Te Buka Piti a Nephi

1 ’E i teienei, i muri a’era, ’ia fa’aoti a’era vau, ’o Nephi, i te ha’api’i atu i tō’u ra nā tua’ana, ’ua parau ato’a atu ra tō mātou metua tāne, ’o Lehi, i te mau mea e rave rahi ia rāua, ’e ’ua fa’a’ite fa’ahou atu ra i te mau mea rahi tā te Fatu i rave nō rāua, i te arata’ira’a mai ia rāua i rāpae i te fenua nō Ierusalema ra.

2 ’Ua parau atu ra ’oia ia rāua nō ni’a i tā rāua mau mārōra’a i ni’a i te moana, ’e i te aroha ho’i o te Atua i te fa’aorara’a ia rāua, i ’ore ai rāua i horomi’ihia e te moana ra.

3 ’E ’ua parau ato’a atu ra ’oia ia rāua nō ni’a i te fenua i fafauhia, ’o tei roa’a ia rāua—’e te aroha rahi o te Fatu ra, ’oia i fa’aara mai ia mātou ’ia ma’ue ’ē atu i te fenua ra nō Ierusalema.

4 Inaha ho’i, tē nā ’ō ra ’oia, ’ua ’ite au i te hō’ē ’ōrama, ’e i roto i te reira ’ua ’ite au ē ’ua ha’amouhia ’o Ierusalema ; ’e ’āhiri ho’i tātou i pārahi noa i Ierusalema, ’ua mou ato’a ïa tātou.

5 ’Āre’a rā, tē nā ’ō ra ’oia ē, noa atu ā tō tātou nei mau ’ati, ’ua roa’a ia tātou te hō’ē fenua i fafauhia, te hō’ē fenua i hau i te maita’i i te mau fenua ato’a ra ; te hō’ē fenua tā te Fatu te Atua i fafau mai iā’u ’ei fenua ’āi’a nō tō’u ra hua’ai. ’Oia ïa, ’ua fafau mai te Fatu i teie nei fenua iā’u, ’e nō tā’u mau tamari’i ē a muri noa atu, ’e nō rātou ato’a ho’i ’o tē arata’ihia mai mai te tahi atu ā mau fenua e te rima o te Fatu ra.

6 Nō reira, e tohu vau, ’o Lehi, mai te au i te mau fa’aurura’a a te Vārua i roto iā’u nei, e ’ore roa te hō’ē ta’ata e tae mai i teie nei fenua, maori rā ’o tē arata’ihia mai rātou e te rima o te Fatu.

7 Nō reira, ’ua ha’amo’ahia teie nei fenua nō rātou ’o tāna e arata’i mai. ’E mai te mea e tāvini rātou iāna mai te au i te mau fa’auera’a tāna i hōro’a mai, e riro ïa ’ei fenua ti’amā nō rātou ; ’e nō reira e ’ore roa rātou e topa i roto i te fa’atītīra’a ; ’e mai te mea ē, e fa’atītīhia rātou, nō tā rātou ïa mau ’ohipa ’ī’ino ; ’e ’ia rahi te ’ohipa ’ī’ino i te tupura’a, e ’anatemahia ïa te fenua nō rātou ; ’e i te parauti’a rā, e ha’amaita’ihia ïa ē a muri noa atu.

8 ’E inaha, e mea ti’a ’ia vai ’itea-’ore-hia teie nei fenua i te mau nūna’a ’ē ra ; inaha ho’i, ’o te apiapi te fenua i te mau nūna’a ’ē, ’e e ’ere ïa tātou i te fenua ’āi’a.

9 Nō reira, ’ua fāri’i au, ’o Lehi, i te hō’ē fafaura’a ’o tei nā ’ō mai ē, mai te mea e ha’apa’o rātou ’o tē arata’ihia mai e te Fatu te Atua mai te fenua nō Ierusalema mai, i tāna ra mau fa’auera’a, e manuia ïa rātou i ni’a i teie nei fenua ; ’e e fa’ata’a-’ē-hia atu rātou i te tahi atu mau nūna’a, ’ia vai noa teie nei fenua nō rātou iho. ’E ’ia ha’apa’o māite rātou i tāna ra mau fa’auera’a, e ha’amaita’ihia ïa rātou i ni’a i teie nei fenua, ’e ’aore roa ho’i ïa e ta’ata e hāmani ’ino mai ia rātou, ’e ’aore rā e rave ’ē atu i tō rātou ra fenua ’āi’a ; ’e e pārahi hau noa rātou ē a muri noa atu.

