1 ’E i reira e hīmene ai au i tō’u hoa here rahi i te tahi hīmene o tā’u i here, nō ni’a i tāna ra ’ō vine. E ’ō vine tā tō’u hoa here rahi i ni’a i te ’āivi hotu rahi.

2 ’E ’ua ’āua ihora ’oia i te reira, ’e ’ua ’ohi ihora i te mau ’ōfa’i ’e ’ua pau, ’e ’ua tanu ihora i te vine maita’i roa ; ’e ’ua patu ihora i te pare i rōpū i te reira, ’e ’ua hāmani ihora i te nene’ira’a uaina i roto ra ; ’e ’ua mana’o ihora ’oia e fa’ahotu mai te reira i te vine mau, ’e ’ua fa’ahotu mai ra te reira i te vine ’ōviri.

3 ’E i teienei, e te mau ta’ata nō Ierusalema ē, ’e te mau ta’ata ato’a nō Iuda nei ; tē ani nei au ia ’outou, ’a hi’opo’a na iā’u ’e taua ’ō vine nā’u nei.

4 E aha atu ā ho’i tē ti’a ’ia ravehia i roto i taua ’ō vine nā’u ra, ’o tei ’ore ā i ravehia e au ra ? Nō reira, i mana’o na ho’i au e fa’ahotu mai te reira i te vine maita’i, ’e ’ua fa’ahotu mai te reira i te vine ’ōviri.

5 ’E i teienei, inaha, e fa’a’ite atu vau ia ’outou i tā’u e rave i taua ’ō vine nā’u nei—e hōpoi ’ē au i te ’āua, ’e ’ia pau roa i te ’amuhia ; ’e e vāvāhi au i te patu, ’e ’ia pau i te ta’ata’ahihia i raro.

6 ’E e fa’aano roa vau i te reira ’ia ano ; ’e ’aita te reira e topehia ’e ’aita ato’a ho’i e ’ūtaruhia ; e tupu rā te mau rā’au taratara ’e te tātarāmoa i roto ra ; e fa’aue ho’i au i te mau ata ē ’eiaha rātou e ha’ama’iri i te ua i ni’a ihora.

7 Nō te mea ’o taua ’ō vine a te Fatu Sabaota ra, ’o te ’utuāfare o ’Īserā’ela ïa, ’e te mau ta’ata nō Iuda ra, ’o tāna ïa ohi poupou ; ’e ’ua tīa’i ho’i ’oia i te parau mau, ’e inaha, ’o te hāmani ’ino tei ’itea ; ’ua tīa’i ho’i i te parauti’a, ’o te ’auē ïa tei ’itea.

8 ’Auē ho’i te feiā ’o tē ’āpiti atu i te fare i te tahi fare, ’e ’aore atu ra e fenua toe nō te tahi ’ē, e toe noa ihora rātou ana’e ra i rōpū i te fenua ra !

9 ’Ua fa’a’ite mai te Fatu Sabaota ra i tō’u nei tari’a, e rave rahi te fare e riro ’ei fare ta’ata ’ore ; ’e te mau ’oire rahi ’e te nehenehe ato’a, ’e ’aita ïa e ta’atahia.

10 ’Oia ïa, i roto i te ’ō vine hō’ē ’ahuru akera, hō’ē ïa bato uaina e noa’a mai, ’e hō’ē ho’i huero homera ra, ta’ihō’ē ïa epha e noa’a mai.

11 ’Auē ho’i te feiā e ara ’oi’oi i te po’ipo’i, i te tītaura’a i te ’ava ta’ero, ’e te tāmau-noa-ra’a ē tae atu i te pō, ’ia ta’ero rātou i te uaina !

12 ’E te kinura, ’e te nabala, ’e te tophe, ’e te helila, ’e te uaina, tei tā rātou ïa mau fa’a’amu’a ; ’āre’a te ’ohipa a te Fatu ra, ’aore ïa rātou i ha’apa’o, ’e ’aore ato’a i feruri i te ’ohipa i ravehia e tōna nā rima.

13 Nō reira, ’ua tītī tō’u ra mau ta’ata nō te mea ’aita tō rātou e ’ite ; ’e ’ua pau tō rātou feiā mana i te pohe i te po’ia, ’e tō rātou pupu ta’ata, ’ua pohe ïa i te po’ihā.

14 Nō reira, ’ua fa’arahi hade iāna iho, ’e ’ua hāmama rahi i tōna vaha, ’aore e fāito ; ’e tei roto noa atu ra iāna tō rātou ra feiā mana, ’e tō rātou pupu ta’ata, ’e tō rātou feiā te’ote’o, ’e ’o ’oia ato’a ’o tē ’oa’oa ra.

