1 I te matahiti i pohe ai te ari’i ra ’o Uzia, ’ua ’ite ato’a atu vau i te Fatu i te pārahira’a i ni’a i te terōno teitei ’e tei fa’ateiteihia ra, ’e ’ua ’ī ho’i te hiero i te hiti ’ahu roroa nōna ra.

2 Tē ti’a noa ra nā seraphi i ni’a a’e ; ta’iono o rātou ato’a ra pererau ; e piti ra ’ei tāpo’i ïa i tōna mata, ’e e piti ato’a ra ’ei tāpo’i ïa i tōna ’āvae, ’e e piti ato’a ra ’ei ma’uera’a ïa.

3 ’E ’ua pi’i ihora te tahi i te tahi, nā ’ō a’era : E mo’a, e mo’a, e mo’a, ’o te Fatu Sabaota ra ; ’ua ’ī te fenua ato’a nei i tōna ra hanahana.

4 ’Ua turorirori ihora nā pou o te ōpani i te reo nōna ’o tei pi’i ra ; ’e ’ua ’ī a’era ho’i te hiero i te au auahi.

5 ’Ua nā ’ō a’era ho’i au : ’Auē ho’i au nei ē, ’ua mou vau nei ; nō te mea e ta’ata vaha vi’ivi’i ho’i au ; ’e tei rotopū ho’i au i te mau ta’ata vaha vi’ivi’i ato’a i te pārahira’a ; ’e ’ua ’ite ho’i tō’u nei mata i te Ari’i, te Fatu Sabaota ra.

6 ’E ’ua ma’ue mai ra te hō’ē seraphi iā’u nei, ’e tei tōna rima te hō’ē ’ārahu ’ama, i ravehia mai e ana i te fa’ahohoni nō ni’a mai i te fata ra.

7 ’E ’ua tu’u mai ra ’oia i te reira i ni’a i tō’u vaha, ’e ’ua nā ’ō mai ra : Inaha, ’ua ū tō ’utu i teie ; ’e ’ua fa’ata’a-’ē-hia tā ’oe mau ’ohipa ’ī’ino, ’e ’ua fa’a’orehia tā ’oe ra hara.

8 ’Oia ato’a, ’ua fa’aro’o vau i te reo o te Fatu, i te nā-’ō-ra’a ē : ’O vai tā’u e tono, ’e ’o vai tē haere nō tātou ? ’E ’ua parau atu ra vau : Teie au ; ’a tono iā’u.

9 ’E ’ua nā ’ō mai ra ’oia : ’A haere ’e ’a fa’a’ite atu i teie nei feiā—’A fa’aro’o mai na ’outou, ’aita rā rātou i māramarama ; ’e ’a hi’o mai na ’outou, ’aita rā rātou i ’ite.

10 ’A ha’ame’ume’u i te ’ā’au o teie nei feiā, ’e ’a ’ōpani i tō rātou tari’a, ’e ’a ha’apō i tō rātou mata—’o te ’ite ho’i rātou i tō rātou mata, ’e ’o te fa’aro’o ho’i tō rātou tari’a, ’e ’o te māramarama ho’i tō rātou ’ā’au, ’e ’o te fa’afāriuhia mai ’e ’o tē fa’aorahia ho’i rātou.

11 ’E ’ua parau atu ra vau : E te Fatu, e aha te maorora’a ? ’E ’ua parau mai ra ’oia : ’Ia pau roa te mau ’oire ’e ’aita e ta’ata fa’ahou, ’e te mau fare ato’a ’aita e ta’ata toe, ’e ’ia ano roa te fenua ra ;

12 ’E ’ia hōpoi-’ē-roa-hia e te Fatu te ta’ata, ’e e tupu te fa’aru’era’a rahi i ni’a i te fenua nei.

13 ’Āre’a rā e toe ri’i noa mai te ’ahurura’a o te ta’ata, ’e e ho’i mai rātou, e pau ato’a rātou i te pohepohe, mai te rā’au ra te ale ’e te aluna ra, tē vai noa ra te ora i roto i tōna tumu ’a ma’iri noa ai tōna mau rau i raro ; ’e e riro ato’a te huero mo’a ’ei tumu nō taua fenua ra.