10 Inaha rā, ’ia tae i te tau e paruparu ai tō rātou fa’aro’o, i muri iho i tō rātou fāri’ira’a i te mau ha’amaita’ira’a e rave rahi nō ’ō mai i te rima o te Fatu ra—’e i fāri’i na ho’i i te ’ite nō ni’a i te hāmanira’a o te ao nei, ’e te mau ta’ata ato’a, ’e i te ’itera’a i te mau ’ohipa faufa’a rahi ’e te māere a te Fatu mai te hāmanira’a mai ā o te ao nei ; ’e i muri a’e ho’i i te fāri’ira’a i te mana nō te rave i te mau mea ato’a nā roto i te fa’aro’o ; ’e te fāri’ira’a i te mau fa’auera’a ato’a mai te mātāmua mai ā, ’e tō rātou arata’ira’ahia mai e tōna ra aroha fāito ’ore i teie fenua maita’i i fafauhia ra—inaha, tē parau nei au ē, ’ia tae i te mahana e pāto’i ai rātou i Tei Mo’a i ’Īserā’ela ra, i te Mesia mau ra, tō rātou Tāra’ehara ’e tō rātou Atua, inaha, tei ni’a ïa ia rātou te mau ha’avāra’a a te ta’ata tei roto iāna ra te parauti’a.

11 ’Oia ïa, e arata’i mai ’oia i te tahi atu mau nūna’a ia rātou ra, ’e e hōro’a atu ’oia i te mana ia rātou, ’e e rave ’ē atu ’oia i tō rātou ra fenua ’āi’a, ’e e ha’apurarahia rātou ’e e ha’amouhia ho’i.

12 ’Oia ïa, mai terā u’i ē tae atu i terā u’i e tupu te mau ha’amani’ira’a toto ’e te mau ’ati e rave rahi i rotopū ia rātou ; nō reira, e tā’u nā tamaiti, ’ua hina’aro vau ’ia ha’amana’o ’ōrua ; ’oia ïa, ’ua hina’aro vau ’ia fa’aro’o māite ’ōrua i tā’u nei mau parau.

13 ’A ara mai na ’ōrua ; ’a ara mai i te vare’a ta’oto rahi, ’oia ïa, i te vare’a ta’oto o hade ra, ’e ’a ueue atu i tenā mau fifi i tā’amuhia i ni’a ia ’ōrua na, ’oia ho’i te mau fifi i tā’amuhia i ni’a i te mau tamari’i a te ta’ata nei, ’e nō reira ’ua ’āfa’i-tītī-hia atu rātou i raro i te ’ābuso mure ’ore nō te mamae ’e te oto.

14 ’A ara ! ’E ’a ti’a mai na mai raro mai i te repo, ’e ’a fa’aro’o mai na i te mau parau a te hō’ē metua rurutaina, ’e ’ua fātata te mau melo o tōna tino i te tu’uhia i raro i te mēnema to’eto’e ’e te māniania ’ore ra, i te vāhi e ’ore roa e ti’a i te ta’ata ’ia ho’i mai i te ora nei ; ’e i roto i nā mahana ri’i e haere atu vau nā te ’ē’a e haerehia e tō te ao ato’a nei.

15 Inaha rā, nā te Fatu i fa’aora mai i tō’u vārua i hade ra ; ’ua ’ite atu vau i tōna ra hanahana, ’e ’ua ha’a’ati-noa-hia vau ē a muri noa atu e nā rima o tōna ra aroha.

16 ’E ’ua hina’aro vau ’ia ha’amana’o ’ōrua ’e ’ia ha’apa’o ho’i i te mau ture ’e te mau parau a te Fatu ra ; inaha, ’o tā tō’u vārua teie i onoono mai te mātāmua mai ā.

