1 Te parau tā Isaia, te tamaiti a Amosa, i ’ite nō ni’a ia Iuda ’e Ierusalema :

2 ’E a muri a’era ’ia tae i te mau mahana hope’a ra, e fa’ati’ahia te mou’a ra o te fare o te Fatu i ni’a i te tupua’i o te mau mou’a, ’e e fa’ateiteihia ïa i ni’a a’e i te mau ’āivi, ’e e ta’iruru mai tō te mau nūna’a ato’a ra i reira.

3 ’E e rave rahi te ta’ata e haere ma te parau ē : ’A haere mai, e haere tātou i ni’a i te mou’a o te Fatu, i te fare o te Atua o Iakoba ; ’e nāna e ha’api’i mai ia tātou i tōna ra mau haere’a, ’e e haere tātou nā ni’a i tōna ra mau ’ē’a ; i nā Ziona atu ho’i te ture i te revara’a atu, ’e te parau a te Fatu i nā Ierusalema atu ïa.

4 ’E nāna e ha’avā i rotopū i te mau nūna’a, ’e e a’o ’ū’ana atu i te parau i te mau ta’ata e rave rahi ; ’e e tūpa’i rātou i tā rātou mau ’o’e ’ei mau ’āuri ’ārote, ’e tā rātou mau māhae ’ei mau tipi tope ra—’e ’aita te hō’ē nūna’a e ’aro atu i te tahi atu nūna’a, ’e ’aita ho’i rātou e ha’api’i fa’ahou ’ia ’aro.

5 E te ’utuāfare o Iakoba ē, ’a haere mai ’outou ’e ’a haere ana’e tātou nā roto i te māramarama o te Fatu ; ’oia ïa, ’a haere mai, i haere na ho’i ’outou ato’a nā te ’ē’a ’ē, ’o te ta’ata i tōna ihora haere’a parauti’a ’ore.

6 Nō reira, e te Fatu, ’ua fa’aru’e ho’i ’oe i tō ’oe mau ta’ata, i te ’utuāfare o Iakoba, nō te mea, ’ua ’ī rātou i te tāiroiro nō te hiti’a o te rā mai, ’e ’ua fa’aro’o rātou i te feiā tahutahu mai tō te Philiseti ra, ’e ’ua au atu rātou i te mau tamari’i a te mau ta’ata ’e’ē ra.

7 ’Ua ’ī ho’i tō rātou fenua i te ’ārio ’e te ’auro, ’e ’aita e hope’a nō te rahira’a o tā rātou mau tao’a ; ’ua ’ī ato’a tō rātou fenua i te pua’ahorofenua, ’e ’aita ato’a e hope’a nō te rahira’a o tō rātou mau pere’o’o.

8 ’Ua ’ī ho’i tō rātou fenua i te mau ’īdolo ; ’e tē ha’amori ra rātou i te ’ohipa a tō rātou iho rima, i tā tō rātou iho rimarima i hāmani.

9 ’E ’aita te ta’ata ri’i e tāhopu i raro, ’e ’aita te ta’ata mana e fa’aha’eha’a iāna iho, nō reira, ’eiaha e fa’a’ore i tāna mau hara.

10 E te mau ta’ata parauti’a ’ore ē, ’a haere i roto i te mato, ’e ’a fa’atāpuni ia ’outou i raro i te repo, nō te mea nā te mata’u o te Fatu ’e te hanahana o tōna ra mana e tā’iri mai ia ’outou na.

11 ’E a muri a’era, e fa’aha’eha’ahia te mata teitei o te ta’ata nei, ’e te te’ote’o o te ta’ata nei e tu’uhia ïa i raro, ’e ’o te Fatu ana’e iho tē fa’ateiteihia i te reira mahana.

12 E tae vave mai ho’i te mahana o te Fatu Sabaota ra i ni’a i te mau nūna’a ato’a ; ’oia ïa, i ni’a i te mau ta’ata ato’a ; ’oia ïa, i ni’a i te feiā te’ote’o ’e te fa’ateitei ; ’e i ni’a ho’i i te feiā fa’aahaaha, e fa’aha’eha’ahia ïa ’oia i raro.

13 ’Oia ïa, e tae mai te mahana o te Fatu i ni’a iho i te mau ’āreti ato’a nō Lebanona, nō te mea ’ua teitei rātou ’e tē fa’ateiteihia ra ho’i ; ’e i ni’a iho i te mau aluna ato’a nō Basana ra.

14 ’E i ni’a iho i te mau mou’a teitei ato’a, ’e i ni’a iho i te mau ’āivi ato’a, ’e i ni’a iho i te mau nūna’a ato’a i fa’aahaaha ra, ’e i ni’a iho i te mau ta’ata ato’a ra.

15 ’E i ni’a iho i te mau pare teitei ato’a, ’e i ni’a iho i te mau patu ato’a i ’āuahia ra.

16 ’E i ni’a iho i te mau pahī ato’a o te moana, ’e i ni’a iho i te mau pahī ato’a nō Taresisa ; ’e i ni’a iho i te mau mea auhia ’e te mata.

17 ’E e tu’uhia te fa’ateitei o te ta’ata i raro ; ’e te te’ote’o o te ta’ata e fa’aha’eha’ahia ïa ; ’e ’o te Fatu ana’e iho te fa’ateiteihia i te reira mahana.

18 ’E te mau ’īdolo ra ’o tāna ïa e ha’amou roa.

19 ’E e reva ’ē ho’i rātou i roto i te mau ’āpo’o o te mau mato ra, ’e i roto i te mau ana o te fenua nei, nō te mea e tae mai te mata’u o te Fatu i ni’a ia rātou ’e e tā’iri te hanahana o tōna ra mana ia rātou, ’ia ti’a mai ’oia i ni’a nō te ueue ’ū’ana i te fenua nei.

20 ’Ia tae i te reira mahana e fa’aru’e mai te ta’ata i tāna mau ’īdolo ’ārio, ’e tāna mau ’īdolo ’auro, ’o tāna iho i hāmani ’ei ha’amorira’a nāna iho, nā te mau ’iore ’e nā te mau ’iore pererau.

21 Nō te haere i roto i te mau ārea o te mau mato ra, ’e i roto i te mau mato ’āmahamaha ra, nō te mea e tae mai te mata’u o te Fatu i ni’a ia rātou ’e e tā’iri te mana o tōna ra hanahana ia rātou, ’ia ti’a mai ’oia i ni’a nō te ueue ’ū’ana i te fenua nei.

22 ’Ātīrā na i te ti’aturi i te ta’ata, tei te ’āpo’o ihu ho’i tōna ra aho ; nō reira tei hea ïa tōna faufa’a rahi ?