taku i tata, e kua tata au i tetai papaki meangiti o te au mea taku i kite ra.

29. E te akakite atu nei au e, kua kite katoa au i te au mea ta toku metua i kite ra, e na te angela a te Atu i akakite mai kiaku.

30. E teianei, te akaoti atu nei au i te tuatua i te au mea taku i kite i toku apainaia anga atu e te vaerua; e me kare e ope te au mea taku i kite ana i te tataia, e tuatua mou ra te au mea katoatoa taku i tata ra, koia mou ïa. Amene.