17 ’Ua teimaha ho’i tō’u nei ’ā’au i te ’oto i terā tau ’e terā tau, i mata’u ho’i au, nō te ’eta’eta o tō ’ōrua ’ā’au, ’o te fa’airi mai te Fatu ra o te Atua i te ’īra’a o tōna ra riri ’ū’ana i ni’a iho ia ’ōrua na, ’e ’a tāpū-’ē-hia ai ’e ’a ha’amouhia ai ’ōrua ē a muri noa atu.

18 ’E ’aore rā, ’o te tae mai te ’anatemara’a i ni’a iho ia ’ōrua nō te ārea e rave rahi mau u’i te maoro ; e ro’ohia ai ’ōrua i te tama’i, ’e te o’e, ’e e ’ino’inohia ai, ’e e arata’ihia ai i te hina’aro ’e te mana fa’atītī o te diabolo ra.

19 E au nā tamaiti ē, ’eiaha teie mau mea ’ia tae mai i ni’a iho ia ’ōrua, ’ia riro rā ’ōrua ’ei nā ta’ata mā’itihia ’e te herehia ho’i e te Fatu ra. Inaha rā, ’ia tupu tōna ra hina’aro ; e mea parauti’a tōna ato’a ra mau haere’a ē a muri noa atu.

20 ’E ’ua oti i te parauhia e ana ē : Mai te mea e ha’apa’o ’outou i tā’u nei mau fa’auera’a, e manuia ïa ’outou i ni’a i te fenua nei ; ’ia ’ore rā ’outou e ha’apa’o i tā’u nei mau fa’auera’a, e tāpū-’ē-hia ïa ’outou i tō’u nei aro.

21 ’E i teienei, ’ia ’oa’oa tō’u ’ā’au nei ia ’ōrua, ’e ’ia reva atu tō’u vārua mai te ao atu nei ma te poupou ia ’ōrua, ’e ’ia ’ore ho’i au ’ia ha’ama’irihia i raro i te mēnema ma te mihi ’e te ’oto, ’e tēnāna, ’a ti’a mai na mai raro mai i te repo, e au nā tamaiti ē, ’e ’a fa’ariro ia ’ōrua ’ei tāne mau, ’e ’a ’ōpua ma te mana’o hō’ē ’e te ’ā’au hō’ē, ’ia tāhō’ēhia i roto i te mau mea ato’a, ’ia ’ore ’ōrua ’ia tae i raro i te fa’atītīra’a.

22 ’Ia ’ore ’ōrua ’ia ’anatemahia i te ’anatemara’a rahi ; ’e ’oia ato’a, ’ia ’ore ’ōrua e fa’atae i te riri o te Atua parauti’a i ni’a iho ia ’ōrua, ē tae atu ai i te ha’amoura’a, ’oia ïa, i te ha’amoura’a mure ’ore o te vārua ’e te tino ato’a ho’i.

23 ’A ara, e tā’u nā tamaiti ; ’a ’ahu na i te ha’ana tama’i o te parauti’a. ’A ueue atu i te mau fifi i ruru’uhia ai ’ōrua na, ’e ’a haere mai i rāpae i te pōiri, ’e ’a ti’a mai i ni’a mai te repo mai.

24 ’Eiaha e mārō fa’ahou atu i tō ’ōrua teina, ’o tei ’ite i te mau mea hanahana, ’e tei ha’apa’o ho’i i te mau fa’auera’a a te Fatu mai te taime i fa’aru’e ai tātou i Ierusalema ; ’e ’o tei riro na ’ei mauha’a i roto i te rima o te Atua, nō te arata’ira’a mai ia tātou i te fenua i parauhia ra ; ’āhiri ’aita ’oia, ’ua pohe roa ïa tātou nō te po’ia i roto i te mēdēbara ra ; ’āre’a rā, i tītau ’ōrua i te taparahi iāna, ’oia ïa, ’ua fa’a’oroma’i ’oia i te ’ati e rave rahi nā roto ia ’ōrua na.