15 ’E te ta’ata ri’i ra e tu’uhia ïa i raro, ’e te ta’ata rahi ra e fa’aha’eha’ahia ïa, ’e te mata o te ta’ata fa’ateitei ra e fa’aha’eha’ahia ïa i raro.

16 ’Āre’a te Fatu Sabaota ra e fa’ateiteihia i te parau mau nāna ra, ’e te Atua ho’i ’o tei mo’a ra e ha’amo’ahia ïa i roto i te parauti’a.

17 ’E i reira te mau fanau’a māmoe e ’amu haere noa ai, ’e nā te feiā ’e’ē e ’amu ha’apau roa i te mau vāhi ano o te feiā ha’aporia ra.

18 ’Auē ho’i rātou ’o tei ’ume i te mau ’ohipa ’ī’ino ma te taura faufa’a ’ore ra, ’e te hara ma te taura rahi pere’o’o ra ;

19 ’O tei parau ē : ’A vaiiho iāna ’ia ha’avitiviti ’e ’ia fa’a’oi’oi i tāna ’ohipa, ’ia ’ite atu tātou i te reira ; ’ia tupu vave ho’i te parau a Tei Mo’a i ’Īserā’ela nei ’e ’ia ha’afātata mai, ’e ’ia ’ite tātou i te reira.

20 ’Auē ho’i rātou ’o tei parau i te ’ino e maita’i, ’e te maita’i e ’ino, ’o tei parau i te pōiri e māramarama, ’e te māramarama e pōiri, ’e tei parau i te maramara e momona, ’e te momona e maramara.

21 ’Auē ho’i rātou ’o tei fa’ariro ia rātou iho ’ei mea ’aravihi i tō rātou iho hi’ora’a ’e ’ei mea ha’apa’o maita’i i tō rātou iho mana’ora’a !

22 ’Auē rātou ’o tei pūai i te inu uaina, ’e te feiā pūai i te ’āno’i i te ’ava pūai.

23 ’O tei fa’ati’amā i te feiā parauti’a ’ore nō te utu’a maita’i, ’e ’o tei fa’a’ore i te parauti’a o te ta’ata parauti’a ra !

24 Nō reira, mai te auahi e ha’apau i te ’aihere ra, e mai te auahi ura e ha’apau i te ota ra, e riro ato’a tō rātou a’a i te pē ra, ’e tō rātou mau pua e pe’e ïa i ni’a mai te repo puehu ra ; nō te mea ’ua fa’aru’e rātou i te ture a te Fatu Sabaota ra, ’e ’ua vahavaha i te parau a Tei Mo’a i ’Īserā’ela nei.

25 Nō reira, ’ua tupu te riri o te Fatu i tōna ra mau ta’ata, ’e ’ua fa’atoro ’oia i tōna rima i ni’a ia rātou, ’e ’ua tā’iri ihora ia rātou ; ’e ’ua rurutaina ihora te mau ’āivi ; ’e ’ua riro atu ra tō rātou mau tino mai te para i rotopū i te mau aroā ra. Nō teie mau mea ato’a ’aita tōna riri i fāriu ’ē, tē fa’atoro-noa-hia mai ra rā tōna rima.

26 ’E e fa’ati’a ’oia i te tahi reva nō te mau fenua i te ātea ’ē ra, ’e e hiohio ’oia ia rātou i te hope’a mai o te fenua ra ; ’E inaha, e haere mai ho’i rātou ma te pe’epe’e rahi ; ’e ’aore roa te hō’ē i rotopū ia rātou e rohirohi e ’aore ho’i e turori.

27 E ’aore roa ho’i e ti’aruhe ’e ’aore ato’a e ta’oto ; ’e ’aore te tātua e matara i tō rātou tau’upu, ’e ’aore ho’i te tāpe’a o tō rātou mau tia’a e mutu.

28 ’Ua ’oi tā rātou mau te’a, ’e ’ua ha’afefehia tā rātou mau fana ; e riro te mau mai’u’u o tā rātou mau pua’ahorofenua mai te ’ōfa’i ’arā ra, ’e tō rātou mau huira ra mai te pūāhiohio ïa, tō rātou ’ū’uru ra mai tō te liona ïa.

29 E ’ū’uru rātou mai te mau liona ’āpī ra ; ’oia ïa, e ’ū’uru rātou ma te haru i te tao’a, ’e ’a hōpoi ’ē atu ai, ’e e ’ore roa e noa’a fa’ahou mai.

30 ’E ’ia tae i taua mahana ra e ’ū’uru mai rātou ia rātou mai te haruru o te miti ra ; ’e mai te mea e hi’o atu rātou i raro i te repo ra, ’e inaha, e pōiri ’e te ’oto, ’e e ’ārehurehu ho’i te māramarama i roto i te mau ra’i.