1 ’E ’ia tae i taua mahana ra, e haru mai ai nā vahine to’ohitu ra i te tāne hō’ē, ’a nā ’ō mai ē : E ’amu mātou i tā mātou iho mā’a, e ’ahu mātou i tō mātou iho ’ahu ; ’o tō ’oe i’oa ana’e ra tē ma’iri mai i ni’a ia mātou nei ; nō te hōpoi ’ē atu ’oe i te parau fa’a’ino ia mātou nei.

2 ’E i taua mahana ra, e riro ai te ’āma’a o te Fatu ra ’ei mea nehenehe ’e te hanahana ; ’e e riro ho’i te hotu o te fenua ra ’ei mea maita’i roa ’e te nehenehe ho’i i tō ’Īserā’ela i ora mai.

3 ’E a muri a’era, e riro ho’i tei toe i Ziona ra ’e tei pārahi i Ierusalema ra i te parauhia ē, e ta’ata mo’a ; te feiā ato’a i pāpa’ihia i rotopū i te feiā ora i Ierusalema ra—

4 ’ia pau i te horoihia e te Fatu te vi’ivi’i o te mau tamāhine o Ziona ra, ’e ’ia hōpoi-’ē-hia te toto o Ierusalema mai rotopū iāna ra e te vārua ha’avāra’a ’e te vārua auahi ra.

5 ’E i reira te Fatu e hāmani ai i te mau vāhi fa’aeara’a ato’a ra i te mou’a ra o Ziona, ’e i ni’a ato’a i te mau ’āmuira’a mo’a nōna ra, i te ata ’e te au auahi i te ao ra, ’e te ’ana’ana o te auahi ’ama ra i te pō ; ’e e riro te reira ’ei pāruru i ni’a i te hanahana ato’a o Ziona ra.

6 ’E e riro ho’i te reira ’ei sēkene nō te tāmarura’a i te ao i te ve’ave’a ; ’e ’ei vāhi nō te ha’apūra’a, ’e ’ei fa’arurura’a i te vero ’e te ua.