25 ’E tē mata’u rahi nei au ’e tē rurutaina nei ho’i, ’o te roa’a-fa’ahou-hia ’oia i te ’ati ia ’ōrua na ; inaha ho’i, i pari na ’ōrua iāna, i te nā-’ō-ra’a atu ē, ’ua tītau ’oia i te mana ’e te ha’amanara’a i ni’a ia ’ōrua ; ’ua ’ite rā vau ē, ’aita ’oia i tītau i te mana ’e te ha’amanara’a i ni’a ia ’ōrua, ’ua tītau rā ’oia i te hanahana o te Atua, ’e te ora mure ’ore ho’i nō ’ōrua.

26 ’E nō tāna ra parau pāpū ia ’ōrua, i amuamu ai ’ōrua. Tē parau mai na ’ōrua ē, i parau ’ū’ana mai na ’oia ; ’e te parau na ho’i ’ōrua ē, i riri nā ’oia ia ’ōrua ; inaha rā, te ’ū’ana o tāna ra parau, ’o te ’ū’ana ïa o te mana nō te parau a te Atua tei roto iāna ra ; ’e ’o tei parauhia e ’ōrua ē, e riri, ’o te parau mau ïa mai tei roto i te Atua ra ; ’aore i ti’a iāna i te tāpe’a iāna iho, ’ua fa’a’ite mata’u ’ore mai rā ’oia i tā ’ōrua mau ’ohipa ’ī’ino.

27 ’E e mea ti’a roa ’ia vai te mana o te Atua i roto iāna, ’ia ti’a iāna ’ia fa’aue atu ia ’ōrua ’e ’ia ha’apa’o ’ōrua e ti’a ai. Inaha rā, e ’ere ïa ’oia iho, ’o te Vārua rā ïa o te Fatu tei roto iāna, i hāmama ai tōna vaha nō te parau atu, ’e i ’ore ai i ti’a iāna i te tāpe’a i te reira.

28 ’E i teienei, e tā’u tamaiti e Lamana, ’e ’oia ato’a e Lemuela ’e e Samu, ’e tā’u ato’a mau tamaiti ’oia ho’i te mau tamaiti a Isema’ela, inaha, mai te mea e ha’apa’o ’outou i te mau parau a Nephi, e ’ore roa ïa ’outou e pohe. ’E mai te mea e ha’apa’o ’outou i tāna parau, e vaiiho ïa vau i te hō’ē ha’amaita’ira’a i ni’a ia ’outou, ’oia ïa, ’o tā’u ha’amaita’ira’a mātāmua.

29 ’Ia ’ore rā ’outou e fa’aro’o iāna, e rave ’ē atu ïa vau i tā’u ha’amaita’ira’a mātāmua, ’oia ïa, tā’u iho ha’amaita’ira’a, ’e e nīni’ihia te reira i ni’a iho iāna.

30 ’E i teienei, e Zorama, tē parau atu nei au ia ’oe na : Inaha, ’o te tāvini ’oe nō Labana ; ’āre’a rā ’ua arata’ihia mai ’oe mai te fenua nō Ierusalema mai, ’e ’ua ’ite au e hoa mau ’oe nō tā’u nei tamaiti, ’o Nephi, ē a muri noa atu.

31 Nō reira, nō tō ’oe ha’apa’o maita’i, e ha’amaita’ihia tō ’oe hua’ai ’e tōna ato’a ho’i hua’ai ; ’e e ora maoro rātou ma te manuia maita’i i ni’a i teie fenua nei ; ’e ’aita roa te hō’ē mea e fa’a’ino ’e ’aore rā e ha’ape’ape’a i tō rātou orara’a manuia maita’i i ni’a i teie fenua nei ē a muri noa atu, maori rā ’o te mau ’ohipa ’ī’ino i rotopū ia rātou.

32 Nō reira, mai te mea e ha’apa’o maita’i ’oe i te mau fa’auera’a a te Fatu, ’ua ha’amo’ahia ïa teie nei fenua e te Fatu ’ei ha’apūra’a nō tō ’oe ra hua’ai ’e te hua’ai ato’a ho’i o tā’u ra tamaiti.